Mu Rrin’ e Muruwel Rom u Polo’i Gum’ircha’em

N’en ni ke buch rog ko fare changgeg nag fare simulator e pugorran nggog ni chag nag ko reb e ban’en—ni demuturug ko changgeg nag e skuukii, fa yap’nag e m’uw, wup’mad, fa kemus ni ngan nang ban’en—e bt’uf ni gubin ngiyal’ ma yibe gay rogon.

Ra yog ni sana bo’or e duw ngay fin aram mag salap ko rogon i fal’ag ban’en. Ra yog ni sana gara muruwel ni rib gel nira mom nggom rogon ni dakmur lemnag rogon i rrin’. Machane fa’an gara tafney nag ni ra yog ni ngam taleg rogon i fil, ma gara guy ni ra waer rogon e tin nikam fil mrayog ni nge malog fapi n’en nikam fil rogon.

Biney e ku wod rogon ni fa’anra gabe fil reb e thin nib thil ko thin rom, wod e fil rogon i chubeng e talen musik, fa changgeg nag e skuukii. Ku wod rogon ni ngan mang reb pi gachalpen Kristus.

Wod ni, mang gachalpen e wod ni bt’uf ni ngam fanow nigem riy.

Biney e gathi ban’en nib moem rogon, ma gathi ra pos me buch.

Michan’ ngak Yesus Kristus e ir reb e tawa’ath, machane ra ngan thapeg e wod ban’an ni ma yib ko tafney nib t’uf fare “pasig, nge laniyaen’med, nge gelingmed ngay.” Ban’en ni ngan gay rogon ngan rrin’ ni gubin e rran. Gubin e awa. Nib mu’un rogon ni nga un fil rogon ni gubin ngiyal’ nge athamgil ngay. Mich rodad, yul’yul’ rodad ngak fare Tathapeg, e ragel ko napan ni yibe sikeng nag ko pi n’en ni be yib ngalan e yafos rodad u fayleng. Mara mon’og ni bachan e gadad be ul’ul’ ni gadad be ayuweg, ni gadad ba gay rogon, ma dabi mulaen’dad riy.

Ma kabay, ni fa’anra dabda fanayed e mich nge fare gelngin nib riyul’ me ngongol riy’, mara marwar e tafney roddad ko pin’en ni’i moey ni gadad manang nib thothup—mara momaw’ ni nga’i par e tin ni kagaed manang nib riyul’.

Fapi lumel ni dan’i yib ngodad era tabab ngabi m’ug nib fal’ya’an u powchdad.

Gelngin e michan’ rom ko tin ni fowap ban’en e kemus nra yog ni nge ayuwegnem ko ta’abochingiyal’ riy. Bt’uf ni gubin ngiyal’ ma yibe duruwi’iy ni nge yag ni nge par nibay rama’en nib tomilang.

Ulan fare bin Be’ech e M’ag, me machib nag fare Tathapeg ba fanathin ko mornga’agen ba masta ni pagaen’ ngak fapi tapigpig rok’ ko mornga’agen ban’en nib thothup—nra bagyad me pi’ urngin ba salpiy ngak ni nge guy rogon ni nge muruwel ngay. Fapi tapigpig nra guyed rogon ni ngar muruwel gad u fithik’ e yul’yul’ ko tin ni yad ba salap riy e ni yo’or nag ngak. Ma fare tapigpig ni upnguy nge mitheg e salpiy rok’ e ni fek rok’ nge chuw.

Pin’en ni nrayag ni ngan fil ko biney e machib? Got e ke pi’ bugi tawa’ath ngodad—tawa’ath ko llowaen’, tawa’ath ko rrin bogi ban’en, tawa’ath ko fal’el’—ma ba’adag ni ngad fanayed ni nge yog ni tawa’ath nagdad ma ki tawa’ath nag pifak. Biney e dabi buch ni fa’an gadadra tay fapi tawa’ath rodad nga dakean e tabel ni wod bogi troffy nikemus ni gadad ba’adag ko bochingiyal’ nge bochingiyal’. Pi tawa’ath rodad e ra yo’or be ga’ ni fa’an gadadra muruwel ngay.

