Tabinaew Nibay ko Lukngun e Gospel ku Yesus Kristus

Fare yalen Fare Galasia ku Yesus Kristus ni fan ko Gidii’en Got ko Tin Tomur e Rran ea bay niʼir e lukngun ko tabinaew. Baga’fan ko fare machib rodad ko tabinaew e temple. Fapi gam’ing nikad thapeged urom e ke bing wo’en ni ngad suled ni gadad e tabinaew ni dariy bi’id manemus nga pow’chen e Chitamangdaed nu Tharmiy.

Napan e general conference ko April 2025, President Russell M. Nelson e ke yoeg ni ngan toey 200 e temple nib be’ech. Rrba’adag nima yoeg ni ngan toey e temple nib be’ech u tomuren e numon rok’ ko general conference, ni gadaed be un ngay ko falfalaen’ riy ngak. Machane, bachan e rbo’or e temple e chiney ni fini giybe toey e chiney, ere rayog makab tu’uf ni ngan saga’alnag i weliy i toey e temple nib be’ech. Ere, fare Ulung ko fare Ragag nge L’agruwi Apostle nikar pi’ed mat’won, dabgu weliyed e temple ni ngan toey nib be’ech ko biney e conference. Gamad e chiney e nggu ul’ul’gadi yean nga m’on ni ngan pi’ fapi gam’in gko temple ngak e members ko Galasia udakean e fayleng, nib mu’un e roffen nge ggin ni ngan toey e temple riy nib be’ech.

Giney ko numon rog ni kugog e kan yoloey u tomuren nike yim’ President Russell M. Nelson. Tin nibay yib u tomuren riy e kan yoloey ma kan pi’ mat’won boch e wik um’on riy, machane kabay rogon ko tin ni nggu machib nag, nike thogthog nag Somoel.

Fare bbugi thin ngak e tabinaew, ea nipiʼ nike gamon guyey ea duw nap’on, nibe yoeg ni “tabinaew eke yibliy Got” ma “baga’ fan ko gagyog roek Samoel nifan ko milekag ko bitir roek.” “Motochiyel rok Got ngak pi fak e ngar diyen gad miyad suguy dakean e fayleng.” Nge, “gamad be yoeg e re bugi thin ney ni Got e ke motochiyel nag ni fapi gelingin ni yima sunumiy e bitir riy nib thothup e karimus nra buch u thilin e pumoʼon nge bpin, ni rogon e motochiyel ko mabgol ni wod e figirngiy nge leʼngiy.” Woed rogon ni michib nag i Elder Russell M. Nelson ko fapi gidii’ niaby u Brigham Young University, ni tabinaew ea “baga’ fan ko gagiyog roek Got. … Ere, fan ea re gagyog nem ea ngan toelang nag ea tabinaew.”

Fare Galasia ku Yesus Kristus ea yimnang boech i ngiyal’ ni Galasia nifan e tabinaew. Er rogon! Tha’ rodad ngak Got nge fen ea yafos rodad u fayleng ea kan weliy ni rogon ea tabinaew. Fare gospel ku Yesus Kristus eb gagyog ku Chitmangdad nu Tharmiy nifan ko bitir roek ni bugi ya’al. Rrayog ning noeg ni fare gagyog ko gospel ea nifil ngodad u langgin fare mu’lung nnitay nifen ko tabinaew nib manimus, ni kan rin’ u daken ea tabinaew u fayleng, ni rogon niybe lemnag ni ngani mus ea ngan toelang nag ea pi bitir ku Got u langgin ea tabinaew nib manimus.

