Jises Kraist me Om Minafon Nepoputan

Jises “a fein fetan ne fori angang murino.” Sia anneani ena ukukochun repot non ewe puken Foffor. Met ren watten an ese naf awewen auchean na! Ennetin Jises a fein fetan ne fori angang murino! I ewe wesewesen auchean—me nenien murinno! A ounusa Manauan won fonufan ne fori mi murino. I mi “uren tong me umoumoch, songomang, me kisaseu,” ese wor koukun non murinno me kirekiroch ese much.

Ew sosot ne awewei ika chemeni An murinno me umoumoch epwe ew okukununon auchean kapasan! Ennet, usun ewe Aposel John a sotuni ne awewei, ika sipwe sotuni ne rekotuni eu me eu awewen ika pwanon an ewe Chon Amanau murino, “iwe ekkewe puk resap tongeni kuch won unusen fonufan.”

Ekkewe akkaewin awewe mi wor rech ra makketiw non pukefel usun Jises an fein fetan ne “fori murino” a efisi anononun ing me, mwar, akkaewin nupwen sia wesen ekieki ita epwe ifa usun ach nom ikewe, ach sipwe kuna An manaman, ne angei An afanafan, me mefi An angangen echikara. A porous ngeni ekkewe mi koturu, A attapa ekkewe mi semwen me nimengaw, A wato ourur ngeni ewe mi apwangapwang, A afanafana ennetin ngaseno, me A kokkori chon tipis repwe aier. Ngeni emon me emon mi uri keinapan, mwan mi chun, ewe fin nisou, ngeni ewe mi mwok, ewe mi pung seningan, me ewe ese kapas; ngeni meinisin in mi netipengaw, siongawen sam, me ewe mi mano punuwan mi netipeta; ngeni ewe mi kapung, ewe mi saw, me ewe mi riaffou; ngeni ewe mi mano non inis me ewe mi mano non ngun, met I a fori a awora eu minafon nepoputan. Ewer, pwan eu amwarar ese naf awewen auchean!

Mettoch meinisin A apasa me fori a awora eu minafon nepoputan fan iten ekkewe ir ra echikarer, efeiochur, aitir, me angaser seni tipisir. I ese susenir, Me i esap ennetin suseni kemi. Anchangei non ei fansoun ami rong eu me nein ekkei manamanen kapas seni I:

“Nei, om tipis a museno.”

“Fopun nengin, Ua apasa ngonuk, Pwata”

“Kopwe nimenimoch.”

“Iwe usap pwan etipisuk: kopwe feino, nge kosap chiwen fori tipis.”

“Nei nengin, om nuku a echikaroketa. Kopwe feinno non kinamwe.”

An ewe Chon Amanau kapas ngeni ekkei aramas ra mwochomwoch, nge me rer I a anapanapa manamanen omusomusen tipis, echikara, niwinsefanito, kinamwe, me manau esemuch. Me ewe amwararen porous pwe, I a awora pwan chok minafon nepoputan ngeni kemi me ngeniei. Kich meinisin mi tongeni wor ach minafon nepoputan seni, me pokiten, Jises Kraist. Pwan mwo ami. Minafon nepoputan ra nom nukanapen an ewe Sam kokkot fan iten Noun semirit. Iei ewe mwichefenin minafon nepoputan! Iei ewe mwichefenin minafon poputa!

Fiti papatais ren konik me ewe Ngun, sia “upusefan” me sia tongeni “fetan non manau mi fo.” Ifa ukukun epinukunuk ena minafon nepoputan a ngeni emon mi otures fan choun tipis ika riaffou seni ekkewe mwirimwirin osukosuken manau me fitikokon nefinen aramas? Ese namot ngeni Jises won Inisin ewe omusomusen tipis ika eu minafon poputa non manau, nge I pwisin a papatais, a pwar ngeni kich non fatochun ewe minafon nepoputan I a forata fan iten emon me emon kich.

Me ach minafon nepoputan ese chok fis fan eu. Sia kan ekieki pwe ach papatais ina chok eu ach tufichin eu minafon nepoputan. Esap ina. Ese chok wor eu chok ach tufichin murinnono. Ekkei minafon nepoputan ra tongeni fis iteiten ran! Me ewer iteiten wik nupwen sia ani och kinikinin pinewa me unumi och kapen konik non achechemen ewe niffangen ach Chon Amanau mi unusoch, ewe a mano ren ewe popun an epwe ngeni kich chommong minafon nepoputan usun mi namot ngeni kich! Jises a ngeni kich chommong minafon nepoputan usun mi namot ngeni kich.

