Ureno ren ewe Manauochun Engino

Non May 2021, nupwen an churi ewe angangen forsefanin ewe Salt Lake Tempel, Preseten Russell M. Nelson a ingeno ren achochon ekkewe pioneer ekkewe, mi kouk ar pisek me nukuchar non ar nuku, ra aueta ena imw mi pin, minne a uta pochokun non nangatamen fansoun. Inamo, i a pwan apareni kewe mwirimwirin kiteter, minne nonnomun fansoun a efisata ekkewe keang fesen non wesetan foun nongonongun ewe tempel me apwangapwangen ewe angangen kauta fau, ra affatano ewe namotan apochokuna ewe imw.

Nouch achengicheng soufos mwirin a aiti kich pwe usun chok mi namot ne fori watten kokkot ne apochokuna nongonongun ewe tempel ren an epwe tongeni ungeni ekkewe pochokunen monumon, mi pwan namot sipwe awora amwararen kokkot—meni kokkot sisamo fori me akkom—ne apochokuna ach pwisin nongonongen pekin ngun non Jises Kraist. Non an kapas ese tongeni monukuno, a nikit ngenikich ru anonnonen kapaseis sipwe ekipwichi usun winikapach: “Ifa usun pochokunen ami nongonong? Me met kewe apochokunen ami kapasen pwarata me weweiti usun ewe kapas allim mi namot?”

Ewe kapas allimen Jises Kraist a awora ngeni kich mettochun nang mi ourouroch me murino ne eppeti ewe kiteter non ngunuch, ra apochokuna ach nongonong me anisi kich ne suseni ekkewe keang fesenin non ach nuku me apwangapwangen non ach kapasen pwarata me weweiti usun ekkewe ennetin ewe kasas allim mi pin. Eu akkaewin nongonong epwe atawei ei eppet mi pwa non sopun section 12 ren ewe Doctrine and Covenants, eu pwarata a kawor me ren ewe Soufos Joseph Smith ngeni Joseph Knight, emon mwan tupwon ewe a ennetin kutta an epwe weweiti mochenin ewe Samon, esap chok an epwe pwarano napanapan, nge an epwe nukuchar non wisan chon kaeo—“pochokun ussun kewe uren fan nang.” Ewe Samon a fen affata:

“Nengeni, ua kapas ngeni kemi, me pwan ngeni meinisin ekkana ra mochen wato me forata ei angang;

“Ese wor emon a tongeni aninis non ei angang tiwenon chok ekkewe mi tipetekison me uren tong me kewe mi wor ar nuku, epinukunuk, me tong ennet, me engino non mettoch meinisin mi kawor ngeni fan an tumun.“

An ewe Chon Amanau emwen, mi makketiw non ei pwarata mi pin, a achema ngeni kich pwe engino ina eu auchean apochokunen eu nukucharen nongonong non Jises Kraist. Ina eu me nein ekkewe auchean manauach, esap chok ren ekkewe ra fen kokko ar repwe angang nge ren meinisin kewe ra fen fori pwon mi pin ren ewe Samon me etiwa ar repwe nikitu ne tapweno mwirin I. Engino mi etipew fengen me apochokuna ekkoch napanap usun Kraist mi mak non ei pwarata: tipetekison, nuku, epinukunuk, tong ennet, me ewe nimenimochun tong a feito seni I. Pwan, ach amari engino eu weweochun anen ach sipwe tumunu ngunuch seni ewe pweteten me soposoponon kiteterin ngun mi fis me ren weiwein fonufan minne mi tongeni apwangapwangano ach nongonong non Jises Kraist.

Me nein ekkewe murino mi wor ren ennetin chon kuno noun Kraist, engino mi fateno pwe eu napanapen ewe Chon Amanau won Winikapan, eu auchean uwan ewe Ngun, mi kawor ngeni meinisin kewe ir mi mochen repwe emwen me ren. Ina ewe manauoch mi wato etipew ngeni ewe netip, anapanapa mochen me memmef ren mirit me mosonoson. Non ekkewe pukefel, engino mi fis pwe eu auchean kinikinin fefeitan ach sai non pekin ngun, a emweni ngeni kich tipepos, nikinikin Kot, me kirekiroch o a enimenimochueno ach memmef, ach kapas, me ach foffor.

