Ewe Achasefanin Tong an Jises Kraist

Ika ka fen fori eu watten tipis me ka fori ewe angangan ika mochen kopwe aier me mefi ewe pwapwan omusomus ese wor kapas a tongeni awewei, kose mochen kopwe sinei ei manaman mi awitiwituk. Ewe Chon Amanau a sopweno ne kokko, “Feito rei.”

Apochokuna om nuku non ach Chon Amanau, Jises Kraist, epwe amwasanga ewe mochenin ngunum om kopwe sinei I, nuku non I, me mutano netipom ngeni I. Enos a eis usun pwisin an omusomusen tipis, “Samon, ifa usun a fis?” Ewe Samon a ponuweni, “Pokiten om nuku non Kraist, ewe kesamo rongorong usun akkom are kuna.”

Me Moronai a apachata, “Ika oupwe amam inisimi seni fofforungaw meinisin, me tongei Kot ren unusen ami tongeni, ekiek me pochokun, iwe an chen epwe naf ngenikemi.”

Kun seni tipis, kun ngeni Kot, me apochokuna ami nuku non Jises Kraist ina eu ningochun angangen poputa sefan. Tipetekison ne fangeta ami mochen ngeni Kot mi pachenong ami pwarata watten tipis ngeni noumi pisop ika presetenin pranch, nge ami unusen omusomusen tipis epwe feito seni ewe Chon Amanau. Omusomusen tipis eu niffang a kawor seni ewe chenin Jises Kraist.

Eu mochen ne ennetin niwin ngeni Kot mi fiti ewe tiniken ne unusen wenechar ngeni Semom non Nang, ngonuk pwisin, ngeni ekkewe re feiengaw, me ngeni noum nouwisen pristut. Sememi non Nang a pwapwa ren ami finata oupwe feito Ren fiti eu netipengaw me netip niemam. Ami netip niemam wewen oua tekison ne wanong inisimi ne poun Kot; an wor eu netipengaw a wato met ewe Aposel Paul a anapanapa usun “ennetin riaffoun niamam,” eu anonnonen mochenin ewe ngun epwe niwin ngeni I ese nifinifin met sipwe fori.

Ami mochen a efisa ami oupwe mochen forsefani met kafen atai. Nge, ami esinna pwe ekkoch mettoch rese tufich ngeni kemi ami oupwe forsefani, oua ennetin iotek pwe ewe Samon, non An chen, epwe anisi ne echikara ekkena ra fen metek pokiten om foffor.

Ekkewe murinon watten tipis won ekkoch ra men metek rese mecheres ne atawei. Ami mei tapweno mwirin ekkewe appiruen kewe aat noun Mosaia, kewe ra “wesewesen achocho ne forsefani ekkewe feiengaw meinisin minne ra fen fori”? Kapas ngeni ekkewe ka asufonur usun met menin ousap esinna.

Nupwen ua amonnata ei afanafan, ua angei eu weiweitan email seni emon a nom non ewe angangen aier me a mochen niwin ngeni ewe Mwichefen. Punuwan we akkom mi chiwen chok riaffou seni wesinon “[ar] apupunu fochofoch, [weires ren ekkewe semirit], ewe turunon tumunun pekin moni, … an esap [tufichin] tufich ngeni mon mettoch, [me] ewe ennetin memmefin riaffou an weri koturuno.”

A aporousa ngeniei usun an noun we nouwisen pristut “a mefi an epwe [eisini] an epwe iotek ne ekieki met [i epwe pwan fori fan itan punuwan we akkom me noun kewe semirit].” Ren an mutata, ua aporousa och kinikinin an we email.

“Ua [akkom] ekieki ewe [moni] ua fangeta non annukun ewe mufesen pwe a kon watte, nge nei we presetenin pranch a peseiei pwe upwe achikipin me iotek usun. …

“Akkom, ua weires ren ewe ekiekin sopweno apungu mettoch. Pokiten ai kewe tipis esap pokiten moni, ua ekieki met eu ennetin wewen ‘fangafangochun … [nge] mwitir chok ua apareni pwe esap chok usun moni.

“Nei kewe nouwisen pristut ra churi [punuwei we akkom] me nei kewe semirit me apareni pwe ir mi chiwen riafou me resemo chikar.”

