Ewe Famini-a Anonga Ekiekin Won ewe Kapas Allimen Jises Kraist

Ewe nongonongun Ewe Mwichefenin Jises Kraist ren Aramas mi Pin non Fansoun Soponon a anonga ekiekin won ewe famini. Auchea ngeni ach nongonong won ewe famini ina ewe tempel. Ekkewe angangepin mi ketiw ikewe ra otufichi kich ach sipwe niwin usun famini esemuch ngeni fan mesen Semach Won Nang.

Usun ren ewe April 2025 mwichenap, Preseten Russell M. Nelson a fen awora esinesinen ewe forutan 200 minafon tempel. A pwapwa an epwe awora esinesin ussun minefon tempel nesoponon eu me eu mwichenap, me kich meinisin sia fiti ne pwapwa. Nge inamo, ren chommongun ukukun tempel iei ra fen nom non poputan kinikinin kokkot me kautar, mi fich ach sipwe amangeno ewe esinesin usun minafon tempel. Ina minne, ren ewe mumuta me ren ewe Mwichen ekkewe Engon me Ruemon Aposel, sisap esinesin ussun ekkoch minafon tempel non ei mwichenap. Iei sipwene sopweno ne awora ekkewe angangepinin ekkewe tempel ngeni memper non ewe Mwichefen non unusen ewe fonufan, mi pachenong inet me ian sipwe awora esinesin ren ekkewe forutan minafon tempel.

Ewe kinikinin ai afanafan ua keran chok atou a mak mwirin manon nouch achengicheng Preseten Russell M. Nelson. Met iei epwe tapweto a mak me ketiw wiik me mwan, nge mi chok pwarano ai afanafan, mi amemef me ren ewe Samon.

Ewe esinesin ren famini, a katou 30 ier a no, a affata pwe “ewe famini mi epinipinino meren Kot” me “mi popunapen ewe kokkot an ewe Chon Fori ren nonomun fetanin Noun semirit feinfeino.” A pwan affata “pwe an Kot annuk fan iten Noun semirit ar repwe nounoutiw me amasowa fonufan mi chok chuen pochokun.” Me, “sia pwan pwäratä pwe Kot a annuku pwe ekkewe manamanen nounou semirit repwe chok fis nefinen chok emon mwan me emon fefin, mi pupunu fengen fan annukun ewe muu.” Nupwen Elder Russell M. Nelson a afanafana non ew mwich non Brigham Young, pwe ewe famini mi “auchea ngeni An Kot kokkot. … Non ennetin, ew popun ewe kokkot an epwe afefeitai ewe famini.”

Ewe Mwichefenin Jises Kraist fan ekkoch a sineno pwe eu mwichefen mi ononga an ekiek won ewe famini. Mei! Nefinach me Kot me ewe popun ach manau iei ra awewe non kapasen ewe famini. Ewe kapas allimen Jises Kraist mi ewe kokkot an Samach won Nang ren murinon Noun kewe semirit non ngun. Sia tongeni ennetin apasa pwe ewe kokotun ewe kapas allim a akkom keit ngeni kich non ewe mwichen apungupungun ew famini fochofoch, mi fifis non ach famini non ei manau, me popun kokotun fetanin an epwe afefeitai ekkewe semirit noun Kot non famini fochofoch.

Inamo ren ena nonnomun nongonongun, mi wor met mi u ngeni. Non United States sia riaffou seni ngawenon pupunu me nounou semirit. Ren arapakan ipuku ier ewe nonnon aramas non ewe imw fiti pea pupunu a kukununo, pwan ewe ukukun semirit mi uputiw. Ekkewe mi pupunu me semirit mi uputiw chon ach Mwichefen ra kon murinno, nge a fen pwan napeno an kukununo. Mi auchea pwe Aramas mi Pin non Fansoun Soponon resap poutano ar weweiti ussun ewe popun pupunu me auchean semirit. Ina ewe fansoun mwach minne sia achocho ngeni. “Manau tekia eu angangen famini,” Preseten Nelson a aiti kich. “Seni chok ewe amanauen ekkewe angangepinin ewe kapas allimen Jises Kraist famini ra tongeni fefeita.”

Ewe kukununon pupunu me nounou semirit non unusen fonufan a weweoch ren popun uruo, nge Aramas mi Pin non Fansoun Soponon ra aucheani me omokutu epwe murinono—resap apiru—ekkana ekkesiwin.

