“Te Mwane E Aki Kona ni Kabooa te Kukurei, ma E Anga Kristo te Kimwareirei ae Akea Boona,” Riaona, Tianuare 2025.
Kairake n Ikawai
Te Mwane E Aki Kona ni Kabooa te Kukurei, ma E Anga Kristo te Kimwareirei ae Akea Boona
Ngkai tangirakin te mwane e a taotira riki ni bwaai aika bongana nakon maiu, I a ataia bwa I a rinea bwain te aonaaba nakon riki Tamara ae i Karawa.
Tamnein te tia koro karaki iroun Stephen Neilsen
N rikirakeu, E rawata te bwai ae I iangoia. I noriia aomata aika rorou aika a rawata aia mwane ao n raka aroia iaon bwai n reitaki. I tangiria ni kan riki naba n ai aroia.
Ngke I kaaina te kura ae rietaata ao n reiakina arou ni bon tei iaon waeu, e riki te mwane bwa te bwai ae moa ni bwai ni maiu. E ti bane nanou ni karekean te mwane ni buoka ibukin te reirei, kawakina au mwane, ao kaotan te katauraoi nakon au mwakri n taai aika a na roko.
Ao baike a toka iaon au bwai n reitaki a kaonaki ma rongorongo iaon te kakamwakuri, karekemwane, ao mwakuri tabeua irarikin are bon au mwakuri. I raraoma bwa ngkana I aki katai waaki ni rangi ni wanawana ma au mwane, e na bon aki nakoraoi arou n te mwane.
E tiku irou te aeka ni katei aei, ni iangoia bwa e na anganai te kukurei ao te tokanikai. I aki toki n iangoa raoiroin kabotoan nanou iaon au mwane ni bon tuangai bwa n te bong teuana, ngkana e a rawata au mwane, I kona n anga ae mwaiti ibukin te ibuobuoki ao n riki bwa te aomata ae tamaroa n te kawai anne.
I aki noria n te tai anne, ma ngkai tangiran te mwane e a riki bwa ai au moanibwai, I a moanna ni kabuaa te kimwareirei i nanon maiu. I a rikirake ni bakantang, riki irouia naake a taraa ni mwaiti ake iai irouia nakon aia mwane ae tau.
I a tangiria bwa N a kabwaia riki iaon bwaai ni kaongora, n au mwakuri, ao riki iaon taraakiu irouia aomata. Ma e taraa n ae mwaiti te tai are I ukora te kabwaia, I namakin ae e kerikaaki kabwaiau—ao e a rikirake kararoakiu mairoun Tamara ae i Karawa.
Ataakin Bwain te Maiu Aei
Imwiin tao teuana te ririki n namakinan aei, I ongora nakon te marooro iroun Beretitenti Dallin H. Oaks, te Moan Kauntira n te Moan Beretitentii. I namakina ae e rawawata nanou ngke I ongo irouna kabwarabwaraan te aomata ae I riki ngkai nakoiai:
“Ni boong aikai tabeman ake a taekinna bwa Kiritian a katikaki riki nanoia ni bwain te aonaaba—bwaai aika a kamatoa te maiu iaon te aba ma akea te bwai ae e na kateimatoa n te maiu are akea tokina.”
I taku bwa I kona n ata ae bongana riki n te tai ae ti teuana bwa te Atua ke te mwane, ma ana taeka Beretitenti Oaks ao ana nonori ni Mataio 6:24 e kaota te koaua: “Akea ae kona n toro irouia tooka uoman: bwa ane e na riba temanna, ao e na tangira temanna; ke ane e na nim iroun temanna, ao e na aki mutiakina temanna. Kam aki kona n toro iroun te Atua ma mammon.”
Ngkana au iango e boboto iaon bwain te maiu aei, I kunea bwa e matoatoa norakin tangiran te euangkerio. I aki noria bwa e na kanga te nanako n taromauri ao warekan koroboki aika tabu ni kona ni buokai ma nanou ae I tangiria.
Ngkai reitanakoan te reirei ao karekean te boo ae teimatoa bon baika a riai n waiakinaki, I bon karikii bwa au moanibwai aika korakora. I a rootaki iai. I a ataia bwa N a bon rootaki n te rawawata ni karokoa ae I reiakina aron bitakin baike I iangoi n au iango.
Kabotoa am Taratara iaon Tera ae Kakawaki Riki
I tataro nakon Tamara are i Karawa ao ni butiia ngkana E kona ni buokai ni kabotoa au taratara iaon bwaai aika a kakawaki riki. I moanna man warekan koroboki aika tabu. Ngkai I kamatebwai kiibu ake I taku bwa e a bati au tai ni wareki mai imwaina, karaki aika I atai aikai a moanna n tiku n au iango. I namakina te Tamnei ae Raoiroi bwa e reitaki ma ngai!
Teuana te karaki ae korakora nanona irou bon are taekan te ataeinimwaane ae kaubwai. E taku Iesu nako ina: “Ngkana ko kan riki ni moan te raoiroi, ao ko na nako ni kabo am bwai nako n anganiia akana aki kaubwai, ao e na reke am bwai i karawa iai: ao nako mai n irirai” (Mataio 19:21).
