Dariy Be’ ni Yigo Ir Rok’

Ke pag 50 e duw, nikug fil mornga’agen e yalen, nib mu’un rogon e yalen ko gospel ngay. Kug tabab ko fare kooki ni kanog fithingan e kooki ko fortune ngay.

Chinatown u San Francisco, tomuren e abich ko tabinaew romaed gamad ma bing reb e pi okaas ney nima pi’ e thin nib gonop ni wod e “Ba milekag ni gowod e biyu’ e mayl nsomm’on riy era tabab ko bin somm’on e tawo’.”

Napan ni kab fel’yangreg, ma k’ugu ngongliy rogon e pi okaas ney. Chuw ko glove nib wechwech, kug t’ar mug lebguy kooki ko fortune ni finigiyib ulan e ovan ni rib gowal.

Ke gin owcheg ngay ni, yalen e biney e okaas ko fortune cookies e gathi yalen e Chinese. Guba’dag ni ngguy rogon nib thilthil e kooki ko fortune ko Chines, Mariken, nge European, ere ku tabab i sapnag e fortune cookies ko boech e naam nib thil—ni wod rogon kanawo’en ni yus nag e triangel ni ngan guy e gin nibe yik ulan e lloway. Restaurant ko Chinese ni bay u San Fransisco, Los Angeles, nge New York e ma pii’ e kooki ko fortune, machane gathi ta’ab rogon ko tin nibay yu Beijing, London, nge Sydney. Kemus ni yu Merikan ni ma liyoer ea Rran ko Kooki ko Fortune ko fare Nam. Kemus ni advertisements ko Chinese e ma pii’ “Kooki ko Fortune nu Merikan ni Rib Thil.”

Kooki ko fortune e bamangil, mab moem ni ngan nang fan rogon. Machane fare wo’en nib ta’ab rogon ni ta’areb nag fapi yalen ni yima rrin’ ko boch ban’en nib thilthil e rayog ni nge ayuwegdaed ni ngad tayed fan yalen e gospel. Ma chiney e ke bing Somoel reb kanawo’en ni ngan fil fare yalen fare gospel ni’ir fare Babyor ku Mormon nge fare bin Be’ech e M’ag ni fapi fanathin ni ku’un profecy nag e ke buch.

Gubin yang ma bay e gidii’ riy ni yaed be chuw. Fare United Nations e ke report nag ni bay 281 million e gidii’ nike chuw. Biney e gowod e 128 million boech e gidii’ ko 1990 nge dalip yay nib ga’ ko 1970 ni yibe sana ngay. Gubin yang, fapi namba ko record ko gidii’ nibe un ko galasia e yaed be piri’eg Fare Galasia Ku Yesus Kristus ni Fan ko Gidiiʼen Got ko Tin Tomur e Rran. Gubin e Madnom, ma gubin chongin e galasia nge pi tafagar roraed ni yaed ma gak’ nga ta’abang ni gonapan e 31,916 ko tagil’ e mo’olung ko Galasia. Gadaed ma non ni bay e 125 e thin nib thilthil rodaed.

Dawri n’uwnapan ngay, u Albania, North Macedonia, Kosovo, Switzerland, nge Germany, kug guy boch chonggin e galasia nib be’ech nike rrin’ ni wod rogon ni weliy fare Babyor ku Mormon ni ta’areb nagrogon ko fare gak’iy ni olive. Ulan e Jacob 5, fare Somoel ko farengi mileay’ nge fare ta pigpig rok’ e ra gel nigew lel’ngin fapi gak’iy ni olive nge fapi papa’ngin mi yo kunuy nga ta’abang e tin ni bay nib thil u biyang. Daba’ ma bitir ku Got e be mukun nga ta’abang ni ta’araeb ko Yesus Kristus; be ’oeg Somoel rogon ni rib fel’ ni ngan ga’ nag rogon ni ngad pired e Gospol Rok’ nib polo’ nib sulyarmen.

Ni nge fal’ag rogdaed ko fare gil’ilungun nu tharmiy, ni weliy Yesus ni ba fanathin ni’ir fare abich nge fare madnom ni th’abi ga’. Ulan e re bugithin ney nib fanathin, bo’or e gidii’ nin pining machane dabunrad ni ngar baed. Me mulwol nag e masta ngak fare tapigpig rok “mman ko yu pa’ i kanawo’ ni ba’ nga wuru’ e binaw” nge “noch pa’ i kanawo’ nruw raba’ ma yoror” ngam “non ngak e girdi’ riy ngarbad nga naun” tin nib gafgow e gidii’, tin nib m’ar, aw nga but’, nge ma’ew. Fa’an yira weliy e biney nib thothup rogon, ma biney e be yipfan ngodaed.

