Bbugi Thin Ngak e Tabinaew—Fapi Thin ku Got

Biney e general conference ko October 2025 eke gamannag fare bin 30 e duw nikan madnom nag “Fare Tabinaew: Bbugi Thin ni fan ko Fayleng.” U dakean e thogthog, biney, nibay e thin riy nike yib udakean e thogthog, e kanni ngongliy ni nge “par ni nge gelnag e tabinaew ni’ir e fare def ko gidii’.”

Ra be’ make sum ko reb e tabinaew, ndemturug ko gur reb e mitin, matam, rugod, pagal, pfak e galabthir, tutuw nge titaw, aunt, uncle, walagag ni bpin fa pumo’on, fa cousin. Sana n’en nth’abi ga’fan, rabogdad, ni wod rogon ni keyog fare bbugi thin, “ni pifaak e galabthir nu tharmiy … [niba’] e “thothup rodaed nge wo’ rodaed nib manemus.”

Napan nin piningeg ni nggu mang reb fare apostel ko 2015, kanog nggog, ni “Biney e thin e ku fana’ e chiney. Fithingam [nib sap ko fare bugithin ni Ulung ko fare Ragag nge L’agruwi Apostles’ e bay ko title] riy. Mu mmath ngay ni gowa tirom ban’en.”

Rib t’uf rog fare bbugi thin ngak e tabinaew. Kugu michmicheg mornga’agen u dakean e nam nu Africa i yib nga Australia nge gubin yangu luk’nggun ko fare mornga’agen e muruwel ko tabinaew ulan fare wo’en e thap ku Got. Biney e bbugi thin ifan e tabinaew e yibu bang nib thothup, ere thingarda cha’ariyed magdad tayfan ya bogithin nike yib rok’ Got.

Kagmed manang, pi brothers nge sisters, niku gog ko fare general conference nike thumur ko re pulpit ney, ni “Bayfan e Thin.”

Nggu weliy boch mornga’agen e gin niyib ere bugi thin ney riy ni’ir e mulwol nifan e pin’in nib michuwun’dad ngay.

Nap’an e 1994, reb e duw um’on ni yib ere bugi thin ney, fare Ulung ko fare Ragag nge L’agruwi Apostles e ribra weliyed rogon ni naam nge am e yaed be palog nag e motochiyel ku Got nfian e tabinaew nga orel, nib mu’un e motochiyel ko mabgol ngay, nge rogon e gidii’. “Machane gathi kemus rogon e pin’en ni kugguyed riy,” nike yog President Russell M. Nelson. “Ku guyed ni bay boch e ulung ko gidii’ ni yaed be gay rogon ni ngar thilyeged e motochiyel nge ngongolen e muruwel ko galong. Ku guyed nibe balyangan’ e pumo’on nge ppin. Ku guyed ni nge buch i pin’ey.”

Fare Ragag nge L’agruw era duugliyed ni ngar ngongliyed ba babyor, bbugo thin ningan official nag, nra weliy mornga’agen e tabinaew ko Galasia. Nap’an ere duw nem, pi Apostle ney, niyad e tathogthog nike mel’eg Got, e rabad ngar ngongliyed reb bugi thin ni mornga’agen e tabinaew. President Dallin H. Oaks e yog nra meybilgad ni yaed be ning e ayuw ngak Somoel ko “n’en ni [ngar] yoged nge rogon e n’en ni ngar [yoged] ni mornga’agen.” Rabra daged ngak fare Bin Somm’on e Presidency—Pi President Howard W. Hunter, Gordon B. Hinckley, nge Thomas S. Monson—ni ngar tafney niged rogon.

Boech e pul nga tomuren, ko March 1995, me yibi yim’ President Hunter me mang Hinckley e President ni’ir e 15th President ko Galasia. I ir e mul farre bugi thin ngalan pa’. Wi’in e puluw riy ni ngan duugliy e biney e thin nifan e Galasia? Biney e buch ko nel’ e pul ta’boech.

Boech e rran nga m’on riy ko September 23 ko fare mo’olung Relief Society ni yima tay um’on ko general conference, me yibi mo’olung President Hinckley nge fagli counselor rok nib mu’un e Relief Society General Presidency ngay. Fapi bpin, ni ku wod fapi Apostles, e yaed be thamiy e tomal nibe yib ko mornga’agen e tabinaew nge pi’in ni bpin. Rabra duugliyed ni mo’olung rorad nga m’on riy e nge par nibay rogon ko mornga’agen e tabinaew.

President Hinckley e ir e kan duugliy ni nge non ngak fapi bpin nibay ko fare mo’olung. Be tafney nag ko mang e n’en ni nge weliy ko ngiyal’ ni nge non ngorad. Biney e general conference ko October 2025 eke gamannag fare bin 30 e duw nikan madnom nag “Fare Tabinaew: Bbugi Thin ni fan ko Fayleng.” Biney e mo’olung nifan e pi’in ni bpin e ireray e ggin nib fel’ ni ngan weliy e biney e bbogu thin riy nifan e tabinaew?

