Wata wom Iten Jises Kraist

Non 2018, ren ewe University Utah, eu wis mi auchea a foruta a iteni “Dr. Russell M. Nelson me Dantzel W. Nelson Presidential Chair non Cardiothoracic Surgery”—cardio, wewen “ngasangas,” me thoracic, wewen “fanimwar.” A afona an Preseten Nelson auchean angang ussun emon Tokterin ngasangas me ewe aninis a angei seni punuwan we Dantzel, ewe a mano. Ei wis a kamo seni ew pekin mwoni a foruta an epwe nomotam ngeni fansoun mwach. Ewe aramas a finita ren ei sokkun wis mi tekia a angei sinenon, aninisin niwinin, me kutten pekin mwoni.

Ewe aemonun tokterin reirei a fini an epwe wiseni ewe wis Dr. Craig H. Selzman, emon tokterin ngasangas mi angangoch esap emon chochon ach Mwichefen. Ren ewe auchean mwich ar repwe ewisa ei wis ngeni Dr. Selzman, chommong wasona mi auchea ra fiti, pachenong Presenten Nelson me punuwan we Sister Wendy W. Nelson. Fansoun ewe mwich a fis, Preseten Nelson non an kapas tekisoson ussun an we minafon angangen reirei.

Atun an we emon Dr. Selzman a aporousa met wewen ngeni i an kafinita ngeni ei wis tekia non University ika sukun mi tekia seni. I a apasa pwe ruanu ran me mwan, mwirin ew nakatamen ran non ewe rumwen reirei, i a kuna pwe emon me nein noun kewe mi samwaw a auchea an epwe niwin sefan ngeni angangen reirei. I a monu me netipengaw, an a sinei pwe epwe nom non ewe pioing pwan ew pwin.

Ei kunionun, Dr. Selzman a fen awora ew oporousen ekesiwinin-manau ngeni pusin i. Non ewe fansoun, i a ekieki, “Non Enimu, upwe kefinita ngeni ew wis non angang mi eiteit mwirin Dr. Nelson. Fansoun meinisin a sineno ussun emon mi tumunuochu memefin non inisin, anisi meinisin fiti mennin, me ese tongeni song. Iei itei epwene akoko ngeni itan, a auchea upwe achocho ngeni ai upwe ussun chok i.” Dr. Selzman afen afat pwe i emon tokterin reirei sia ani epinukunuk. Nge a mochen epwe winiti emon mi fokkun murino.

Me nom, meni an kumien reirei a esinna an watten monunu me ningeringer pokiten a pwa me non nikinikin me ngingin neuan. Nge non ewe rumwen reirei ena pwinin Dr. Selzman a fori ew pochokunen ekiek an epwe wesewesen aninisioch me weweiti an ewe kumi. I a mefi pwe a fori ew sokofesen me a apungano an epwe sopweno ne achocho ngeni an epwe ussun Dr. Nelson.

Nimu ier mwirin, Preseten Nelson a fangeno ngeni ewe University Utah noun kewe taropwen porousen an angang. Aramas mi auchea seni ewe university ra feito pwe repwe kinisou ngeni Nelson. Non ei fansoun mi fis ei mettoch, Dr. Selzman a kapas sefan. Wewen makemochen iten Preseten Nelson, RMN a apasa, “Mei wor ew makemochen it ‘RMN’ minne iei a choufetan non ewe Kinikinin Cardiothoracis Surgery ren ewe University Utah.”

Non nonomun ningeringer, Dr. Selzman a awewei, “Iei ua fori met aua osukuna noum kewe ra kaeo ar repwe fori—ononga ekiek won met kopwe fori, oreni ne fori, me fori met ukukun om tongeni. Ei manau murinnon emon aramas a nonnom non kich iteiten ran. Sia awora pinnen esisin ngeni meinisin memperin ewe kinikin me emon me emon minefon chon kaeo. Fachikin ewe pin mi wor ekkewe foun mesen mak ‘RMN.’ Ewe RMN eu nongonongun ach we pekin kaeo; aua asukuna ngeni meinisin.” Dr. Selzman a fen emwirinono manauan seni nom me mochen an epwe arap ngeni Kot pokiten itan iei a chufengen me ena it ren Preseten Nelson.

