A Riai ni Kaotaki Raoi Ana Mwakuri te Atua

I anganaki au tai n tuoaki tabeua te bong i mwiina ma te taokita, ma n ingabongin Tianuare anne, e karekea te wirikiriki mwaaneu ae ikawai, Kylie, bwa a riai au utu n uotai nakon te ruu n aoraki ibukin aoraki aika a karina ae n te onaoraki ae e uakaan. A waekoa taokita n tua karaoan te tutuo n mitiin (CT) ao tabeua karaoan tutuo ni kauarerekea tiinakon te ran man te kaburoro. N te bong are i mwiina, I rinanon te MRIs uoua te tai (magnetic resonance imaging). I mwiina ao e a manga tuoai taokitan te mata.

“Iraua tabonibai aika ko konaa n nooria?” e titiraki, n kaoti tabeua tabonbaina i matau. Akea te bwai ae I kona n nooria.

I mwiin ana tutuo, e kunea bwa iai irou kanikinaaean korakoran mwiin tiinakon te ran man kaburorou ao korakoran aorakin matau. Aoraki aikai i bon irouia a bon aki karika aio. E kabwarabwaraa bwa ma korakoran buan au taratara, e kona n reke te manga taratara i mwiin teuana te ririki ao bwa e na kona n aki okira arona au taratara. E baairea nimakin bwainaoraki aika a korakora ibukin katokan te maraki ao bwain aoraki riki tabeua.

I moana tangiu ngke e a tia n nako. E karaua nanou tinau, “Ngkana ko naaki kona n tei n am onimaki n te tai aei, ko kona n katuka am onimaki iroura.”

N au kateniua ni bong n te onaoraki, e tuatua au taokita karaoan te MRV (magnetic resonance venography) man riin nuukau ao kaburorou, n ukora te tibu ke te bono. N te aoa 4:00 a.m uabong i mwiin are I uti n matakii, I rinanon waakin te MRV ae nimaua te aoa maanna. N te katauraoi, a baaireia au utu bwa a na tataro ao n aki mamatam ibukiu n te ingabong anne. Tamau, are e mamatu ni kaan irarikiu ni katoa tairiki n au ruu n te onaoraki, e a manga kakabwaiaai—te kauatai man kakabwaia aika a mwaiti ake I karekei.

N tuangakiu iroun te tia mwakuri n te onaoraki ngkana I tangiria n ongora n te katangtang i nanon au tai n tutuo, I tuangnga anene mairouia taan anene ake I tatangiria. E karini bwaai n kakauongo n te taninga aika raabwa nakon taningau ao ni kabaraaka atuu ma bwain tauan te ubu bwa I aonga n eti raoi. N tain karaoana, e booa nako te bwai ni kakauongo are e kuri ni bwaka mai taningau. Akea te katangtang ae I ongo ngke e a waaki te MRV.

Maanin karaon te mwakuri, bon rikiraken te kabuebue i nanon te mitin are I rin iai. I mwiin te maan ae rangi ni maan i rou, I tuangaki bwa I a nakoraoi ao n manga waakinako riki n te tai ae aki rangi ni maan. Ma I namakina te maaku ao te raraoma man te kabuebue, kakarongoa aika a tangimwaaka, ao tikuu i nanon te mitiin.

N au tataro i nanou, I wewete: “Tamau are i Karawa, taiaoka ma anganai te rau. I rangi ni maroaa n tii ngai. I kainnanoa Am ibuobuoki. I tangiriia au utu.”

N te tai ae tawe, I ongo tangin te biaano ae amarau i taningau. Bon teuana mai buakon anene are I tatangiria—teuana are e kakatangnga i aon te biaano tariu ae uarereke, ae Morgan. N na bon aki kaantaningaia bwa N na ongo man mwawan te taninga ni kakauongo i aon karongoaan te mitiin. Taraan ae e mena i rarikiu Morgan, ao I aki maroaa. E toki te karongoa. E nako te kabuebue. E toki te maroaa i nanon te tabo ae kainaki.

I namakinna bwa I otinako man rabwatau, n airon ae kanga I beibeti i aon taari n te aakea. I namakinna bwa I katobibiaki n ana tangira te Atua ao n aia tangira au utu. N aiaron anne, I rangi n rau. Ai bon 7:30 a.m., te tai are a moan karaoa aia aki mamatam au utu ibukiu. E waekoa n toki maanin tain te MRV are nimaua te aoa, ao i mwiina I ongo, “E a tia.”

Te tangira are I namakinna man te bwai ae riki anne e karekei rannimata i matau ao tokin te kua are I a tia n namakinna n maanin tikiu n te onaoraki. I aki ataia ngkana e na oki au taratara, ma I ataia bwa e mena ikekei te Atua ao n tia n ongo au tataro. I mwiin aua te bong i nanon te onaoraki, I a kaotinakoaki.

Ni katoabong i mwiin uoua te wiiki, I manga okira te onaoraki ibukin bwainaoraki, ao ni katoabong I kariariaa te bitaki n au taratara—e taanako te roo ae kureei nakon te kureei ae oota, nuun bwaai a kaoti ni katobibia tabonibaiu i moau, te mabubu ae aoranti n te TV e bitaki nakon te uee. Reken te marurung teutana i mwiin teutana bon te tokanikai.

Uoua te wiiki i mwiin otinakou, e oti n mwiin te tutuo bwa au taratara e moa man ae bon akea nakon ae bon rangi n tamaroa ni kauoua matau.

“Bronwyn, tera ae riki?” e titiraki au taokita n te mata.

“Ko nooria, ti a tia n tataro, ao n tia n karekei kakabwaia,” I kaeka.

“E rangi ni kamiimi aio!” e taku. “I bon tuai man noora aio mai i mwaiina. Tiaki kona n karekea mwiina ae kanga ai aron aio i nanon tao onoua namwakaina.”

E tuangai i mwiina bwa aoraki ake bon akea aia taratara a kangaanga n manga karekea okin aia taratara. I nanon tabeua te wiiki, I a tia n riki bwa teuana man ana keiti ae te kabanea n aki tamaroa nakon ae te kabanea n tamaroa.

N tokin te ririki 2022, taan kairiiri n ana uote tamau a rinea te botoniango ibukin 2023. E kairaki man te angareirei mairoun Beretitenti Russell M. Nelson, are e taku n moan te ririki anne, “Ukora ao kantaningai kakai.”

N te tai anne, e iangoia tamau bwa e na buokiia membwa n te botoniango anne ake a rinanon taai ni kangaanga. Akea ana kaantaninga bwa e na rangi n kaineti nakoia au utu.

“Iriira Otan Kristo”, taekan te botoniango. “Kaantaningai kakai! Kaantaningaa te kimwareirei!”

Uoua te ririki i mwiina, e a rangi n tamaroa au taratara nakon are I mwain are e bua. I karabwaa Tamara are i Karawa ni katoabong ibukin au kakai ao ibukin aia onimaki au utu ae aki bwaka. Rinanon te kataaki aei, E kaotaki iai ana mwakuri te Atua. I karikirakea au koaua ae matoatoa riki, te kakaaitau ae korakora ibukin te maiu, ao te tangira ae korakora riki Ibukina ao ibukiia utu ao raao.

N te bong aei, I karaoi bwaai ni kabane ake I konaa ni karaoia, ni ikotaki ma arou ni korobanna, ni kamanenai kakabwaia, bwaintangira, ao te kimwareirei are e anganai te Atua—n kamoamoa iai ao n kakabwaiaia tabeman.