Relief Society General President Elaine Jack ke weliy: “Dan gu nanged ko mang ere bbugi thin ney nifan e tabinaew ko ngiyal’ nem. … Machane [kug] guyed e title riy, ma kug thamiyed ni bay ko rogon mornga’agen e tabinaew … ni ban’en nra yib fal’ngin. … Kug thamiy nrib fel’ mab mangil ni bay reb e chongin e fare Ulung ko fare Ragag nge L’agruw nibe thapeg e yi’iy.”

Fare mo’olung ko Relief Society ko re Sabado nem e rib mangil. President Hinckley nike iyib fare bbugi thin udakaen e pi thin ney nib gaa’: “Bachan e sabanban ni yibe pi’ ni go wod e ir e tin nib riyul’ ban’en, bachan e sabanban ko mornga’agen e yalen nge motochiyel, bachan e sabanban ni nge yog ni ngan chuweg e kireb ko fayleng, kug thamiyed ni nggu tayed chiylen ma gamad yoeg ko gidii’ … mornga’agen fapi motochiyel, fapi yalen, nga fapi n’en ni yima rrin’ nibay fan ko tabinaew nike yoeg fapi profet, fapi tayi’iy, nge fapi tathogthog ko galasia ni gathi ta’abiyay nikar roged nikab kakrom iyib.”

Me mu’ me be’eg fare bbugi thin ni ga’angin yang. Ni wod rogon nike yog Somoel, “Fa’an udakaen e lamag fa e lamrad ko tapigpig rog, ba ta’abrogon.”

Fare bbugi thin e yoeg, ni “Got e ke gayog nag ea Tabinaw.” Ri guba’adag rogon nrib tomilang rogon e biney e thin. Biney e bbugo thin e ba mulwon nike yib nifan ngodad ni ngiyal’ ni gadad be par ufayleng ma thingari paru wun’dad e pin’en nib thothup nge tin nib riyul’ nib manechubog ko mornga’agen e yafos rodad nga mm’on. Ke machib President Nelson, “I gur e ya’el ni bitir ku Got. … Dam fal’eg e oloboch ko marunga’agen e biney: Bay fal’ngim nib thothup. U fithik e athamgil rom, bay nira dag Got ngom e n’en ni gara rrin’ nga mm’on.”

Nap’an nin pi’ mornga’agen e biney, ma bo’or e gidii’ u fayleng ni dani adag rogon e biney e bbugi thin. Gathi ngiyal’ nem. Maka gathi ngiyal’ ney. Tiney e bogi gidii’ ni dabunrad e thin ko biney nifan e tabinaew, mabgol, nge rogon e gidii’. Boech e gidii’ e keyog ni Galasia e kar lufed, kar thilyeged, mab tu’uf ni ngar chuweged e biney bbugi thin nifan e tabinaew.

Fare bbugi thin ngak e tabinaew, e wod rogon nike yoeg President Hinckley, ba motochiyel, pi walageg nib t’uf rog. Yalen riy e dani thil ya ba puluw ko rogon kanawo’en Somoel nge kanawo’en e motochiyel rok’. Fapi machib ko fare bbugi ngak e tabianew e ni thoghthog nag ni yib rok Somoel Yesus Kristus ngak fapi Apostel rok’ ko fan e ngiyal’ nem nge ngiyal’ ney. Iraray e Galasia rok; nike duugliy rogon e riyul’ riy nge rogon ni ngad fol gad riy.

Boechi gimed e bayi be’eg fare bbugi thin ngak e tabinaew me ga’ar, “Biney e gathi fan ngog.” “Wod ni dabi yag rog.” “Tabinaew rog e dani wod ya’an e biney.” “Dariy bang riy nifan ngog.”

Ngak e pi’in nibe tafney ni arogon, wenig mu nang ni igur e bitir ni kamub ko galabthir u tharmiy, bang ko tabinaew rok’ e Chitamangim nu Tharmiy. Dariy be’ ni manangem fa btu’uf rom nib gel ngak. Musap ngak; meybil ngak ufithik’ gum’ircha’em, pagaen’um ngak nge fapi michmicheg rok’. Bay e tabinaew rom ngak fare Tathapeg, ni’ir e Yesus Kristus rom, ni rigab t’uf rok. Ir e yib nga fayleng ni nge bayuliy nag e pi denen rodaed me fek amithngin tomalngin e kireb nge pi rran nrib gel e momaw’ riy. Ir e manang e pin’en ni gabe yaen ufithik nge tin ni gabe thamiy ban’en. Musap ngak; pagaen’um ngak nra pi’ fare Kan ni Thothup ninge par rom, ninge ayuwegnem, me powi’iyem. Thamiy e t’ufeg rorow nra “pu’og nga lan gumircha’en e pi gidii’; … e ireram e n’en ni th’abi fel’ ko gubin banen … ma tha’abi gel e falfalan’ riy ko pi ya’al.”

Gubin e pi Apostle rok’ Somoel ni t’ufgad ngomed. Gamad be meybil nifan ngomed ma gamad be ning ngak Somoel ni nge powi’iy ni fan ngom. Mpar romad. Gabe par ko bangiyal’ nrib gel’ e momaw’ riy ni mo’oniyan’ e be gay rogon ninge pangegem ni ngam mang ngak. Ri damu malog nga orel. Ma fa’anra kam malog, musul biyay. Bmab pa’mad ngom, nge pa’ e pi’in nri gab t’uf roraed.