Ei kinikinin mettoch mi fis a apachanong Dr. Selzman a esenipato ai upwe pusin eisiniei: “Ifa ussun ai ua fen ekesiwin nupwen uwa apacha itei ngeni ewe iten Jises Kraist? Ua fen apiru ew Nikinikin Kraist mi murinno ussun ew pungunon? Ua ennetin sotuni ai upwe emon mi murino me winiti ussun I?”

Non an Dr. An Selzman sine, sia tongeni kuna ren nimu fofforoch ngeni wisach minne sia wata woch ewe iten Jises Kraist. Inamo ika ena fofor a poputa ren papatais, ese unus chinon chok ika sia unusoch me pin me sia winiti ussun I.

Ion kich ina ewe aewin fofforoch. An Dr. Selzman fansoun chuno ngeni ofes an Nelson a apacha itan ngeni iten Preseten Nelson, me Dr. Selzman a poputa ne siin fiti Preseten Nelson. Nupwen sia wata woch ewe iten Jises Kraist, sia apachata itach ngeni Itan. Sia siin meren I. Sia pwapwa ach sineno me winiti emon souneng. Sia etiwa ewe Chon Amanau me ese wor ach niamam nupwen sia uta ach sipwe anneanong pwe kich Noun.

Arapakan wewen ngeni pwan ew fofforoch—chechemeni. Nupwen Dr. Selzman a tonong non an ewe ofes, mesan a fot won noun medallion (niffangang mecha) I a angei nupwen a choni ewe Nelson professorship. Ei medallion a achema ngeni ren ewe murinon RMN. Ren kich, ach angei ewe sakramen iteiten wik a anisi kich ach sipwe chechemeni Jises Kraist non unusen ewe wik. Nupwen sia angei ewe sakramen, sia fori ren achechemen ewe kamo I a moni an epwe angasa kich. Sia pwon sefan ach sipwe chechemeni I, esina Auchean me etiwa An murinno. Sia eniwini ne etiwa pwe non chok me seni An chen minne kich sia ngas seni mano non inis me ngun.

Achechemen wewen pwe sia tapweno mwirin ewe aurour a kawor seni ewe Puken Mormon soufos Alma. Sia “mut ngeni meinisin [ach] foffor repwe nom won ewe Samon, me ian [sia feinno ian, sia] mut ngeni epwe non ewe Samon; … [sia] mut ngeni meinisin [ach] ekiek repwe emwen ngeni ewe Samon; … [me sia] mut ngeni ekkewe memefin [non] netipach repwe nom won ewe Samon feinfeino chok.” Nupwen mo kich mi osukosuk ren ekkoch mettoch, sia chok ekieki I, nupwen chok sia chemeni pusin itach, inamo ika met sia anonga ach ekiek won.

Ew maritan ren chechemeni met ewe Chon Amanau a fen fori fan itach a aunungatin fofforoch—apiru. Dr. Selzman a poputa ne apiru Preseten Nelson me ewe mwurinon RMN. Ua nuku pwe an Preseten Nelson murinnon angangoch a ew pwarata ren tamen an angangen chon kaeo ren Jises Kraist. Ren kich, nupwen epwe napeno ach esina me chechemeni Jises Kraist, pwan ina napenon ach mochen sipwe ussun I. Ussun Noun chon Kaeo, sia siwin ngeni murinno nupwen sia anapa ach anonga ach ekiek won I, nap seni nupwen sia anonga ach ekiek won pusin inisich. Sia achocho ngeni ne winiti ussun I me kutta ach sipwe feioch ren An kewe fofor murinno. Sia iotek iteitan pwe sipwe ur ren tong ennet, ewe tong mi ennet an Kraist.

Nupwen Preseten Nelson a afanafan non April: “Nupwen tong ennet a winiti kinikinin nonnomuch, sipwe oturano ewe mochenin angawano ekkoch. Sipwe kouno ne apungu ekkoch. Epwe wor rech tong ennet fan iten ekkana seni meinisin ir mi feito seni sokopaten manau. Tong ennet ngeni aramas meinisin mi auchea ngeni fetanochuch. Tong ennet mi ewe nongonongun an emon manauen souneng.” Chiechien tong ennet, sia kutta, “tumunu, … me amarano” ekkoch niffang non pekin ngun seni ewe Chon Amanau, a pachenong wenechar, nikitu, me tiniken.