Aram rogon nibay e biney e machib, ku bay e togopluw riy. U roey u Miriken ea kad gafgow gad u wagagayen ea mabgol nge fakay ea bitir. Ya kari chugur ni nge gamon ra’ay ea duw nipi tabinaew niybe, mabgol riy ea kari buch’uw, ma ku’errogon ea gargel. Mabgol nge diyen ko pi choenggin ea Galasia rodad ea kabfel’ boech, machene karki yan nga but’ nib gel. Rib ga’fan ni Girdii’en Got ko tin Tomur e Rran ea dabir n’eged ea lowan’ rorad ko mabgol nge bitir nib ga’fan. Fi’ir reram ea tin ngaram nigdad be athmagliy. Ke machib nag President Nelson ni “N’uf ngalang ko falfalaen’ e fan ko tabinaew.” “Kemus nu daken ea gam’ing ko gospel roek Yesus Kristus ea rayog ni tabinaew ea nge toelang ngalang.”

Sobut’ nag ea mabgol nge fakay ea bitir ko national ea yibe nangfan nifan ko historic, machene Girdii’en Got ko tin Tomur e Rran ngongolenrad ea ngathangri mon’og—dabi un ko—tin aram rogon.

Napon ni kugub pagal nike gaman 80 ea duw palgen, ug par ko fargi farm ko tutuw nge titaw roeg ni gubin ban’en niybe rin’ u reb ea rran ma yibe rin’ u tangin gagyogen ea tabinaew. Dariy ea tv fa bugi electronics ninge palog nigey ko gam’ingin ea tabinaew. Tin chiney ea rran ea buch’uw ea choenggin ea galasia nibe muruwliy gam’ingin ea tabinaew. Tin chiney ea par nge milekag, gosgos nikan yarmiy, nge manon ni kari-popoy ea ke moem nag ko fapi fel’yangren ni ngar ted tafarad ni boed ea boardinghouses niyad ma mol nge abich riy ni dakir ga’ foen fagli labthir ko gagyoeg rorad.

Raragon ea labthir eke mo’war nibchan ea beyan u rogon nibe muruwliy ea tin ni kab be’ech choenggin ea galasia ea murwel ko yafos rorad. Ni kakurom, reb ea rarogon nima kunuy ea tabinaew nga ta’bang ea ragon ea gafgow ni’in tay u ta’bang nifan ta’abnen—ni boed bangi loway niyad be t’ar fa murwel nifan ko yafos. Tabinaew ea kan yarmiy min muruwliy ni reb ea economic production. Biney ea rran, bodke urngin ea tabinaew ma ke mang units ko economic consumption, nidar t’uf ea degree nibga’ ko mokun ko tabinaew nge coorperation.

Raragon ea labthir nibe mo’owar, Girdii’en Got ko tin Tomur e Rran ea kaba’ mat’owrad nipi’ Got-ningar filed ngak pafak rad ningar faleged rograd ko kanaw’en ea tabinaew rodad nib manimus (muguy ko Doctrine and Covenants 68:25). Thingar drin’ed banen ni arrogon u napon ni urngin gidi’en ea tabinaew rodad ea dar rin’. Madar ko mabgol, yam’, nge dar ea kan par niybe rin’. Kug nang ban’en ni aram rogon ko fare tabinaew nigu ilal riy.

Chitamngig ea yim’ ni medlup ea duw roeg, ere reb ea pagal ni walageg nib bitir nge reb ea bpin ni walageg nge gag ea gu ilal gad ko chitningmad nidariy figirgin. Ma pi rarogon nibgel ea magawon riy, marbe athamgil. Yigo’ ir rok’, machane Somoel e ke pi’ gilngin ea machib ni’i tay ni marnge’gen e Galasia nikan sulweg ebe pow’iy mad. Rogon ni meybil nifan ko ayuw u tharmiy urogon ninge chugliy pifak, er ni taw’ath nag riy! Ni chugliy mad ko ba tabinaew nib falfalan’ ni chitmangmad nike yim’ ea gubin ngiyal’ maybe lemnag. Yoeg ngomad ni’i moe’ ea chitmangmad ma ki’i moe’ figirngin mabay ug pired ni gamad reb ea tabinaew nibchan fare m’agpa’ nirtew u temple. Chitmangmad ea keyaen ni dabi n’uw napon nibchan i Samoel eke pining ngareb ea murwel.

