Pwarano me Pochokununo non Kraist

Achengicheng pwi me fefinei, ua mefi ewe tongen ewe Samon nupwen sia chufengen. Ua tipetekison ai upwe kapas ngeni kemi. Ua iotek pwe ewe Ngun epwe uwei ngeni netipemi met ewe Samon a mochen oupwe ausening, nap seni ekkewe kapas upwe apasa.

Me nom, ua kutta ai upwe kaeo physics me math non ewe fansoun ua sukun college. Ua wesen mefi ai sach. Ua poputa ne mefi pwe ua sossot ne kaeo och mettoch a nap seni ai upwe kaeo. An napeno ai mefi sach, a kisino ai mefi ewe pochokun ne sopweno ne achocho ngeni. Ai tipemwaramwar a efisi ai upwe mefi pwe ai achocho ese namot. Ua poputa ne ekieki pwe upwe fangeta, me fori och mettoch mi mecheres.

Ua mefi apwangapwang. Nupwen ua iotek, ua mefi pweteten apinukunuk non ewe Samon. Ua mefi An apasa ngeni ai ekiek, “Ua sotunuk, nge ngang mi pwan nom reom.”

Use sinei non ena atun met wewen ekkena kapas. Nge ngang mi sinei met upwe fori—ua poputa ne angang.

Seni ai ekipwichi me angang non ekkewe ier mi tapweto mwirin, ua fokkun weweiti ei kapasen pesepes non ewe pukefel: “Ua tongeni fori mettoch meinisin non Kraist ewe a apochokunaei.”

Ua kaeo pwe ai tinisuk ren physics a eu niffang seni ewe Samon. I a aitiei pwe ren An aninis, ua tongeni fori mettoch usun rese tufich ika a wor ai nuku pwe I epwe anisiei. Seni ei niffang, ewe Samon a angang an epwe sotuni me apochokunaei.

Ewe kapas sotuni a chommong wewen. Ne sotuni mettoch esap chok wewen tesini. Ina epwe anapano pochokunan. Ne sotuni och pekin mecha epwe tonong fan achouun pochokun. Pwichikar, chouuchouu, me opochou ra kapacheta, tori wesewesen pukutan a napeno me pwano. Ewe mecha ese apwangapwangeno seni ewe angangen sotuni. Ennetin, a winiti och mettoch sia tongeni epinukunuku, och mettoch a pochokun an epwe amwochata watten chou.

Ewe Samon a sotuni kich non ena chok pwan napanap an epwe apochokuna kich. Ena angangen sotuni ese fis non fansoun mecheres are kinamwe. A fis nupwen fansoun sia mefi pwe ach tongeni a nap seni met sia ekieki pwe sia tongeni engino ngeni. Ewe Samon a aiti kich pwe sipwe sopweno ne marita me sisap chipwang non ach achocho, pwe sisap tongeni fangeta, pwe sipwe sopweno ne achocho.

Nupwen sia sopweno ne nuku non Jises Kraist—pwan nupwen mettoch usun resap tufich ngeni kich non ewe fansoun—sia winiti mi pochokun on pekin ngun. Ekkewe rekotun pukefel ra apochokuna ei ennet.

Ewe Soufos Moronai, ren awewe, a weri sossot me pochokununo non ena sokkun napanap. A manaueni sopwonon ierin kewe non an anamon. A makkei pwe ese wor chiechian, pwe saman we a fen ninnino, pwe noun kewe aramas ra mano. Ra kukuta pwe repwe angeiano manauan.

Nge Moronai ese siongaw. Nge, a makkei an kapasen pwarata usun Jises Kraist won seleich fan iten aramas i esap manau an epwe kuner, mi pachenong mwirimwirin ekkewe aramas ekkewe ra mochen repwe nieno. I a makkei fani itach. A sinei pwe ekkoch repwe turunufasei an kapas. A sinei pwe ekkoch resap etiwa. Nge a sopweno ne makkei.

Non an weri sossot, an Moronai nuku a nimochuno me pochokununo. A napeno nimenimochun. An kapas a uwei ewe pochokunen emon a fen engino ngeni nesoponon. Sia tongeni mefi ewe manaman nupwen sia anneani an kapasen pwarata:

“Iei ngang, Moronai, ua ekis makkei met me rei pwe mi öch; iwe ua mak ngeni pwi kewe, ekkewe chon Leiman; iwe ua mochen pwe repwe sinei pwe a nap seni fopuku rue ier a fen wesino nupwen ewe esisin a fen kawor usun wareton Kraist.

“Iwe ua eppungano ekkei uruo, mwirin ai ua fen apasa ekkoch kapas ren ai pesei kemi.

“Nengeni, ua mochen pesei kemi pwe nupwen oupwe anneani ekkei mettoch, ika epwe iei miritin Kot pwe oupwe anneanir, pwe oupwe chechemeni ifa usun umoumochun ewe Samon ngeni ekkewe noun aramas, seni forutan Adam pwan feitiw tori ewe fansoun oupwe angei ekkei mettoch, me ekipwichi non netipemi.

