Felan’ e Pi’in Yad Ma Guyrogon ni nge Awnag e Gapas u Thilin e Girdi’

Mu’un ngog ngam tafney nag ni kab fal’yangrem u Kapernaum, nib chugur ko fare day nu Galilee, ko fare ngiyal’ ne machib ni’i tay Yesus Kristus. Thin ni wear ni mornga’agen ba rabbi—ba sensey—nthin rok’ e kunuy e gidii’ ni yo’or nga ta’abang. Gidii’ ni milekag nga dakean nochi burey nib sap ko day ni ngeyag ni ngar motoyil gad ngak.

Un ngak boech e gidii’ nibe yib u dakean fapi kanawo’ nib sug ko ab iyib nga Galilee. Napan nibay mu taw, me yibi mukun fapi gidii’ nga ta’abang ni ngar motoyil gad ngak Yesus. Boech e gidii’ e ga’ar, “Messiah.”

Maga motoyil. Thin rok’ e bayi aw ngalang gum’ircha’em. Ma napan e milekag rom nga tabinaew, ma kam par ni damur un ko sabathin.

Nibay ko tafney rom bogi ban’en nrib fal’ mornga’agen—nrib fal’en mornga’agen ko fare motochiyel ku Moses. Ke weliy mornga’agen ni ngkum pi’ e ba’ ni gilay’ i linglingim ma kag t’ufeg e to’ogor rom. Ke michmicheg, “Ma rafel’ wa’athan gubin e pi’in yaed ma awnag e gapas, ya yira piningraed ni bitir rok’ Got.”

Ulan e yafos rom, napan ni gara thamiy nrib momaw’ rogon—nibay e murus nge dan nang ko mang e bayi buch—ma wod nib momaw’ rogon ni ngan thamiy e gapas.

Payngim ni gabe papay; ma napan ni bay mu taw nga tabinaew nike math’ e pogofan rom. Nike mukun e tabinaew rom nga ta’abang; me fith e chitamam, “Moeg ngog e n’en nikam rung’ag ma kam thamiy.”

Mag yog nike pininingem ni ngam dag e tomilang rom ngak e gidii’, mag gay rogon ngam rrin’ e tin nib mat’aw ko ngiyal’ ni yibe gafgow nigem. Mag rung’ag ko thin rom nikam mog, “Ma rafel’ wa’athan gubin e pi’in yaed ma awnag e gapas, ya yira piningraed ni bitir rok’ Got.”

Mag fith, “Ra yog ni nggu mang be’ nima awnag e gapas ko ngiyal’ nibe buch bogi ban’en u fayleng, nib sug gum’rcha’eg ko murus, ni wod nrib palog rogon i thamiy e gapas?”

Me sap e chitamam ngak e chitinngim me fulweg nrib sumnguy, “Aragon. Gadadra tabab ko gin ni som’on riy—ulan gum’ircha’endaed. Nge mu’ ma migid ma ulan e tabinaew rodad nge gidii’ rodad. Napan ni gadadra gay rogon urom, ma awnag e gapas e ra yaen ulan e kanawo’ iyean ngalan e binaew.”

2,000 e duw nga m’on riy. Dakri fan ni ngan tafney nag rogon—ya ireray e gin ni gadad bay riy e chiney. Dariy fan nib thil e pin’en nibe gafgow e biney e mfen riy ko fapi fal’yangren nu Galilee—ni wod e ulung nib togopluw ngorow, sabanban, fulweg tabban e cham ngak be’, dumomow u kanawo’, puwaen’, social media, nge ku boch ban’en—e wod ni l’agruw e gali mfen ney e be yean u fithik bogi ban’en nrib gel e momaw’ riy.

Falfalane’ dad ngay, ni fapi fal’ayngren rodad e wod ni yaed be mukun nga dakean farengi Burey nu Sermon: ni yaed be un ko seminary, fapi conference nifan fare Pi’in ni Fal’yangren, nge fare Moey, Mu’un Nggog Uroy maki mulwol nag Somoel ni ngan athamgil: ere ku er rogomed ni nge gal ra’emed u p’eowchen e girdi’, nge felan’ e pi’in yibe gafgow nagrad, nge t’uf romed e pi to’ogor romed.