Gumnang ni bo’or boech ea tabinaew nide falfalan’ rad, machene gubin ea chitinngiy ni dariy figirngin ea kura yog ninge michib nag fare adag ko Chitmangiy nu Tharmiy nge taw’ath ko m’agpa’ u temple. Maku’er megur ea rayog ningam rin’e tiney! Fare gagyogen ea Chitmangdad nu Tharmiy eke m’ag rogon ko gubin ea girdii’. Ke m’agan’ dad ko fare m’agpa’ u temple nge taw’ath ko m’ag ea tabinaew nga ta’bang ninge par nib manimus. Boed ea chitinngig, gamad ba’dag ni gamad ma yoeg ea n’en ni michmich nag Lehi ko fare pagal nifak ni Jacob ni Got “ere yibliy ea pi mo’owar roem nge mang ea tin nib ga’fan ngom” (2 Nephi 2:2). Ta’reb rogon ni gubin ea tabinaew ko Girdii’en Got ko tin Tomur e Rran, nib poloek fade poloek ea chiney. Gadad e tabinaew ko galasia.

Chep rodad nge michan’ roadad ko tabinaew nib manimus ea be pi’ gilingdad maku be m’ag dad. Rridab gu pagtilin ea michmich ko Tutuw roeg i Harris, ni napon ni kagmad bitir ni’ug pired ko fargi farm roek u ta’ben Payson, Utah. I yoeg ngoeg ba thin nib kirban’ ni marnge’gen ea chitamag nike yim’ nib palog u Denver, Colorado. Mug mil ngalanggin ea singgil nugma mol riy mug rogbog nga but’ nga to’ben ea bet roeg, mu’ug yoer. Me lakeg tutuw me rogbog nga but’ nga ta’beg me ga’ar, “bay gumang chitmam.” Re michmich nem ea ban’an nib gel ko mang ea rayog ni nge rin’ ea tutuw nge titaw ni ngar gomniygew ea tin nib t’uf u napon ni ke yim’ fake yan ngabang rebe choenggin ea tabinaew.

Labthir—nide mabgol fake mabgol—nge ku boech ni boed ea tutuw nge titaw, niyow be gomniy i muruwliy nifan ko bitir—ea yad ba sensey nibcheg. Tin th’abi fel’ nikar filed ea keyan u rogon ea ngongol rorad. U langgin ea tabinaew ea ir ea gin’en ni ngan dag rogon min fil marnga’gen ea tin nib manimus ni boed fana ga’fan ea mabgol nge bitir, gam’ingin ea yafos, nge tin nrib riyul’ wo’en ea falfalan’ Ma ku’ir ea gin’en nrib fel ni ngan fil boech ban’en nib t’uf ko yafos, ni boed ea, gol, man’agfan, gam’ing nigey, nge fen nib fel’ ea skul nge murwel nib yul’yul’.

Arogon, bo’or choenggin ea Galasia nibay gidi’en ea tabinaew rorad ni danirma tay uyngin ea tin nib fel’ ko gospel nge tin nibe nameg. Picha’nem ea bat’uf rorad ea adag nge gumaen’ rodad. Ta’reb nag be’ ngak be’, thingar tafney niged gagad nifre kanawo’ niffel’ nigdad be gay ea de meleg nibchan ea rarogon ea gafgow kore yafosney. Fare michib nrib fel’ ko Doctrine nge Covenants 138:57–59 ebe micheg ngodad ni kalngan’uy nge gilngiy nib thothup ea kura buch u fayleng ko ya’al u tomren ere yafos ney. Ma boech nikub ga’fan, napon nira yib ea tabinaew ngata’bang ngar pi’ed gilingrad, thingar da tafney nigey gadad nipi denen nge pi kirkireb ni gadad be awngay kore yafos ney ea rayog ni ngan n’agfan u daken ea kalngan’uy nibchan fare miligaech nitay Yesus Kristus.

