Rongorongo aika Raraoi n te Tangira ao te Kimwareirei

Bon te moaningabong ae boou ibukiia utu n aanaomata n te buakonikai, ike e kaoti iai te Atua te Tama, ao Natina, Iesu Kristo, ao n taetae nakon Iotebwa Timiti ni kaeka nakon ana tataro Iotebwa te teei bwa tera te ekaretia ae riai ni kaainna (taraa Iotebwa Timiti—Rongorongo 1:14–20). E tua Iesu Kristo nakon Iotebwa bwa a na akea te Ekaretia ae na kaainna. E berita bwa E na kaotaki bwaninin ana euangkerio nakon Iotebwa nakon taai aika a na roko.

Nakoia aomata aika a mwaiti, e taraa n ae Iotebwa bon te aomata ae riai n aki weteaki nakon te mwakuri ae kakaawaki aei, ao a bon eti. E aki reirei ao te ataeinimwaane ae aki kinaki man te tabo ni ununiki ae uarereke n te tabo ae aki rangi n ataaki. N aiaron naba aia taeka tabeman nakon te Tia Kamaiu n Ana bong, “E kona n riki te bwai ae raoiroi mai Natareta?” (Ioane 1:46), a mwait aika a iangoia bwa tera te bwai ae raoiroi ae na reke mairoun te aomata ae 14 ana ririki ni maiu ae akea ana reirei i Palmyra, New York. Ma mairoun Iotebwa—n aron tarakina bwa e aki kona n riki irouna aei—Tamara are i Karawa ao te Uea Iesu Kristo a na bon kakoroa bukina bwa e na riki te bwai ae kamiimi. E riai n uota aio nakoira te kaantaninga bwa n ara kawai ae uarereke man mangori, ti kona naba n ibuobuoki n aanga aika a riai nakon ana mwakuri te Uea.

N taina, E wetea Iotebwa Timiti te Uea “ao n taetae nakoina mai karawa,ao n anganna tua” (Reirei ao Berita aika Tabu 1:17). E karekei kaotioti ao reirei aika a bongana Iotebwa Timiti ake a uota te ota ae boou nakon ara atatai n ana babaire n tangira Tamara are i Karawa ao ana tangira ni kamaiu Iesu Kristo n Ana mwakuri ni kamaiu. Ma te kamiimi, a roko rongorongo aika a raraoi n te tai raoi ngke tamaroan bwaai ni mwamwananga, itoman, ao bwaai riki tabeua a anga otan te Atua bwa e na otamwaaka ni kakabwaia riki natina.

E Anga Bwaatua te Anera Moronaai nakon Iotebwa Timiti, iroun C. C. A. Christensen

Te Kakoaua ae Korakora n Ana Tangira te Atua

E kakaawaki kaotin te anera Moronaai nakon Iotebwa Timiti nakon Kaokan Bwaai ao te kakoaua ae korakora n Ana tangira te Atua. E tuanga Iotebwa taekan te rekooti Moronaai, ae koreaki i aon bwaatua koora, ae taunaki n te tabo ae kaan (taraa Iotebwa—Timiti 1:33–34). I nanon taina, e na anganaki Iotebwa te “mwaaka mai eta” (Reirei ao Berita aika Tabu 20:8) n raira te rekooti anne nakon ae ataaki ngkai bwa ana Boki Moomon, are e tei i rarikin te Baibara bwa kakoauan taekan Iesu Kristo.

I nanon ana Boki Moomon ni kabanea, ti wareka taekaia te botanaomata ake, bubua n ririki i mwain Kristo, a taia ao n kaman taekina Rokona ao n ingainga nako iai. Ti kunea naba iai rongorongon kaotin te Tia Kamaiu ae manga uti ao ana mwakuri i buakoia Nibwaite, n te tai are E kaoiia aomata ni kabane bwa a na roko Nakoina ao n namakina mwiin te nera i baina ao i waena (taraa 3 Nibwaai 11:14–15). E kamaiua te aoraki, te mwauku, te mataki—“aomata ni kabane ake a karawawataki n aekaia nako”—ao i mwiina e kakabwaiaia ataei aika a uarereke ao n tataro ibukiia (taraa 3 Nibwaai 17:7–9, 21). Ti reiakina ae mwaiti n taekan ana tangira ao ana nanoanga te Tia Kamaiu n te rongorongo ae tabu.

E kakoauaa Ana Boki Moomon bwa “Iesu bon te Kristo.” Karaunano i nanon ana Boki Moomon e kauringiira n kaokiokia bwa e tangiriira Tamara are i Karawa ao e tangiriira ara tia Kamaiu i aon riki bwaai ni kabane ae ti kona n iangoia.

E reitinako Kaokan Bwaai ma kaotiia taan uota te rongorongo mai karawa nakon Iotebwa Timiti. E kaoka te kariaia ni bwabetito Ioane te tia Bwabetito man te kateboaki i nanon te ran ibukin kabwaraan buure. Teniman mai ibuakoia moan Abotoro ake tengaun ma uoman—Betero, Iakobo, ao Ioane—a kaoka te mwakuri n abotoro ao kiing n te kariaia n te nakoanibonga. A roko naba tabeman, n raonaki ma Eria, are e kaoka te kariaiakaki bwa utu a na ikotaki n akea tokina n te reitaki n te maiu are akea tokina are e riaon te mate.”