“Ai minafon kokkot pwe upwe feinno mwei fiti nuku. … Ua chok affata ai mochen upwe aninis me use esuku mettoch seni. … Ua finata ai upwe [tinano ngeni punuwei we akkom och ukukun moni] seni eu me eu chek, minne a watte ukukun seni niwini we. Me mwen chok ai awora ewe aewin niwinin, ewe Samon a [ngeniei eu memmef pwe mi namot] upwe awatteno [fan ru ewe ukukun moni].

“Ua kaeo pwe apungu mettoch esap chok usun moni. A usun ai upwe tekison ne fangeno manauei ngeni ewe Samon. … Ewe moni an epwe anisi ne siwini met uwa angei seni ai famini pokiten ai finata mi ngaw. A wewen usun ach fori me apwonueta ekkewe pwon me nukun ach esuku och mettoch pwe niwinin me ai anisi neminewe an esap nonineniti usun mon mettoch pwe epwe tongeni kutta ewe Ngun.”

Ami achocho ne forsefani met oua fen atai ese anongonong won moni, nge nupwen oua tekison ne ourour fengen me ewe Samon, oupwe tongeni kuna pwe mi wor chommong oua tongeni fori.

Nupwen oua kutta an ewe Samon omusomus, oupwe tipepos nupwen oua awitiwiti An unusen etipew. Ekkieki usun ei uwokisin:

“Ra tipetekison[a] inisir … ren anonnonun tipetekison; me … ra unusen sio ngeni Kot; ewer, pwan mwo non unusen nangatamen ewer ran. … [Nge] ewe Samon a mang ne rongorong ar sio pokiten ar angangangaw.”

“Nge inamo ewe Samon a rongorong ar sio, me a poputa … ne ekisano achour kewe; … me … ra poputa ne feiochuno ekis me ekis.”

Oupwe tipepos nupwen ewe Samon a ngeni kemi An feioch me etipew ekis me ekis.

Non an ewe Samon fansoun, oupwe mefi Mongungun an ureni kemi, “Kosap chiwen mut ngeni ekkei mettoch repwe aosukosukok.” Eu ran, nupwen oua sopweno ne kun ngeni ewe Chon Amanau, Sememi non Nang epwe “angeiano ewe niamam seni [netipemi], me non echipwerun Noun we.”

Ren ekkewe ra fen feiengaw me ren watten tipisin ekkoch, ua mochen atoura an ewe Chon Amanau tong me umoumoch, an ourur me kinamwe.

Ewe netipengaw oua fen mefi, ewe netip riaffou, ewe turuno, ewe ennetin memmefin riaffoun koturuno, ewe afitikokon manauemi a efisata eu minafon nikinik—ua ngeni kemi ai enneti epinukunuk, ewe Chon Amanau mi sinei kemi me tongekemi. Kutta I. I ami ourur me pochokun; I epwe tinato Noun chon nang repwe chunakemita. Inet ami metek repwe wesino, ami netipechou epwe kisino, me mettoch ouse mochen chechemeni repwe morono? Ngang use sinei. Nge ei ngang mi sinei: Mi wor an manaman an wato ningoch seni fanangen ami riaffou.

Achengicheng pwich me fefinach seni Grand Blanc, Michigan, ren ar nukucharen nuku non Jises Kraist, ren ar pochokun me aramasoch, ra angei me repwe angei, non ekkewe wiik me maram mwach, epwe puputiw rer ewe unusochun me umoumochun tong an ewe Chon Amanau.

Nupwen oua sopweno ne wanong ami epinukunuk non I, ekkewe kuchun rochopwak me ami riaffoun kechiw nepwin repwe siwin ngeni suputiwen ar kechiwen pwapwa me kinamwe non saramen nesosor. “Ami netipengaw epwe siwin ngeni pwapwa. … Me ami pwpwa ese wor [emon] epwe angei seni kemi.” Ewe fansoun epwe feito. Uwa pwarata pwe epwe feito.