“Machane Elder Uchtdorf,” sana gara yoeg ni, “I gag e dariy boch fapi tawa’ath rog fa fapi n’en ni gub salap riy—ni wod, e tawa’ath nib ga’fan.” Sana wod ni gara sap ngak boch e gidii’ mag guy fapi tawa’ath rorad fa rib fal’el fapi tawa’ath rorad ma bay ni gara thamiy ndariy e tawa’ath rom nib mangil. Sana bay nra yib ko tafney rom ni u napan e bin som’on e yafos, ko fare rran nifan e thapeg nag e tawa’ath, ma wod ni fare palet rom e dariy ban’en u langgin—nrib ga’ ni fa’an bay musap mag guy ni palet ko boch e gidii’ e wod nrib sug ko tawa’ath nrib bo’or.

Oh, rigu be athapeg ni nggu gumuchmuch nigem mug ayuwegem ni ngam nangfan e bin ba’aray e ban’en nrib riyul’: I gur be’ nikan tawa’ath nigem ko tomilang, fare ya’el ni bitir ku Got ndariy bi’id manemus! Ma gur e bay fal’ngin nib gel mab ga’ ma gathi kemus ni bachan rogon ya’am.

Wod reb e poet ni yoloey, I gur e kamub nga fayleng “ufithik bogi maguleeng u tharmiy”!

Gin ni kamub riy e rib thothup, ni ku wod rogon e ggin ni ngam sor ngay. Kam chuw u tharmiy ni ngamub ngaray, machane tharmiy e dawri chuw rom!

I gur e be’ ni rigab cheg ma gab thil.

I gur e gabsug ko tawa’ath!

Ulan e Doctrine and Covenants, ke weliy i Got:

“Ba yo’or mit e tawa’ath, ma [rabe’] makan pi’ reb e tawa’ath ngak u dakean fare Kan ni Thothup rok’ Got.

Bay boch ni kan pi’ ngak ni ta’areb, ma reb e kan pi’ ngak reb e tawa’ath nib thil, [nge] ni nge yog ni gubin e gidii’ me yib fal’ngin riy ngak.”

Boch e pi tawa’ath ney ni bay rodad e kan yoloey ngalan fapi chep nib thothup. Ma bay boech ni danga’.

Wod rogon ni yoeg fare profet i Moroni, “Dab mu feked yathin e pi tawaʼath rokʼ Got; ya rib yoʼor; ni yaed be yib rokʼ taʼab Got.” Bay nra m’ugdad nib “Thilthil rogon ni yibe pii’ e pi tawa’ath ney … ; machane taʼab Got e ma rinʼ gubin banʼen u fithikʼ gubin e gidiiʼ.”

Bay ni sana bariyul’ ni fapi tawa’ath rodad nib thothup e gathi gubin nib fal’ ya’an, machane biney e dar yipfan ni dani ga’fanrad. Ra yog ni nggog ngom boch e tawa’ath ni kug guy nibay ko yo’or e pi memba u dakean e fayleng? Mu tafney nag ko kan tawa’ath nigem ko biney ni wod e:

• Dag e murnguy.

• Guy e gidii’ ni danur tin’uy ngak.

• Pir’eg fan e falfalaen’uy.

• I gur be’ ni gama pi’ e gapas.

• Guy e ma’ang’ang nib achichig.

• Yoeg e thin ni rib yul’yul’.

• N’agfan.

• Kalngan’uy.

• Athamgil.

• Weliy rogon bogi ban’en nib moen rogon ni ngan nangfan.

• Nang rogon ni ngan non ngak e bitir.

• Sustain nag fapi Tiyugang’ ko Galasia.

• Ayuweg e gidii’ ni ngar thamiyed ni yad e bang ko ban’en nib ga’fan.

Sana dabi yog ni ngam guy boch e pi tawa’ath ney ko ward talent show. Machane gu be athapeg ni gara guy rogon nib ga’fan ko fare muruwel rok Somoel nge rogon ni kam ayuweg, tawa’ath nag, nge ayuweg reb fapi bitir ku Got ni bachan e tawa’ath rom. Ted u lan’in’med: “Ni u dakean e tin baʼachig mab moem banʼen e yima muguʼuliy e tin nib gaaʼ banʼen riy.”

Ere dared nra bagdad me rrin’ bang nib achig rogon.

Pi walageg, nge pi tafagar rog, gu be meybil nag ni fare Thothup e ra ayuwegnem ngam guy fapi tawa’ath nge tin ni gab salap riy nike pi’ Got ngom. Ni nge yog, ni, wod rogon fare tapigpig ko fare fanathin ni pi’ Somoel, ni ngad gel niged ma gadad yo’or nag.

