Bay fare Fal’ngin e T’ufeg Rok’

Napan e May 2021, napan ni gube milekag nag fare motoey nu’un ko fare Temple u Salt Lake, meri ggin President Russell M. Nelson owchen ngay ko rogon ni toey fapi pioneer ere nu’un ney, ni dariy talen muruwel roraed ni bo’or machane mich rorad e rib gel, nra toeyed ere nu’un nem nib thothup, me rib th’abi mangil ko na’un nge ya’el nike par nib suwon ngalang nib n’uw napan. Machane, ke guy ni ke tabab e muchbuu’, ni biney e ke l’gin fare def ko fare temple ni dakir par nib thethabil ubut’, ni biney e be m’ug nib tu’uf ni ngan fal’aggin rogon biyay.

Maki machib nag fare profet rodaed niku wod rogon nib ba t’uf ni ngan rrin’ nib gel ni ngan gel nag e daef ko fare temple ni ngeyog ninge gel ko tin ni bayi buchu fayleng, e kuwod rogon nib tu’uf ni ngad rrin’ed—ni wod ni ngad rrin’ed boch ban’en ni sana dawurda rrin’ed biyay—ni ngayog ni nge gelnag e daef rodad nib thothup ngak Yesus Kristus. Ulan e mulwol rok’, nike pi’ ngodad l’agruwi duwer ni rib ga’fan ningad tafney niged: “Uw gelngin e daef rom? Nge mang a bay ko mich rom nge na’ab rom ni kab tu’uf ko fare gospel?”

Fare gospel ku Yesus Kristus e rayog ni nge pi’ e ayuw ngodad nib thothup me taleg e qoloboch ko tin nib thothup ban’en ko yafos rodad, mrayog ni nge pi’ gelngin nib gel e daef rodad me ayuwegdad ko tin ni gadad be mo’war riy ulan e yafos rodad me pi’ gelngin e mich rodad me gelnag e na’ab rodad ko mornga’agen fapi n’en ko gospel nib riyul’ mab thothup. Reb e yalen ko rogon ni ngan rrin’ e biney e rayog ni ngan pir’eg ulan e section 12 ko fare Doctrine and Covenants, ba thothog npi’ ngak fare Profet Joseph Smith nifan ngak Joseph Knight, ba mo’on ni rib yul’yul’ mari ba’dag ni nge nangfan e muruwel rok’ Somoel, ni gathi bachan e ba’dag ni nge thilyeg rogon ir machane ba’dag ninge nang rogon ni nge par nib gel nib yul’yul’—“ni wod ba ram’en e tomilang nu tharmiy.” Fare Somoel e ga’ar:

“Arrogon, gube non ngom, ma kugbe non nifan ngak e gidii’ ni gubin ni ba’dag ni nge un me pi’ e ayuw ko re muruwel ney;

“Ya dariy be’ nrayog ninge un ko re muruwel ney makemus ni fa’anra sobut’aen’ nag ir mab sug ko t’ufeg, mabay e mich rok’, athap rok’, nge murunguy rok’, ni kuma t’ar laniyan’ ko gubin ban’en, ni demturug ko mange ran’en ni yira’ pi’ ngak ni nge rrin’.”

Fare kanawo’en e powi’iy ni dag fare Tathapeg, nikan yoloey cheppin ngalan ere babyor ney nib thothup, e be pug orran ngodad ni t’ar laniyan’ e ir e kabang ni rib ga’fan ko fare daef rodad ngak Yesus Kristus. Irerray reb fapi fal’ngin nrib ga’fan, ni gathi kemus nifan ngak e pi’in nikan pining ni nge pigpig yaku fan ngak e pi’in nike mu’i ngongliy e m’ag ngak Somoel make mu’ i finey nra leak kanawo’en ufithik’ e yul’yul’. T’ar laniyan’ e kuma pi’ gelngin fapi n’en ni bod kanwo’en Kristus nikun weliy ulan e biney e yi’iy nikan thapeg: sobut’aen’, mich, athap, t’ufeg, nge murunguy nima yib Rok’. Ku arram rogon, niku wod ni fil rogon e t’ar lanin’uy e rayog ni nge yororiy dad ko tin nibe qoloboch nib thothup nibe buchbuch ko fayleng nrayog ni nge mo’warnag e daef rodad ngak Yesus Kristus.