Ma kiyad be thapeg fapi thin nibe yib ko fapi profet nib fos ko fare Fulweg yarmen: “Bt’uf e Gidii’ nima Awnag e Gapas.” Rayog ni ngan dubuy machane dabin cham nag mornga’agen. Moen’ e man’agfan nge t’ufeg ngaloen e togopluw nge uf. Mu toey e rungrung rom ko rogon ni nangfan bogi ban’en mag un ngay, ma gathi rungrung ko tolingaen’ fa wereg e gidii’ u but’. Ma fare michmicheg riy e kab t’ab rogon: “Ma rafel’ wa’athan gubin e pi’in yaed ma awnag e gapas, ya yira piningraed ni bitir rok’ Got.”

Gum’ircha’en fapi mfen ni kar ilal gaed ab sug ko mich ngak Yesus Kristus nge athap nifan e tin nga m’on ban’en. Machane dari fan ni aragon ya kiyad ma fith, “Ra yog ni nggu mang be’ nima awnag e gapas ko ngiyal’ nibe buch bogi ban’en u fayelng, nib sug gum’rcha’eg ko murus, ni wod nrib palog rogon i thamiy e gapas?”

Fulweg ko biney e ku tabab rogon ni aragon! Da fanayed fare thin rok fare Tathapeg: “Nggu tay e gapas nge par romed, nggu pi’ e gapas rog ngomed. … Dabi magafan’med ma dabi wagagey lanin’med, ma dab mu tamdaggad.”

Daba’, ma awnag e gapas e kama tabab ko gin ni som’on riy—ulan gum’ircha’endaed. Nge mu’ ma migid ma ulan e tabinaew rodad nge gidii’ rodad. Napan ni gadadra gay rogon urom, ma fare awnag e gapase ra yaen ulan e binaew rodad.

Tafney niged dalip bangi ban’en nima ngongliy Gidii’en Got e gapas riy.

Som’on riy e ra tabab ulan gum’ircha’edaed. Bang ko fare machib ni’i tay Kristus e m’ug ni yib fapi bitir ngabi mukun ngak. Urom min dag rogon. Sap ko rogon e awnag e gapas nima pi’ e bitir nima yib u gum’ircha’en e ra yog ni nge pi’ e athamgil ngalan gum’ircha’endaed. Ba’aray rogon nike fulweg e bitir mornga’agen “Uw rogon ni ma m’ug ni gur reb ni gama awnag e gapas?”

Fulweg rorad e ke yib ulan gum’ircha’enraed! Ke yoeg Luke, “Mpi’ e ayuw ngak e gidii’ ni gubin ngiyal’.” Grace e weliy ni rib ga’fan ni ngan n’agfan e kireb ko gidii’, ni demuturug ni fa’anra dani fel’ rogon ngom. Anna e ga’ar, “Kug guy be’ ni dariy be’ ni ngar tafafal gow, e re ku waen nggu un ngak ko fafal.” I Lindy e tafney nag ni ra ngam mang be’ nima awnag e gapas e wod ni ngan e ayuweg e gidii’. “Nge mu’ mag ul’ul’ ngay. Nra ul’ul’ ndabi tall.” Liam e ga’ar, “Dammog e thin nib kireb ngak be’, demturug nike rrin’ ban’en ngom nib kireb.” London e weliy, “Fa’anra bay be’ nibe kakrangem, moeg ngak, ‘Wenig mutal.” Trevor e guy ya’an, “Fa’anra ta’areb e donat nike magay, nta’ar ngan fo’od nag.”

Thin ko pi bitir ney e pow riy ni gadad gubin ma kan gargeleg dad nibay e t’ufeg nge murnguy rodad. Fare gospel ku Yesus Kristus e ma chodowaliy e pi ngongol ney nib thothup, nib mu’un e awnag e gapas ngay, ngalan gum’ircha’endad, nra tawa’ath nagdad ko biney e yafos nge bin migid.

