Sap ngak’ Got mag paer ni gab Fos

June ko biney e Duw, ke yib e pi’nen nib kireb ngak’ fare nam ko Lesotho ulan e southern Africa. Bay e bus nib achigchig nike fek riliw’ e bpin nibfel’ yangren ku fare Maputsoe Branch ku Galasia nge medlup e tiyugang’ niyad beyaen ngab binay nib capital ni, Maseru, nifan e mo’olung ko pi bpin nibfel’ yangren ku District roraed. Kar milekaggad nga dakaen e kanawo’ nibay la’agruw e lane- riy ni kakadbul, me yib ba karro u m’on, nike guy rogon ni nge thilyeg reb e karro, me yib nga langgin fare kanawo’ nibay fare bus riy. Dariy e time riy ni ngan cheleg ngadabi chafin, ma aram miyad chafin fare karro, me chelchel nge yaen nga wuru’ e kanawo’, me yik’.

Ni gubin, ragag nge lal e gidii’ e yim’ kore mudoel’ ney, nimu’un nel’ e bpin nibfel’ yangren, l’agruw e tiyugang’ ko e bpin nibfel’ yangren, nge fare Maputsoe Branch president nge le’engin. Pi’in ni dar maed, choenggin e tabinaw, nge pi fager, e kar feked ni bo’or miit e pi thamiy, nikan tay nimu’un e puwaen, kirbaen, nge riyul ni bay e m’ingaen’ riy. Dariy fan ere thamiy ney nge pi duwer ni dar thapeged e fulweg riy, kar fal’eged laniyaen’rad ma kar chelgad ngak’ Got ufithik’ e pi tang nib thothup, fapi scritpure, nge meybil, e rayog ni ngar pir’eged e gapas riy. Setso’ana Selebeli ni ragag nge medlup e duw rok’ eke micheg ni, “Yesus Kristus ebe runguy mad ma bay romad, dariy fan e amith ulan gum’ircha’mad.”

Reb e bpin nibfel’ yangren nge reb e tiyugang e karanow nga qaspital nibachaen eke yik’ doewnginrow e yow be bi’eg fare babiyor ku Mormon. Me ga’ar bagyow, “Yug gamow be bi’eg u langgin e babiyor ku Moroni, mebe yoeg moroni e n’en nirug be thamiy. … Napan nira non, ma woed nibe ga’ar, ‘Thingrim fil e pi thin ney yakan yoeloey nifan ngom ninge aywegnem ngam thimur kore gafgow ney. ’”

Ulan e gum’eeyaag nifan e gidii’ nikar maed, Area Seventy Elder Siyabonga Mkhize eke fonow ni ga’ar, “Thingar dachel gad ngak’ Somoel ko ngiyal’ ney magad ning ngak’ ni nge gapas nag gum’ircha’dad … me ayuwdad nifan e amith nigadad be thamiy.” Fare president ko bpin nibfel’ yangren ko Leribe Branch, Mampho Makura, e ga’ar, “Mu chelgad ngak’ Somoel, ngam pir’eged gelingmed ngam thapeged e tin ni Ir e ba’adag. Yesus Kristus e ’ir owchen nge tungun ko michan’ rodad [Hebrews 12:2]. Dammu siyeg, machane ngam sap gad Ngak’.”

Musap gad Ngak’. Fapi thin rok’ ni boed rogon e fonow rok’ Alma ngak’ fak ni Helaman: “Muguy rogon ni ngam sap ngak Got mag paer ni gab fos.” Ke weliy Alma e tin ni buch ku Lehi nge gidii’ rok’ ko fare Liahona: “Rib moem ni ngan motoyil ko fare thin rok’ Kristus, niʼir e ra yal’uwegem ko falfalaen’ ni manechubog, ni boed rogon ngak’ e pi’in chitamangdaed ni’ir motoyil gaed ko re compass ney, ni’ir e yalʼuwegraed ko wo’ nib k’ik’iy i yaen ko fare nam nni michmicheg.” Ke yoeg Alma: “Fa’an yaed ra sap ngay ma yaed rapaer ni yaed bafos. … Ni fa’an gadaed ra … sap ngay ma rayog ni ngad pired ni gadad bafos nib manimus.”

U biyay ni buch, e weliy Alma fapi wok’ ko fare porchoyog nib wasay nib brass ni tining Moses ngalang. Me yoeg Somoel ngak’ Moses ni nge ngongliy ya’an ba porchoyog me toey nga p’ebgul baley i gek’iy, me micheg “ni’en nike kad e porchoyog, e napon nira sap ngay, ere fos.” me weliy Alma ni fare ya’an fare wasay nib brass ebe yip’fan Kristus, niyra chubiy ngalang udakaen e kuruth. Bo‘or ni kar sap ngay miyaed fos, machane boechiyad, ulan e thin rok ‘ Alma, ni “rib gelaen ‘” e dar sapgad ngay ere kar maed.