“Iwe, nupwen oupwe angei ekkei mettoch, upwe fokkun pesei kemi pwe oupwe tingor ren Kot, ewe Sam mei Napanap, fan itan Kraist, pwe oupwe sinei ika ekkei mettoch mi ennet; iwe, are oupwe tingor ren ennetin netipemi, ren ami mochen sinei, fifi ami nuku non Kraist, iwe, i epwe pwar ngenikemi ennetin pungun ekkei mettoch, ren ewe manamanen ewe Ngun mi Fel.

“Iwe me ren manamanen ewe Ngun mi Fel oupwe tongeni sinei ennetin mettoch meinisin.”

An Moronai kapasen pwarata a pochokunono non an akkanamon, nge a ningeno ren saram an epwe emweni tappin aramas meinisin ar repwe kutta Samach non Nang me ewe Chon Amanau Jises Kraist.

Pwan emon soufosen Puken Mormon, Jacob, a sossot me pochokunono nekukkunun ewe a mefi weires me watten netipengaw. Nge saman we, Liai, a aiti i pwe Kot epwe efeiochu non an kewe sossot.

“Iwe nengeni, non fansoun om kisikis ka fen riaffouni weires me watten netipengaw, pokiten ekkewe fofforun turunufas an pwium kewe.

“Nge inamo, Jacob, nei we a aewin uputiw non ewe fonu pon, ka sinei ewe manamanen Kot; iwe i epwe epinano om kewe riaffou pwe repwe om feioch.

“Ina minne, ngunum epwe feioch, iwe kopwe nonnom non kinamwe ren pwium we, Nifai; iwe non ranum kewe kopwe angang ngeni om Kot. “Ina minne, ngang mi sinei pwe en ka manau, pokiten wenecharen om we Chon Angasano; pun ka fen kuna pwe non ewe fansoun mi fich i epwe feito pwe epwe wato manau ese much ngeni aramas.”

Ewe Soufos Joseph Smith a weri watten sossot me pochokunono nupwen a nom non Liberty Jail. Non an ewe a fokkun manau weires, ewe Soufos Joseph a sio:

“O Kot, ifa ii en? …

“Fite tamen om kospw anisiei?”

Ewe Samon a kuna non an Joseph riaffou ewe angangen epinipininon an enginno nupwen a ponuweni:

Nei we at, kinamwe ngeni ngunum; om kewe osukosuk me riaffou repwe chok nom reom ekis chok fansoun;

“Iwe mwirin, ika pwe ka engino ngeni, Kot epwe seikuketa won tekia; kopwe fokkun okufu meinisin chon ungonuk.”

Ewe pekin appiru mi nap usun sossot me pochokuno a fis non unusen an ewe Chon Amanau Achasefan. A wata won Inisin tipisin fonufan. A mwarei ach metek me ach netipengaw. A unumi ewe kaap mi kipwin. A pwarano nikitu non meinisin fansoun.

Pokiten An amwararen Achasefan, Jises Kraist a tongeni apochokuna kich non ach fansoun sossot. A sinei ifa usun an epwe anisi kich pokiten I a fen mefi meinisin ekkewe weires minne sipwe mefi non manauach iei. “I epwe wata won inisin ekkewe metek me semwen an noun aramas … pwe i epwe tongeni sinei anongonong won ewe pekin aion ifa usun an epwe anisi noun kewe aramas anongonong won ar apwangapwang.”

Sia sinei pwe nupwen an nom non ewe Manaman Gethsemane, ewe Chon Amanau a eisini ewe Sam ika ewe sossot epwe tongeni wes seni—nge mwirin A pwan apasa pwe ika mochenin ewe Sam, iwe ewe Chon Amanau epwe fori. Non ekkoch kapas, ewe Chon Amanau a pwan etiwa tipemwarawar me fatangaw, nge a wor an nuku non Saman non Nang.

Pwi me fefinei, ami sossot me pochokununo meni esap usun nikinikin an Moronai ika Jacob ika an ewe Soufos Joseph. Nge epwe feito. Meni epwe feito non pwetete, seni ekkewe sossotun manauen famini. Meni epwe feito seni samau ika tipengaw ika nonninen ika mefi anamon.

Ua pwarata pwe ekkei fansoun esap ir minen pwarata pwe ewe Samon a nikitikemino. Nge, ir minen pwarata pwe I mi tongei kemi an epwe enimochu me apochokuna kemi. I a fori kemi oupwe pochokun ne mwarei choun manau ese much.

Ika sia nikitu non ach angang, ewe Samon epwe enimochukicheno. I epwe apochokuna kich. Me eu ran sipwe nenesokuru me kuna pwe ekkena sokkun sossot ra pwarata usun An tong. Sipwe kuna pwe I a anapanapa kich ach sipwe tufichin uta ren I non ning. Usun noun ewe Samon Aposel Paul a apasa nesoponon pwisin manauan, “Ua fen fiuni eu fiu mi murino, ua fen awesi ai angang, ua fen omwochu ewe nuku.”

Ua pwarata pwe Kot mi sinei kemi. I mi sinei ekkewe sossot oupwe mesengeni. I mi nomw remi. I esap nikitikemino. Ua pwarata pwe Jises Kraist i ewe Noun Kot. I ach pochokun, ach Chon Angasano, ach epinukunuk. Ika sia nuku I, I epwe fori ach manamanen ngun epwe anisi kich ne okkufu sossot meinisin sia kokko ngeni ach sipwe engino ngeni. Ua pwarata non ewe it mi pin, iten Jises Kraist, amen.