“Ururingakina Bwa Bukin Tera I Maiuakina te Euangkerio,” Riaona, Tianuare 2025.
Kairake n Ikawai
Ururingakina Bwa Bukin Tera I Maiuakina te Euangkerio
Kauringai au “bukin tera” e kaungaai ni kaaniai riki nakon te tia Kamaiu ao n iriiria rinanon au kouru n tamnei.
E kona n mangaongao maiu n taai tabebetai, ma I tatangira te karaunano ae I namakinna ngkana I nakonako nakon te tabo n taromauri. Bon teuana bukina ae I tatangira iai te nako n te taromauri!
Ao ngkana i uringnga bwa tera ae I tatangira iai te euangkerio—n aron namakinan te Tamnei ae Raoiroi, te katooto—I karekea riki te kukurei n nano n iriiria ma anuau n tamnei, n aron te nanakon te tembora, warekan au boki aika a tabu, ao n tataro nakon Tamara are i Karawa.
Ibukina bwa e kona n rangi n katabetabe te maiu, e kona n bebeete mwanuokinan bwaai aika a bebeete ake ti tatangiria. Ma i teimatoa n kakauringai bukin tera I maiuakina ao n tatangira ana euangkerio Iesu Kristo e buokai n kabooua au kouru n tamnei are e na uotai ni kaaniai ma Tamara are i Karawa.
Katean Kouru n Tamnei Aika a Boou
N moan ririki n tatabeua nako, I tatangiria n tuoa au kouru n tamnei man korean bwaai aika a na ibuobuoki ni Katoa Ririki. Ngkana ko karaoa naba teutana tirobaeam ao n iangoa arona bwa ko na kanga n kanakoaraoa am reitaki ma Kristo i nanon te ririki ae boou aei, titirakiniko te titiraki aei:
“Bukin tera I tangira ana euangkerio Iesu Kristo?”
E kabwarabwara Titita Ann M. Dibb, te Kauoman ni Kauntira ngkoa n te Beretitentii ni Kabuta n te Bootaki n Ataeinnaine bwa “e rikirake ara tangira ibukin te euangkerio ngkana ti rinanon ana tangira Tamara are i Karawa ao te rau ae beritanaki mairoun te tia Kamaiu ngke ti kaotia Nakoina bwa ti kukurei n ongeaba ao n Iriiria.”
N ataakina bwa bukin tera ko tangira te euangkerio e na buokiko n namakina ao n kinaa te tangira are iai iroun Tamara are i Karawa ao Iesu Kristo ibukim. Te aeka n iango aei e na buokiko n namakina teutana rootakim ngkana ko keiaki mwaaka n katea ao ni karokoko n am kouru n tamnei.
Au “bukin tera” ibukin maiuakinan ao tangiran ana euangkerio Iesu Kristo ni ikotaki ma te atatai bwa e kona n akea tokin te utu ao te rau ae I namakinna i mwiin te tataro ni koaua nakon Tamara are i Karawa.
Tao a na terana am “bukin tera” —e na anganiko te tai iroum n tamnei are ko kainnanoia bwa ko na riki bwa ana reirei Iesu Kristo ae tamaroa riki.
Maiuakinan Am “Bukin Tera”
N te tai are I kinaa bukin tera I a tia n maiuakina te euangkerio, e bitaki arou n karaoan au kouru n tamnei. I katoka iangoan arona bwa I a tia n kabwaka ni karaoia ao n kaeta au iango riki i aona i aon tera are I kona ni karaoia. I ururingnga bwa I maiuakina te euangkerio ibukina bwa I tangira au tia Kamaiu.
E taku Unimwaane Dieter F. Uchtdorf man te Kooram n Abotoro n te Tengaun ma Uoman: “Ti riai ni butimwaia bwa Ana tua te Atua tiaki ti karinanin iango aika raraoi. … Bon reirei mai ieta, aika a boboto iaon koaua aika akea tokiia, aika kanakoaki bwa ana uota te ‘rau n te aonaaba aei, ao te maiu ae akea tokina n te aonaaba ae na roko’ [Reirei ao Berita aika Tabu 59:23].”
Iriirana ma aron au kouru n tamnei e kauringai bwa antai ngai: te nati mairouia ara karo mai karawa. E anganai te reirei anne te ninikoria n kaaitarai rootakin au iango ao mamaarau rinanon Iesu Kristo (taraa Ita 12:27).
E reireia Beretitenti Russell M. Nelson, bwa “e aki kaantaninga te kororaoi te Uea mairoura n te tai aei i nanon rikirakera ae akea tokina. Ma E kantaningaira bwa ti na rikirake n itiaki.” Ngaia are I karaoa au kabanea n tamaroa ni katoabong n tiku ni kaan nakon Iesu Kristo ao n uringnga bwa bukin tera I rineia n iriiria.