Me fith Alma:

“Fa’an gimed ra gol ni kemus nu dakean e changar ni ngam tayed ma gimed gol, ere dab musap gaed nib papay, fa gimed ba’adag ni ngam ’el’el niged gum’ircha’med nga fithik’ i laniyaen’med nde mich, nge gameed, ni dab musap gaed, mi gimed yim’?

“ … Me ere mu changar gaed mi gimed tabolngin nag e michmich romed ngak’ facha’ ni Fak Got, ni bay yib ni nge bayuliy e gidii’ rok’, ma yira gafgow nag min lii’ nge yim’ ni bayul ko pi denen roraed; ma ra fos bayay ko yam’, niʼir e ra yib nag e foskoyam’, ni gubin e gidii’ ma thingar sak’iy gaed nga p’oewchen, ni ngan pufthin nagraed ko bin tomur e rran ni fare rran ko pufthin, u rogon e pi muruwel roraed.”

Riyul’, re fanow ney ni “ngam sap ngak’ Got mag paer ni gab fos” ni gathi kemus nifan e yafos nib manimus, machane ma ayuwegdad nge pangindad nge e yafos rodad nib fel’. Dam pagtilin fapi thin rok’ walagdad Selebeli nu Lesotho ni ke yoeg—“Yesus Kristus ebe runguy dad ma bay ngodad, dariy fan nibe amith gum’ircha’dad.”

Ereray rogon e yafos kore fayleng ney—ni bay mo’onyan’ riy niba pi’ e lumel ma gubin e gidii’ e demachalbog—me bay e m’ingaen’ nge oloboch, gafgow nge kirbaen’, mathmit nge malog, cham nge de fel’ e pufthin. Ma kemus napan ni ngan sap ngak’ Got ni rayog ni bee’, pi tabinaw, nge pi nam ere mon’og. President Russell M. Nelson e michib nag, “Nibchan fare Tathapeg, ngu daken fare Bayul rok’ nib manechubog, e ke thapeg dad ko pi n’en ni gadaed mo’owar riy, tin ni kad oloboch gaed riy, nge bachane eke buch rok’ ma manang gelingin e amith riy, kirbaen’ riy, nge tomal ni gabe yaen u fithik’ [muguy ko Alma 7:11–13ma napan ni gara kalngan’um u fithik’ e yul’yul’ mag pag Nge ayuweg nem, ma rayog ni ngam sak’iy ngalang u daken e biney e fayleng nib sug ko kireb nge kribaen’.”

Dariy reb e micheg nike buch bayay nge babay u lan fare Babyor ku Mormon ni woed e biney: “N’umngin i nap’an ni bay um fol gaed ko pi motochiyel rog ma bay mu mon’og gaed u lan fare nam; ma n’umngin i nap’an ni dab mu fol gaed ko pi motochiyel rog ma yira chuwegmed rog.” Fapi yafos ko gidii’ ulan fare Babyor ku Mormon ebe dag ngodad e tin nib riyul’ kore buguthin ney. “Mon’og” be yip’fan ni ngar adagged e fonow nge tawa’ath nu tharmiy ulan e yafos roraed. “Mon’og” be yip’fan ni ngar thapegged rogon nib- fel’ ko muruwel nima pii’ rograd ni ngar mabgolgad, chugliy e tabinaw, min ayuweg boech e gidii’ “Mon’og” kum mu’un rogon ngay ni ngan mon’og ngadakan e magawon nge gafgow. Ufithik’ fare murunguy rok’ Somoel, “urngin e pi’nen [nike] buch uta’abang nifan [ngoraed],” machalbog nagraed, me gaa’nag e thaa’ rorad Ngak’.

