Kōjeraam̧m̧an ko ko an Jepļaaktok eo

Iiō ko ļo̧k, iaar en̄jake āinwōt kar Josep eo edik. Ikar pok kōn “tariņae in naan ko im lim̧otak in ļōmņak kein” (Josep Smith—Bwebwenato 1:10) rej itok jān kabun̄ ko rellōn̄ ilo Fiji. Ke ij iioon mijenede ro, ekar lōn̄ aō kajjitōk. Jet rekōn kajirere ke n̄a erum̧ij aō katak kōnke ebōk rualitōk iiō in aō iaron̄ron̄e Kabun̄ in. Oktak eo aō ekar ijino jān meļeļe eo aō kōn etan Kabun̄ in.

Ilo tōre in jerbal in karejar eo an ilo mour in , Jisōs Kraist ekar kajutak Kabun̄ eo An. Ium̧win jet iien ko, katak im kajoor eo an priesthood eo an Kabun̄ eo An raar jako. Ilo raan kein ad, Jisōs Kraist ekar kōjepļaaktok kōn Rikanaan Josep Smith ejja Kabun̄ eo wōt ekar kajutake ke E ekar mour ioon laļin (lale Laajrak in Tōmak ko 1:6) E ekar bar kakien kōn revelesōn, “Bwe āindein naaj etan Kabun̄ eo Aō ilo raan ko āliktata, em̧ool Kabun̄ eo an Jisōs Kraist im Armej ro Rekwojarjar ilo Raan Ko Āliktata” (Katak im Bujen Ko 115:4).

Kabun̄ in ej bōk etan Jisōs Kraist kōnke An Kabun̄ in! Ālkin rualitōk iiō ko, m̧ool in ekar kobrak aō ļōmņak im būruō. Ikar peptaij ke ekar 27 aō iiō, im ejjab to kar kūr eō bwe in juon rikakpilōklōk an būreejtōnji eo an Likao ro ilo ward eo im juon rikaki in jemenere in jibbon̄. Ilo iaļ eo aō, naan in kam̧ool eo aō ekar eddōkļo̧k.

Mour eo aō ekar oktak ke iaar katakin jemenere, etal n̄an kweilo̧k in kwojkwoj, im ron̄jake kweilo̧k eo eļap. Iaar bar en̄jake meoeo, kaenōm̧m̧an, im im̧we eo an Jetōb ilo aō riiti Bok in Mormon—juon kam̧ool jej jibwe im loe kōn Jepļaaktok eo eo im kūr in kanaan eo an Josep Smith.

Ke Irooj ekar kūr Josep, “im kar kōnono n̄an e jān lan̄, im kar leļo̧k n̄an e kien ko” (Katak im Bujen Ko 1:17), E ekar kwaļo̧k bwe E ej “ej kōkejakļo̧kjeņ armej raņ im kūr er n̄an jerbal eo ekwōjarjar An ilo tōre in im epepen in, barāinwōt ilo epepen ko etto” im bwe “E ej juon wōt Anij inne, rainin, im indeeo” (Katak im Bujen Ko 20:11–12).

Jepļaaktok eo ekar jino ippan Josep im ej wōnm̧aanļo̧k rainin. Āinwōt Armej ro rekwojarjar, kar kūr kōj n̄an kōnono etan Rilo̧mo̧o̧r eo “Bwe tōmak … en maron̄ ļapļo̧k ilo laļ,” An “bujen ejjeļo̧k jem̧ļo̧kin en maron̄ jutak,” im “tarlep in gospel eo [An] maron̄ in kean̄ kake jān ro rem̧ōjņo̧ im ļam waan n̄an jem̧ļo̧k ko an laļ,” (Katak im Bujen Ko 1:21–23). Jej jeraam̧m̧an n̄an maron̄ jipan̄ kalōk Kabun̄ in an im kepooj laļin n̄an raan eo im Jisōs Kraist enaaj roktok.

Kam̧m̧oolol kōn Rikanaan Josep

Juon iiō ālkin peptaij eo aō, lio ippa, Anita, im n̄a kar etal n̄an Nuku’alofa Tonga Temple n̄an sil indeeo ejjeļo̧k jem̧ļo̧kin. Kam̧ool eo aō kōn Jepļaaktok eo ekar kōm̧m̧an bwe etal n̄an tampeļ en wōr meļeļein. Gospel eo an Jisōs Kraist em̧oj an jepļaaktok m̧ool meļeļein eļap unin! Būruō ekar obrak kōn kam̧m̧oolol kōn kōjeraam̧m̧n ko ekar boktok n̄an n̄a im baam̧le eo aō.

