Naan ko Rem̧m̧an kōn Iakwe im Lan̄lōn̄

Juon rujlo̧k in juon raan ekāāl n̄an baamle eo ilo buļōn wōjke ko, ijo Anij Jemād im Nejin, Jisōs Kraist rekar waļok im kenono n̄an Josep Smith n̄an uwaake jar eo an Josep ke ej dik kōn kabun ta eo ej aikuj kobaļo̧k ie (lale Josep Smith—Bwebwenato 1:14–20). Jisōs Kraist eaar jiron̄ļo̧k Josep Smith bwe en jab kobaļo̧k ilo jabdewōt kabun̄ ko. E eaar kallim̧ur bwe jepļaaktok in tarlep in gospel eo An enaaj kar kwaļok n̄an Josep ilju im jakļaj.

N̄an elōn̄, Josep eaar jab jejjōt n̄an kūr eo n̄an jerbal eo eļap an aorōk, im rekar jim̧we. E ekar jab jikuul im ekar juōn laddik jān juōn jikin kallib edik ilo juon bukwōn jidikdik. Ejjeļok āinwōt an jet kar ba kake Rilomo̧o̧r ilo tōre eo An, “Ej ke wōr jabdewōt men eṃṃan ej itok jān Nazeret?” (Jon 1:46), elōn̄ rekar ļōm̧nak ta em̧m̧an enej itok jan juōn 14 iiō eo ekar jab jikuul im edik jeļā ippān ilo Palmyra, New York. Ako jān Josep—Ilo an jab kar ekkar n̄an kile—Jemedwōj ilan̄ im Irooj Jisōs Kraist rekar boktok menin būlōn̄ ko. Men in ej aikuj boktok n̄an kōj kōjatdikdik bwe ilo wāween ko redik im rōttā, jemaron̄ kōm̧m̧ane ijoko koņaad im raurōk n̄an jerbal in an Irooj.

Ejjōb to, Irooj eaar kūr ioon Josep “im kar kōnono n̄an e jān lan̄, im kar leļo̧k n̄an e kien ko” (Katak im Bujen ko 1:17). Josep eaar bōk revelesōn ko raorōk im katak eo aorōk im ej boktok meram n̄an jeļā kein ad kōn karōk in iakwe eo an Jemed Ilan̄ im Iakwe in lo̧mo̧o̧ren eo an Kraist im kajoor in katok in pinmuur eo An. Ilo jejjōt in, kōjeram̧m̧an kein rekar itok ilo iien eo ekkar im emenin aorōk n̄an wōnm̧aanļo̧k ko ilo ial in m̧akūtkūt, kenono, im bar jet eria ko renej kōtļok bwe meram eo an Anij en waļok n̄an kōjeraam̧m̧an elōn̄ im lōn̄ ro Nejin.

Enjeļ Moronai ej Leļo̧k Pileij ko n̄an Josep Smith,, jān C. C. A. Christensen

Juōn Kam̧ool Ekajoor kōn Iakwe eo An Anij

Waļoktok eo an enjeļ Moronai n̄an Josep Smith eaar menin aikuj n̄an jepļaaktok eo im kein kam̧ool em̧ool kōn iakwe eo an Anij. Moronai ekar jiron̄ļo̧k Josep kōn juōn rekoot eo, em̧ōj jeik ioon pileij gold ko, kar kalbwini juōn jikin epaak ( lale Josep Smith—Bwebwenato 1:33-34). Ejjōb to, kar leļok n̄an Josep “kajoor eo jān ijo eutiej” (Katak im Bujen ko 20:8) n̄an ukote ļo̧o̧k eo bwe en waļok Bok in Mormon, eo ej jutak ippān Baibōļ eo im ej bar juōn kallim̧ūr kōn Jisōs Kraist.

