“Jāān Ejjab Maron̄ Wiaik M̧ōņōņō, ak Kraist ej letok Lan̄lōn̄ Ejjeļo̧k Wōņāān,” Liahona, Jan. 2025.
Rūm̧m̧an Ded ro
Jāān Ejjab Maron̄ Wiaik M̧ōņōņō, ak Kraist ej letok Lan̄lōn̄ Ejjeļo̧k Wōņāān
Ke ikdeelel eo aō ilo jāān ekkar bōk jikin men ko raorōk ippa, ikar kile ke ij kāālet men ko an laļin m̧okta jān Jemedwōj Ilan̄.
Pija in rijeje eo jān Stephen Neilsen
Ilo aō kar rittoļo̧k, ekar bujin aō kōttōpar. Ikar lo armij ro detta wōt rej kōm̧m̧an jāān im lo tōprak jān social media. Ikar kōņaan bwe in baj āinwōt er.
Ke iaar jikuul ilo university im katak bwe in n̄a make, jāān ekar erom̧ men eo eaorōktata ippa. Men eo de eo ij ļōm̧nak e ej bwe in maron̄ tōprak n̄an jāān in jikuuļ ko n̄an jikuuļ, kakkoņkoņ jāān, im kōpopo n̄an jerbal eo aō āinwōt juon rijin̄a ilju im jekļaj.
Jon̄an social media ko aō raar obrak kōn enaan ko kōn ļap tōprak in jerbal, kōbajet, im jerbal dikdik ko jet n̄an jipan̄ eō wōr dem̧oļo̧k in jāān ippa. Ikar inepata ke n̄e ijjab bōk eļap iien im jeļā bwe in kōjpārok jāān ko aō, iban kar maron̄ ekkeke peū kōn jāān.
Ikar kaorōk manit in, ikar ļōm̧ņak enaaj kar kōm̧m̧an aō m̧ōņōņō im ļap aō tōprak. Ikar errā ilo ļōm̧nak eo aō n̄an mije jāān ilo aō jiron̄ eō make ke juon raan, n̄e enaj ļapļo̧k aō jāān, imaron̄ leļo̧k joortak n̄an jikin jipan̄ ko im inaj kar juon armij em̧m̧an ilo wāween eo.
Ikar jab jeļā ilo iien eo, ak ke ikdeelel eo aō ilo jāān ekar bōk jikin men ko raorōk ippa, ekar jino an jako m̧ōņōņō eo ilo mour eo aō. Ekar jino ļapļo̧k aō ebanban, eļaptata ņae ro im eļapļo̧k aer jāān.
Ikar jino kōņaan bwe en ļapļo̧k tōprak ko aō ilo social media, ilo jerbal eo aō, im bar ilo wāween an armij kalimjōk eō. Bōtaap āinwōt n̄e ilak kipeļ jeram̧m̧an, ij en̄jake an dikļo̧k aō tōprak—im eļapļo̧k aō kar etoļo̧k jān Jemedwōj Ilan̄.
Kile Em̧weikiik
Emaron̄ ālkin juon iiō in en̄jake rōt in, ikar ron̄jake juon kōnono jān Būreejtōn Dallin H. Oaks, Rikakpilōklōk eo Kein Kajuon ilo Būreejtōnji eo Kein Kajuon. Ikar en̄jake an būruō eddoļo̧k ke ij ron̄jake an kōmeļeļe jejjet in kain rōt armij ikar erom̧.
“N̄an rainin ewōr jet ro im rej ba er Rikurijtin ak eļapļo̧k aer reel kōn men ko an laļin—men ko rej rie mour ioon laļ ak jab najidik kōj n̄an mour indeeo.”
