Kakaitau ni Botiia

Ma Tariu n te Moan Beretitentii ao te Kooram n Abotoro n te Tengaun ma Uoman, ti katanoata: E boboto te Ekaretia aei iaon maiun temanna ae ngaia atibun te maninganinga ae kororaoi, Iesu Kristo, ao Ana Mwakuri ni Kamaiu ae akea tokina ma Mangautina. … E kaoira ni kabane bwa ti na Nakoina ao n nakon Ana Ekaretia, ni karekea te Tamnei ae Raoiroi, otenanti ni kamaiu, ao ni karekea te kimwareirei ae teimatoa.”

Ibukina bwa Kaokan Bwai e waaki nako rinanon kaotioti aika reitinako, “e aki kona te aonaaba ni manga titebo, ngkai te Atua e na booti bwaai ni kabane i nanoni Kristo (I-Ebeto 1:10).”

“Bwaai ni kabane” n ikotaki ma Ana nanai. E weweteira te tia Kamaiu bwa ti na katikui bwaikorakin te aonaaba ao ni ikotaki Nakoina. E tangiriia ana tiibu bwa a na riki bwa te ota ae otanako otana, n katea te kainibaaire ibukiia kaain te aonaaba ni kabane man kaotan aron maiuia ana reirei ni koaua Iesu, ni ikotaki ma aron maiuakinan te kimwareirei ni koaua ngkai a kabanei maiuia i aon te tia Kamaiu.

Ti bobooti nakon te tia Kamaiu ngkai ti roko Nakoina (taraa Mataio 11:28) man kamwakuran te onimaki nakon te rairannano, butimwaean te bwabetitio nakon Ana Ekaretia, ao karekean ana bwai n tituaraoi ae te Tamnei ae Raoiroi.

Ti bobooti nakon te tia Kamaiu ngkai ti rinanon te kamaiu n tamnei are e roko man kanakin te toa, kakoauaana bwa ti bon kukurei ni katokaa i aora Arana, n ururingnga n taainako, ao n kaawakin Ana tua nako (taraa Reirei ao Berita aika Tabu 20: 77, 79).

Ti bobooti nakon te tia Kamaiu ngkai ti kaoni maiura n Ana taeka ao Ana koaua ni katoabong, n raonaki ma aia reirei Ana burabeti, taan mamata, ao taan karekei kaotioti.

Ti bobooti nakon te tia Kamaiu ngkai ti katamaroai ara konaa n ongo i Rouna, maiuakinana bwa ti na tau nakon ana wirikiriki te Tamnei ae Raoiroi.

Ti bobooti nakon te tia Kamaiu ngkai ti kakorakorai rairakira, karikirakei ara onimaki, kananoa arora n riki bwa reirei, katotonga Arona nako, ao n keiakimwaaka n karaoiroira riki ni katoabong.

Ti bobooti nakon te tia Kamaiu ngkai ti karaoi berita aika a tabu ao n karekei otenanti aika a tabu i nanon te tembora.

Ti bobooti nakon te tia Kamaiu ngkai ti anga ngaira ma te taotaonakinnano ao te ninikoria “n bwaai ni kabane ake e tangiria te Uea bwa e na karaoaki [nakoira]” (Mosiah 3:19).

Kabaneana, ti bobooti nakon te tia Kamaiu ngkai ti reirei ao n kakoaua Irouna, kaoiia ara utu, raoraora, ao kaain rarikira ni ikotiia ma ngaira nakon “te ota, te maiu, ao te kaantaninga n te aonaaba.”

Ngkana ti roko n bootaki ao n ikotaki bwa kaain ana Ekaretia Iesu Kristo ibukiia Aika Itiaki ni Boong aika Kaitira, ti iraorao ao n katoaira ma ake tabeman. Ti boutoka, angareirei, ao ni karikirakeira i marenara. Ti keiakimwaaka, n ana taeka te tia Kamaiu, n riki bwa “teuana” (Ioane 17:21; taraa naba Reirei ao Berita aika Tabu 38:27) ao n “ i tangitangiri” (Ioane 13:34).

E reirei Beretitenti Dallin H. Oaks, te Moan Kauntira n te Moan Beretitentii, “Te roroko n taromauri n te Ekaretia e anganiira te korakora ao ni kanakoraoi ara onimaki are e roko man ara reitaki ma taan kakoaua tabeman ao ni kaai n taromauri ma naake a kataia n tiku ni kawain te berita ao n riki bwa ana reirei Kristo aika tamaroa.”