Alma e weliy ni sap ngak‘ Got ebe yipfan ni ngan fol ko pi motochiyel Rok‘, meybil Ngak‘ ni gubin ngiyal‘ nifan ko ayuw Rok‘, mu puruy‘nag ngak‘ gubin e ngongol rom, mag pag gum‘ircha‘em nge sug ko magar nifan Ngak‘ ni gubin e rran nge neap‘. Fapi motochiyl nge fonow rok‘ Got ni be dag u lan fapi chep nib thothup nge pi thin ko fapi profet. Fare chep nirib ga‘fan nibay ko “The Family: A Proclamation to the World” e wo‘ nirib mangil. Bay reb e fapi fonow ulan fare babyor ni Fan ko Gelngin e P’in ni Fal’yangren. Fare thin nifan ko fapi pu’moon nge bpin nib fal’yangren ko biney e duw “l’eged owchedad ngak Kristus,” binir e thin rok’ Somoel napan nike pii’ e gapas ngak’ Joseph Smith nge Oliver Cowdery: “Pagaen’med ngog nifan gubin e lem romed; dabi maerwaer wun’med, dabmu rus.” Fan ko Gelngin e Pi’in ni Fal’yangren ebe weliy mornga’agen boech e pi motochiyel nib thabi gaa’ nge yalen nibe fil ngodad urogon ni ngad l’eged owchedad ngak’ Somoel u napan ni ngad mel’egged gubin ban’en. Ba mot’won ni gathi kemus nifan kopi fel’ yangraen ma kufan ngodad ni gadad gubin.

Bay ta’areb e wok ni rib thabi ga’’, Fan ko Gelngin e Pi’in ni Fal’yangren bay e fonow ni rib mangil ulan ba guruy ni fithingan “Dogur Roem eb Thothup”. Me fonow nag: “Rrin e tin nib fel’ nga doewem—nge doewngin bee’—ufithik’ e liyor. Napan ni bay mu duugliy e maad ni ngam chuwngay, fa rogon piyen loeligem, nge ya’am, mu fidem, ‘Gube tayfan e dogur rog ni’ir e reb e tawa’ath ni rib thothup nike yib rok’ Got?’”

Fan ko Gelngin e Pi’in ni Fal’yangren e kube ululuy e thin nibe yoerg: “Mu tayfan e punpun nge thamtham ko punpun ya tiney eb thothup. Tiney e gathi bugi ban’en nifan e makrang fa fan e gosgos. Faanra dawri mabgol be’ ni pumo’on fa bpin, ma dani fel’ ni ngan math nga downgin facha’, ya giney e bang nib thothup rok’ facha’ ni dabin math ngay ni dariy fan ni bay e mad u dakaen. Ko tin ni gabe mel’eg ni ngam rrin’, fa mu sap ngay, fa mu motoyil ngay, fa mu tafney nag, fa mu post nag mornga’agen, fa mu text nag, thingar mu gay rogon ni dabi pug lamen e thamtham ko galong ngom fa ngak’ be’.”

Biney ebe pug uran ngodad e pi thin rok’ President Nelson:

“Ri’in e ban’en e bay ni rayog nira gathay e yafos rom ni rib papay ko biney e motochiyel ni rib thothup ni [falen e dogur]. Gidii’ nike mu’ i ngongliy e m’ag ngak’ Got, ngongol ko galong e kanawo’en ni rib pay nira mul e mich rom.

“… Fare gelngin ni ngan sunmiy e yafos e karimus ni‘ir fare tawa‘ath ni yib rok‘ e Chitamangiy nu Tharmiy nike pii ‘ngak‘ pifak u fayleng ni ngar muruwel gaed ngay. Aram fan, ke tay Got kanawo’en ni ngan fanay e biney e gelngin nib riyul’ ni rib thothup. Par u thilin e pumo’on nge bpin e karimus nifan ngak’ e pi’in nike mabgol.

“Ga’angin yang u fayleng e dani michuwan’ e biney, machane tafney ko gidii’ ni yo’or e dar thilyeg e biney nibay nib riyul’. Somoel e ke motochiyel nag ni dariy bee’ ni dani be’ech nirayag ni nge yib ngalan e celestial kingdom. … Fa’anra dan um yul’yul’ ni bachan e ngongolen e galong, gube wenig nag ngom mu kalngaen’um. Mub ngak’ Kristus ngam thapeg fare tawa’ath ko kalgaen’ ni urngin napan ni gara kalngaen’ ko fapi denen roem [Muguy ko Isaiah 1:16–18; Doctrine and Covenants 58:42–43].”

Gamnang faram fare michib nibay ulan fare Babyor ku Mormon, pi’nen nib thil ko mon’og e gathi gafgow—ereray nni chuwegraed roek Somoel. Chuw rok’ Somoel ebe yip’ fan e kan ni thothup Rok’ u lan e yafas rodad. Gadad gubin ni bay fare tomilang rok’ Kristus rodaed u napan ni kan gargel nagdaed nga fayleng. Ma ku arrogon, boech e gidii’ ni bayn tawfe nag nge thapeg fare tawa’ath nge boech reb e tamilang ko fare Kan Thothup. Ir e ma pii’ e tomilang nge fonow, me gaa’nag me mon’og e pi’nen nib chag ku bee’, nge ayuweg i chuweg e tin nib kireb, fapi mel’eg ni de mat’aw, nge tin kireb e kanawo’.

