Nepoputan
Iei sia feino mwach ren ei mwichenap mi fis iteiten wonu maram, soposopono usun a fen kokotono me fiti chon afanafan me kon mi kefinita me ren Preseten Nelson mwirin chommong maramen kokkotun.
Achengicheng pwi me fefinei, sia chu nupwen sia netipeta ren manon nouch achengicheng Preseten Russell M. Nelson. Ua kapas ngeni kemi usun ewe Presetenin ewe Mwichen ekkewe Engon me Ruemon, non minne wis ua fen ketiw me non eu me eu ach kewe wart, steik, me mwichenap ren ekkewe fisu esop ier ra no.
Sia feino mwach ren ei mwichenap mi fis iteiten wonu maram, soposopono usun a fen kokotono me fiti chon afanafan me kon mi kefinita me ren Preseten Nelson mwirin chommong maramen kokkotun. Ekkewe chok mi kapacheta ngeni ei, ai afanafanen nepoputan, me ai kapas me non nenien Preseten Nelson non ewe soponon mwich non neanowasen Raninfel.
Iei ewe aewin fansoun non ukukun 75 ier an emon Presetenin Mwichefen a mano fitu chok ran me mwen eu mwichenap. Ei a anomota am aupwe ota ifa usun aupwe efisi ekkewe auchean mwichen nouwis fiti fengen me mwichenap me pwan ekkewe kinikinin mwichenap, pwan non ewe chok fansoun aua ota an we fenin meima epwe mwitir. Preseten Nelson a weweiti ewe auchean mwichenap an epwe awora emwen ngeni ekkewe Souneng non ekkewe maram repwe feito. Sia asufonu ren ach tapweno mwirin ewe kokkotun mwichenap i a fen apungano.
Non ei fansoun netipeta, sia fen efisi eu mwich ach sipwe pwarano ach afona me osufonu Preseten Russell M. Nelson me mwen ach kewe mwichen mwichenap iwe mwirin fori kokotun peias mwirin chok wesinon mwich. Meinisin ekkei a fen fis fiti ewe mumuta an faminien Preseten Nelson me ewe Mwichen ekkewe Engon me Ruemon Aposel.
Pokiten am meinisin ekkewe aupwe kapas non mwichenap aua mochen am aupwe awora am fansoun ne apasa won winikapem am mwareiti Preseten Nelson, ina minne aua fen tingor pwe meinisin an nouch chon afanafan ren ewe mwichenap repwe chok aukuku ar kapasen mwareiti me osufonu, repwe witiwitino ar tichiki kapasen mwareiti me osufonu ren ewe fansoun peias, ewe sia fen poputa ne ota.
Ai mwochomwochen kapasen mwareiti me osufonu—mi fich ngeni ei mwich me ngeni ekkewe kapasen mwareiti am aua fen apasa—iei: Ua tongei Russell M. Nelson me a fen nap ai kaeo usun ewe kapas allim me usun emwenin kapas allim seni ai nakatamen chiechi ngeni me sisinei i nap seni pwan emon souemwen ngang mi sisinei. I ach nenien appiru usun emon chon angang me chon tapweno mwirin ewe Samon Jises Kraist. Ren ekkei mettoch ua pwarata, non iten Jises Kraist, amen.