Ikar ļōm̧ņak imaron̄ kaorōk Anij im jāān ilo joun wōt iien, ak naan ko an Būreejtōn Oaks im ļōm̧ņak in ilo Matu 6:24 rekar kwaļo̧k m̧ool: Ejjeḷọk armej e maron̄ pokake ruo irooj; bwe enaaj kōjdate juon im yokwe eo juon; ak e naaj dāpij juon im kajekdọọn eo juon. Koṃ ban ri karijeran Anij im ṃweiuk.”
Ke ļōm̧ņak eo aō ekar mije m̧weiek ko, ikar lo bwe ekar penļo̧k aō ikdeelel ilo gospel in. Ikar jab meļeļe ekōjkan an etal n̄an jar im riiti jeje ko rekwojarjar jipan̄ eō ilo kōtōpar ko aō.
Ilo a wōnm̧anļo̧k ilo jeļāļo̧kjen im bwe jāān ippad kōtōpar ko rem̧m̧an, ekar ļap aō kaorōki. Ekar tar jān jon̄an aō ikdeelel. Ikar kile bwe enkar nana aō mour m̧ae iien ij ukōt kōlm̧enļo̧kjen eo aō.
Mije Ta eo Eaorōktata
Ikar jar n̄an Jemedwōj Ilan̄ im kajjitōk Ippān n̄e E maron̄ jipan̄ eō jino mije ta eo eaorōktata. Ikar jino riiti jeje ko rekwojarjar. Ke ij jino katak eoon ke im ij ļōm̧ņak em̧ōj aō kar riiti elōn̄ allen, bwebwenato kein ikili raar kōm̧ad eō. Ikar en̄jake an Jetōb Kwojarjar kōnono ippa.
Juon bwebwenato ear dāpdep ippa ej kōn likao eo em̧weie. Jisōs ear jiron̄e: “Eļan̄n̄e kwō kōņaan bwe kwōn weppān, kwōn ilo̧k im wiakaki men ko am̧, im leļo̧k n̄an ro rej jeram̧ōl, im enaaj wor m̧weiōm̧ i lan̄: im kwōn itok im ļoor eō” (Matu 19:21).
Ke ij riiti bwebwenato in ilo jeje ko rekwojarjar, iar en̄jake unoojdikdik bwe in bōjrak im ļōm̧ņak kōn wāween an jerbal n̄an n̄a. Ilo jinoun, āinwōt ejjeļo̧k men en āinwōt juon ikōtaam̧ro likao in em̧weie—em̧ōj an m̧weie kadede im ekar jab kōņaan aje m̧weie ko an. N̄a, ilo bar juon wāween, ikar jab m̧weie, im ikar ļōm̧ņak kijejeto ko aō n̄an kōļapļo̧k jāān ko aō rekar jim̧we.
Ak ejjab to iar kile ke enkar pen aō aji jāān ko aō, āinwōt likao in em̧weie. Eļaptata kōnke ikar m̧ōjņo ilo joļo̧k kōttōpar eo aō n̄an bōk eļapļo̧k jāān.
Ikar kōņaan likūt Jemedwōj Ilan̄ m̧okta ilo mour eo aō. Iaar kāālet in kōpeļo̧k jōņōļ eo aō, je ta ko ij en̄jaki, im reilikļo̧k n̄an jeje ko jet aō m̧oktaļo̧k n̄an kajjieon̄ meļeleļo̧k ta eo ekar jino ikdeelel eo aō.
Ke iaar kōm̧m̧ane menin, iar jino kile an men ko raorōk ippa bōd. Ke iar lo juon jeje, “Ij ļōm̧ņan ekōjkan aō bōk tōprak jān aolep men ijelo̧kin aō ļōm̧ņak kōn ekōjkan aō maron̄ em̧m̧anļo̧k ak jipan̄ ro jet.”
Eliktata, jān aō ekkatak jeje ko rekwojarjar, ron̄jake Jetōb, im jeje ilo jōņōļ, ikar jino oktak.
