Kam Bane ni Kainanoaki bwa Rabwatan Kristo Ngkami

Mataniwiia taokita n te kuakua n te U.S, mataniwia taan reirei n te kuakua ibukin te United States, a tibwa te rongorongo aei i aon kakawakin te reitaki: “Butanakon te aoraki ae te maroaa ao te tiku n akea raom e a tia n aki rangi n taraaki n te bootaki ni kuakua bwa te kangaanga are e a tia ni kaikuaka temanna ao te botanaomata. Ara reitaki bon boton te marurung n ara waaki nako ae e noraki n aki ataaki. … Atakin kakawakin te kangaanga n te marurung n te maroaa ao te titiku na akea raom, ti riai ni moanibwaia katean te reitaki ma aomata n aron naba moanibwaian kangaanga ake tabeua i aon marurungin te botanaomata. … N reitakira, ti kona ni katea te [botanaomata] ae marurung, ae waekoa ni kaitarai kangaanga, ae uarereke te maroaa iai, ao n rangi n rereitaki.”

N reitakira ti kona ni buoka katean te nakoanaine n te aonaaba n rooro nako ae marurung, ae waekoa ni kaitarai kangaanga, ae karako te maroa iai, ae e iraorao ibukin reitakira n te berita ae tabu ma te Atua ao tabera i marenara ngkai ngaira Ana reirei Iesu Kristo.

N aron are E taku ara Tia Kamaiu, “Ane a na ataingkami aomata ni kabaneia bwa au reirei ngkami n aei, ngkana kam i tangitangiri” (Ioane 13:35).

Ti kona ni buoka kauarerekean butanakon te aoraki ae te maroaa man katean taabo aika a bubutimwaai ao ni mano n ara botaki n taromauri ao riki i nanon ara Bootaki n Aine, ike ni kabane a kona n namakina ana tangira te Uea ibukina bwa a katobibiaki n ara tangira.

Baike ti rinanoi n te ekaretia a bon nanonaki bwa a na katauraoi reitaki aika a kakawaki akanne ma te Uea ao i marenara n ake a kainanoaki ibukin aron maiura n te rabwata, namakin, ao te maiu n tamnei. Bon iai te korakora ae mwaiti n te katiteuanaaki ao te tamaroa n arora ae kakaokoro; kam bane ni kainanoaki bwa rabwatan Kristo ngkami (taraa 1 I-Korinto 12:12–27). N aron te kai ae bubura ae te redwood ae wakaana a bae i marenaia ao a kona ni kaitarai korakoran te angibuaka ibukina bwa a botaki n tei, ti kainanoia ni katomai baira, botaki n tei, ao ni kakorakoraira i marenara rinanon angibuakan te maiu.

Ngkana ti bon kinaia raoi tekoraki ake ti taku bwa a kaokoro ma ngaira, ti kunea bwa e korakora riki baika ti titebo iai nakon are ti ataia. E korakora te bwai ae a kona n anga aomata n tatabemaniia, taneiai n te maiu aika a mwaiti aika a tamaroa ao ni kakaokoro aika a kona ni kakabwaiai maiura. Ongoraeakinan aia karaki tabeman ao ukoran ataakiia raoi e na biti nanora, ao te momotikitaeka ao te maaku are iai iroura ibukiia tabeman e kona n oneaki mwiina n te namakin ni kakaitau bwa a na riki bwa raora.

E kona ni buokiira te Uea n noriia aomata tabeman n Arona n noriia, ao E kona ni kaonii nanora ma te tangira, n anganiira te kona n tabekiiarake, karaunanoia, ao ni ngare ma ngaiia, n tang ma ngaiia, ao ni karekeia bwa raora naake i rarikira. E na buokiira n ataa ae kainnanoaki ao n ataia bwa ti na kanga n riki bwa kakabwaia ibukiia aomata i aon mwanangaia.

E koaua, bon iai Temanna ae e kona n atai aikai ni kabane ao ni kororaoi ana nanoanga. Ngkai bon mwakoron Ana mwakuri ni kamaiu, E rinanon te ‘maraki ma te rawawata ao kariri n aekaia nako; … [ni uota] i aona marakiia ao aorakiia ana aomata’ (Aramwa 7:11) bwa ti aonga n ataia raoi bwa ti bon aki tiku ti ngaira.

Ti weteaki n tatabemaniira nako bwa ti na tangira ao ni buokiia natin Tamara are i Karawa n aron are e na karaoia te Tia Kamaiu. Bon raora Ngaia ni kakabwaiaia aomata nako bwa aonga ngaiia ao ngaira ni kona n namakina bwaninin ana tangira ara Tia Kamaiu. Ti a kanimwii baira ao ni kimwareirei ni mwananga ni waaki nakon mweengara. I kakoauaa bwa aio ana mwakuri ae tabu are ti bane ni weteaki bwa ti na karaoia.