Nengeni Kot me Manau

Non ewe June a no, ew anuokusun akseten a fis non ewe fonuen Lesotho non southern Africa. Efoch kukkun bus a uwei 20 fopun nengin seni ewe Maputsoe Pranch seni ewe Mwichefen me fumon nour souemwen a sa ngeni ewe capital city, Maseru, ren ew chufengenin mwichen fopun seni ar we tistrik. Nupwen ra sa won ewe anenap mi wor ruofoch nenien san taraku non kunokun nesosor, efoch taraku a sato me ewe epek, a sotuni ita an epwe pasini pwan efoch taraku, a sanong non ewe an mi sa ewe bus won. Ese wor neni ika fansoun an epwe kouno ne purefengen me ewe wa, me non chok seken ekkewe taraku ra purefengen, sokopeniu seni ewe an, iwe pung me kar.

Ukukun meinisin, 15 aramas ra mano non ewe akseten, pachenong onomon fopun nengin, ruemon sou emwenin Mwichen Fopun, me ewe presetenin pranch me punuwan ewe. Ekkewe mi manau, chon ar famini, me chiechier ra pwarata sokopaten memef, mi pachenong fansoun song, weiresin ekiek, me pwan nemenemeno. Ina mo ren ekkei memef me kapas eis rese ponu, rafen oururu emon me emon neir me kun ngeni Kot non kon mi pin, ekkewe pukefel, me iotek, ikewe ra kuna ourur. Setso’ana Selebeli emon mi manau seni ewe akseten engon-me-fisu-ierin, a pwarata, “Jises Kraist mi tongeikem me a nom rem, inamo ika netipem mi metek.”

Emon fopun nengin me emon sou emwen ekkewe ra nuing ren aninisin karer ra kaeo fengen ewe Puken Mormon. Emon a apasa, “Arapeto chok am auwa fen annea non Moroni, me Moroni a apasa met wesewesen ua fen mefi. … Nupwen a kapas, ussun nge a apasa, ‘Kopwe kaeo ekkei kapas pun ra mak fan itom an epwe anisuk kopwe ngaseno seni ei.’”

Non ew chufengenin angangen peias ren ekkana ra mano, Area Fik Elter Siyabonga Mkhize a kapasen aurour, “Kich meinisin sipwe kun ngeni ewe Samon non ei atun me tingor ngeni I epwe oururu netipach me … epwe ekinamweano ewe metek sia mefi.” Ewe presetenin Mwichen Fopun seni ewe neni Leribe Pranch, Mampho Makura, a pesei: “Kun ngeni ewe Samon me kuna ewe pochokun ne etiwa An mochen. Jises Kraist e ‘ewe chon fori me chon ounusano ach nuku.’ [Hebrews 12:2]. Kosap neneno seni nge nengeni I.”

Nengeni I. An neminewe kapas a enniwini ewe ourour an Alma ngeni noun ewe at Ilaman: “tumunu pwe kopwe nengeni Kot me manau.” Alma a apasa met a fis ngeni Liai me noun kewe aramas ren ewe Liahona pwe eu sokkun: “Mi mecheres ne awora tumunoch ngeni ewe kapasen Kraist, minne epwe itiningonuk ew aan mi wenechar ngeni pwapwa esemuch, usun chok semach kewe ar aneasochis ngeni ei kampas, minne epwe itiningenir ew aan mi wenechar ngeni ewe fonuen pwon.” Alma a apasa: “Ika ir repwe nengeni ir repwe manau. … Nge ika sia … nengeni sipwe sipwe manau feinfeino.”

Non pwan eu fansoun, Alma a enniwini ew minen apiru ussun ewe serepenit piras Moses a chunata nupwen ekkewe chon Israel nom ra osukosuk ren serepenit mi ngetenget. Ewe Samon a ureni Moses pwe epwe fori emon serepenit seni mecha o iseta won efoch ira fiti ewe pwon “ika ekkewe serepenit ra ku emon, nge a nengeni ewe serepenit won ewe ira, iwe epwe manau.” Alma a awewei pwe ewe macha piras a ew sokkun ika esisinen Kraist ewe epwe sikita won ewe irapenges. Chommong ra nengeni me manau, nge ekkoch ra nom non an Alma kewe kapas, “fokkun weires” pun rese nengeni me ra mano.

Alma a eis:

“Ika oupwe tongeni chikar ren chok ami nenefetanei mesemi pwe oupwe tongeni chikar, ousap mwitir nengeni, are oupwe fen apochokunano netipemi non ami ouse nuku, me winiti mi chipwang, pwe ousap nenefetanei mesemi, pwe oupwe tongeni mano?

“ … Iwe nenefetanei mesemi o poputa ne nuku non ewe Noun Kot, pwe i epwe wareto pwe epwe angasa noun kewe aramas, me i epwe riaffou me mano pwe epwe achasefani ar tipis; me i epwe manau sefan seni mano, minne epwe wato ewe manausefan, pwe aramas meinisin repwe uta me mwen mesan, ar repwe kapung non ewe soponon me ranin kapung, anongonong won ar kewe angang.”

