M̧ōņōņō in Kuk tok

Ippānļo̧k Em̧m̧aan ro rejitōnbōro ippa ilo Būreejtōnji eo Kein Kajuon im Doulul eo an Jon̄oulruo Rijjilōk ro, kemij kean̄: “Kabun̄ in ej emjak ilo mour in ewānōk an ejm̧aan eo, Jisōs Kraist, im ilo Pinmuur eo ejjeļo̧k jem̧ļo̧kin im Jerkakpeje eo em̧ool. … E ej karuwaineneik kōj aolep n̄an itok n̄an E im Kabun̄ eo An, n̄an bōk Jetōb Kwojarjar, kain̄i ko an lo̧mo̧o̧r, im bōk lan̄lōn̄ eo ejjeļo̧k jem̧ļo̧kin.”

Kōnke Jepļaaktok eo ej wōnm̧aanlo̧k wōt ilo an itok wōt revelesōn, “Ñan jerbal an iien ko re jejjet, bwe En kobaik men ko otemjej ilo Kraist,men ko i lan̄, im men ko i laļ’ (Epesōs 1:10).”

“Men ko otemjej” ekoba jiip ko An. Rilo̧mo̧o̧r eo ej kūr kōj n̄an likūt nana ko an laļin im kuk tok Ippān. E kōņaan bwe jiip ko An ren meram eo ej romaak, ilo aer kōm̧m̧ane juon jon̄ak n̄an aolepen laļin ilo aer kejōkļo̧kjen kōn mour an m̧oolin rikaļoor ro, ekobaan aer en̄jake lan̄lōn̄ eo em̧ool ilo aer mije Rilo̧mo̧o̧r ilo mour ko aer.

Jej kuktok ippān Rilo̧mo̧o̧r eo ilo ad itok n̄an E (lale Matu 11:28) ilo ad kōjerbal tōmak n̄an ukweļo̧k, peptaij ilo Kabun̄ eo An, im bōk mennin letok eo an Jetōb Kwojarjar.

Jej kuk tok ippān Rilo̧mo̧o̧r eo ilo ad en̄jaake kōmour eo ilo jetōb im ej itok jān bōk kwojkwoj eo, kam̧ool bwe jej m̧ōņōņō in bōk Etan iood, keememej E aolep iien, im kōjpārok kien ko An (lale Katak im Bujen Ko 20:77, 79).

Jej kuk tok ippān Rilo̧mo̧o̧r ilo ad kobrak raan in mour ko ad kajjojo kōn naan ko an im m̧ool eo, ekoba katak ko an rikanaan, rilolo, im ri bōk revelesōn ro An.

Jej kuk tok ippān Rilo̧mo̧o̧r eo ilo ad kōkm̧anm̧anļo̧k jeļā eo ad n̄an ron̄jake E, mour kwojarjar n̄an unoojdikdik ko an Jetōb Kwojarjar.

Jej kuk tok ippān Rilo̧mo̧o̧r eo ilo ad kōkajoorļo̧k oktak eo ad, kōļapļo̧k ad tōmak, kam̧wilaļļo̧k ad bujen rikaļoor, ļo̧o̧r waanjon̄ak eo An, im kajjieon̄ em̧m̧anļo̧k kajjojo raan.

Jej kuk tok ippān Rilo̧mo̧o̧r eo ilo ad kōm̧m̧ani bujen im kain̄i ko rekwojarjar ilo tampeļ.

Jej kuk tok ippān Rilo̧mo̧o̧r eo ilo ad leļo̧k/ajjeļo̧k kōj make n̄an kijenmej im peran “n̄an aolep men ko Irooj ej lo ekkar n̄an dood ņa [iood]” (Mosaia 3:19).

Āliktata, jej kuk tok ippān Rilo̧mo̧o̧r eo ilo ad katakin im kam̧ool kōn E, karuwanene baam̧le ko ad, ro m̧ōttad, im ro riturud n̄an kuk tok ippād n̄an “meram eo im mour eo an laļ, im kōjatdikdik an laļin.”

N̄e jej itok ippān doon āinwōt ro uwaan Kabun̄ eo an Jisōs Kraist im Armej ro Rekwojarjar ilo Raan Ko Āliktata, jej deļōn̄e juon jemjera im m̧ōttā eo ippād doon. Jej reejtak, katakin, im kotak doon. Jej kajjieon̄, ilo naan ko an Rilo̧mo̧o̧r eo, bwe jen “juon wōt” (Jon 17:21; bar lale Katak im Bujen Ko 38:27) im n̄an “yokwe doon;” (Jon 13:34).

Būreejtōn Dallin H. Oaks, Rikakpilōklōk eo Kein Kajuon ilo Būreejtōnji eo Kein Kajuon, ekar katakin, “Pād ilo jikin jar ej letok n̄an kōj kajoor im elapļo̧k tōmak eo ej itok jān ippān doon ippān ro rej tōmak im kabun̄-jar ippān ro rej barāinwot kakkōt n̄an ped wōt ilo ial in bujen in im em̧m̧anļo̧k āinwōt rikaloor an Kraist.”