Ke weliy fare chep nib thothup:

“Gubin e pi nam makan pining ni nge un” ko “fare madnom ulan fare nu’un ku Somoel.”

“Fal’ag rogon fare pi’i kanawo’ ku Somoel … ni ngeyog ni yean gul’il’unguy u dakean e fayleng, ni ngeyog ni pi gidii’ nibay riy e ngar fanayed, mi yaed fal’ag rograed ko fare rran ni bayiyib.”

Daba’ ma gubin e gidii’ nikan pining ni nge ’un ko fare madnom ku Somoel e bathilthil e gin nikar bad riy nge yalen roraed. Pulubthir nge fal’yangren, fla’ab nge gafgow, gidii’ ko fare nam fa gidii’ nike yibu bang, kad ngongliyed e tagil’ e mo’olung rodaed ni wod e toffen e community.

Ku wod rogon ni yoeg Apostle, i Peter ni guy e tharmiy ni bing ba yi’iy ko “guy ban’en ni be yib nga but’ ni bod ya’an bangi mad ni ba ga’ yang … ni kan nguchuruy nga but’ u aningeg i tabthungen … ma urngin mit e gamanman u daken e binaw ni bay u lan.” Machib nag i Peter: “Ka fin gu nang e chiney nriyul’ ni gubin e girdi’ ma ta’reb rogorad u wan’ Got. … En ni bay madgun Got u wan’ ma be rin’ e tin nib mat’aw e ra i par ni bfel’ u wan’ [Somoel] ndemturug ko be’ u kun nam.”

Ko fare fanathin ni mornga’agen fare Samaritan, ke pining Yesus ningad nad ngodaed nge Ngak ngalan fare nu’un rok’—fare Galasia Rok’. Be pining daed ni ngad pired ni bugul i yoror nib mangil. Fare Samaritan e micheg nag nra sul nge pi’ e ayuw ulan fare nu’un rok’ fare Tathapeg. Fol ko gospel ku Yesus Kritus e bmu’un e tay tagil’ ko gubin gidii’ u lane Galasia Rok ni kan sulweg.

Fare thothup ko “singgil ulan e nu’un” e bmu’un “ni dariy be’ ni yigo ir rok’.” Napan ni gara yib nga galasia, fa’anra kam guy ni bay be’ ni yigo ir rok’, rwenig ngom mog e thin ngak nib fel’ ma ra yag ni ngam un ngam par u charen? Biney e bay ni gathi aragon rogon e yalen rom. Bay ni chan’ey e bathil e thin rok’ ngom fa bathil ngom. Aragon, boed ni fare kooki nib fortune e bay nira yoeg, “Ba milekag ko tafagar nibach fare gospel ni tabab ko tu’uf ni bachan e thin nib fel’ ma dariy be’ ni yigo ir rok’.”

“Dariy be’ ni yigo ir rok’” e ku be yip fan ni dariy be’ ni nge par ni yigo ir rok’ ko tin ni be thamiy fa ko tin nib thothup ban’en. Gube un ngak reb a matan nike kirbaen’ ni ngani fingichiy fak ni pagal. Boch e duw nga m’on riy, fare pagal ni fak e kari falfa’aen ni nge mang reb e deacon. Bachan e biney fare tabinaew rok’ e ra chuwi’iyed reb e sus ngak ni rib be’ech.

Machane, napan ni yaen nga galasia me minmin boch e deacon ngak. Fare sus rok’ e be’ech, machane dani fel’ ya’an. Ke tamra’ make kirbbaen’, fare pagal nib deacon e yog ni dariy bi’id me un biyay nga galasia. Kube kirbaen’ gum’ircha’eg nifan ngak nge tabinaew rok’.

Kanawo’en fare pi’i kanwo’ nga Jeriko, ra bagdad make minmin be’ ngak, tamara’ nge kirbaen’, fa kabay ni kan gafgow nag fa kan mak’rang ngak. Ma kubay nikad rrin’ed e biney ngak be’ ni bay ni gadaed manang fa dangay, bay ni kad guyed fa rung’aged, fa bay nikad l’igined be’ ke kirbaen’ ni dan dananged. Bachan e amith ni kad thamiyed nge amith ni kad pi’ed ko gidii’ aram fan ni fek dad Yesus Kristus ngalan fare nu’un rok’. U lane Galasia Rok’ ma dakean gam’ing nge m’ag Rok’, ma ngad bad nga ta’abang nge ku Yesus Kristus Gadaed ma t’ufeg ngan t’ufeg daed, gadaed ma pigpig ngan pigpig ngodaed, ma gadaed ma pag fan ma ngan pag fan rodaed. Wenig mu tay u wun’um, “dariy mit e kirbaen’ ndabi yag ni nge gol nag e tharmiy” fayleng e ma moem nag e tomal rodad—fare falfalaen’ rok’ fare Tathapeg e rib riyul’.

