“Aio Bon te Bwaintangira Nakoim,” Riaona, Tianuare 2025.
Bwanaaia Aika Itiaki ni Boong aika Kaitira
Aio Bon Te Bwaintangira Nakoim
“Tamara are i Karawa,” I tataro, “tera te bwaintangira ae I konaa ni karikirakea bwa e na kakabwaiaia Natim?”
Ngke te ataeinnaine, e kairaki nanon Yanina bwa e na ataia bwa te anene bon te bwaintangira ae ko na ni kabonganaa ni kakabwaiaia iai tabeman. I mwiina, e rineaki bwa temanna mai buakoia kaain te ekaretia man aba n te aonaaba ae na anene ma te Tabaenako Kuaea i nanon tain te maungatabu ni kabuta (e raweaki te tamnei i nanon te Salt Lake Tabernacle).
Ngke e kawara Ecuador n 1999 Beretitenti Gordon B. Hinckley (1910–2008), I ongo bwanaana ngke e kangai, “Tera ae ko baireia bwa ko na karaoia, karaoa are am kabanea n konaa.”
Ngke te ataei ngai, I reiakinna bwa e anganiira bwaintangira te Atua bwa a na karekea nakoira kakabwaiakiia tabeman (taraa Moronaai 10:8–18). I tataro, “Tamara are i Karawa, tera bwaintangira nakoiu ae I kona n karikirakea bwa e na kakabwaiaia Natim?”
Ngke 16 au ririki, I moanna ni kamatebwaia te anene man ana kaunganano te tia kairiiri n te reirei anene. “E rangi n tikiraoi bwanaam,” e taku neierei nakoiu.
Ngke a uboai taan mataku n te anene i mwiin au moan anene, e roko n au iango te taeka: Aio bon te bwaintangira nakoim.” I tang ibukina bwa e a tia ni kaekaaki au tataro. Ma, n abau, e kona ni kangaanga karekean te maiu ngkana te tia anene ngkoe. Ma I ataia bwa e katauraoa te kawai te Uea. Ngaia, are I reitaanako te kamatebwai n te anene, ukoria bwa N na riki bwa te tia anene ngai ae I rianako n nakon au konaa.
Ngke 19 au ririki, I anganaki te buoka n kamatebwai i tinanikun abau. Reken anne ao aaro ae aiaron anne, e aki koro bukin akanne. N au nonoori, I konaa n nooria bwa e tangirai te Uea bwa N na tiku i Ecuador.
A tuangai aomata bwa akea kabwaiau n te anene ibukina bwa akea au reirei ae reke mai tinanikun abau, akea kabwaiau, ke kinaakin arau. Ma I ataia bwa iai ana babaaire te Atua ibukiu, ngaia are I a uota au taarenan ni ibuobuoki n te Ekaretia, ike I a kaaini kuaea, kairi anene ma katangtang, ao n kataia n anaa nanoia tabeman bwa a na karikirakea aia bwaintangira irouia ao aia taarena.
Rimwi riki, Ngke I a anganaki au mwakuri n te tabo n terewition, I raraoma ibukin taian kariiri ake a irekereke ma taabo ni kamataku. Ma te kaeka nakon au tataro bon, “Butimwaea te mwakuri ao kaotia bwa ko konaa n riki bwa te tia anene n aki kataorikaakaki n am kainibaire.”
I a tia ni mwakuri bwa te tia ibuobuoki ibukia taan anene n te terewition, te tia ibuobuoki n tia kairiiri ibukin te Symphonic Choir i Guayaquil, ao kaain te baba n tararua n te Ecuadoran House ibukin te Katei ibukin te tabo ae Guayas.
I kakoauaa bwa e kona n koro nanon miira nako ngkai ti teimatoa ni koaua nakon reireiara. N boong aikai e a kinaaki arau i abau ao au rabakau—I karabwaa korakorau n maiuakina te euangkerio ao ni karikirakea te bwaintangira are e a tia n anganai Tamara are i Karawa.
Ngkana ti ongotaeka nakon nanon Tamara, bwaai aika a kangaanga a na bon akea kangaangaia (taraa Mataio 19:26). I ataia bwa E tangiriira ao e tangiria ni buokiira ni karikirakei ara bwaintangira ni kakabwaiaia tabeman.