Chon kuno noun Kraist ekkewe ra achocho ne amari ei nikinik usun Kraist ra napeno non tipetekison me uren tong. Eu kinamwein pochokun a fis non ir, me ra murino ne tufichin ouku song, amari tipepos, me anisi ekkoch ren engino, sufon, me menin, pwan nupwen ekkewe monumonun weires ra pochokun. Ra achocho ar resap mokut atapwanapwan nge ra finata ne foffor ren miriten ngun, emwen me ren mosonoson me ewe pweteten ourouren ewe Ngun mi Fel. Non ei napanap, resap kon feiengaw ren kiteterin pekin ngun pokiten, usun ewe Aposel Paul a afanafana, ra sinei pwe ra tongeni fori mettoch meinisin non Kraist, ewe a apochokuner pwan non fansoun ar mesengeni sossot minne mi tongeni achungu ar kapasen pwarata usun I.

Non noun Toropwe ngeni Titus, Paul a atoura ourour mi pin usun tufichin ekkewe ra mochen tupuni ewe Chon Amanau me fori An mochen ren nuku me nukuchar. A apasa pwe repwe kisasew, fatoch, pung, me pin—nikinik mi ennetin engunuwa ewe pochokunen engino.

Inamo, Paul a fonou pwe “resap nukumach, resap songokai, … [me] esap wor efitikoko.“ Kana sokkun nikinik ra ungeni ekiekin ewe Chon Amanau me eppeti ennetin maritan ngun. Non nonnomun pukefel, “esap nukumach” i ewe ese etiwa an epwe foffor ren namaiki me namanam tekia; “esap songokai” i ewe a su seni ekkewe mochenin tipesong me netipengaw; me “esap afitikoko” a wewe ngeni emon ese etiwa anini fengen, rochongaw, me manangaw ren kapas, inis, me memmef. Nupwen sia achocho ne siwini napanapach fiti nuku me tipetekison, sia tongeni nukuchar ngeni ewe pochokunen foun An chen me winiti mi nimenimoch me ningochun pekin aninis me ne Poun mi pin.

Non ai ekipwichi ewe namoten amari ewe manauochun engino, ua chechemeni an Hannah kapas, inen ewe soufos Samuel—emon fefin an nuku a fokkun amwarar ewe, mwirin mwo watten sossot, a konu eu konun kinisou ngeni ewe Samon. A apasa, Oupwe kouno ne sikasini kemi; Ousap chiwen kapasen namanam tekia: pun ewe Samon i emon Kot mi sinei mettoch meinisin o a apungu foffor meinisin. An we koon a nap seni eu iotek—a eu tingor ngeni pwisin i an epwe fofforun tipetekison, oukatiw mochenin, me oukukoch. Hannah a achema ngeni kich pwe ennetin pochokunen ngun ese pwano non atapwanapwanen mwokutukut ika namanam tekian kapas nge non engino, ekiekochun napanap mi wenengeni an ewe Samon mirit.

Napengeni, ewe fonufan a etekiai nikinik mi fis seni rochongaw, sikasini, me tipemong, fan ekkoch a peni kana sokkun nikinik pokiten pochokunen efien manau iteitan me ewe mochenin punguno me itefouno. Nupwen sia kunnuno seni ewe manauochun engino me emenungaw seni ewe pweteten me ukukochun mwokutun ewe Ngun mi fel non ach foffor me kapas, sia mecheres ne turunong non an ewe chon koum chunumei, minne a efisi ach sipwe apasa kapas me siwini napanapach sipwe ennetin niemam ren, ika epwe non ach mwicheich, famini, ika nefinach ngeni nouwis. Ewe kapas allimen Jises Kraist a tingorekich sipwe aea ei murinon manau akkaewin non fansoun sossot, pun ennetin non ekkena fansoun ina atun ewe ennetin napanapanen aramas ra pwano. Usun Martin Luther King Jr. a apasa fan eu, “Ewe wesen wenecharen emon mwan ese fis nupwen manau mi mecheres, nge nupwen i mi weri weires me tipengaw.”

Ren kich aramas pwon, sia kokko ach sipwe manau fiti netipach repwe pochokun fotuur non ekkewe pwon mi pin sia fen fori ren ewe Samon, sipwe tumunoch ne tapweno mwirin ewe tetten I a forata seni An nenien appiru mi unusoch. Ren ponuwan, I a pwonei, “ennet, ennet, ua apasa ngenikemi, pwe iei ai nongonong mi ennet, iwe ion epwe foruta won ei a foruta won ai nongonong, iwe ekkewe tittin hell resap tongeni pwaracho ngeni ir.”