Ulan e 1 Nephi 19, ke ga’ar: “Arragon, ni boed rogon fare Got ku Israel ni tay e [gidiiʼ] nga butʼ; … nga u ranoed u dakean. … Ere yaedra toey, ma be athamgil; ma yaedra lii’, ma be athamgil. Arragon, mi yaedra thuw nga dakean, ma be athamgil.”

Reb e tafagar rog i Professor Terry Warner e yoeg ni fare pufthin nag, toey, lii’, nge thuw nga dakean e gathi ta’ab biyay ni buch ko ngiyal’ ni’i moey Kristus u fayleng. Rogon ni gadaed ma ayuwegdaed—ni wod e napan ni ke yib e mik’iy ngak bagdaed, fa balel, fa be’ ndariy be’ rok’—e rogon ni gadaed be rrin’ Ngak.

Ulan e Galasia rok’ nike sulyarmen, mangil ni dariy be’ ni nge par rok’ ni yigo ir rok’. Dabda paged e biney nge buch. Darod ngad fingichiyed raed, non ngoraed, min machib ngorad ko t’ufeg. Tafagar, walagey ni bpin, nge pumo’on e nge par ni gathi gidii’ ni dani macham ngodad machane wod ba bitir nima par u tabinaew.

Daba’ ma bo’or e gidii’ nibe thamiy ni yigo ir rok’ ma dariy be’ ngak. Social Media nge AI e rayong ni nge pagdaed ni ngad sap gaed ko par nib chugur ko gidii’ nge maath ko gidii’. Gadad ba’adag ni ngad rung’aged lamaadaed. Gadaed ba’dag ni ngad thamiyed ni bay bang ni tagil’dad nibay e t’ufeg riy.

Bo’or fan ni gadaed ma thamiy ni dan da macham gaed ko gidii’ ko Galasia—biney, e bachan, nra bagdad ma be par rok’ ni yigo ir rok’. Be m’agfan’daed ko rogon lingan e thin rodaed, fa rogon e maad rodaed, fa rogon e tabinaew rodaed. Sana bay ni gadaed be thamiy ni dabi yag rodad e tiney; ya be yaen boen e ath u dakeandaed, fa bachan e gadad ba’dag ni ngan be’ech nagdaed; fa ke kireb e thin romew e tafagar rom fa kam thamiy e kirbaen’ fa kam tamra’, fa be m’agfan’um ko mornga’agen e yalep e Galasia. Bay ni sana bachan e dariy e tagar rodaed, fa ke dar e mabgol rom, i gur e ke yim’ figirngim. Bitir rog nib ga’ laman; fa dariy e bitir rodow. Dan darog ko fare pigpig ko mission fa kug sul nga tabinaew ni dawri taw ko ngiyal’ riy. Ku bo’or e pin’ey ni ku dawrin yoloey.

Mosiah 18:21 ma nge taʼareb gumʼirchaʼraed u taʼabang ngo fithikʼ e tʼufeg roraed ngoraed. Gube piningdad ni ngad saga’algad tafney ni bpag rogon, saga’al ko fith bugi ban’en ngak e gidii’—nge, ngiyal’ ni bayi t’uf, ngad saga’al gad ko og nag e kireb nga dakean daed. Ngongliy rogon yu Zion e gathi ma buch ulan ta’areb e rran. Machane ra reb fapi “mogethin”, fa fingichiy be’, e ra fek yu Zion nga ta’abang. Gayed rogon e pagaen’ ngak Somoel min gay rogon i mel’eg ni ngan fol ko fapi motochiyel rok’.

Rogon e yalen, ulan e galasia ni tagil’ e mich rodaed nge gin ni gadaed ma fanow riy ni gadaed pi’in e Chonggin e Galasia, e dariy be’ riy ni yigo ir rok’ ni bachan e m’ag rodaed ngak Yesus Kristus.

