Kūr in Mijen eo Aō ekar ke Juon Bōd?

Ruo iiō tokelik jān aō jino degree in ekkatak kōn jāān im bōnbōn, ekar wōr juon unoojdikdik ekajoor n̄an etal im mijen. Ikar kāālet in jerbal, jekdoon n̄e imaron̄ kar kakure jet iaan credit ko aō ilo college im ikar aikuj in buki kajjojo iien.

Jidik iien tokelik, ke ij riiti kūr in mijen eo aō n̄an Utah Salt Lake City Central Mission, iien eo ear kabwilōn̄lōn̄. Ikar jab jeļā kajeen jabdewōt im rekar jerbal ilo Salt Lake City. Ibawōt ke bōlen ekar bōd kūr eo ikar kōpeļo̧ke. Ke ij tōpar tok Salt Lake City, ikar en̄jake an aolep men ikar jeļā jakoļo̧k. Ikar lo aō make bajekōļ ilo jiņo ilo aō jab jeļā elmen erom̧ juon mijenede. Kōn m̧anit im mejatoto eo an make, iar en̄jake āinwōt n̄e Salt Lake City etoļo̧ktata jān South Africa.

Ilo eria eo aō jinountata, komro mijenede eo m̧ōtta kar loļo̧k juon membōr etan in Chris Ruppel n̄an kejota. Ekar kajjitōk n̄e komro jeļā kōn kōjan̄jan̄. Mijenede eo m̧ōtta ekar ba ijeļā piano im al, innem iaar al juon al n̄an baam̧le eo. Innem juon men eaiboojoj ekar bōk jikin. Brother Ruppel ekar kalimjōk eō im ba, “Elder Vizzini, eļan̄n̄e kwoj al rōt in, kwonaaj juon mijenede eo eļap an tōprak.” Ikar ļōm̧ņak elukun em̧m̧an ļōm̧ņak eo an ak iar jab lukkun leļo̧k aō n̄an e.

Jejjo allōn̄ tokelik, ippānļo̧k Brother Ruppel, iaar jipan̄ ejaake juon iien nokon in kōjan̄jan̄ an mijenede. Ilo aolep eria ko aō iar jerbal ie tokelik, kem kar kōm̧m̧ane ejja kain nokon in wōt. Elōn̄ armij raar bōk ko̧ņaer ippam, jān membōr ro an stake n̄an rikōjan̄jan̄ ro rebun̄bun̄ ilo eria eo im membōr ro jen kabun̄ ko jet. Kem kar katakin kōn Rilo̧mo̧o̧r ilo al n̄an armij ro im renkar jab kōņaan jijōt im ron̄jake katak ko am. Ikar katak ke kōjan̄jan̄ emaron̄ un̄ur rijerata im rim̧weie jim̧or, rimāletlet im ro rejjab.

Mijen eo aō ekar katakin eō ke imaron̄ kōm̧m̧ani men ko repen. Ke ij jerbal ilo juon eria etoļo̧k jān ijo jikū, ikar katak bwe aolep rej nejin Anij. Em̧ōj aō lo kabwilōn̄lōn̄ ko ilo mour ko an armij ijo rājet in laļin ilo Utah, im em̧ōj aō bar loi ijin ilo South Africa. Ijeļā bwe eļan̄n̄e ewōr ad tōmak, kabwilōn̄lōn̄ ko renaj waļo̧k ilo mour ko ad kajjojo. (lale Mormon 9:15–21).