Lōke Anij m̧okta jān Jāān
Lukkun em̧m̧an en̄jake kallim̧ur eo ilo Jabōn Kōnnaan Ko 3:5–6
“Lōke Jeova kōn aolepen būruōm, im kwōn jab atartar ioon jeļāļo̧kjeņ eo am̧.
“Kwōn kwaļo̧k E ilo iaļ ko am̧ otem̧jeļo̧k, iņņām Enaaj ba kajjien iaļ ko am̧.”
Inaaj kajjieon̄ wōt kōļapļo̧k tōļan ko aō im kateō kōn jeļāļo̧kjen eo aō im jerbal in jin̄a eo aō. Kappukōt n̄an un̄n̄are peid make ilo jāān im kake aikuj ko ad make im baam̧le ko ad ej juon ikdeelel ejim̧we. Ijoke, jej aikuj kōkm̧anm̧an bwe kōtōpar ko ad ilo jeram̧m̧anim jāān reen aorōk ļo̧k jān jabdewōt.
Raan kein, ijjab kea n̄e inaaj bun̄bun̄ ak kōm̧m̧an eļap jāān jān jerbal ko aō. Em̧ōj aō jeļā ke mour ijo imaron̄ iakwe—im en̄jake iakwe jān—Jemedwōj Ilan̄ im Jisōs Kraist, baam̧le eo aō, im jin̄a ebwe n̄an n̄a. Ejako an pidodo aō illu kōn aikuj ko jab kōtmāni ak tōprak ko an armij ro jet. Ijelo̧kin, emaat aō n̄an gospel eo an Jisōs Kraist kōnke ej kōjpārok eō jān mour in jua, jekmenņae, im ikutkut pok. Im n̄e ij jino meloklok, jeje ko rekwojarjar im rikaanan ro rej kakeememej eō aolep iien kōn ta eo eaorōktata ilo mour in.
Būreejtōn Russell M. Nelson ekar katakin:
“Ilo an laļin ba bwe kajoor, m̧weie ko, bun̄bun̄ ko, im kam̧ōņōņō ko an kanniōk rej bōktok m̧ōņōņō, rejjab! Rejjab maron̄!
“M̧ool eo ej bwe eļap jerbal n̄an kappukot m̧ōņōņō ijo kwojjab maron̄ loe ie! Ijoke, n̄e kwonaaj mour ippān Jisōs Kraist im kōm̧m̧ani jerbal in jetōb ko aikuji n̄an anjo̧ ioon laļin, E, im E make, ewōr kajoor ippen n̄an kotak eok jen anjiwiwi in laļin.”
Anjo̧ jān Laļ
Oktak ko Rilo̧mo̧o̧r eo ekar jipan̄ eō kōm̧m̧ani ilo jetōb eo aō raar kabwilōn̄lōn̄. Ijeļā kiiō bwe jeram̧m̧an ko ad ejjab n̄an kwaļo̧k ewi jon̄an aō em̧m̧an ak kobaik aorōku n̄an jon̄an jāān eo ij kōm̧m̧ane; ak ej n̄an en̄jake kam̧m̧oolol kōn iien em̧m̧an eo n̄an pād ilo mour in im lo kōjeraam̧m̧an ko rem̧m̧an Jemedwōj Ilan̄ ej litok aolep iien n̄an n̄a. Ijeļā ke n̄e inaj likūt E m̧okta, aolep men renaaj pād ijoko jikier.
Ij kōketak eok n̄an ļōm̧ņak kōn ta ko raorōk ippam ilo mour in. Kwoj mije ke m̧weiek im ta eo ejjeļo̧k ippam? Ak kwoj mije ke ta eo eaorōktata? M̧o̧ol n̄an kwe make. Lale eļan̄n̄e kwoj aikuj ukukōt iaļ eo am̧ ļo̧k n̄an Rilo̧mo̧o̧r.
N̄e konaj kōm̧m̧ane kāālet in, konaaj lo eļapļo̧k m̧ōņōņō jān jon̄an eo kwoj kōtmene.