Ilo aolepān Bok in Mormon, jej riit kōn armej ro, bukwi iiō ko m̧okta jān Kraist, kar jeļā im kwaļok kōn itok eo An im kar reim̧aanļo̧k n̄an e. Jej barāinwōt lo jet ļo̧o̧k ko kōn waļokļok eo an Rilo̧mo̧o̧r eo ālikin an kar jerkapeje im kwaļok ilubwilijin Rinipai ro, eo ekar karuwaineneik aolep n̄an itok n̄an E im en̄jaake kākōļļe in dila ko Katin, Pein im Neen (lale 3 Nipai 22:14–15). E eaar kōmour rinan̄inmej, riakā, ripilo — “im aolep er ro raar m̧ōjņo̧ ilo jabdewōt wāween otemjeļo̧k”—innem kar kōjeram̧m̧an ajiri jiddik ro im jar kake er (lale 3 Nipai 17:7–9, 21). Jej katak eļap kōn iakwe eo an Rilo̧mo̧o̧r im an tūriam̧o jān ļook in ekwojarjar.

Bok in Mormon ej kam̧ool bwe “Jisōs ej Rikraist.” Naan in kallim̧ur ko ilo Bok in Mormon ekkā aer kakeememej kōj bwe Jemedwōj Ilan̄ im ad Rilo̧mo̧o̧r rej iakwe kōj eļapļo̧k jān jabdewōt men jemaron̄ ļōm̧nake.

Jepļaaktok eo ekar wōnm̧aanļok kōn waļoktok eo an rijilōk ro jet jān lan̄ n̄an Josep Smith “Jon Ripeptaij eo im ekar jerkakpeje ekar kōjepļaaktok mālim eo n̄an peptaij kōn tuļo̧k ilo dān n̄an bōk jeo̧rļo̧k in jerawiwi. Jilu iaan Rijilōk ro jon̄oulruo jinointata—Piter, Jemes, im Jon—kar kōjepļaaktok tōl eo an rikaļoor im kii ko an mālim in priesthood. Ro jet rekar bar itok, ekoba Ilaija, eo im ekar kōjepļaaktok mālim eo n̄an kakobaik baam̧le ko n̄an indeeo ilo jem̧jerā eo n̄an indeeo im ej eļļāļo̧k jān mej.”

Ilo Āprōļ 6, 1830, Jisōs Kraist ekar ejaake ilo Rikanaan Josep juōn kabun̄ ālikin kar wāween kabun̄ eo Ekar ejaake ilo tōre ko an ilo Kallim̧ūr M̧okta (lale Laajrak in Tōmak ko 1:6), kadedeikļok kōn “pedped an rūjilōk kab rikanaan ro, Jisōs Kraist make ilo an juon ejm̧aan eo” (Epesōs 2:20). Kabun̄ eo an Jisōs Kraist im Armej ro Rekwojarjar ilo Raan Ko Āliktata ej kōm̧m̧ane kōjeram̧m̧an ko an jepļaaktok in kajoor in Priesthood eo n̄an aolep ro nejin Anij ro rej kōpooj er make n̄an bōke.

Āinwōt an Būreejtōn Russel M. Nelson katakin kōj, jemaron̄ lo lan̄lōn̄ ilo ad ukweļok kajjojo raan im ilo ad reilo̧k n̄an Jemedwōj Ilan̄ im ad Rilo̧mo̧o̧r. N̄an ro enana aer mour ak ro rej en̄jaake aer make iaer: aolep rej ruwainene n̄an itok n̄an Kraist im Kabun̄ in An. Kabun̄ in ejjōb juōn jikin kabun̄ jar n̄an ro rewānōk ak juōn aujpitōļ n̄an ro rinan̄inmej. Elder Dieter F. Uchtdorf jān Doulul eo an Jon̄oul ruo Rijilōk ro ej kakeememej kōj bwe “Jejjōb itok n̄an m̧ōn jar n̄an ņo̧o̧ji inepata kein ad ak n̄an mour jāni.”

Ilo jikin jar eo jej lo m̧ōņōņō ilo jekjek ko n̄an kaoktak kōj, jipan̄ ro jet ilo iakwe, im kwaļok men ko jekar iooni ippān em̧m̧an ko an Kraist ejjeļļok jem̧lokier. Jemaron̄ “bōnbōn ilubwiljin armej ro an kabun̄ eo an Kraist” im “maron̄ keememej im naajdik er jān em̧m̧an eo an naan in Anij” (Moronai 6:4). Juon kōjeram̧m̧an eļap!

