Sikeng nge Gel Nigey u Dakean Kristus

Pi walageg, gu be thamiy e tu’ufeg rok’ Somoel ko re rran ney ni kad mada’gad. Kari gu falfalaen’ ni nggu non ngomed e daba’. Ri gu be meybil ni nge fek e Thothup ngalan gum’ircha’em e tin ni ba’adag Somoel ni ngam rung’ag, nib gel maran ko thin ni baygu weliy.

Kaakroom kug guy rogon ni nggu fil e physics nge math ko napan ni gubay u college. Ku gu thamiy e ngoochaen’ nib gel. Ku gu thamiy ni sana gube gay rogon ni nggu fil ban’en ni dabi yag rog. Gelingin ni fani ngochaen’ ni geg, e aram gelngin ni gube thamiy nibe waer gelngig i gay rogon. Kirbaen’ rog e wowilyeg ni nggu thamiy ni gelngin e muruwel rog ni rib gel ab m’ayfan. Ere gu tabab i tafney nag ni nggu tal, mug thilyeg ngareb nib moem rogon.

Ku thamiy ni ke mo’war gelngig. Napan ni gu meybil, mug thamiy ni be micheg nag Somoel ngog. Ku thamiy ni ke non ko tafney rog, “Gube sikeng nigem, machane kugu ba’aray nigu bay rom.”

Binem e ngiyal’ ma dan gunang fan e tinem e thin. Machane gu manang ko ren’en ni nggu rrin’—ku waen ko muruwel.

Tafney nag ma kug be ul’ul ko muruwel nga tomuren e ran’ey, ku gub ko gubgu nangfan ere bugithin ni ba’aray ulan e chep nib thothup nima pi’ gelngiy: “Demturug e mit i n’en ni gu ra mada’nag ma bay gelngig nike pi’ Kristus nrayag ni gu par riy.”

Ku gubgu fil ni gafgow ni ug tay ko phyics e ka bang ko tawa’ath nike yib rok’ Somoel. Ke machib nag ngog ni u dakean fare ayuw Rok’, ma rayog ni nggu rrin’ bogi ban’en nib momaw’ rogon ni fa’anra bay e mich rog nibay nra ayuweg neg. U dakean e biney e tawa’ath, e bay Somoel riy nibe sikeng nag ma be pi’ gelngig riy.

Fare bugithin ni sikeng e ba yo’or fan. Ra ngan dag rogon ban’en ma gathi kemus ni ngan sikeng nag rogon. Ya susun ni ngki gel nag gelngin. Ra ngan sikeng nag balayi wasey ma susun ni ngan tay ngatanggin bugi ban’en nib tomal. Gowalngin, tomalnggin, nge marrin e yira uneg ngay nge mada’ ko ngiyal’ nike m’ug gelngin fare n’en. Fare wasey e gathi ke waer gelngin ni bachan e yibe sikeng nag. Ya biney, e wod nra mang ban’en nra yog ni nge pagaen’uy ngay, ban’en nib gel nra yag ni nge chubiy gelngin e tin nib tomal ban’en.

Somoel e kuma sikeng nagdaed ni ku wod rogon ni nge gelnagdad. Biney e sikeng e dabi yib ko ngiyal’ nibay e gapas fa ngiyal’ nib moem rogon e yafos rom. Ra yib ko ngiyal’ ni kad thamiyed ni dabki yag rodad nga gelngindad. Somoel e ke machib nag ni ngad ul’ul’gad ko mon’og ma dabin magaf ko gay rogon, ma susun ni dabi mulaen’dad, ni dabda talgad ko gay rogon.

Napan ni bay da ul’ul’gad ko mich ngak Yesus Kristus—ni wod bangiyal’ ni bay ban’en ni go wod e dabi yog rodad—ma fin ireram e ngiyal’ ni gadadra gel nib thothup rogon. Ke yog e chep nib thothup rogon e biney nib riyul’.

Wod, fare profet Moroni, nib sikeng nag min gel nag gelngin. Yigo ir rok’ ni magay ko ngiyal’ nike pulubthir. Ke yoloey ni dariy e tafagar rok’, ni chitamangin e kan li’ ke yim’, ma gidii’ rok’ e kan gathayrad. Ni bay e gidii’ ni be gay ni nge yag ni ngar lii’ed nge yim’.