Ngke I wareka te karaki man te boki ae tabu, I namakina tuangau bwa N a toki ao n iangoia bwa e kanga ni kaeineti aei nakoiu. N te moan tai, kanga e taraa n ae akea te bwai ae titebo arou iai ma te ataeinimwae ae kaubwai—e a kaman reke kaubwaina ao e aki kukurei n anga nako. Ngai, n te itera are teuana, I tuai kaubwai, ao I iangoia bwa au kekeiaki ni karekea te mwane ae mwaiti a bon eti.
Ma I kunea i mwiina bwa e na bon kangaanga irou kanakoan au mwane, n aron te teinimwane are e kaubwai. Riki n ataakina ae I a tia ni korakai ni kanakoa te bwai are I uaiakina ibukin te mwane ae mwaiti.
I tangiria ni manga katuka Tamara are i Karawa bwa te moanibwai i nanon maiu. I baireia bwa N na kauka au tienoo, ao ni korea te bwai are I namakinna, ao n oki rikaaki n noori baike I a tia ni korei ni mataata raoi bwa tera ae kariki moan tangiran bwaai aikai.
Ngkai I karaoa aei, I a rikirake n ataia bwa ngaia a bon bane tain baike I moanibwaii. N aron ae I nooria n teuana are koreaki, “I bae ni iangoia bwa N na kanga ni kabwaia man aikai ni kabane nakon riki ae N na kanga n nakoraoi ke ni buokiia tabeman.”
N tokina, man kamatebwaian koroboki aika tabu, n ongora nakon te Tamnei, ao ni koroboki n au tienoo, I a moanna ni bitaki.
Onimakinan te Atua nakon riki te Mwane
E a tia n rangi ni kamiimii namakinan te berita are n Taeka n Rabakau 3:5–6 bwa e koro nanona i nanon maiu:
“Ko na onimakina te Uea n nanom ni kabanea; ao tai mwiokoa oin am ataibwai.
“Kaitaua ni bwaai ni kabane, ao e na kaira kawaim.”
Ae I bon teimatoa ni karikirakea au tarena ao ni mwakuri korakora iaon au reirei ao au mwakuri ni korotamnei. Ukoran kamanoam n te mwane ibukin karekean bwaai i bon ibukira ao ara utu bon te nano ae eti. Ma irarikina, ti riai n rangi ni karaurau n aki karika arora n rikirake ao te mwane bwa a na riki n rangi ni kakawaki iaon bwaai ni kabane.
Ni boong aikai, I a aki tabe bwa N na rangi ni kinaaki ke ni karekea te mwane ae mwaiti rinanon baike I karaoi. I a ataia bwa maiuakinan te maiu are I a kona iai n tangiria—ao n namakina te tangira mairoun—Tamara are i Karawa ao Iesu Kristo, au utu, ao ni baike I karaoi e bon tau ibukiu. I a aki kakai un man reken kabanemwane aika aki ataaki ke man reken tekeraoia aomata tabeman. Ni kaitaraana, e a bane riki nanou nakon ana euangkerio Iesu Kristo ibukina bwa e reitinako ni kamaiuai man te maiu ni kan bwaibwai, kakabotau, ao man te reitinako n aki rauaki. Ao ngkana I a moanna ni mwaninganako, koroboki aika tabu ao burabeti aki toki ni kauringai bwa tera ae bongana riki n te maiu.
Beretitenti Russell M. Nelson e anga reirei:
“Ngkai te aonaaba e kairoro bwa te mwaaka, te bwaibwai, kinaakira, ma kakukurein te rabwata anganiira te kukurei, ma a bon aki! A aki kona!
Te koaua bwa e rangi kakua riki bon ukoran te kukurei n taabo ake aki kona ni kuneaki iai! Ma e ngae n anne, ao ngkana ko kanimko ma Iesu Kristo ao ni karaoi mwakuri ibukin maiun tamneim ake a kainnanoaki bwa ko aonga n tokanikai iaon te aonaaba, bon tii Ngaia n akea riki, ae iai irouna te mwaaka n eutikorake man te aonaaba aei.”
Tokanikai i aon te Aonaaba
Te bitaki are e buokai iai te Tia Kamaiu n tamneiu e a tia n rangi ni kamiimii. I a ataia ngkai bwa te tokanikai bon tiaki iaon karikau bwa N a rangi n rianako ke kakorakoraan arou man mwaitin au mwane ake I karekei; bon iaon namakinan te kakaitau ibukin te tai are ti rinanona n te maiu aei ao n norii kakabwaia aika kamiimii are e aki toki Tamara are i Karawa ni katauraoi ibukiu. I ataia bwa ngkana I Karimoaa, a na bane n nakoraoi bwaai ni kabane.
I kaungako bwa ko na iangoi bwai ake a moa ni bwai i nanon maium. Ko bon kabotoa naba ngkai am taratara iaon bwain te maiu aei ao baike akea iroum? Ke ko kabotoa am taratara iaon bwaai aika a rangi ni kakawaki riki? Bwaina te kokoaua i bon iroum. Taraia ngkana ko riai ni kaeta kawaim n oki nakon te Tia Kamaiu.
Ngkana ko rinea anne, ko na kunea te kimwareirei ae bati nakon are ko iangoia bwa e na kona n reke.