Bin l’agruw ngay, gelnag e awnag e gapas ulan e tabinaew ni wod rogon kanawo’en nike dag Somoel ni ngad rrin’ed ko tha’ rodad ngodad ni wod e: pining ni nge un ngay, gafgowaen’ ni be tay, munguy, mudung nge tu’ufeg.

Ba’aray mornga’agen reb e tabinaew ni awnag e gapas ko tin ni buch ulan e tabinaew, ni rrin’ ni wod rogon e pi machib ney ni gadad manang mornga’agen.

Bogi bitir ulan fare tabinaew e yead be gafgow ko rogon e tha’ rorad ngak be’ nib ilaal ni gubin ngiyal’ mab kireb e tafney rok’. Fapi bitir, e ke kak’nnaen’rad ma kar gafgow gaed riy, era tabab gaed i rrin’ ni wod rogon ni’i rrin’ e chiney nib pilaal.

Reb e balayal’ riy me yibi puruy’ fare tabinaew ko ngiyal’ e abich ko balayal’ mi yaed weliy mornga’agen e biney. Me yib reb e tafney ko tomilang ngorad—gathi kemus ni fulweg riy machane ba experiment ni ngan guy rogon ko re fel’ fa danga’.

Susun ni ngan togopluw ko ban’en nike rrin’, fare ulungi bitir e ngar rrin’ed ban’en nib thil ko n’en ni yaed ma rrin’: ngar fulweged e thin nib mangil. Gathi kemus ni thin nib mangil machane, ngar ul’ulgaed ngar roged e thin nib fel’ nge muruwel nib fel’, ni demuturug rogon ni yibe rrin’ e kireb ngorad. Yaed gubin nra duugliyed ni ngar rrin’ed e biney ko ngiyal’ nikar duugliyed, ma tomur riy mi yaed sul ngar tafney niged rogon.

Dari fan ni bay bochi yaed ni stuntun, machane ra duugliyed ni ngar rrin’ed e biney.

N’en ni buch ni migid e wod e bma’ang’ang.

Sumunmun riy ma be tabab nge thil. Owchen ni wod nib puwan’ e munguy ya’an ni wod nibe siminmin. Ma fare cha’ ni ilaal, ni’ir e rib dumomuw, e tabab nge thil. Fapi bitir, nra duugliyed ni ngar daged e tu’ufeg, era pire’eged e falfalaen’ ko biney. Biney ni thil e rib alamrin rogon ma bachan e biney danki tu’uf ni ngar gak gaed nga ta’abang ngar puruy’ niged mornga’agen. Tu’ufeg e ke fal’ag rogon e biney.

Napan ni tow ko ngiyal’ riy, me sum e tha’ roraed ni yaed btafagar, ni ayuweg raed ni gubin. Ra ngan awnag e gapas, e wod ni ngad n’agfan e kireb ko gidii’ ma gadad gay rogon ni ngad chubiyedrad ngalang ma gathi ngan lufrad nga but’.

Bin dalip ngay, awnag e gapas ulan binaew rodaed. Napan e World War II, Elder John A. Widtsoe e machib nag: “Ra ngan fal’ag reb e binaew nibay e gapas riy mab tu’uf ni ngan fal’ag e pumo’on nge bpin ni bogi gidii’ ni yaed bta tu’ufegrad ma yaed ma pi’ e gapas. Ra be’, u dakean fare machib rok Kristus … e bay ulan pa’ fare gapas nifan ko fayleng.”

Mornga’agen e bin ba’aray e ri dag ya’an e biney ni gube weliy mornga’agen.

Boch e duw kafram, bay l’agruwi mo’on—bogyow e ba Muslim imam ma reb e ba pastor nib Kristian niyow l’agruw ni gidii’ nu Nigeria—ni yow l’agruw nib thil e tiliw rorow. Ra bogyow makri gafgow nib alamrin. Machane, u dakean fare gelngin e man’agfan, kar mel’egew ni ngar ranow u dakean fare pi’i kanawo’ u ta’abang.

