Bwanaaia Aika Itiaki ni Boong aika Kaitira
Te Bong ae Moan te Tamaroa
Te Uea e kabongana rikin tamau ae te aboriginal ni buokia n raoiakinna ma ara utu.
Tamau are e a tia ni mate, Claude Rou, ae mate n 2015 n aki maan i mwiin bwabetitoana. Mai i mwaaina, tinau, tariu ao mwaneu, ao ngai ti a maan ni kaaina te Ekaretia, ma i nanon ririki aika mwaiti e tiku tamau n aki anaaki nanona n aki kan kaainna.
Inanon te tai ae maan, e taku, “e rawawata nanou, ao I rikirake n uun man kakawarakiu irouia natiu ao tibu ao I tangiria bwa N na kaokoroai mai irouia au utu. E rikirake te kaiangatoa i nanon mweengau, ao au reitaki ma kainabau e a rikirake ni kangaanga.”
Inanon te tai aei, e a moana kakaean rikaaki ana bakatibu n rikina n aboriginal mai Kanata, ake bon te kanoa man te botanaomata ae te Mi’kmaq ao te Huron-Wendat. Imwiin reitakina ma te komiunite ae te Mi’kmaq i rarikin te tabo are e ikawairake iai, e a kaoaki nakon te powwow, te bukamaru irouia Aika bon Kaain Amerika.
N te tairiki anne n tain te powwow, e arora baina te mataniwi ae rietaata n te baronga ao n tuangiia ataei bwa a na nakoina bwa e na kakabwaiaiia. Baike a taekinaki ake i mwiina iaon kakawakin te utu ao te bakatibu e rota tamau n ai aron te baa.
N te tai anne, e taku, “I noriia au utu bwa a kaenakoi baia nakoiu ngke I tannako mai irouia. E roko irou te nanokawaki, ae moan te korakora n ai aron ae kanga e a urubekebeke nanou. I ataia man te tai anne bwa te Uea e kabonganai aia taeka au bakaibu ni kamaraua nanou. I ataia bwa I riai n rairaki nakon Tamara are i Karawa ao ni manga kaeta te uruaki are I a tia ni karikia ma au utu.”
E moana karekean te rau ma ara utu Tamau, bubuti kabwaraan ana bure mai irouia kaain te utu n tatabemaniia. Man aia banna ni katooto kainnabana ao natina, e a moana ana tataro ao ni wareka Ana Boki Moomon. Ngkai e a tia ni wareki rongorongo aika kawakinaki iaon te aba ae Amerika, e moanna ni katikaki nanona nakon Ana Boki Moomon. Ataakin raoi koauana e a kamatoaaki nakoina n te tai ae waekoa.
“Ni katobibiaki irouia au utu, I a bwabetitoaki bwa kaain Ana Ekaretia Iesu Kristo Ibukiia Aika Itiaki ni Boong aika Kaitira,” e taekinna. “Anne bon te bong ae moan te tamaroa i nanon maiu! I kakoauaa mwaakan te katooto n te tangira. Inanon 36 te ririki, e teimatoa n ana onimaki kainabau ao e kaota anuan Kristo nakoiu, e ngae ngke e matoa nanou. Imwiina, n te wikente teuana a bitaki bwaai ni kabane ibukiu.”
Ana karaki tamau ae tamaroa e kauringiira bwa “bain n nanoanga” te Tia Kamaiu e aroraki nakoira [ni kabane]” ao ngkana ti rairii nanora, E na bon butimwaiira (taraa Aramwa 5:33).