Woed ngomed, gumnang ni bee’ ni ke thapeg e tawa’ath ko fare Kan Thothup machane bachane de fol ko pi motochiyl rok’ Got ke malog e pi tawa’ath ney rok’. Bay bee’ nike yib ko tafney rog nikan chuweg ko Galasia nibchan e pi denen rok’. Ke yoeg ni puwaen’ e lemnag ni nge rin’ ni som’on. Ke lemnag ni pi’in ni dar macholbog gad e kar pufthin niged ir. Ma nang ni nognogl rok’ e dani mangil, machane ke lemnag rogon nibe sap ko kireb rok’ bee’ Me yaen boech e rran i yaen, me par nike fal’rogon ko yafos rok’ u wuru’ e Galasia ni dakir pigpig ma dakir un ko misa ma dakir ayweg bee’.

Me yaen boech i ngiyal’ ni aram rogon, machane me tabab i nang ni dakir thamiy fare Kan Thothup— rok’ Got—ulan e yafos rok’. Ufithik’ e ganop rok’, nim nang e thamiy nibe yib, ni gubin e rran, ni gapas, fonow, nge fal’rogon nifan fare Kan Thothup, eke tawreng nag. Aram me, rrin’ e pi’nen ni thingari rrin ni nge kal’ngaen’, yarmiy e yafos rok’, ngeyog ni ngan tawfe nag biyay ko ran nge fare Ya’el.

Be m‘ug ni dariy tungun bugi ban’en ni me sap e gidii‘ ngay ni ngan nang fan ban‘en, falfalaen‘ n‘uy, nge ayuw. Bayo’or nima “thum’ nga wuru’ fare pow.” Machane dab da woeded “ bee’ nib bitir, ni be fekdad e n’ew i yan, ma be fekdad e nifeng i yan ni gubin yay nra n’aeg e nifeng gil’ [fa yalen].” U dakaen e sap ngak’ Got, rayog ni ngad pir’eged e gapas ufithik’ e tin nib mo’omaw’ ma ra gaa’nag e mich rodad ufidik’ i ngiyal e maerwaer nge sikeng ko ya’el rodad. Rayog ni nge yib gilingdad ko ngiyal’ ni gadad be yaen u fithik’ e tin nib moomaw’ nge ngiyal’ ni gadad be thamiy ni yigo’gadad rodad. Rayog ni ngad pir’eged rogon ni ngad sunmiyed e tin nib machalbog ulan ere yafos ney. Rriyul’, dariy reb kanawo’en nga bang ko bin ni Ri Got eke ngongliy: “Mu sap gad ngoeg, ngug thapeg med, ni gubin yang u fayleng: ya Rigag Got, ma dakuriy bee’ .”

Sap ngak’ Got e gathi ban’en nifen dad; be yip’fan, ni, Ir e rib ga’fan ngodad. Gube pug uran bayay fare mudoel’ ni buch u Lesotho ko fabnem e June nike thimur. Ulan e bet rok’ u qaspital, bee’ ni tiyugang’ ko fapi bpin nib fal’yangren ni de yim’, ni demich u wan’ i Got umon ni nge un ko Galasia, eke yoeg ni murwel rok’ e chineye nge nang ko mongfan ni de yim’. “Pigpig ngak’ Got ni gubin ngiyal’ e irary rogon ni rayog ning nggu nang, ni fa’an rayib e fulweg riy,” nike yoeg. “Ku’ug lemnag kafram ni guba’adag Got, machane chiney e guba’adag Got ni rib, rib, rib, rib gel. Chiney I Ir e [ri somm’on] nib th’abi tolong ulan e yafos rog.”

Gube pii’ e mich rog u mornga’agen fare Chitimangiy, Fak, nge Kan Thothup, ni yad machalbog ko thin, lemnag, fan, nge ngongol, ni yad be muruwliy u ta’abang ni woed ta’areb e Got, ni ir e ngad sapgad ngak’ u gubin ban’en nib mangil. Gube pii’ e mich rog u mornga’agen e Bayul roek Yesus Kristus, nima yib gelngin ni nge fulweg e micheg nib th’abi mangil, “Nge pagaen’med ngoeg, ma gamed athamgil nge mada’ ko tomur, ma ra yog ni ngam fos gaed; ya en ra athamgil nge yaeni mada’ ko tomur e gura pii’ e yafos ni manechubog ngak’.” U dakean fidngan Yesus Kristus, amen.