Non ai chok emon at 80 ier a no, ua nom won an semen semei we ewe atake non ew nikinik ikewe arapakan meinisin met mi fis non ewe ran a nom fan emwenien ewe famini. Ese wor T.V ika ekkoch sokkun pisekin katon an epwe awosukono seni mokutukutun famini. Ren sokofesenin, non nonnomun teninimw non ei fansoun, chokukun memper ra sinei auchean mokutukutun famini mi chok fifis. Manauen non teninimw me pekin sein neman ika neset ikenai, etettenin minen apwapwa, me mwitirin pekin atoura kapas ra amecheresi sarafo ar ekieki ngeni imwer, pwe nenien chok mour me mwongo fan ekkoch nge ikewe mi kukkun an sam me in emwenin met kewe ra fofori.

Aitien sam me in rafen pwan apwangapwangeno pokiten chommong chon ei Mwichefen iei ra angang ar repwe anisi osukosuken famini. Non fansoun nom, ew me nein ekkewe wachemuken opochokun a ochufengeni kewe famini ina ar otures fengen ne achocho fengen non ew mettoch—ussun ren ar atakeni ewe masies ika fori angang ne awora anen mwoni tonong. Ewe famini ew tetenochun me emwenochun choo ren ar fori angangen mwoni tonong. Ikenai, napengeni famini ir ra chok nounano mwoni, minne ese anomota ew tekian tikri ren forutan famini me angang fengen.

Nupwen aitien sam me in a kisino, Aramas mi Pin non Fansoun Soponon mi chiwen wor wiser Kot a awora repwe aiti nour semirit ar repwe mwoneta ngeni ach fetanin famini non fansoun soponon (nengeni Doctrine and Covenants 68:25). Chommong me neich sipwe fori ei nupwen esap meinisin ach kewe famini ir mi foffori pekin oruni. Awesi ar pupunu, mano, me keimu fesen ir mi wesewesen fis. Ua kuna ena non ewe famini uwa marita me non.

Semei we a mano nupwen uwa fisu ier, iwe pwi we kukkun me fefinei me ngang am ouwa marita meren inem mi mano punuwan. Non kewe fansoun mi kon eriafou, a achocho me soposopono. I chok akanamon me epinukunukungaw, nge ren an ewe Samon aninis, an manamanen afanafanen ewe nongonongun ewe Mwichefen mi niwinsefanito a emwenikem. Ussun an iotek fan iten an nang aninis non an amari noun kewe semirit, me inem ewe a feioch! Am oua marita non ew imw mi apwapwa non minne semem we mi mano ussun mi chok nonnom. Inem ewe a aitikem pwe mi wor emon semem me i a wor emon punuwan me aupwe ew famini fansoun meinisin pokiten ar apupunu non tempel. Samem ewe a chok towaweno ren chok ekis fansoun pun ewe Samon a fen kori ngeni ew angang mi sokono.

Ua sinei pwe chommong pwan ekkoch famini rese kon pwapwa, nge meinisin inenap ese wor punuwer ra tongeni osukuna ussun ewe tong an emon Sam won Nang me omuchunon feiochun ew apupunun non tempel. En mi pwan tongeni föri ei! An Samach won Nang kokot a anetata pwe ei tufich fan iten meinisin. Kich meinisin sia kinisou ren apupunun non tempel me ren ewe feiochun riri fengen ussun ew famini fochofoch. Ussun inei we, am oua sani ne eniwini an Liai ewe pwon ngeni noun we Jacob pwe Kot “epwe epinono om kewe riaffou pwe repwe om feioch” (2 Nifai 2:2). Ena a pwan fis ngeni meinisin faminien Aramas mi Pin non Fansoun Soponon, mi unus ika rese mo unus. Kich ew faminien mwichefen.

Ach nongonong me ach nuku non famini fochofoch a apochokuna me ochu fengenikich. Usap tongeni monuki ewe pwon an semen semen inei we Harris, nupwen am mi chok semirit am oua nom won an ewe atake kan ngeni Payson, Utah. I a ngeniei ewe anetipengawen porous pwe semei we a mano towaweno non Denver, Colorado. Ua sanong non ewe rumwen mour me fotopukutiw unukun ewe pet, ua fokkun kechiwengaw. Semen inei we a tapwenong mwiri me fotopukutiw unuki me apasa, “Ngang upwene semom.” Ena kinamwein pwon mi ew pochokunen minen awewen met semen semach me inach ra tongeni fori ar repwe amasowa ewe neni mi pon nupwen emon chon kewe famini a mano ika ra pwositi emon chon ewe famini.

Sam me in, rese pupunu ika ir mi pupunu—me ekkoch, ussun samach me inach chinnap, ekkewe ra amasowa ena wis ren semirit—ir ekkewe meinapen sense. Ar osukun mi kon iman mi seni ar minen opuru. Ewe kinikinin famini mi ewe neni a kon unusoch ne pwarano fofforun me kaeo auchean ese much, ussun ewe auchean apupunu me semirit, ewe popun manau, me ewe ennetin popun pwapwa. Ina pwan ewe murinon neni ne kaeo ekkoch auchean nesenin manau, ussun kirekiroch, omusomus, pochokun ngeni sosot, me ewe auchean sukun me angang wenechar.