Fiti nikitu me achocho non eu pwonen nukuchar ngeni eu minafon manau non Kraist, sia tongeni winiti “emon mi sofo,” ikewe mettoch minen nom ra winiti mi fo. Met sokkun asoso a fori pwe ena sokkun minefon ran a wato ngeni emon mi achocho, ren an sopweno ne fini nuku non an ach Chon Angaseno manamanen echikara me eniwinsefani, inamo ewe tipemwaramwaren ach nonnom non eu fonufan mi turutiw? Ewe Chon Amanau ese tongeni fangeta non An pwon ne apwonueta mochenin ewe Sam me awesi An angangen achasefan, ina mo fansoun metek minne mi efisi An epwe chechech, an epwe sup cha seni mononan, an epwe riaffou non inis me ngun, me an epwe iotek pwe ewe kap mi kipwin epwe katuruno. Pwan ew, I a pwomoni napanapan nikitu non nuku ngeni kich fiti napanapen Kot.

Ren eu me eu pwon mi pin sia fori me eu me eu achocho sia fori ne apwonueta, sia tongeni angei eu “minafon netip” me eu wattenon ukukun “minafon ngun.” Ekis me ekis, an napeno ach etiwa An umoumoch non netipach me aturau ekkewe mongungun ekiekiengaw non mokurach, sia winiti Noun aramas pokiten sia ennetin fori I epwe ach Kot. Jises a fokkun mochen I epwe ach King me nouch Chon Masen siip me noun Princen Kinamwe, me sipwe finata sipwe fori non pusin netipach me ach ekiek.

Aier a awora eu tufich ngeni ach minafon nepoputan, eu minafon poputa, me oruwen tufichin nepoputan. An nouch achengicheng Preseten Russell M. Nelson afanafan ra fen afatochu ekkoch wewengaw usun ewe niffangen aier, me ua ekieki pwe sia keran poputa ne weweiti.

Mi ameseik ach rong nouch kewe serafo ra awewei met wewen aier ngenir. Ua keran rong emon fopun a apasa, fiti amenimen won mesan, “Nupwen ua ekieki usun aier, ua mefi amwararen pwapwa me epinukunuk. Ua mefi ewe tong me pwapwa an Semei non Nang me ai Chon Amanau. Use nuokus ai upwe feito ren Semei non Nang non iotek me tingor An aninis ren met chok ua osukosuk ren. Ngang mi sinei pwe Rese sotuni ar repwe kunaei ai fori mettoch mi muan. Pour mi sukuno ar repwe aninis. Iei aier me rei,” a apasa. Ei fopun a weweiti pwe pokiten Jises Kraist, a tongeni wor an minafon nepoputan!

A namot ngeni kemi eu minafon nepoputan? Ka tongeni fori eu minafon poputa, pwan mwo en? Ekieki usun ekkewe aramas ewe Chon Amanau a angang ngenir—ekkewe aramas A aitir, echikarer, amanauareta, omusano, me eniwinisefanir. I a finireta seni eu kinikin ika nonnomur anongonong won nour moni? I A asokkofeseni nefinen ekkewe mi tupwon me ekkewe mi tipis? A apareni ne eimueno aramas pokiten ra kon fich ngeni me ra konien tong? Apw.

Ekkoch ra feitto ngeni I fiti watten nuku, achifoua non An manaman ne echikara—ussun emon fefin mi chok fefeiseni cha, ewe meinapen ewe mwichen soufiun Rome nom, ewe mi rupurupukis , Jairus, ewe mi chuun Bartimaeus. Emon me emon ir ra sotuni ar nuku, ra apinukunuku pwe ewe murinon me manamanen ewe sense seni Nazareth epwe siwini manauer me ar tufich. Me I a fori. I a mut ngeni An manamanen echikara epwe pupuno.

Nge Jises a pwan efeiochu ekkewe ar nuku ese nukuchar, usun seman ewe semirit mi semwen ewe a puchoruta, meni usumi, “Samon, ua nuku; anisi ai nukunukumang.” Me A fen pwan ninatiw kirekiroch won ekkewe rese mwo kutta I, usun ewe fefin ra sereni non an tipisin nisou, ewe fin Nain mi mano punuwan, ewe mwan mi mwok ren ewe konikin Bethesda, me ewe mwan mi chun seni an uputiw. Ka fen mefi I a fein fetan ne fori murino non manauom nupwen kosamo kukkuta I ika tapweno mwirin I?