Fare bbugi thin ngake tabinaew e ga’ar, “Galabthir e bay e murwel rorad ni ngar fanow niged pifak rad ni ngar t’ufegned miyad rin’ e tin nib mat’aw ban’en.” Fare Babyor ku Mormon e pi’ ni bin l’agruw e michmicheg ko biney nib riyul’. Ulan fare bin somm’on e guruy, kad be’eged, “I GAG, Nephi, e gargelegeg e gallabthir rog ni yow ba gol.” U urngindad ni tabab nag i be’eg fare Babyor ku Mormon—me tabab bayay ngo bayay—ni bachan urngin yay e biney make yag ni par e pi thin ney ko tafney rok? Mugay rogon ni nge nang gum’ircha’em.

Bochi e thin ulan e bbugi thin ney ni gube’adag ni’ir: “Falfalen’ u lane yafos ko tabinaew e baga’ ni ma buch u napan ni kan pir’eg u dakean e pin’en ni ke fil Somoel ni Yesus Kristus.”

Mini’ e dabun ni nge thapeg e falfalaen’?

Ere mang e fapi machib rok’ Yesus Kristus? Bayay, ulan fare bbugi thin: “Mich, meybil, kalngan’, n’agfan, tayfan, adag, tu’ufeg, murwel, nge ku boech e ngongol nib mangil.”

Mini’ e dabi mon’og e yafos rok’ u tomuren nike rrin’ e pi machib ney? Dariy bogdad nra rrin’ e pin’ey nib polo’ rogon; machane ra yog ni ngad fanow niged ko rogon fapi thin rok’ President Hinckley nib gonop: “Mu rrn’ u gelngin nra yog rom.”

Bay ulan fare bbugi thin ngak e tabinaew ni, “Fapi matam e ngar gagiyeg niged e tabinaew … u fithik e tu’ufeg nge mat’aw,” ma “fapi mitin e bin th’abi ga’ e muruwel rorad e ngar chathawaliyed e pi bitir rorad.” Gagiyeg niged e dar yipfan ni yead e baga’ lungunrad, nge chathawaliy e dar yipfan ni bin migid ni l’agruw e muruwel rok. Got e ke pi’ ngak e pumo’on nge pi’in nib bpin e muruwel nib thil machane bogi muruwel ni yow l’agruw mab ta’abthal row ni yow be ayuweg row.

Nggu weliy ban’en nike buch rog.

I gag nge le’engig e ku filew rogon ni nga’i ta’abthal mow ko gubin ban’en u tomuren ni kug duugliy ban’an nrib ga’fan nigu duugliy rogon ni dan gu uneg ngay. N’en ni kug rrin’ e ggin owchen ngak, mab momaw’ ngak. U tomuren, me tay pa’ nga dakean poeg me ga’ar nrib gel marrin, “Ron, wenig, ri dabkum rrin’ e biney ngog bi’id.” Kangiyal’ nem ma kug ta’areb gow ko gubin ban’en ke mada’ ko chiney.

Gadad ma pireged ulan fare bbugi thin ni: “Fapi matam nge fapi mitin e thingar ra ayuwegew row ni yow ba ta’areb.”

Ta’areb e bugithin nib ga’fan. U n’umngin napan e duw ni kug muruwel gow Sister Rasband u ta’abang ni wod rogon nike weliy rogon fare bbugi thin ngak e tabinaew ni’ir e fare “muruwel romow ni rib thothup,” ka yog ni kug fal’aged rogon ba mabgol ni gamow l’agruw ni gamow ba ta’areb. Nap’an nra mabgol reb pifak mow, I gag nge Sister Rasband e gamow ma mulwol ngorad nge le’engin fa figirnginrad ko rogon ni ngar ta’areb gow.

Nap’an ni gadad ra par ni kemus ni tirok’ Got ban’en e gadad be sap ngay, ma aram ni gadad ra tay fadad ma gadad ayuwegdad. Tiney e wo’ nib mat’aw era powi’iyed ko yafos nib gapas, ko tabinaew rodad, nge par rodad u fithik’ e gidii’.

Chitamangdad nu Tharmiy e ke pi’ fare bbugi thin ngak e tabinaew ni nge powi’iydad ngad suled ngak, ni nge ayuwegdad ngad filed me suguy dad ko t’ufeg, pi’ gelngingdad, pi’ fadad, nge na’ab ko mornga’agen e tin nib manechunog ban’en. U fithik gelngig, rigu be wenig nag ni ngam par ni gab chuchugur ngak nge fare Fak. Ri gube michmicheg ni fa’an gara rrin’, fare Kan Thothup ere pi’ e thogthog ngom me powi’iyem me ayuwegnem ngam thamiy u lan gum’ircha’em fare gapas ni michmicheg “ni dabi chuchugur ni nge nang e girdi’ fan.” U dakean fidngan Yesus Kristus, amen.