Kōjeraam̧m̧an kein em̧ōj aer itok n̄an laļin jān “Josep Smith, Rikanaan eo im Rilolo eo an Irooj, [eo] ekkar kōm̧m̧an eļapļo̧k, ijjello̧kin wōt Jisōs, n̄an lo̧mo̧o̧r eo an armej raņ ilo laļ in, jān bar jabdewōt armej ekar mour ioon” (Katak im Bujen Ko 135:3). Jej aikuj kam̧m̧oolol kōn—im jab pilo jān—ta ko kar litok n̄an kōj jān rikanaan eo an epepen in rikanaan rein āliktata.

Jān Josep, jej meļeļe kōn bujen jemjerā eo ad ippān Jemedwōj Ilan̄ im Jisōs Kraist. Ewōr ippād priesthood eo em̧ōj kōjepļaaktok im kain̄i im bujen ko. Ilo en̄jake eo an Josep ilo Bukwin Wōjke Ekwojarjar eo, jej katak bwe em̧ool m̧okta jān an Anij kwaļo̧k kadkad in Nejin, Jisōs Kraist, ekar kūr etan Josep (lale Joseph Smith—Bwebwenato 1:17). E jeļā wōn kōj kōn etad. Im ejja ke ej kōpeļo̧k lan̄ im uwaake jar eo epidodo im m̧ool an juon ļaddik eo 14 iiō drettan, E enaaj bar uaake jar ko ad ilo Ankilaan, wāween An, iien eo An, jekdoon ta iiō ta eo ad. M̧ool kein rej pād ilo m̧wilaļ in jetōb eo aō. N̄aij kam̧ool bwe rem̧ool.

Ij kōjatdikdik bwe ij juon eo im ej kōm̧m̧an em̧m̧an ilo laļ in. Eļan̄n̄e ij, innem Josep ekar kōm̧m̧ane eļap ijo ko̧ņaan n̄an menin. Mour eo aō eban kar ta eo rainin, iban kar juon ļeo pālele im baba eo im ij āinwōt in, im iban kar m̧ōņōņō in wōt in kar rainin ilo an jako gospel eo kar kōjepļaaktok imRikanaan Josep ekar ajeļo̧k mour eo an n̄an bōktok n̄an laļ in. Gospel eo ej letok n̄an eō meram im kōjatdikdik. Kōn wōt menin, inaaj kam̧m̧ool n̄an indeeo n̄an Rikanaan Josep.

Ij ineek juon kape in Bok in Mormon ippa jabdewōt jikin ij etal, kōjatdikdik ke imaron̄ leļo̧k n̄an juon im kwaļo̧k kadkad in gospel eo an Jisōs Kraist n̄an er. Em̧ōj aō ajej bukwi kape ko aolepen laļin. Ij iakwe kwaļo̧k ennaan eo an Jepļaaktok eo—aolep iien, aolep jikin.

Mennin eļap an m̧ool n̄e ij katakin im kam̧ool n̄an ajiri ro nejim kobalōk ippān Anita ilowaan m̧weo im̧om. Leddik eo nejim ej jerbale juon mijen kiiō ilo New York City, USA. Kem kar jiron̄ e, “Etal im kam̧ool kōn Rilo̧mo̧o̧r eo ilo ijjo koj pād ie ilo laļ in. M̧am̧a im Baba eo am̧ renaaj kōm̧m̧ane ejja menin ijo kemij pād ie laļ in.” Em̧m̧an ippam kōnanik doon kōn jerbal ko am. Im kiiō, ewōr juon jibum leddik emen an iiō. Kōjatdikdik im kōttōpar eo an būruō ej bwe liin enaaj ikutkut an keememej an Jim̧m̧a eo an kam̧ool kōn Rilo̧mo̧o̧r im gospel eo An.

Kōj aolep jemaron̄ kam̧ool kōn kōjeraam̧m̧an ko an gospel eo em̧ōj an jepļaaktok—aolep iien, aolep jikin—ilo ad mour juon waanjon̄ak in mour āinwōt rikaļo̧o̧r ro an Jepļaaktok eo. Jemaron̄ kwaļo̧k kōn Bok in Mormon: Bar Juon Kallim̧ur kōn Jisōs Kraist. Im jemaro̧n̄ kam̧ool bwe Jisōs Kraist eaar kōjepļaaktok tarlep in gospel eo An im E ej tōl Kabun̄ eo An rainin. Būreejtōn Russell M. Nelson ekar katakin bwe “revelesōn eo ej wōnm̧aanļo̧k wōt im itok jān Irooj ilo iien in im jerbal in ej wōnm̧aanļo̧k wōt kōn jepļaaktok eo.” Ij kam̧ool bwe ej wōnm̧anļo̧k wōt ilo ļain eo ejamin rup an kii ko an priesthood bwe rikanaan, rilolo, rirevelesōn rej kabjeri, ro rej kōketak, tōl, im jipan̄ kōj liap e kōj make n̄an Rilo̧mo̧o̧r Jisōs Kraist.

En̄iin ej kam̧ool im naan in kam̧ool eo aō. Inaaj m̧ōņōņō in kwaļo̧k aolep iien im jamin pere.