Ewer, chommong chon ewe Mwichefen a wor chon ar famini mi auchea rese etiwa auchean me osukusuku ewe kapas allim Ekkei memper a auchea ngenir ach tong me nikitu. Ach sipwe wewe ngeni emon me emon, sipwe chemeni pwe ewe unusoch sia kutta ese kouk ngeni ekkewe nonomun kokotongawen manauach iei. Ewe auchean osukun non Doctrine and Covenants 138:57–59 a affata ngenikich pwe aier me maritan ngun a tongeni soposopono non ewe nenien ngun ewe a tapoto mwirin ei manau. Akkauchean, ren kewe chufengenin famini an epwe apochokuna fengenir, sipwe chemeni pwe ekkewe tipis me nipwakingaw kich meinisin sia sinei non ei manau ra tongeni repwe musono seni aier pokiten ewe amwararen me amanauen Achasefan an Jises Kraist.

Ach Chon Amanau, Jises Kraist, mi ach auchean minen apiru. Sipwe feioch ika manauach a apiru An kewe afanafan me fangetani pusin manauan. Tapweno mwirin Kraist me fangeno inisich ne angang ngeni emon me emon ina ewe murinon echikaren ach apangaw me an emon anongonong won pusin i ina met a pwa mi chok fifis.

A pwan wor ew wisen sam me in ar repwe aiti nour semirit ar repwe sinenapei fofforun mettoch mi imuno seni nongonongun ewe kapas allim. Famini ra etipew nupwen ra fori fengeni mettoch mi weweoch. An famini atake a forata nefinen famini. Mwokutukutun pwapwan famini a apochokuna ririn nefinen famini. Kamp, mokutukutun urumot, me ekkoch pekin urumot ra auchea ne ochu fengeni kewe famini. Famini repwe forata chusefanin famini ar repwe chechemeni mwirimwirir kewe, minne a emwen ngeni ewe tempel.

Sam me in repwe osukuna semirit non nongonongun tufichin fori mettochun manau, pachenong angangen nukun imw me non imw. Kaeo ekkewe kapasen ekis mi ew auchean amoneta ren angangen misineri me nonomun manauen ikenai. Ewe sensen ekkei tetenin kaeo ra tongeni repwe sam me in ika semen me inen semer me iner kewe ika tetenin ar famini. Famini ra maroch nupwen ra kaeofengen ussun ew kumi me emiriti fengenir won mettoch meinisin mi wenengeni ewe famini me chochon.

Ekkoch meni repwe apasa, “Nge ese wor am fansoun ngeni ew me nein kana.” Ach sipwe awora fansoun ne fori met mi ennetin namot, chommong sam me in repwe kuna pwe ra tongeni okunu ar famini repwe tin ika meinisin re okunu nour kewe pisekin katon repwe ofeno. Iwe sam me in, chechemeni, met ekkana semirit ra wesewesen mochen ren mongon nekunion mi ami fansoun fengen.

Watten feioch ra feitto ngeni kewe famini ika ra iotek fengen, fotopuku nepwin me nesosor ne awora kinisou ren ekkewe feioch me repwe ioteki oskosuk mi chou fetan. Famini ra pwan feioch nupwen ra iotek fengen non angangen Fan me non ekkoch napanapen mwich. Kewe riri nefinen famini ra pwan pochokunono seni porousen famini, forata orenien famini, me aea fengen ekkewe mettoch ra sinei mi pin. President Spencer W. Kimball a achema ngenikich pwe “porousen mokutukutun memef seni pusin manauach me ach kana famini me nom … ir pisekin osukun mi pochokun.” Fan chommong ir ekkewe nenien mokutukutun memef fan itach me mwirimwirich kewe.

Ua pwarata pwe ewe Samon Jises Kraist, i ewe Anamon Noun Kot, Samach Feinfeino. I a tingorekich ach sipwe fetan won ewe anen pwon minne a emweni ngeni ew chufengenin famini non nang. Ewe manamanen riri fengen an ewe pristut, a emwen seni ekkewe kii mi niwinsefanito me non ewe Kirtland Tempel, a ochufengeni famini fochofoch (nengeni Doctrine and Covenants 110:13–16). Ra fen mokutukut anganger non ew napenon ukukun tempel an ewe Samon non unusen fonufan. Ei mi ennet. Mut ngenikich sipwe choni, ua iotek, non iten Jises Kraist, amen.