Ko gubin fapi fal’ngin ni wod ni ngan mang gachalpen Kristus, t’ar lanin’uy e ir e bin nib suwan ufithik’rad ni’ir e bedag rogon fare Tathapeg, ni bod ba wa’amngin nrib fel’ ko Ya’el, ni biney e bay nrayog ngak e gidii’ ni fa’anra yad ba’dag ni ngar thapeged e tin nib thothup ban’en. Irerray fare fal’ngin nima pi’ e gapas ngalan gum’ircha’ey, nima thilyeg e thamtham nge tin ni yiba’dag ko tin nib gonop nge tin nib simunguy ban’en. Ulan fapi chep nib thothup, t’ar lanin’uy e kabang ni’ir e rib ga’fan ko fare kanawo’en e milekag rodad nib thothup, ni’ir era powi’iydad ko gum’aen’, tu’ufeg, murunguy ma kuma be’echnag e pin’en ni gadad ma thamiy, rogon e thin rodad, nge rogon ngonglendad.

Pi gachalpen Kristus nima gay rogon ni nge rrin’ e biney nibang ku Kristus e magel nag e gumaen’ rok’ min suguy ko t’ufeg nib polo’. Bay ba gelngin nima yib ngadaken rad, ma wod nima yib gelingrad ni da’ni papay e damumuw ngorad, mab gel e gum’aen’ rorad, mab munguy e tafney rorad ngak e gidii’, ma yaed ma tayfan, ma yadba yul’ul’, ma yadba gel ko ngiyal’ nra yib fare nifeng ku mo’oniyan’ ni rib alamrin rogon. Yaed e darma rrin’ bugi ban’en ufithik’ e gurgur, ma yaedma fanow ni wod rogon e gonop nib thothup, ni fare Kan ni Thothup e ir e be powi’iyrad nib simunguy mab sobut’aen’. Bachan e biney, momaw’ ngorad ni ngar qolobochgad ko tin nib thothup ban’en ni bachan e, wod rogon nike machib nag fare Apostle Paul, ya yad manang ni rayog ni ngar rrin’ed gubin ban’en udakean Kristus, ni’ir e ma pi’ gelingrad ni kuwod rogon ko ngiyal’ nra yib e lumel ngorad nra rurug fare mich rorad ngak.

Ko fare mulwol rok’ ngak Titus, me weliy Paul mornga’agen fapi fal’ngin nifan ngak e pi’in ni ba’dag ni nge par ni wod rogon fare Tathapeg mayad rrin’ fare muruwel rok’ ufithik’ e mich nge liyor. Ke yoeg ni susun ni yad bod e milekag nga tabinaw rok nge ayuweg, ma darma tamuun rrum, ma ba yul’yul’, ma ba thothup—ni tiney e ire rima dag fare ngonglen e t’ar lanin’uy.

Maki, taychilen Paul ni susun ni “dabra ufanthin, fa papey e damumuw ngak, … [nge] dani tachaam.” Tiney e ngongol e rib tagan ko tafney ko fare Tathapeg ma kuma palognagdad ko mon’og nigey ko tin nib thothup ban’en. Ko biney e thin ulan e chep nib thothup ni, “thangri dabi ufanthin” e wod be’ ni dar ma rrin’ bugi ban’en ufithik’ e fekyathin nge tarfanggin; de “papey e damumuw ngak” e wod be’ nima palog nag ir ko tin ni dani gum’aen’ e ngongol fa kareng e damumuw ngak; ma fare “dabi tachaam” e be yipfan be’ nima siyegnag e togopluw, tachaam, nge thin nibgel marin, fa gelngin, fa bakireb ko thamtham rodad. Napan ni gadadra gayrogon ni ngad thilyeged ngonglendad nge yoen’ loen e mich nge sobut’aen, ma aram nrayog ni ngad yuluy niged gadad ko fare malang ko murunguy rok’ ma rayog ngan polo’ nagdad ma gadad mang ayuw ko tin nib tu’uf Rok’ nib thothup.