Samoel rodad ni Yesus Kristus ea ir ea kanawo’ rodad nib fel’. Yira taw’ath ni fa’an gadad ra ta’reb nag ea yafos rodad ko michib roek nger miligach ni tay. Lek Kristus nge ayuwegged gadad ea bin thabi fel’ ea falay kofre si’in nge to’gor ni’ir ebe buchbuch.

Pi labthir ea kubay mat’owrad ni ngar michib niged ea bitir rorad ko tin niyug lowan’ eb thil ko tin mat’owngin ea gospel. Pi tabinaew ere mukun ni fa’an yadra ngongliy bugi ban’en nib ga’fan u ta’bang. Milay’ u tabinaew ere ngonggliy ea tha’ u thilin ea tabinaew. Fafalan’ u tabinaew niy be tay ebe gel nag fare tha’ ko tabinaew. Camping, sports activities, nge ku boech ea pi gosgos ea rib ga’fan ni nge kunuy ea pi tabinaew nga ta’bang. Pi tabinaew ea thingar muruwliyed reb ea mukun ko tabinaew ni ngan lemnag ea pi girdii’ ni kakrom, nib sar ko temple.

Pi labthir ea thingar rifled ngak pifak rad ko rogon bugi ban’en ko yafos nimmu’un ea murwel u tabinaew ngay. Fil boech ea thin eb mangil nra fal’ag rogoy ko murwel ko missionary nge bin chiney ea yafos. Sensey ko pin’ey ea rayog ni pi labthir fapi tutuw nge titaw nge pi girdii’en ea tabinaew. Tabinaew ea me fel’ rogon u napon niyad ma fil ban’en nge mu’ulung u ta’bang ngan weliy marnga’gen ea tabinaew nge pi girdii’en.

Ma boech ea yoeg, “Machene dariy ea ngiyal nira yog ning gurn’ed.” Ngan gay bingyal’ ni ngan rin’ ea tin rib ga’fan, bo’or ea pi labthir nikar nanged ni rayog ningar cheleged ea tabinaew rorad ko tin nib ga’fan u but’ ni fa’an yadra tay fapi technologies nib off. Pi labthir, mu tafney nigem riy, ni n’en nir ba’dag ea pi bitir nem ningan kay ko abich ni balayal’ ea bingyal’ ningar tayed roem.

Rib ga’ ea taw’ath nira yib ko tabinaew nima mebil u ta’bang, rogbog nga but’ ko nep’ nge kadbul ngan pining ea magar ko taw’ath min mebil nifan ko tin niybe gafgow riy. Tabinaew ea kiyra taw’ath nag ni fa’an yad ra yan u ta’bang ko misa ma kur uned kopi mulung. Tha’ ko tabinaew ea kuma gel u fidik ea yat’ ko tabinaew, ngongliy ea yalen nifen ea tabinaew, min ser nag ea pi n’en nib thothup. President Spencer W. Kimball eke pug uran ngodad ni yat’ ni mange’gen ea yafos rodad nge picha’ ni kakrom … ea bugi tilin ea chep nib ga’fan.” Boech i ngiyal’ ea rib ga’fan ngodad nge pifak dad.

Gube micheg ni Samoel Yesus Kristus ni ri’ir ea fak Got ni Chitmang dad nib Manimus. Be pining dad ni ngad leked fare kanawo’ nib m’ag nibe yan i yan ko fare mu’lung nibga’ ko tabinaew. Fare gilngin ea m’ag ko priesthood, niyma pi’ ko fapi keys nni sulweg u langgin fare Kirtland Temple, ebe kunuy ea tabinaew nga ta’bang nib manimus (muguy ko Doctrine nge Covenants 110:13–16). Yibe muruweliy u langgin ea temple ku Samoel u daken ea fayleng ni gubin yang. Ba riyul’. Uned ngad manged bang riy, gube mebil nag, u daken fidngan Yesus Kristus, amen.