Ma dariyfan ni arogan ya Moroni e dani kirbaen’. Ya n’en ni rrin’, e yoloey e mich rok’ ko mornga’agen Yesus Kristus nifan ngak e gidii’ ni dabi guy, nim mu’un e gidii’ ngay ni yib ko pi gidii’ ney ni yaed be gay rogon ni ngar lii’ed nge yim’. Ke yoloey nifan ngodad. Ma nang ni bay boch e gidii’ ni bayi makrang nag e thin rok’. Ma manang ni bay boch e gidii’ ni dabi fanay e pi thin ney. Machane dariyfan ni aram rogon ya ke ul’ul’ ke yoloey mornga’agen.

U fithik e sikeng rok’, min gel nag min be’echnag e mich rok’ Moroni. Min polo’ nag ga’angin. Thin rok’ e bay bagelngin ni bachan e ir be’ ni athamgil nge ul’ul’ nge mada’ ko tomur. Ra yog ni ngad thamiyed gelngin e mich rok’ ko napan ni gadadra be’eg mornga’agen.

“Chiney e gag, Moroni, e nggu yoloey boech banʼen ni gube guy nib gaʼfan; ma gube yol ngakʼ pi walageg, ni fapi Lamanites; ma gubaʼadag ni ngar nanged ni ke yoʼor ko aningeg miriʼay nge riliwʼ e duw ni yaen u napʼan fare pow nni piiʼ ko fare wub rokʼ Kristus.

“Ma nggu mithaeg e pi chep ney, u tomuren ni kug weliy buchʼuw e thin nib fonow ngomed.

“Musap gaed, gubaʼadag u napʼan ni bay mu poeyed e pinnʼey, ni faʼanra ba gonop rokʼ Got ni thingar mu poeyed, ni nge yib ngaenʼmed rogon e wurengaenʼ rokʼ Somoel ngakʼ e gidiiʼ, aram u napʼan nni sunmiy Adam nge yib iyib nga butʼ nge madaʼ ko ngiyalʼ ni ke thap e pinnʼey ngomed, magmed lemnag u lan gumʼirchaʼmed.

“Ma nap’’’an ni ke thap e pinn’’ey ngomed, ma guba’adag ni ngam fithed Got riy, ni facha’ ni Chitamangiy ni Manechubog, u fithingan Kristus, ko ba riyul’ e pinn’ey fa dangay; ma fa’an gimed ra fith u fithik’ e l’agaen’ u gum’ircha’ey, u fithik’ e yul’yul’, nib mich an’uy ngak’ Kristus, ma ra dag e riyul’ riy ngomed, u dakean gelingin fare Kan ni Thothup.

“Ma dakean gelingin fare Kan ni Thothup e rayog ni ngam nanged riy e tin nib riyulʼ ni morngaʼagen gubin banʼen.”

Mich rok’ Moroni e yib ko ngiyal’ ni yigo ir rok’, machane bay e tomilang riy nra yag ni nge powi’iy urngin mit e mfen ni ngar sapgad ngak e Chitamangindad nu Tharmiy nge Yesus Kristus ni fare Tathapeg rodaed.

Reb e profet ko fare Babyor ku Mormon, i Jacob, e ni sikeng nag min pi’ gelngin ya napan ni kab bitir ma bo’or e gafgow nge kirbaen’ ni yib ngak. Machane fare chitamangin, ni kanog i Lehi ngak, e machib nag ngak ni Got era tawa’ath nag u fithik e pi gafgow rok’.

“Ere musap, u napʼan ni kagab bitir ma um gafgow ko amith nge kirbaenʼ, ni bachan e kireb rokʼ walagem.

“Machane, gur Jacob, ni bin sommʼon e bitir rog u lan wuruʼ e binaw, gur e gamnang falʼngin Got; ma ra tawaʼath nigem ko pi gafgow ni gabe tay.

“Ere, yaʼel rom e bay ni falʼeg waʼathan, me gur e bay mu chuw u paʼ e riyaʼ ni kam paer rokʼ walagem i Nephi; ma pi rran rom e bay mu piiʼ ko pigpig ngakʼ e Got rom. Ere, gumnang ni gur e kan bayul nigem, ni bachan e Tabiyul rom nib matʼaw; ya gur e kam guy u napʼan e ngiyalʼ nra poloʼ e tayim ma bay yib ni nge thapeg e gidiiʼ.”