Ilo Kabun̄ in jej bōk ad kakije im bar kōkāāl. Jej lo kain̄i ko im kajoor eo an priesthood n̄an jerbale. Jej lo m̧ool eo em̧ōj an jepļaaktok, katak ko rōm̧ool, im revelesōn an juon make. Jej lo pā ko rej karuwanene, bōro ko rej kaenōm̧m̧an, im ainikien kōkajoor ko. Jej lo iien em̧m̧an ko n̄an mour kōn kien ko ruo raurōk (lale Mark 12:30–31).

Em̧ōj an Irooj kakōl kōj bwe “rikōjdat ekoba.” (Katak im Bujen Ko 38:12). N̄an kejparok baam̧le ko ad jān im̧we eo an Setan, ad kabun̄jar ippān doon āinwōt Armij ro rekwojarjar eaorōkļo̧k wōt.

“Bōro-kuk,” Rikanaan Joseph Smith eaar katakin, ej “juon kajoor.”

Rikanaan Josep Smith eaar bar ba, “Raan eo em̧ōkaj n̄an jepļaaktok eo an aolep menotemjej im renaaj kūrm̧ool, ko im aolep rikanaan ro rekwojarjar raar kanaan kaki, em̧ool n̄an kuk tok eo an m̧weo imōn Israel.” Juon iaan ro raar kanaan kar Jeremaia ilo Kallim̧ur M̧okta:

“Kōn men in, lo, raan ko rej itok, Jeova ej ba, im re ban bar ba, ‘Āinwōt Jeova ej mour Eo ear kadiwōjḷọk ro nejin Israel jān āne in Ijipt;

“Ak, Āinwōt Jeova ej mour Eo ear kadiwōjtok ro nejin Israel jān āne eo ean̄ im jān aolep āne ko Ear joļo̧k er ie, im Inaaj kajepļaak er n̄an āne eo aer eo Iar leļo̧k n̄an ro jem̧aer” (Jeremaia 16:14–15).

Rikanaan Josep eaar wōnm̧aanļo̧k im kean̄, “Kōj armij ro raorōk im Anij eaar kāālet n̄an boktok aiboojoj eo an Raan ko āliktata … iien eo Armij ro rekwojarjar an Anij renaaj kuk tok ippān doon jān aolepen laļ, baam̧le ko, im armij, im kajin ko.”

N̄an kadedeļo̧k jerbal eo, “Inaaj kūrtok elōn̄ ri eo̧n̄ōd ro, Jeova ej ba, im renaaj eo̧n̄ōde er; im ṃōjen, Inaaj kūrtok elōn̄ ri-kakidudu ro, im renaaj kapukot er ioon toļ otemjej im ioon bat otemjej im ilo ro̧n̄ in dekā ko” (Jeremaia 16:16).

Ro jeiū im jatū, āinwōt bujen Israel ilo raan ko āliktata—ro uwaan Kabun̄ eo an Jisōs Kraist im em̧ōj an jepļaaktok—kōj jej rieon̄od im rikakijen ro an Irooj. Kar kūr kōj n̄an aintok ro doon Irooj ar kāālet er jān aolep toļ, bat, im jikin kōppād ko. Kar kūr kōj n̄an leļo̧k n̄an ajiri ro nejin Anij iien em̧m̧an n̄an erom̧ ro renaaj bōk aolep men ko E kar kallim̧uri ajiri ro Nejin im rej tōmak. Jerbal eo eļap in jemaron̄ wūjlepļo̧k ie.

Jej kakūrm̧ool kūr in ekwojarjar ilo aintok Israel ilo jait ko ruo an rōn̄ōl eo—kwaļo̧k nuuj eo em̧m̧an an Jepļaaktok eo ippān ro jet, kappukot ro jibūd im jim̧m̧aad remej, im jerbale kain̄i ko n̄an er ilo tampeļ. Jej bar kakūrm̧ool kūr in ilo ad kwaļo̧k iakwe eo an Rilo̧mo̧o̧r eo ilo jerbal ko ad, waanjon̄ak ko ad, naan in kam̧ool ko ad, im karuwainene ko n̄an ro jet bwe ren kobatok ippād.

“Irooj ej tōl Jepļaaktok eo an gospel eo An im Kabun̄ eo An,” Būreejitōn Henry B. Eyring, Rikakpilōklōk eo Kein Karuo ilo Būreejtōnji eo Kein Kajuon eaar ba. “Ej etal im̧aadļo̧k. Ewānōk an jeļā kōn ilju im jekļaj. Ej karuwaineneik tok eok n̄an jerbal in. Ej kobawaj ippam̧.”

Ta eo ekar waļo̧k n̄an waj eo an Jim̧m̧a Nelson? Jejjo iiō remootļo̧k, Iaar leļo̧k n̄an ļaddik eo nejū. Āinwōt an kar itok n̄an n̄a, waj eo ej kio koneek e n̄an ro m̧okta jān e im kakeememej e kōn eddo eo an n̄an ro ineen.

Im āindein ej wōmm̧aanļo̧k wōt. Kajjojo epepen in bujen ko rej wōnm̧aanļo̧k wōt kōn jerbal eo an Irooj, kōm̧m̧ani ijo koņaer ilo kepooj laļin n̄an Itok eo eo kein karuo an Jisōs Kraist.

Jen kam̧m̧oolol kōn jeraam̧m̧an im lōke eo Irooj eaar likūt iood ilo ad kuk tok ippān Rilo̧mo̧o̧r eo, kuk tok ippān Rikwojarjar ro, im kuk tok ilo jerbal eo An.