Imam Muhammad Ashafa nge Pastor James Wuye e ramangew l’agruwi tafagar u fithik e gapas. Uta’abang mi yow fal’ag rogon bayay ni nge mang tigil’ e meybil. Chiney e yow bay ni yow ma machib nag ko gidii’ ni nge fek e athap nge yon’ ngalon e fananikan. Yow l’agruw nra thapegew fare Nobel Peace Prize, ni dowri n’uw napan ngay ni ngkar thapegew fare Commonwealth Peace Prize.

Gali chan’ey ni ur moyew ni l’agruwi to’ogor e yow ma milekag e chiney ni yow be fal’ag rogon e tin nike kireb, ni yow be micheg nag ni fare mulwol ko awnag e gapas ko fare Tathapeg e gathi kemus ni ra yog rogon—ya kabay nib gel gelngin.

Napan ni bayda bad ngad nanged fare fla’ab rok Got, ma aram ni “dabi yib ngaenʼmed ni ngam gafgow niged gimed, machane ngam pired u fithikʼ e gapas.” Gayed rogon ngad guyed e gidii’ ni wod rogon nima guy e bitir e gidii’, ulan e tigil’ e mo’olung rodad nge lan e binaew rodad.

Gube pi’ reb e mulwol. Ba mulwol ni ngan rrin’ nifan e awnag e gapas—mang e biney, nge rogon nifan ngodad, ni ngad tabab gad riy ko gabul? Garam fek reb e wik, ngam un ko ba wo’en e awnag e gapas?

1. Dariy e togopluw ulan e tabinaew: Napan ni bayi tabab e togopluw, mutal ngam sul nga tomur ngam moeg e thin nib fel’.

2. Fal’ag e thin rom u online: Um’on i ngam yoloy ban’an, fulweg e thin ngak be’, fa moeg e thin u online, mu fith, Biney e ra ayuweg me fal’eg fare wethael uthilin mow? Fa’anra dangay, mag tal. Dam mu pi’ nge yean. Mag thilyeg, ngam moeg ban’en nib mangil. Mpi’ e gapas ko gin nibay e fananikan riy.

3. Fal’ag rogon mag fulweg nga ta’abang: Ra reb e tabinaew ma rayog ni nge guy rogon nge fal’ag e tha’ rok’ riy nrayog ni ngan rrin’ e biney ni ngan siroq nag, machib nag, fal’ag rogon, fa ni fulweg fare tha’ ko tabinaew nga ta’abang.

Ke yo’or in e pul ngay ni kug thamiy nrib gel ni nggu mulwol nag mornga’agen e biney: “Felan’ e Pi’in Yad Ma Guyrogon ni nge Awnag e Gapas u Thilin e Girdi’.” Nggu museg e thin rog u roy, ni nggu weliy ban’en ni karug thamiy ulan gum’ircha’eg.

Awnag e gapas e ir reb wo’en Kristus. Awnag e gapas e wod ni boech e gidii’ e ma guy ni ban’en nib waer gelngin—ma dariyfan. Ya, ra ngan mang be’ nima awnag e gapas e dani waer gelngin ya wod ni biney e bay ni dabi nang e fayleng rogon. Awnag e gapas e bmu’un gelngin e athamgil ngay ni darma chuweg fa kireb nag rogon e yalen riy. Awnag e gapas e rayog ni fa’anra mbab gum’irchaem, nge tafney rom ngay. Ni wod nima yib ngalan pa’dad ni ngad thapeged e gidii’, ma gathi wod nib man lan pa’am. Awnag e gapas e gathi ban’en nikab be’ech. Ya bay nike machib nag Yesus Kristus, nibay ulan fare Bible nge fare Babiyor ku Mormon. Awnag e gapas e kab kakrom ni’in machib nag ko napan nin Fulweg yarmen e Galasia ko tiney e rran ni gadaed bay riy.

Rayog ni ngad rrin’ed e muruwel rodad ni gadad e pifak e Chitamangiy nu Tharmiy ni gadad be gay rogon ni ngad manged e gidii’ nima awnag e gapas. Gube micheg ko mornga’agen Yesus Kristus, ni’ir e fare pilung ko Gapas, fare Fak Got nib Fos, u dakean fidingan Yesus Kristus, amen.