Ewer, ewe kapasen ourour “nengeni Kot me manau” a wor wewen ren kich esap chok non fansoun ese much, nge a pwan fori meinisin sokofesen non nonomun me nongonongun manauach iei. Chechemeni kewe kapas an ewe fopun Sister Selebeli non Lesotho a fen apasa—“Jises Kraist a tongei kich me a nonnom rech, inamo ika netipach mi metek.”

Iei non nonnomun ew fonufan mi turutiw—ikewe ewe tefin a efitikokou me ikewe meinisin rese unusoch—o epwe wor netipengaw me fitikoko, riaffou me weires, fetanengaw me mano, erriafou aramas me pungungaw. A chok ren ach nengeni Kot minne meinisin aramas, famini, me pwan mo ekkewe fonu ra tongeni nonomoch. President Russell M. Nelson a afanafana: “Pokiten ewe Chon Amanau, seni An Achasefan esemuch, a angasa kich seni apwangapawang, mwan, me tipis, me pokiten A fen mefi metek meinisin, aurek, me chou oua fen ani, [nengeni Alma 7:11–13], iwe nupwen oupwe ennetin aier me kutta An aninnis, oua tongeni okkufu ei efeiengawen fonufan.”

Ese wor pwon epwe enniwin sefan fan chommong non Puken Mormon pukefen nap seni ei: “Ukukun ami oupwe anneasochisi ai kewe annuk ami oupwe feiochuno me non ewe fonu; nge ukukun ami ousap anneasochisi ai kewe annuk ami oupwe pokupokuno me mwei.” An emon pusin sinei ussun ewe Puken Mormon aramas me nom ra pwarano ewe ennet ussun ekkei kapas. “Prosper” wewen ani pwapwan ewe emwen me feiochun nang non manauer. “Prosper” wewen angei kinikinin nonomoch non pekin mwoni ewe a otufichir ar repwe pupunu, forata famini, me iamwiri osupwangen ekkewe ekkoch. “Prospering” a pachenong ewe tufich ne tota seni weires me sossot. Seni ewe chenin Kraist, “mettoch meinisin ra [angang] fengen ren [ar] murinno,” emwirinerono, me apochokunono nefiner me I.

Alma a awewei pwe sipwe nengeni Kot ach sipwe aponueta An kewe annuk, sopweno ne kechiw ngeni I ren An aninis, kapasen aurour meren I non om fofor meinisin, me mut ngeni netipom epwe ur ren kinisou ngeni I neran me nepwin. An Kot annuk me kapasen ourour ra pwa non ekkewe pukefel me ekkewe kapasen Noun chon angang. Ekkewe nongonong me ennetin popun ra nom non “Ewe Famini: Ew Esinesin ngeni ewe Fonufan” ir mi ew apiru murino. Pwan ew emwen mi pwa non ewe puk Ren ewe Pochokunen Sarafo. Ewe itenapen Mwichen Onuon me Fopun ren ei ier “Nengeni Kraist,” a tou seni an ewe Samon ewe ekinamwein emwen ngeni Joseph Smith me Oliver Cowdery: “Nengeniei non ekiek meinisin; kosap tipemwaramwar, kosap nuokus.” Ren ewe Pochokunen Sarafo a kapas ngeni An Kot atapwanapwanen annuk me nongonong me osukun won ifa ussun ach sipwe nengeni ewe Samon non ach fori murinon omuchunon ekiek. Iei ew emwen esap chok ren sarafo nge fan iten kich meinisin.

Ussun ew auchean minen appiru, Ren ewe Pochokunen Sarafo a wor an watten auchean emwen non ewe sopun intenapa “Inisum Mi Pin.” A aiti kich, “Eteneki inisum—me inisin ekkoch—fiti sufon. Nupwen ka fori omuchunon ekiek ussun ufom, forun mokurom, me om pwano, eisininuk pusin, ‘Ngang mi osufonu inisi ussun ew niffang seni Kot mi pin?’”

Ren ewe Pochokunen Sarafo a soposopono ne affata, “Onomu nisou me memefin nisou epwe pin. Resap pisekin turunufas ika minen urumot. Nukun pupunu nefinen emon mwan me emon fefin, mi muan ami oupwe atapa ewe kinikinin inisin emon mi monomon me pin pwan mwo ika mi ufouf. Non om finata ussun met ka fori, nengeni, anneani, rongorong ngeni, ekieki ussun, postini, ika mak, amonungaw seni mettoch mi fis an epwe awora memefin mochen nisou ngeni ekkoch ika pwisin en.”

Ei a achema an Preseten Nelson kapasen fon:

“Ekkoch mettoch epwe emwitir ne awosukosuka manauom nap seni atai ei annukun [nimenimoch] seni nang. Ren ekkana ra fen fori pwon mi pin ngeni Kot, manawangaw ina ew me nein kewe anemwitirin om kopwe poutano om kapasen pwarata.

“… Ewe manamanen forata manau ina ewe ew tufichin kot minne Samach non Nang a mutata Noun kewe semirit won fonufan repwe aea. Iwe nge, Kot a forata fateochun ekkewe nongonong ren ewe aean ei manaman seni nang. Kanefengen ren kewe inis a chok fis fan iten emon mwan me emon fefin ekkewe mi apupunu fengen.