Ti kunea te rau n tamnei ao te kabouaki n te Ekaretia. Ti kunei otenanti ao te kariaia n te nakoanibonga ao ti kakoroi nanoia. Ti kunea te koaua ae e a tia ni kaokaki, reirei aika a itiaki, ao kaotioti i bon ibukira. Ti kunei baai aika a bubutimwaai, naano aika a rau, ao bwanaa ni kaungaunga. Ti kunei taai n maiuakinii uoua tuua aika a korakora (taraa Mareko 12:30–31).

E a tia n tuangiira te Uea bwa a “ikotaki kairiribai” (Reirei ao Berita aika Tabu 38:12). Ni kamanoia ara utu ao n totokoa ana kewe Tatan ae e a korakora rikirakena, arora n uaia n nebonebo bwa Aomata aika a Itiaki e a rangi ni kakaawaki riki.

“Te katiteuanaaki,” e reirei te Burabeti Iotebwa Timiti bwa, “bon te korakora.”

E taku naba te Burabeti Iotebwa, “E birimwaaka te bong ngkana a na kakoroaki nanon kaokan bwaai, ake a tia n taetae ni burabetiia ni kabane burabeti aika a tabu, nakon bobootaia te bata are i Iteraera.” Temanna are e a tia n taetae ni burabeti iaona bon Ieremia n te O-Tetemanti:

“Noria, a kan roko boong, e taku te Uea, aika e na aki manga kangai te aba iai, Ngkai iai Iehova, ae kawaerakeia tibun Iteraera man te aba are Aikubita;

“Ma, Ngkai iai Iehova ae kawaerakeia tibun Iteraera man te aba are i meang ao man aba ni bane ake E kakioia nako iai” (Ieremia 16:14–15).

E taekinna i mwiina riki te Burabeti Iotebwa, “Ngaira bon te botanaomata ae ti tangiraki are e a tia n rineia te Atua ni karokoa te mimitong n Boong aika kaitira … ngke a na ikotaki ana Aomata te Atua aika Itiaki n tii teuana man aaba nako, ao kanoa, ao botanaomata, ao neewe. ”

N katiaan te mwakuri, “N na weteiia taan akawa aika bati, bon ana taeka Iehova, ao a na akawaiia; ao rimwi N na weteiia taani kae-man aika a bati, ao a na kaeiia mai aoni maunga ni kabane ao mai nanoni bangabangani bwaa” (Ieremia 16: 16).

Tariu ao mwaaneu, ngkai ngaira Iteraera aika a tabu ni boong aika kaitira—kaain ana Ekaretia Iesu Kristo ae kaokaki—ngaira bon ana tia akawa te Uea ao ana taan kaeman. Ti weteaki bwa ti na ikotiia ana aomata te Uea aika a karineaki man maunga nako, tabuki, ao man te kaawa ae karako. Ti weteaki n anga nakoia natin te Atua te tai bwa a na riki bwa taan bwaibwai ni koaua nakon are E a tia n beritanna nakoia natina aika a kakaonimaki. Anne te mwakuri ni ibuobuoki ae te kabanea ni korakora ae ti konaa ni karaoia.

Ti kakoroa nanon te kairiiri mai karawa anne man bobootan Iteraera n iteran te rabuna aika uoua—tibwaakin te rongorongo ae raoiroi n Kaokan te Euangkerio ma tabeman, ukorakiia ara bakatibu ake a tia ni mate, ao karaoan te otenanti ibukin temanna n te tembora. Ti kakoroa raoi naba te kairiiri anne ngke ti tibwaa ana tangira te Tia Kamaiu rinanon ara mwakuri ni ibuobuoki, katooto, koaua, ao ara kakao nakoia tabeman bwa a na raoniira.

“E kaira Kaokan Ana euangkerio ao Ana Ekaretia te Uea,” E taekinna Beretitenti Henry B. Eyring, te Kauoman ni Kauntira n te Moan Beretitentii. “E na rimoara. E rangi n atai kanoan taai aika a na roko. E kaoi ngkami nakon te mwakuri. E raoni ngkami ni karaoana.”

Tera ae e riki nakon ana tai ni bai tibun Nelson te unimwaane? Tabeua te ririki n nako , I angan natiu te mwaane. N aron are e karaoaki iai nakoiu, te tai anne ngkai e a tomaia nakoia ana bakatibu ao n kauringnga tabena ibukiia kanoana.

Ao n reitinako. Kanoara nako aika a rin n te berita a reitanakoa ana beku te Uea, ni karaoan tabeia ni katauraoan te aonaaba ibukin Kauaokin Iesu Kristo.

Ke ti na teimatoa n taainako ni kakaitau ibukin te tai ao te onimaki are e a tia n katokaa i aora te Uea ngkai ti botiia nakon te tia Kamaiu, botiia ma Aomata aika Itiaki, ao ni botiia n Ana mwakuri ni ibuobuoki.