Napan ni gube tafneynag rogon ni ngan gay rogon e t’ar lanin’uy, me yib fapi thin ku Hannah ko tafney rog, ni’ir e chitinngin fare profet Samuel—be’nib bpin nirib gel e mich rok’, ni utomuren e mo’war ni tay, me pi’ ba tang ko og nag e magar ngak Somoel. Ke ga’ar, “Mu taleged e thin ni gimed be yog ni ba ga’ lammed ni gimed e soeroermed; ngam th’abed gulungumed ndab ku mu weliyed e thin ko ufanthin; Ya SOMOL e ba Got ni manang urngin ban’en, me ir e ma thabthabelnag urngin e tin be rin’ e girdi’.” Tang rok’ e baga’ ko meybil—ya ba mulwol nra-be’ me munguynag ir ni nge sobut’an, me gonop nag ir, me ayuweg ir. Hannah e ke pugorran ngodad ni bin gelngiy ni thothup nib riyul’ e gathi mam’ug ko rogon e ngonglendad nirib papay fa rogon e thin rodad nib tolang ngalang ya rogon e t’ar lanin’uy, nge tafiney nib gonop ko tirok Somoel ban’en.

Bo’or yay, fare feylang e wod nima tawa’athnag e ngongol ni wod e tachaam, fekyathin, dani gum’aen’, yigo ir nifan ngak, ni tiney e ngongol e bagel marrin ngalan e yafos ni’ir e ma fekey ko wo’ ni dani mat’aw. Napan ni gadra fek owchdad ko fare fal’ngin e t’ar laniyan’ min fekyathin fare Kan ni Thothup nima powi’iy dad ko rogon e ngongol nge numon rodad, mara moem ni ngan muul ngalan fare wup’, nra l’igindad ngad doged e thin ni dani fel nge ngongol nra m’ingnag gum’ircha’endad, ni demuturug ko ra buch ko tafar rodad, tabinaew, fa tha’ rodad ko gidii’ nirib ga’fan. Fare gospel ku Yesus Kristus e be mulwol ngodad ni ngad gayed rogon e biney e fal’ngin nribga’ ko ngiyal’ nirib gel e momaw’riy, ya irerray e pi ngiyal’ nram’ug pingindad. Wod rogon ni yog Martin Luther King Jr., “Ngonglen nge pingin facha’ e darma pos me buch ko ngiyal’ nibay ubang nib gapas fa bang nib moem ngak, ya ma buch ko ngiyal’ nibay nibay ufthik’ e gafgow fa be buch bugi ban’en ulan e yafos rok’ nib momaw’ rogon.”

Gadad ni pi gidii’en Got, e kan mulwol nag ngodad ni ngad pired ni gadad bagel ko ko fapi m’ag ni kad michmicheged ngak Somoel, ni ngad gayed rogon e fanow ni wod rogon kanawo’en nike dag ngodad. Make micheg, nra fulweg ni, “Rriyulʼ, nriyulʼ, Gube yoeg ngomed, ni ireray e machib rog, ma enra dumow nga dakean e ke dumow nga dakean e war rog, ma fapi garog nu infierno e dabiyog ni nge togopluw ngomed.”

Fare ngiyal’ ni’i machib fare Tathapeg ufayleng e rrin’ e biney e fal’ingin ko t’ar laniyan’ ni’ir e bang ko par rok’. Udakean fare wo’en nib polo’, ke machib nagdad ni nga’i “gum’aen’dad ko pi gafgow nibe yib ngodad, ma dabda togupuluw gad ngak e pi’in nibe togupuluw.” Ke machibnag ni dab damul gad ko damumuw ni bachan e tuwthin nge toqogor, ya ke ga’ar, “thingarmu kalngaen’, ngam bod bochi tir.” Maki machibnag ni pi’in ni ba’dag ni nge yib ngak u gelngin ga’ngin gum’ircha’en e thingari puruy’ nge fel’ e thin rorow eni toqogor rok’. Udakean e t’ar laniyan’ nge gum’richa’ey nib sumunguy ko tu’ufeg, ke michmicheg nag ngodad ni fa’an yira yoeg e thin ngodad nib gel marrin, toqogor, dariyfannag, fa thin ni dariyfan, ya ke micheg ni fare gapas rok’ e dabi chuw rodad, ma fare gelngin e gapas rok’ ni bachan fapi m’ag rodad e dabi chuw ulan e yafos rodad.