“Napengeni ewe fonufan ese nuku ei, nge an aramas memef esap ina met a apungano ennet. Ewe Samon a afata pwe ese wor emon aramas mei u ngeni annuk epwe muuni ewe muun celestial. … Me ika ka fen nimengaw, ua tingor ngonuk kopwe aier. Feitto ren Kraist me angei An pwonen unusoch omusomus nupwen ka unusen aier seni om kewe tipis [nengeni Isaiah 1:16–18; Doctrine and Covenants 58:42–43].”

Chemeni pwe pwon non ewe Puken Mormon, ewe osokurun feioch esap woungaw—pwe fen ewe pokupok seni mwen mesen ewe Samon. Nonnomun a wewe ngeni pochokunen Ngunun me non manauen emon. Meinisin ra ureno ren ewe Saramen Kraist nupwen ra feitto won ewe fonufan. Non kapachetan, ekkoch ra finata ar repwe papatais me angei ewe niffang me apachata saramen ewe Ngun mi Fel. I a wato mokutukutun memef me emwen, anapano me enimochuono an emon nifangen pusin non nenian me tongeni, me aninis ne amonungaw seni angangawen ekkoch, ngawen ekiek, me muchupok.

Ussun en, ua sinei ekkoch fan ew ra ani pwapwan ewe niffangen ewe Ngun mi Fen nge ion ese aponueta ekkewe annukun Kot a pout seni ena feioch. Awenewen ngeni emon a tonong non ekiek minne noun taropwen pachenong non ewe Mwichefen a fen katou ren an atai annuk. I a apasa pwe an poputan mokutukut an epwe mefi netipengaw. I a mefi an kewe sou emwen rese unusoch ra apungu. I a sinei an napanap rese pung, nge i a sotuni ne pwarata ren an a itini ekkewe mi mwan me nipwakingawen ekkoch. Mwirin ekis fansoun, i a poputa ne mefi kinamwe non ew nikinikin manau nukun ewe Mwichefen ese wor angangen wis, osukusuken fiti angangen fen ngeni Kot me iamwiri ekkoch.

Ei a soposopono ren ekkoch fansoun, nge i a poputa ne mefi napanon pochokunen memefin ewe Ngun mi Fel a nom ren—An Kot ese nom—non manauan. Ren an weweiti, i a sinei met ussun an epwe ani, ran me ran, ewe ourur, emwen, me epinukunukun ewe ngun, me a mitiseni. Omuchunon, i a fori met a auchea an epwe aier me tufich sefan ne papatais ren konik me ewe Ngun.

Ussun ese wor nemuchun ngeni ekkewe sokofesenin nenien awora aninisin aramas ra nengeni ren wewen, pwapwa, me aninis. Napengeni ra “kutta pekinon ewe esisin.” Nge sisap ussun “semirit, kunungeni me kunuseni, me mwarei fetanei fiti iteiten asapwanin nongonongun annuk [ika napanapen pisek].” Non ach nengeni Kot, sia tongneni kuna kinamwe non weires, me ach nuku a tongeni soposopono ne marino pwan mo non fansoun tipemwaramwar me sosot non pekin ngun. Sia tongeni angei pochokun non ach mesengeni u ngeni me imuseni ekkoch. Sia tongeni asofosefani menemenochun fiti met sia sinei mi fis iei. Ennetin, ese pwan wor ew an me nukun met Kot pusin I a fen sikata: “Kun ngeniei, pwe oupwe manau, tori soponon fonufan: pun ngang Kot, o ese pwan wor emon.”

Kun ngeni Kot wewen pwe I esap chok ew me nein ach kewe etetenin mettoch; a wewen, pwe, I emon a kon tekia non tetenin. Ua chemensefani ena akseten mi anetipengaw non Lesotho non ewe June a no. Seni an ewe pettin pioing, emon me nein kewe meinapen Mwichen Fopun ewe a manau, ewe ese nuku non Kot me mwen an choni ewe Mwichefen, a apasa pwe an popun iei an epwe kuna pwata a manau. “Sopweno ne angang ngeni Kot ina ussun ai upwe kuna ew ponuan,” neminewe a apasa. “Ua kan ekieki pwe uwa tongei Kot, nge iei uwa fokkun, fokkun, fokkun fokkun tongei. Iei I ewe [nampa ew] auchea non manauei.”

Ua apasa ai kapasen pwarata ussun ewe Sam, Nau, me Ngun mi Fel, ekkewe ra unusoch non ar chufengen non kapas, ekiek, popun, me fofor ir ewe emon Kot, ir minne sipwe kutta meinisin mettoch mi murinno. Ua apasa ai kapasen pwarata ussun ewe Achasefan an Jises Kraist, nupwen a feitto ewe manaman an epwe ounusochuono ewe murinon pwon, “Kun ngeniei, o nikitu tori soponon, pun kopwe manau; pun ewe a nikitu tori soponon upwe ngeni manau ese much.” Non iten Jises Kraist, amen.