“En̄iin Menin Letok Eo Am̧,” Liaona, Jānwōde 2025.
Ainikien Armej ro Rekwojarjar ilo Raan Ko Āliktata
En̄iin Menin Letok Eo Am̧
Ikar jar, “Jema Ilan̄,” “ta menin letok eo imaron̄ kōļapļo̧k im emaron̄ kōjeraam̧m̧an ro Nejim̧?”
Ke ej juon jiron̄, kar im̧we Yanina ekkar ikreleel n̄an jeļā bwe al ej juon menin letok emaron̄ kōjerbale n̄an kōjeraam̧m̧an ro jet. Tokelik, kar kāālet e bwe en juon iaan ro uwaan kurup in al eo jān aolepen laļin n̄an al ippān Tabernacle Choir eo ilo kweilo̧k eo eļap (pija eo kar pijaik ilo Salt Lake Tabernacle).
Ke Būreejtōn Gordon B. Hinckley (1910–2008) ekar loļo̧k Ecuador ilo 1999 eo. ikar ron̄ an ba, “Jabdewōt men eo kwoj kāālet in kōm̧m̧ane, kōmaat am̧ maron̄ n̄an kōm̧m̧ane ijo em̧m̧antata.”
Ke iaar ajri, iaar katak ke Anij e letok n̄an kōj menin letok ko im jemaron̄ kōjeraam̧m̧an ro jet kaki (lale Moronai 10:8–18). Ikar jar, “Jema Ilan̄,” “ta menin letok eo imaron̄ kōļapļo̧k ippa im emaron̄ kōjeraam̧m̧an ro Nejim̧?”
Ke ej 16 aō iiō, iaar jino ekkatak al jān wōt rōjan̄ eo an ritōl in jikuuļ in al eo ijo ij jokwe ie. “Elukun aiboojoj ainikiōm̧,” liin ekar ba.
Ke ri alooj ro rej kapokpok ālkin aō kar al, juon enaan ekar alikkar an itok n̄an ļōm̧ņak eo aō: “En̄iin menin letok eo am̧.” Iar jan̄ kōnke ekar uwaak jar eo aō. Ijoke, ilo laļ eo aō, epen kōm̧m̧an jāān in mour āinwōt juon rikōjan̄jan̄. Ak ikar jeļā ke Irooj ekar kepooj juon iaļ. Kōn menin, iaar wōnm̧anļo̧k wōt im ekkatak al, kappukot n̄an jon̄an eo em̧m̧antata imaron̄ in tōpare.
Ke ikar 19, kar letok n̄an eō jāān in jikuuļ n̄an ekkatak ilikin. Ijoke, jeraam̧m̧an in im ko jet āinwōt, raar jab tōprak. Ilo aō reilikļo̧k, imaron̄ lo bwe Irooj ekar kōņaan bwe in pād wōt ilo Ecuador.
Armij raar ba ibban kar tōprak ilju im jekļaj kōnke ejeļo̧k aō jeļāļo̧kjen jān bar juon laļ, jāān, ak juon et ebun̄bun̄. Ak iar jeļā ke ekar wōr an Anij karōk n̄an n̄a, kiiō iaar likūt tōļan eo aō ilo jerbal in jipan̄ ilo Kabun̄ in, ijo iaar ejaak kuwaer ko, tōl al, im kajjion̄ kareel ro jet n̄an kōļapļo̧k menin letok im tōļan ko aer.
Tokelik, ke kar letok aō jerbal ilo juon station in TV, ikar inepata kōn kapo ko im rej ekkeijel ilo jikin kompani ko an jikin kōm̧m̧an pija. Ak uaak in jar eo aō ekar ba, “Bōke jerbal in im kwaļo̧k ke komaron̄ juon ri al ilo am̧ jab kakure jon̄ak ko am̧.”
Ikar jerbal āinwōt juon rijipan̄ in television artistic production, āinwōt juon rijipan̄ tōl kuwaer n̄an Symphonic Choir of Guayaquil, im pād ilo poot eo an Ecuadoran House of Culture n̄an jikin ko ilo Guayas.
Ij kam̧ool ke jemaron̄ kakurm̧ool etōnak ko ad ilo ad jab kakure jon̄ak ko ad make. Rainin eta ebun̄bun̄ ilo aelōn̄ eo aō im ilo jerbal eo aō—kam̧m̧oolol n̄an kijejeto eo aō ilo mour kōn gospel eo im kōļapļo̧k tōļan ko aō Jemedwōj Ilan̄ ekar letok n̄an eō.
N̄e jej pokake ankilaan Jemed, men ko repen renaaj oktak im pidodo (lale Matu 19:26). Ijeļā ke E ej iakwe kōj im kōņaan bwe jen kōļapļo̧k tōļan ko ad n̄an kōjeraam̧m̧an ro jet.