Ewe achasefanin tong an Jises Kraist a tongeni pwa non nikinik mi kon weires, nge a namot ngeni kich meinisin ewe achasefanin chen an ach Chon Amanau. Preseten Dallin H. Oaks a aitikich: “Pokiten An angangen achasefan nupwen a nom won fonufan, ach Chon Amanau mi tongeni echipa, echikara, me apochokuna aramas meinisin ekkis meinisin won fonufan, nge ua nuku Epwe chok tufichin anisi ekkewe ir mi kutta I o tingor An epwe anisir. Ewe Aposel James a aiti, ‘Oupwe pwisin atekisonakemitiw me mwen mesan ewe Samon, iwe epwe atekiakemita’ (James 4:10). Sipwe weri ei feioch nupwen sia nuku non I o iotek fan iten An aninis.”

Ua angei mumuta seni chiechiei achgengicheng me Meinap Unus Fiik, Elter Robert E. Wells, iei a 97 ierin, ai upwe aporousa met mi fis ngeni nap seni 60 ier a no:

Nupwen an nonnom non Paraguay non 1960 me a angang usun emon chon angangen non bank, Robert Wells, atun an 32 ierin, me punuwan we, Meryl, ir pilot non ru sokofesenin sepenin, ra changeni imwer seni Uruguay ngeni Paraguay. Ra changenong non kuchu mi manun, Robert me Meryl rese chiwen kuna me rese chiwen tawen kokko fengen won radio. Robert a mwitir sotiw, ikewe a sinei pwe wan punuwan we sepenin a puretiw. Punuwan we me chiener kewe ruemon mi fiti rese manau. Noun kewe, mi nom neimw non Asunción, ir ier fisu, nimu, me ru.

Elter Wells a kapas usun an netipeta:

“Kapas resap naf ne awewei ewe metek a auraeino, a fokkun chou ese chiwen fatoch ai ekiek me memmef. Chonun mesei ren ai riaffou ese tongeni kouno ne suputiw. Sopweno ngawenon mettoch, nupwen ai ekiek a apareni usun manon punuwei we, ua kuna ai mefi watten niamam ai mefi pwe tipisi ewe purutiwen ewe sepenin.”

Robert a pwisin etipisi ren an ese chekiochu ewe sepenin me an ese ngeni punuwan we nafochun ourouren pisekin chang ika aas non asepwan. A mefi pwe a tipis an ese tumunoch.

Robert a apasa:

“Ai ekiek a wunununo. … Ua chok manau—[fan iten ekkewe semirit,] me ese wor pwan och popun.”

“A … turuseniei ai mochen ai upwe soposopono ne manau.”

Nesoponon, Robert a feioch ren eu anonnonen pekin ngun. A achemma:

“Non eu pwinin, arap ngeni eu ier mwirin, nupwen ua fotopukutiw non iotek, eu manaman a fis. Nupwen ai iotek me sio ngeni Semei non Nang, ua mefi usun ita ewe Chon Amanau a feito nepeki me ua rong eu mongungu a apasa ekkei kapas ngeni nguni me ngeni seningei: ‘Robert, ai asoren achasefan a moni niwinin om tipis me om mwan. Punuwom we a omusokono. Chienom kewe ra omusokono. Upwe sachetai om chou. …’

“Seni ena fansoun, ewe choun tipis [me siongaw] a fokkun amwarar ne suseniei. Ua fen ngaseno! Ua mwitir weweiti ewe ounusen manamanen an ewe Chon Amanau Achasefan me … me a och wenewen ngeniei. … Ua … weri saram me pwapwa usun usamo mefi me akkom. … A fen kawor ngeniei eu niffang ua fich ngeni—an ewe Samon niffangen chen. … Use fich ngeni—use fori och mettoch ai upwe fich ngeni, nge inamo I a ngeniei”

Pwi me fefinei, amo sipwe “nimenimochuno non Kraist me ren ewe chenin Kot, me non ewe kasukun chan Kraist, … me [winiti] aramas mi fel, esap wor nimengaw.”

Ua pwarata usun ewe tong, ewe umoumoch, me chenin ach Chon Amanau me Chon Angasano. I mi manau. Kich Noun; kich semiriten ewe pwon mi pin. Nupwen sia nuku non I, tapweno mwirin I, me epinukunuku I, I epwe sachetai kich seni ach netipengaw me tipis. Iwe, mwirin ei manau, non imwan Saman we, sipwe nonom ren I feinfeino chok. Non iten Jises Kraist, amen.