Ainikien Armej ro Rekwojarjar ilo Raan Ko Āliktata
Raan eo Eaiboojojtata
Irooj ej kōjerbal okar in ļāmorōn ko an jema n̄an jipan̄ e ekōnono ippān baam̧le eo am.
Jema eo ejako, Claude Roy, ekar mej ilo 2015 eo, ejjab to ālkin an kar peptaij. Ilo iien in, jinō, ro jeiū im jatū, im n̄a kem kar ro uwaan Kabun̄ in ilo jet iien, ak iumin elōn̄ iiō ko, jema ekar pen ilo an jab ikdeelel in kobatok.
Ālkin jet iien, ekar ba, “būruō ekar penļo̧k, im iaar matōrtōr ke ajri ro nejū im jibū rej lotok eō im kar kōņaan kōmakeļo̧k eō make jān baam̧le eo aō. En̄jake nana ko rekar eddōkļo̧k ilo m̧weo im̧ō, im jemjerā eo aō ippān kōrā eo paleō ekar m̧ōjņoļo̧k.”
Ilo iien in, ekar jino kappukot baam̧le eo an jān Canada, ro raar bwijjin armij ro an Mi’kmaq im Huron-Wendat Ālkin an kar tōparļo̧k jukjuk in pād eo an Mi’kmaq ijo epaake jikin eo ekar rittoļo̧k ie, kar karuwaneneiki n̄an juon powwow, juon ceremony an Native American ro.
Ilo jotenin powwow eo, juon irooj eutiej ekar kōpeļo̧k pein im kajjitōk bwe ajiri ro ren itok n̄an ippān bwe en maron̄ kōjeraam̧m̧an er. Men eo ekar waļo̧k ekar kwaļo̧k kōn aorōk in baam̧le im ro bwijjid im ekar kalel jema āinwōt juon jouruur.
Ilo iien eo, ekar ba, “Ij loe an baam̧le eo aō erļo̧ke peier n̄an n̄a ak ij jitļo̧k jen er. Ikar obrak kōn būrom̧ōj eo epen kōmeļeļeki āinwōt n̄e būruō ej itipdikdik. Ikar jeļā ilo iien eo ke Irooj ekar kōjerbal naan ko an bwij eo an ro jibū im jim̧m̧aō n̄an kapidodoklo̧k būruō. Ikar jeļā ke ij aikuj kar oktakļo̧k n̄an Jemedwōj Ilan̄ im karpen e jōrrāān eo ikar kōm̧m̧ane n̄an baam̧le eo aō.”
Baba ekar jino kōm̧m̧an aenōm̧m̧an ilo baam̧le eo am, ilo an kar kajjitōk jeorļo̧k bōd jān kajjojo ro uwaan baam̧le eo. Kōn waanjon̄ak eo an kōrā eo pāleen im ajiri ro nejin, ekar jino jar im riiti Bōk in Mormon eo. Ālkin an kar riti elōn̄ bwebwenato ko kōn jikin eo ilo Amedka, ekar en̄jake an epaakeļo̧k Bok in Mormon eo. M̧ool eo an ekar allikar n̄an eilo wōt iien eo.
“Baam̧le eo aō kar jepool eō ke ij peptaij n̄an juon uwaan Kabun̄ eo an Jisōs Kraist im Armej ro Rekwojarjar ilo Raan Ko Āliktata,” ekar ba. “Kar raan eo eaiboojojtata ilo mour eo aō! Ij kam̧ool kōn kajoor eo an waanjon̄ak in iakwe. Iumin 36 iiō ko, kōrā eo ippā ekar dāpij wōt tōmak eo an im kar waanjon̄ak āinwōt Kraist n̄an eō, men̄e būruō ekar pen. Innem, juon weekend ear ukot aolep kain n̄an n̄a.”
Bwebwenato eo an jema ej kakeememej kōj ilo aiboojoj ke “pein tūriam̧okake rej erļo̧k n̄an [kōj]” pein Rilo̧mo̧o̧r, im n̄e jej ukweļo̧k, E enaaj bōk kōj Ippān (lale Alma 5:33).