N 6 n Eberi, 1830, Iesu Kristo rinanon te Burabeti Iotebwa e katea tein te ekaretia i mwiin te ekaretia are E barongaia n te Nu Tetementi (taraa Taekan te Onimaki 1:6), n tabwanin ma “i aon taian boua ake abotoro ma burabeti, ao Iesu Kristo naba n te atibu are bouan te maninganinga” (Ephesians 2:20). Ana Ekaretia Iesu Kristo ibukiia Aika Itiaki ni Boong aika Kaitira e karekea ae a bane n tauraoi taian kakabwaia n mwaakan te nakoanibonga ae e a tia ni kaokaki nakoia ni kabane natin te Atua ake a tauraoi ni karekea.

N aron are e a tia n reireiniia Beretitenti Russell M. Nelson:, ti kona ni kunea te kimwareirei i nanon te rairannano ni katoabong ngkai ti tannakon Tamara are i Karawa ao ara Ta Kamaiu. Nakoia ake a nanokaawaki ke a taku bwa aki tau n te raoiroi: a kaoaki ni kabane n roko nakon Kristo ao Ana Ekaretia. Te Ekaretia bon tiaki te tabo ibukiia aika a kororaoi ma bon te tabo n aoraki ibukiia aika a aoraki. E kauringiira Unimwaane Dieter F. Uchtdorf man te Kooram n Abotoro n te Tengaun ma Uoman bwa “ti roko nakon te ekaretia n aki karabai ara kangaanga ma ti roko bwa ti na katoki.”

N te ekaretia ti kunea te kimwareirei inanon taai ake ti kaotii mwakuri mai inanora, n beku ibukiia tabeman ma te tangira, ao n tibwai oin ara tameoao ma ana raoiroi Kristo ae bati. Ti kona n “warekaki i buakoia aomatan ana ekaretia Kristo” ao “n uringaki ma n kamwarakeaki n ana taeka te Atua ae raoiroi” (Moronaai 6:4). Ai korakorara te kakabwaia!

E taekinna n te tai teuana te Burabeti Iotebwa Timiti, “Ngkai, tera ae ti ongo n te euangkerio are ti a tia ni karekea? Bwanaan te kukurei! Bwanaan te nanoanga mai karawa; ao bwanaan te koaua mai aontano; rongorongo aika raraoi ibukiia maate; bwanaan te kukurei ibukiia ake a maiu ao ake a mate; rongorongo aika raraoi ae moan te kakimwareirei” (Reirei ao Berita aika Tabu 128:19).

A roko rongorongo aika a raraoi aikai ibukina bwa a tangiriira Tamara are i Karawa ao Natina ae bati n tangiraki irouna, Iesu Kristo, ao a tangirira—riki nakon bwaai nako—n butimwaeira n oki nako rarikiia, bwa e aonga n reke iroura n aki toki aron te maiu ae A maiuakinna. E kaotaki man Kaokan Bwaai bwa A tia ni karaoi bwaai ni kabane aika a riai ni karaoa te aro ae mimitong aei ibukira ni kabane. N mwanangara n te maiu ae akea tokina, ti na rinanon kataaki ao kangaanga, ma “[ti] riki, bwa [ti] aonga ni karekea te kimwareirei” (2 Nibwaai 2:25) n te maiu aei ao te maiu ae na roko. E atai riki aikai te Burabeti Iotebwa nakoia aomata aika a mwaiti.

E kaitara ma kakaitara ao bwainikirinaki aika teimatoa Iotebwa, ma e kateimatoa “anuara ni kukurei” (Iotebwa Timiti—Rongorongo 1:28). E kateimatoa kimwariereina, korakorana, ao ana konabwai ni kaitarai kangaanga, ao e kakoroa nanon ana mwakuri ae kamiimi are e a tia n anganaki bwa e na karaoia. I anga au karine nakoia ni kabane Aomata aika Itiaki ake a kaoaua, a boutoka, ao n iriira te Burabeti Iotebwa Timiti, ao ni katabuia nakon katean te Ekaretia. Ti bae korakora irouia n te kaaitau ao te karinerine.

E aobuaka te maiu n boong ake ngkoa n te Ekaretia, ao e kona n aobuaka naba n boong aikai. Ma e waakinako Kaokan Bwaai. Ma Iesu Kristo ae atuun te Ekaretia, a na teimatoa ni kairiira burabeti aika a maiu. E na reitinako katean ana auti te Uea, bwa a aonga kakabwaia mai karawa aika a tabu ma te Atua ni kabaeira nakoina ao nakoia ake ti tangiriia n iteran te rabuna aika uoua (taraa Mataio 16:19). E na butanako ana tangira te Atua ao Iesu Kristo nakon te aonaaba ni kabane ngkai ti iriira ana tua te Tia Kamaiu n kamwarakeia Ana tiibu ao tibwaa Ana euangkerio. Ti na kakoaua n koauan Kaokan Bwaai n waaki nako ni kawai ao nakon taabo aika a na kangaanga iangoia n ana bong Iotebwa.

Ti kona n kunea te korakora ao te kimwareirei ae korakora—n aron ae reke iroun te Burabeti Iotebwa—ngkai ti taui ao n maiuakinii koaua aika a kakaawaki aikai. E reitinako te wewete are e karaoia Iotebwa nakoia aika Itiaki ni boong aikai: “Ti na aki waki n te mwakuri ae rangi ni kakawaki? Waaki rake ao tiaki rikaaki. Ninikoria, … ao waaki, waaki nakon te tokanikai! E riai nanomi ni kimwareirei, ao n rangi ni kukurei” (Reirei ao Berita aika Tabu 128:22).

Ke e kaira ao ni kakabwaia maiura rongorongo aika a raraoi n te tangira ao te kimwareirei man Kaokan Bwaai—ngkai ao n aki toki.