Profet Joseph Smith e buch e biney rok’ nin sikeng nag min pi’ gelngin ko fare ngiyal’ ni’i moy ulan fare Kalbus u Liberty. U fithik e kirbaen’ rok’, me yor fare Profet Joseph:

“O Got, ga bay u ’uw? …

“U num’ngin napan ni ngam par ni dam mpii’ e ayuw?”

Ke guy Somoel gelngin e gafgow rok’ Joseph nge athamgil ni be tay me ga’ar:

“Fakag, nge yib e gapas nga dakean e ya’al rom; ma tomal nge pi lumel rom e ra par ni dab ki n’uw napan;

“Ma fa’an, ni garam athamgil nib gel, ma Got era chibiyem ngalang ko bin th’abi tolang ngalang; ma yira gel nigem ko urngin mit ban’en.”

Fare bin nth’abi ga’ ko kanawo’en e sikeng nge pi’ gelngin e yibu dakean fare Bayul rok’ fare Tathapeg. Ni fek nga dakean fapi denen ko gidiiʼ nu fayleng. Ke thamiy e pi amith nge pi kirbaen’ rodad. Ke n’um e ran ulan fare kap nib mo’oy. Ma ke ul’ul’ nib yul’yul’ ko urngin e ngiyal’ riy.

Bachan fare bayul rok’ ni rib ma’ang’ang, Yesus Kristus e ra yog ni nge pi’ gelingdad ko ngiyal’ ni yibe sikeng nagdad. Manag rogon ni nge pi’ e ayuw ngodad ni bachan e ke thamiy urngin e pin’ey nib momaw’ rogon ngodad u fayleng. “Ma rafek nga dakean e pi moʼowaer ko gidiiʼ rokʼ, … ni nge yog ni nang ko dagur u rogon ni nge ayuweg e gidiiʼ rokʼ u rogon e pi moʼowaer roraed.”

Kad filed ni napan faragi Milay’ u Gethsemane, me fith fare Tathapeg ngak e Chitamangiy ni fa’anra yag ni ngan chuweg fapi gafgow u dakean—machane maki yog ni fa’anra ba’adag e Chitamangin, ma rrin’ fare Tathapeg ni aram rogon. Biney e ku be yipfan, ni kumus ngak fare Tathapeg maki marwar e tafney rok’, machane bay e mich rok’ ngak e Chitamangin nu Tharmiy.

Pi walageg, sikeng nge gelngin e bay ni dani ta’ab rogon ngak Moroni fa ngak Jacob fa ngak fare Profet Joseph. Machane ra buch. Bay nra yib ni dariy lingan, u dakean e gafgow nra yib ko yafos ko tabinaew rom. Bay nra yib u dakean e m’ar fa kirbaen’uy fa amith fa thamiy ni yigo gur rom.

Ri gube micheg nag ngom ni pi ngiyal’ ney e gathi pow riy nike pagem Somoel. Ya, pow riy ni rigab tu’uf rok’ ni ba’adag ni nge be’ech nigem me pi’ gelngim. Be ngongliyem ma be pi’ gelngim ni nge yog ni mu fek gelngin tomalngin e yafos ni manechubog.

Fa’an gadadra ul’ul ko pigpig rodad, ma Somoel era be’ech nagdad. Ma kura pi’ gelngindad. Mara borran ngay ma gadadra sap nga tomur ma gadadra guy ni pi sikeng ney e bugi pow ko tu’ufeg rok’. Ma gadadra guy ni be gay rogon ni nge fal’eg rogdad ni nge yog ni ngad uned ngak ngad sak’iygad u fithik’ e fla’ab. Wod rogon ni yog fare Apostle rok’ Somoel ni kanog i Paul ngak ko tomuren e yafos rok’, “Kug athamgiliy e tin nrayag rog ko sagreng, ma kug mil u n’umngin yang ni ngan mil riy, ya par e michan’ rog u gil’.”

Rigu be micheg ni Got bmanangem. Ir e manang e pi sikeng ni be yib ngalan e yafos rom. Ni’ir bay romed. Dariy bi’id nra pii’ keru’ ngom. Gube micheg ni Yesus Kristus e ir e Fak Got. I Ir e gelngindad, I Ir e Tabiyul rodaed rodad, ma I Ir e athap rodad. Fa’anra pagaen’dad ngak, mara pi’ gelngin dad nib thothup nra puluw ko gelngin e pi sikeng nra yib ngodad. Gube micheg u dakean fithngan Yesus Kristus nib thothup, amen.