An ewe Chon Amanau angangen afanafan won fonufan a sinneno ren ewe manauochun engino non meinisin napanapen Nikinikin. Seni An nenien appiru mi unusoch, I a aitikich “sipwe tipepos non riaffou, sisap esita chon esit.“ Nupwen A aitikich pwe sisap fangeta ngeni song pokiten fitikoko me anini fengen, A affata: “Oupwe aier, me winiti usun emon kukkun semirit.” A pwan aiti kich pwe meinisin ekkewe ra mochen feito ren I ren unusen netip repwe etipew fengen ngeni ekkewe ir ra song rer ika ren ekkewe mi wor ar tipengaw ngenir. Ren eu ukukochun nikinik me eu umoumochun netip, I a epinukunuku kich pwe nupwen sia weri rochongaw, kirikiringaw, sufonungaw, ika koturungaw, An Kirekiroch esap no seni kich, me ewe pwon mi pin ren An kinamwe esap katuruno seni manauach.

Ekkoch ier a no, ngang me punuwei we aua ani ewe tufich mi pin ne churi ekkoch memper mi tupwon seni ewe Mwichefen non Mexico City. Chommong me neir, ika won pwisin winikaper are seni atonger kewe, ra engino ngeni watten sossot, mi pachenong sonani semirit, ninni, me ekkoch ametekin riaffou.

Nupwen aua nenengeni mesen ekkewe Souneng, ause kuna song, koput, ika mochen ngenir niwinin met ra fori. Nge, aua fen kuna mosonosonen tipetekison. Mesemeser, inamo ika ra sinneno ren ar netipechou, ra pwarano eu ennetin mochenin chikar me ourur. Ina mwo ika netiper mi tatakis ren riaffou, ekkei Souneng ra nikitu ren nuku non Jises Kraist, ra finata ar resap mut ngeni ekkei weires repwe winiti keang fesen non ar nuku me efisi apwangapwang non ar kapasen pwarata usun ewe kapas allim.

Nesoponon ena mwich mi pin, aua kapong ngeni emon me emon ir. Meinisin kewe kapongen won pau, meinisin foropach a winiti eu mosonosonun kapasen pwarata minne mi fiti ewe aninis an ewe Samon, sia tongeni fini ach sipwe ponuweni fiti engino ngeni ewe ningeringer me sosotun manau. Ar mosonoson me tekisonun appiru a fis pwe eu pweteten tingor ne fetan won an ewe Chon Amanau ewe an fiti engino non mettoch meinisin. Aua mefi pwe aua nom nein chon nang.

Jises Kraist, ewe mi nap seni meinisin, a riaffou fan itach tori An a sup cha seni mononan meinisin, nge inamo I ese mut ngeni song epwe ourano Netipan, ese pwan wor namaiki, enetipengaw, ika kapas mi ngau repwe tou seni Tunawan, pwan mo nupwen fansoun watten riaffou. Ren unusochun engino me tipetekison ese wor mi nonno ngeni, I ese ekieki Pwisin I nge emon me emon noun Kot semirit—me nom, iei, me fansoun mwach. Ewe Aposel Peter a pwarata usun echipwerun napanapen Kraist nupwen a apasa: “Ion, nupwen a kapas mi ngaw ngeni i, ese ponuwenir non kapas mi ngaw, nupwen a kuna riaffou, ese mo eniwa ekkewe chon eriaffou nge a chok epinukunuku ewe sou apung mi pung.” Pwan mo nukanapen An watten riaffou, ewe Chon Amanau a pwarano unusochun me murinon engino. A apasa, “Inamo, mwareiti ewe Sam, me Ua angei me aweseno ai ammoneta ngeni ekkewe noun aramas.”

Pwi me fefeinei achengicheng, ua atoura ai ennneting tingor ngeni kich meinisin pwe sipwe eningano ach ekiek me netipach ren ewe manauochun engino usun Kraist, pwe eu ponuwen ewe tingor an nouch we achengicheng soufos Preseten Russell M. Nelson. Nupwen sia achocho ren nuku me nikitu ne apachanong engino non ach foffor me kapas, ua pwarata pwe sipwe pochokununo me afota manauach won ewe ennetin nongonongen ach Chon Angasano.

Ua ennetin apasa ai kapasen pwarata pwe ewe soposoponon atapwa engino a enimenimochu ngunuch me epinano netipach me mwen ewe Chon Amanau, a apwetetei ne akanakich ngeni I me amonna kich, ren epinukunuk me kinamwe, ngeni ena ran mi ning nupwen sipwe churi I nupwen An Oruan Wareto. Uwa uwau ekkei kapas mi pin non iten ewe Chon Amanau, Jises Kraist, amen.