Machib nag Joseph Smith: “Ba gilaey’ ko rogon ni gadaed be guy, sana wod e un i pi’ e ayuw fapi muruwel ko Galasia, ‘fare ga’angin e gospel ko ngiyal’ ney nike sug … ,’ napan nira yib fapi gidii’en Got ngar mo’olung gad nga ta’abang ngalan reb e nam, ko thin nib thilthil, nge gidii’ riy.”

Got “e dabi rrin’ ban’en machane ke mus ni ngiyal’ ni fa’anra bay fan ko fayleng; … ni nge yag ni ngar feked gubin e pumo’on nge [pi’in ni bpin] nge yib Ngak.

“… Be piningraed ni gubin ni ngar baed ngak’ ngar feked boech e murnguy rok’; … ma gubin ma ta’areb rogon rok’ Got.”

Yib ngak Yesus Kristus e ba tu’uf ni ngad paged fare ngongol ko fekyath nge yalen e fayleng. Woed rogon ni machib nag President Dallin H. Oaks, rib tu’uf ni ngad paged e yalen fa boch e ngongol nifan e nam rom ni dani fel’ ko kol falan fapi motochiyel ku Got ni nge yag ni ngam mang reb Gidii’en Got ko tin Tomur e Rran. Ke weliy ni, “bay reb e yalen ko gospel nib thil, nibay fal’ngin nge rogon ni gan rrin’ nfian ngak gubin [e] chonggin ko Fare Galasia ku Yesus Kristus ni Fan ko Gidii’en Got ko Tin Tomur e Rran.” Yalen e gospel e bmu’un fare motochiyel ngay ko kol folen e dowef, un nga galasia ni gubin e wik, dab ni unum e alkuul, tamagow, tea, fa coffee. Kab mu’un e yul’yul’ ngay, nangfan ni gadaed ma mon’og ko mich rodaed ulan e Galasia ma gathi yaen ngalang fa sul nga but’.

Ku fil rok’ fapi chonggin e galasia nge tafagar ko gubin e nam nge yalen nib thil. Fil e chep nib thothup ko thin nib thilthil nge yalen e gospel e rayog ni nge gel nag e na’ab rom. Tu’ufeg rok’ Kristus nib thilthil rogon e kug thamiy make gel nag e t’ufeg rog nge na’ab rog ko mornga’agen fare Tathapeg rog. Gadaed gubin ni kan tawa’ath nagdaed ni bachan e yalen e galasia rodaed, ni wod rogon ni ke machib nag President Russell M. Nelson, ni gadaed e bitir ku Got, bbitir ko m’ag, ni reb gachalpen Kristus.

Fare gapas ku Yesus Kristus e bay nifan ngodaed. Dawri n’uw napan ngay me fith reb e pagal nib fel’yangren, “Elder Gong, kra yag ni nggu waen nga tharmiy?” Ke tafneynag ko fa’an nra yag ni ngan n’agfan e denen rok’. Ku fith fithingan, motoyil ni rib fel’ rogon, pining ni nge yean ngani non ngak e bisof rok’, mug pi’ e gumuchmuch ngak nrib ga’. Ke yaen nibay fare athap rok u dakean Yesus Kristus.

Weliy mornga’agen reb e pagal ni kab fel’yangren. Ta’aboch riy kug thapeg reb e babyor ni tabab e thin riy ni, “Elder Gong, I gag nge figirngig e ku chuguliyew medlup e bitir … ma kug waen ko mission ni l’agruw yay.” Machane “Guma thamiy ni dabi yag ni nggu thap ngalan e celestial kingdom … ya denen rog ko napan ni kab fel’yangreg e rib kireb!”

Ul’ul e thin ko fare babyor: “Elder Gong napan nim mog ngak mornga’agen fare pagael ni thapeg e athap ko man’agfan, me suguyeg e falfalaen’, ma ku guy ni [sana kra yag ni ngkun n’agfan rog].” Tin tomur e thin ko fare babyor, “Ri gu ba’adageg e chiney!”

M’ag rodaed e yira gel nag ko napan ni bay da bad ngak boch e gidii’ nge Somoel ngalan fare nu’un Rok’. Somoel e ra tawa’ath nagdad ni fa’an yira guy ni dariy be’ ni nge par rok’ ni yigo ir rok’. Ma mini’ e ra nang? Sana fare cha’en ni ra par nga chirem e bay ni ra mang e tafagar rom ni wod fare kooki ko fortune. Ngay gi yag ni da gum’aen’ niged gadaed ma gadad tay bang nifan ngak nge fan ngak boch e gidii’ ko fare madnom rok’ fare Saf, ri gube meybil nag udakean fithingan nib thothup Yesus Kristus, amen.