Bukun e duw kafram, I gag nge le’ngig e yog ni gu mada’ nigew fapi chonggin e Galasia nib yul’yul’ u Mexico City. Orani yaed, ndemuturug ko yaed fa udakean be’ nib tu’uf rorad, e ke yean ufithik’ e gagow ni rib alamrin, nib mu’un i irring fakrad, cham nge lii’ gidii’, nge ku boch ban’en nrib momaw’ rogon ni ngan tafney nag.

Napan nugsap gow nga owchen fapi chonggin e Galasia, ma danug guyew e damumuw, puwaen’, fa yad ba’dag ni ngar fulweged tabab e pi kireb ney. Ya n’en nikug guyew, e gumaen’. Owchrad, ni aram rogon nib sug ko kirbaen’, ya yaed ba’dag ni ngar thapeged e gapas meyog ni ngan polo’ nagrad. Dariyfan ni aram rogon ni kari kirbaen’rad ko tiney e gafgow, pi chonggin e Galasia ney e kiyad be ul’ul ko mich ngak Yesus Kristus, ni yaed be mel’eg ni dabra paged e pi gafgow rorad ni nge mange mo’owar ulan e yafos rorad nge mich rorad ko fare gospel.

Tomuren ere mukun nem, maga mow mada’ nagrad ni gubin nggu fingichiyedrad. Gubin e ruurugpa’, nge gumuuchmuch e ke mang e mich riy ni fare ayuw nira pi’ Somoel, e rayog ni ngad rrin’ed e tin nib momaw’ ban’en ufithik’ e t’ar laniyan’ ulan e biney e yafos. Rogon nikar daged nge wo’en ni yad be rrin’ e ke mang ba mulwol ni ngan yaenu wa’en fare Tathapeg ni ngan t’ar lanin’uy ko gubin ban’en. Gu chuwgow ni gowod e ku chuwgow u fithik bugi angel.

Yesus Kristus, ni’ir e th’abi fel’ ko gubin, e gafgow nifan ngodad nge mada’ ko ngiyal’ ni yib e racha’ ko gubin e mtʼuftʼuf ko yalach u doew, machane dani pag e damumuw ngeyib ngalan gum’irche’en, fa puwaen’, fa qalan’, fa yib e thin ulanggan nib yabaq, ni demturug gelnggin e amith nitay. Fare t’ar laniyan’ nge gumaen’ nibay rok’, dani tafney nag ir ya tafney nag gubin pifak Got—tin nike thumur, tin nchiney, nge tin nga m’on. Fare Apostle Peter e micheg mornga’agen Kristus napan ni yoeg: “Ma fa’an noeg e thin nib kireb ngak ma de tay puluwon ni thin nib kireb; ma fa’an nni gafgownag ma de ga’ar e bayi fulweg taban ngak e pi’in yad be gafgownag, machane me pag fan urngin ban’en ngak Got, ni ir fare Tapufthin nib mat’aw.” Ku wod rogon ni ufithik’ e gafgow nge amith nitay ni rib alamrin, Somoel e ke dag e t’ar lanin’uy nib thothup mab polo’. Ke ga’ar, “Ni dariyfan, rir ngak fare Chitamangiy, nge kug unum nge muu’ nag fare fal’eg rogoy ko pi bitir ko pumo’on.”

Pi wagalag, rigube mulwol nag ngomed ni gubin ni ngad gayed rogon ko tafney rodad nge gum’ircha’endad ni ngad rrin’ed ni wod rogon fare t’ar laniyan’ nidag Kristus, ni biney e ka bang ko fare numon ni yoeg President Russell M. Nelson ngodad, ni keyog ngodad ni ngad rrin’ed boch ban’en nib thothup ni nge gelnag e daef rodad ngak Yesus Kristus. Napan ni gadadra gay rogon e t’ar laniyan’ ufithik’ e mich nge athamgil ko rogon e thin rodad nga ngonglendad, rigu be micheg ni yira pi’ gelngindad min muyluy nag e yafos rodad nga dakean fare daef ko fare Tabayul rodad.

Rigu be micheg nag ni fa’an yira gay rogon e t’ar laniyan’ ni gubin ngiyal’ mara be’ech nag gum’ircha’endad umit fare Tathapeg, mara chugur nagdad ngak me fal’ag rogdad, ufithik e athap nge gapas, nifan fare rran ni gadadra mada’nag ko fare bin L’agruw e Wub Rok’. Gube yog e pi thin ney nib thothup udakean fithingan Yesus Kristus, amen.