Fare rran e ra yib ni gadadra sak’iy u mit e Chitamangdad nu Tharmiy nib sug ko murnguy ni nge weliy rogon e pi muruwel rodad. Ra adag ni nge nang ko mang e pin’en nikad rrin’ed ko fapi tawa’ath nike pi’ ngodad—nrib ga’, ko rogon ni kad fanayed nike tawa’ath nag pifak. Got ni manang mornga’agen dad nib polo’, n’en nra yog ni ngad manged, ere aram fan ni tin ni ba’adag ni ngad rrin’ed e btolang rogon.

Machane dar taga’ ngay ni ngad darod u kanawo’en nib tomggin, chagnag, fa sorok rogon. Ulan e fayleng ni ke sunmiy, mon’og e ma buch nib saga’al mab gumaen’—machane wod ni gubin ngiyal’ ma be rrin’ ma darma tal ko gay rogon.

Ka gama nang, I Yesus Kristus e ke mu’i rrin’ e sorok’ riy ko napan ni tha’eb wo’en e yam’ nge denen.

Gin ni muruwel rodad e ngad laked Kristus. Muruwel rodad e ngad pi’ed keru’dad ko denen, min sap ngak fare Tathapeg, min yaen u kanawo’en, ni ta’areb e rifrif nga m’on nge mu’ fani yib reb. Napan ni gadadra rrin’ e biney, u fithik’ e yul’yul’, ma ra yog ni ngad thuruyed nga palog e tin ni dani fel’ fab polo’ rodad ma buchu’uw nge buchu’uw mra yog ni ngan be’ech nagdad, nge mada’ ko fare ngiyal’ ni bayni polo’ nagdad u dakean Kristus.

Tiney e tawa’ath e ra yog ni ngan thapeg. Tiney e tawa’ath e bay e chiney. Fare maab riy e bay nib maab langan. Mat’wondad ni gadad e ngad darod ngalan ngad tababgad.

Som’on riy e wod ni bachachig. Machane binem e OK.

Ko gin nib mo’owar e mich rom riy, mu tabab ko athap ngak Yesus Kristus nge ulan fare gelngin nra kaleen nigem me be’ech nigem.

Chitamanagdad e ke fith ni ngad rrin’ed e biney u fithik’ e mich ni gadad e pi gachalpen ma gathi bogi gidii’ ni tamilekag machane bogi gidii’ nib michuwun’rad u polo’ i gum’richa’enrad nra paged nge chuwed yu Babylon mi yad tay gum’ircha’en rad, tafney rorad, mi yad yaen ni yad ba sor nga Zion.

Gadad manang ni athamgil rodad ni yigo gadad e dabi yog ni nge fekdad nga celestial. Machane ra yog ni nge ayuwegdad nge pi’ dad ngak Yesus fare Kristus, ma Ir e ra yo gni nge ngongliydad ngad celestial gad.

Ni bachan e Tathapeg rodad nib sug ko tu’ufeg, dariy ban’en ni wod ni dariy be’ nra gel riy. Fa’an gadadra tay a athap rodad nge mich rodad ngak, ma bay e micheg riy ni gadadra gel. Ke micheg nag ni ra yog ni ngad thapaged gelngin, nge murnguy rok’ nrib yo’or. Buchu’uw ni buchu’uw, ma ra yog ni ngad mon’og gad ni gadad be chugur ko fare rran nib polo’ ni gadadra par rok’ nib mu’un e tabinaew rodad ngay ko dariy bi’id manemus rogon.

Ra ngan yaen ngan taw ko ginnem, ma ra be’ ma thingari rrin’ e birok’ e muruwel ni gubin e rran. Og niged e magar ko tin ni kad rrin’ed fowap, machane dab da talgad u rom. Gadad manang ni kab n’uw kanawo’en ni ngad darod riy, machane dabda paged e biney ni nge k’arang e kirbaen’ ngodad.

Irerray fan dad—ni gadad e pi gachalpen Kristus.

Gu be mulwol nag ma gu be tawa’ath nag gubin e memba ko Galasia, nge gubin e bee’ ni ba’adag ni ngar un’ed, ma pagaen’rad ngak fare Tathapeg mi yad un, u fithik’ e gumaen’ nge athamgil ni ngam rrin’ e muruwel rom u polo’i gum’ircha’em—ni nge yog ni sug e falfalaen’ rom ni nge, borran riy, ma yog ni ngam thapeg urngin e pin’en nibay ko Chitamangiy. Ko pin’ney e gube micheg u dakean fithngan Yesus Kristus, amen.