Ngeni emon me emon ekkei aramas non pukefel, me ngeni meinisin ekkewe ra ausening me ponuweni, I a awora eu minafon nepoputan, ika pwe eu minafon manau a mus seni tipis, are eu minafon manau a chikareta seni semwen, are eu minafon manau a pwaata seni mano.

Met wewen ngeni kemi me ngeni ei? An murino me umoumoch me tongen kirekiroch ese wor koukun. Minafon nepoputan ra nom nukanapen an ewe Sam kokkot! Minafon poputa ir an ewe Nau misin! Minafon nesosor, minafon sopwun, me minafon tufichin murinonon ir ekkewe nongonongen ewe porousochun ewe kapas allim!

Iwe, oua fen towaw seni ami pwon mi pin non fansoun nakatam ren ami ousap angei eu minafon nepoputan? Apw. Oua fen fori ei ika enan fan chommong an esap kawor ngeni kemi pwan eu tufichin murinono? Apw. Oua fen towaweno seni Kraist ren An esap anisi kemi ne makkei eu minafon porous seni ikenai feino? Apw. Ewe chon koum i ewe chok a tufich seni ena ekiek pwe oua kokono. Ouse anamon.

Me minafon nepoputan ir fan iten chommong nap seni chok ach tipis me muan. Seni ewe murinon me chenin ewe Chon Amanau, a tongeni wor ach minafon nepoputan minne a efisi siwinin napanapen ekiekin nom, oreni mi ngaw, nisosong, napanapangaw, memefin nipwakingaw, me mochenin tipingeni ekkoch me atowawakicheno seni wisach. Oua tongeni siwini mettoch usumi ewe a apekusu kemi non chommong ier. Oua tongeni poputa sefan seni ewe pochokunen ewe Mastan minafon nepoputan. I ese tongeni chipwang ne asofo sefani ach tufich.

Ngeni ir ekkewe ra weires ren ewe chok tipis are ewe chok osukosuk mi eniwin sefan, oupwe chok nikitu. I ese anomwo eu eppetin aan mwemi. I ese auku ami oruwen tufichin murinono. Oupwe feinno chok mwemi. Oupwe soposopono ne achocho. Oupwe kutta aninis seni ekkewe chon unukumi. O oua nukunuk non ewe minefon nepoputan ewe a nom fan itom iteiten om kunsefan ngeni Semom non ennetin netipom. Nikitano ekiekin mochen fori tipis, ewe sia enniwini, me nikitano om namanam tekia o ungeni ikewe ururun repwe nom ie. Ese namot kopwe ususum we chok me akkom. Etiwa om minafon nepoputan, om oruwen ika aunungatin ika aruwanun—ika pukuwen—tufichin murinono, a kawor ngonuk me ren ewe achasefanin chan Jises Kraist.

Ua ennetin kinisou ren ewe tufich mi asofo sefan a ngeniei me ekkewe epwap awora.

Ach Chon Amanau a apasa eu omuchunon kapas ese naf awewen auchean me nukun minne esap wor epinukunuk ika pwapwa non ei ran. Mwirin ewe riaffou non Gethsemane me nesoponon ewe metekin irapenges, A chok apasa, “A wes.” Osini usun ewe Messia a fen pwonuta, me ewe unusen mon niwinin an aramas tipis me riaffou a fen mono. A apasa a “wes” An asor esemuch me mi fochofoch. Inamo An Achasefan esap unusoch tori An epwe pwisin weri eu minafon manau non ewe aunungatin ran, eu minafon nepoputan usun emon mi ningeno, manausefan me ren manamanen ewe Sam.

Pokiten I a fori ekkewe mettoch mi apwapwai Saman we, me pokiten I “riaffouni mochenin ewe Sam non mettoch meinisin,” en me ngang a tongeni wor ach minafon nepoputan. Angei ami asofo sefani nepoputan, ikenai, iei chok. Jises Kraist i ewe Chon Makkei me Chon Awesi ach nuku, a fiti kich ne makkei chommong minafon sopwun. I ewe Nepoputan me ewe Nesoponon—ewe nesoponon ach saw me riaffou, me ewe nepoputan minafon manau non I, a mut ngeni kich sipwe nukusokuru, me poputasefan fiti ew minefon ran, non ukukun chommongun ach mochen. Ennetin An “murino me kirekiroch repwe atapwa [kich] non unusen ranin [manauach].” Non iten Jises Kraist, amen.