Rikanaan Josep Smith ekar kwaļok, “Kiiō, ta jej ron̄ ilo gospel eo me jaar bōke? Juon ainikien em̧m̧an! Juon ainikien tūriam̧o jān lan̄; im juon ainikien m̧ool jān ilo laļ; ennaan ko rem̧m̧an n̄an ro remej; juon ainikien em̧m̧an n̄an ro remour im ro remej; ennaan ko rem̧m̧an kōn lan̄lōn̄ eļap” (Katak im Bujen ko 128:19).

Naan in kōjeram̧m̧an kein raar itok kōnke Jemedwōj Ilan̄ im Nejin Ejitōn Bōro, Jisōs Kraist, rej iakwe kōj im kōņaan—jān aolep men— karuwaineneik kōj n̄an Ippāer, bwe jen maron̄ mour n̄an indeeo āinwōt mour ko Aer. Jepļaaktok eo ej kwaļok bwe emōj Aer kōm̧m̧ane aolep men aikuji n̄an letok juon kōjātdikdik eļap n̄an kōj aolep. Ilo ial in ad n̄an indeeo, jenaaj ioon mālijjon̄ ko im men ko reppen, ak “[jen] maron̄ āinwōt, bwe [jen] maron̄ m̧ōņōņō” (2 Nipai 2:25) ilo mour in im eo ej itok. Rikanaan Josep ekar jeļā men in jān elōn̄.

Josep ekar ioone elōn̄ jum̧ae im kakure, ijoke ekar dāpiji “lem̧ōņōņō eo an” (Josep Smith—Bwebwenato 1:28). E ekar ped wōt ilo an m̧ōņōņō, kajoor, im peran, im ekar kōm̧m̧ane jerbal in ekabwilōn̄lōn̄ em̧ōj leļok n̄an e. Ij kwaļok ao naan in kautiej n̄an armej ro rekwojarjar jem̧aan ro rekar tōmak, jipan̄, im ļoor Rikanaan Josep Smith im leļok aer n̄an m̧ōn jar in. Eļap ad m̧ūri ippāer kōn kam̧m̧oolol im naan in kautiej.

Ekar jab pidodo ilo tōre ko jinoin n̄an Kabun̄ in, im emaron̄ jab pidodo rainin. Ako Jepļaaktok in ej wōnm̧aanļo̧k wōt. Ilo an Jisōs Kraist bōran Kabun in, rikanaan ro rej mour renaaj wōnm̧aanļok n̄an tōl kōj. M̧wōko m̧ōn Irooj renaaj wōnm̧aanļok in ekkal, bwe kōjeram̧m̧an ko an bujen ko an indeeo ippān Anij remaron̄ liāpe kōj n̄an E im n̄an ro jej iakwe er ilo jait ko jim̧or ilo veil eo (lale Matu 16:19). Iakwe eo an Jemedwōj Ilan̄ im Jisōs Kraist enaaj ajedeed n̄an aolepen ļal ilo ad ļoore ta eo Rilo̧mo̧o̧r ekar ba n̄an naajidik jiip ko An im jaketo-jaketak gospel eo An. Jenaaj kam̧ool m̧ool kein kōn Jepļaaktok eo ilo an wōnm̧aanļo̧k ilo wāween ko im n̄an jikin ko epen nej kar ad kōtmene ilo tōre ko an Josep.

Jemaron lo kajoor im eļap lan̄lōn̄—āinwōt Rikanaan Josep ekkar—ilo ad atbo̧kwōj im mour kōn m̧ool kein raorōk. Kūr eo Josep ekar kōm̧m̧ane n̄an Armej ro Rekwojarjar ilo tōre eo an ej wōnm̧aanļok wōt ippād rainin: “Ta jeban bun̄m̧aanļo̧k ilo juon jibadbad eļap ke? Bun̄m̧aanļo̧k im jab kelik. Peran, … wōnm̧aanļo̧k, wōnm̧aanļo̧k n̄an anjo̧! Būruōmi ren lan̄lōn̄, im m̧ōņōņō otem m̧ōņōņō.” (Katak im Bujen Ko 128:22

Kōjātdikdik bwe naan ko rem̧m̧an kōn iakwe im lan̄lōn̄ Jepļaaktok eo ej boktok en kōjeram̧m̧an im tōl mour ko ad—rainin im aolep iien.