Au Mwakuri ni Mitinare bon te Wewete ke te Kaairua?

Uoua te ririki i nanon tain karaoan au beebwa ae te degree ibukin warebwaian te mwane, I karekea te wirikiriki ae matoatoa bwa N na nako ni mwakuri ni mitinare. I rineia bwa N na beku, e ngae ngke I ataia bwa e na rootaki au reirei are e na riai n reitinako.

Tabeua te tai i mwiina, ngke I wareka taekan weteakiu ni mitinare nakon te Mition ae Utah Salt Lake Central, te namakin n te tai anne e rangi n rianako. Akea te aomata ae I ataia ae e a tia ni beku i Salt Lake City. I taku i nanou bwa tao e bure te reta ni wewete nakon te mitinare ae I kaukia. Ngke I a roko i Salt Lake City, I namakinna bwa ni kabane bwaai ake I atai a bua. I bwatika i aan te tinoo n akea au iango bwa e kanga aron te mitinare. Ma kaokoron te katei ao kanoan te bong, e taraa n raroanako Salt Lake City mai Aberika Maiaki n aron ae I a tia n mwananga iai.

N au moan tabo ni mwakuri, ti kawara te membwa ae arana Chris Ruppel ngai ma toau ibukin te katairiki. E titiraki ngkana ti bwaati n anene ao n katangtang. E taekinna toau bwa ngai I kakatanga te biaano ao n anene, ngaia are I a anenea te anene nakoia kaain te utu. I mwiina ao iai te bwai ae e okoro ae riki. E taraai te Tari Ruppel ao n taku, “Elder Vizzini, ngkana ko kateimatoa am anene n aron anne, ko na riki bwa te mitinare ae nakoraoi.” I iango i nanou bwa e tamaroa are e taekinna ma I aki rangi ni katuua iangoana.

Tabeua namwakaina i mwiina, ma te Tari Ruppel, I ibuobuoki n barongaa aia taromauri mitinare ibukin te anene. N taabo ni kabane are I beku iai i mwiina, ti kakaraoa ae aron anne. A mwaiti aomata ake a raoniira, mai irouia kaain te titeiki nakoia taan katangtang aika a rangi ni kinaaki n te tabo ao kaain aro tabeua. Ti reireia taekan te tia Kamaiu rinanon anene nakoia aomata ake tao a rawa n tekateka n ongora reirei. I reiakinna bwa te anene ma te katangtangi e kona n riingii nanoia aika a kainnano ao aika a kaubwai, aika a reirei ao aika akea aia reirei.

E reireinai au mition bwa I konaa ni karaoi bwaai aika a kangaanga. Ngke I beku n taabo aika a raroanako ao ni kaokoro ma mweengau, I reiakinna bwa ni kabane aomata bon natin te Atua. I a tia n noori kakai i nanon maiuia aomata n iteran te aonaaba i Utah, ao I a tia n nooria naba ikai i Aberika Maiaki. I ataia bwa tii ngkana iai iroura ara koaua, a kona n riki kakai i nanon maiura (taraa Moomon 9:15–21).