Ach apiru Jises Kraist a emweni kich ngeni ew oruanun fofforoch—minne a wenengeni An kewe popun. Sia fiti I non An angang. Ussun emon Tokterin reirei, Dr. Nelson a sinneno pwe emon sense, emon chon echikara, me emon chon kutta pungun mettoch. Ewe pinen esisin a aea non an Dr. Selzman kinikin a awora auchean ekkei mochenin achocho ngeni, pwarano ekkewe kapas osukun, echikara, me Kuna. Ren kich, kinikinin ach mwarei ewe iten Jises Kraist a pachenong pusin ach mochen, fori ren pusin mochenich, me fori fiti etetenochun wenecharen ach kokkot ngeni An. Sia fiti I non An angang nupwen sia “tong, aporousa , me etiwetiw.” Sia fiti I non An angang nupwen sia iamwiri ekkoch, akaewin, ekkewe ra nom non osukosuk me ekkana ra fen tatakis non netiper, chourek, ika metekin riaffou ren fofforun ei fonufan.

Sia pwan ounusa ne mwarei ewe iten Jises Kraist seni esina, chechemeni, anonno ngeni, me awena. Ach fori ekkei ruanu a emweni kich ngeni enimuan fofforoch—Aphochokunen netip. Kich sia tufichin tonong non An Kot manaman me feioch non manauach. Ewe Nelson professorship a awora ngeni Dr. Selzman sinenon me monien aninis a nounou ne siwini ewe oreni non an kinikin. I a aea ei “manamanen pwon” an epwe anisi ekkoch. Non ew an mi nonno ngeni, nupwen sia wata won inisich ewe iten ewe Chon Amanau, Samach won Nang a efeiochu kich fiti An manaman an epwe anisi kich ne awesano ach misin non manauach ei.

Nupwen sia fori pwan ekkoch pwon mi pin ngeni Kot, sia ounusano ne mwarei ewe iten Jises Kraist. Ren pungunon, Kot a efeiochu kich ren An manaman. Nupwen Preseten Nelson a osukuna: “Emon a fori pwon mi pin non nenien papatais me non tempel—me apwonureta—a napeno ar mumuta ngeni ewe manamanen Jises Kraist. … Ewe niffang niwinin ach apwonueta pwon mi pin ren Kot—manaman minne a apochokuna kich ach sipwe ungeni ach riafou, sossot, me netipengaw murino.”

Sia tufichin angei waten ewe ennet me emwen non pekin ngun. Sia tufichin pwaracho ne mesengeni sosotuch kewe. Sia pochokunono napono non ach mochen sipwe tapweno mwirin Jises Kraist. Sia fokkun emwitirano ne aier me niwin ngeni I nupwen sia atai annuk. Sia murinono ach aporousa An kapas allim fiti An manaman me mumuta. Sia anisi ekkewe mi osupwang nge esap wor ach sipwe apungur. Sia angei ew omusomusen ach kewe tipis. Sia ani eu watten kinamwe, me sia fokkun pwapwa pokiten sia tongeni pwapwa iteitan. An ning epwe rokopwanikicheno, me Noun kewe chon nang repwe tumunukich.

Ewe Chon Amanau a kokorikich, “Feitto ren ewe Sam non itei, iwe non ewe fansoun epwe feitto angei unusen an ning.” Ua pesei kemi oupwe fori ei. Feitto ren Samach won Nang. Wata won inisich ewe iten Jises Kraist. Esinna ren I. Chechemeni I fansoun meinisin. Achocho ngeni om kopwe ussun I. Fiti I non An angang. Angei An manaman me feioch non manauom. Makkei Itan non ngasangasom, seni om pusin mochen me mochen fori. Ei a ngonuk “uta” mwen mesen Kot me ngonuk ewe tufich ren An ewe Chon Amanau aninis fan itom. Kopwe winiti emon chon anemwir mi tekia non ewe muun Samach won Nang, emon chon anemwir fiti Noun Anamon, ach chon Amanau me Chon Angasano mi achengicheng.

I mi manau. Ua wesewesen sinei. A tongei kemi. A fangano Manauan fan itom. A tingor ngonuk om kopwe feitto ren ewe Sam non I. Non iten Jises Kraist, amen.