Ewe Famini Eu Esinesin Ngeni Fonufan—Kewe Kapas seni Kot

Ei mwichenap ren October 2025 a esisina ewe 30th achechemen ewe esinesin ren “Ewe Famini: Eu Esinesin ngeni ewe Fonufan.” Seni murinon napanap, ei esinesin, fiti pusin kapasen pwarata, a foruta an epwe “anisi me apochokuna ewe famini pwe nongonongen chufengenin ewe choo.”

Meinisin ra feito seni eu famini, ika en emon inenap, semenap, noun nengin, noun at, noun nour kewe, papa chi me mama chi, tetenin in, tetenin sam, brother, sister, ika tetenin pwipwi me mongeang. Akauchean, emon me emon kich, usun mine ewe esinesin a apasa, “emon ngun achengicheng noun semach me inach non nang at me nengin … [fiti] eu murinon manau me fetanin nonomun manauach .”

Nupwen ua koko ngeni ewe wis mi pin aposel non 2015, ua pesepes, “Ei esinesin iei a om. Itom a [wenengeni ekkewe kapas ‘Apungupungun ekkewe Engon me Ruemon Aposel’ non ewe itenap] iei a nom ikei. Mefi me afanafana usun nge om.”

Ua men sani ewe esinesin ngeni famini. Ua pwarata non unusen fonufan seni Africa ngeni Australia me ekis meinisin non nefinen ewe wisen famini non an Kot kokotun ese much Ewe esinesin a fokkun auchea, iwe mi namot sipwe fori ren ach meniniti ekkewe kapas seni Kot.

Chechemeni, pwi me fefinei, usun ua apasa me non eu mwichenap akkom seni ei nenien afanafan, “Kapas ra auchea.”

Mut ngeniei upwe ngeni kemi ekkoch auchean porousen ewe esinesin usun eu kapas a nom nukanapechikin met sia nuku.

Non 1994, eu ier me mwen ewe esinesin a tou, ewe Mwichen ekkewe Engon me Ruemon Aposel ra kakapas fengen ifa usun mwichen aramas me kafomen ra towaw seni an Kot kewe annuk fan iten famini, pupunu, me mwan ika fefin. “Nge esap ina amuchunon met am mi kuna,“ Preseten Russell M. Nelson a awewei mwirin. “Sia tongeni kuna an ekkoch neni achocho ne aturano meinisin kewe nogonong me auku mwokutukutun nisou. Aua kuna torukoruken mwan me fefin. Aua tongeni kuna meinisin mine epwe fis.”

Ewe Mwichen Engon me Ruemon ra tipeew repwe amonata echo taropwe, eu wesewesen esinesin,chechemeni usun wisen ewe Mwichefen non famini. Non ena ier, ekkei, Aposel, chon osini ra koko me ren Kot, ra amonata ewe taropwen esinesin faniten famini. Preseten Dallin H. Oaks a chemeni pwe ra ennetin iotek ngeni ewe Samon faniten ”met [repwe] apasa me ifa usun [repwe] tongeni apasa.” Ra wato ngeni ewe Aewin Presetensi—Preseten Howard W. Hunter, Gordon B. Hinckley, me Preseten Thomas S. Monson—ren ar repwe ekieki.

Mwirin chok fitu maram, non March 1995, Preseten Hunter a mano, me Preseten Hinckley a winiti ewe 15th Presetenin ewe Mwichefen. Ewe esinesin a nomw fan tumunuan. Epwe inet ewe fansoun mi pung ar repwe awora ei esineisn ngeni ewe Mwichefen? Ena fansoun a fis wonu maram mwirin.

Fitu ran me mwen ewe mwichenap an Relief Society September 23 mine a sopwosopwono won mwichenap, Presenten Hinckley me noun kewe chon aninis ra chufengen non apungupung ren ewe Presetensin Relief Society Unus. Ekkewe sister, usun ekkewe Aposel, ra fokkun ekipwichi usun osukosuken fefin me famini. Ra ekieki usun ekkewe mwich epwe fis non famini.

Preseten Hinckley a fori eu fansoun chufengen an epwe aporousa kewe fefin non ewe mwichen chufengen. A fokkun ekipwichi usun emwenin ei amwararen chufengen. Nupwen an a kapas usun, a pani ren ewe it a fori mi minefo nge ese mwo afat “Ewe Famini: Eu Esinesin ngeni ewe Fonufan.” Epwe ei mwichen fefin a fis a murino ne fori ewe ekiek ren ewe esinesin faniten famini?

Presetenin Relief Society Unus Elaine Jack a awewei mwirin: “Ause sinei met ewe esinesin ngeni ewe famini non ena fansoun. … [Aua] tongeni sinei seni ewe itenap, nge aua mefi sokkun mettoch non ewe famini … epwe fokkun murino. … Ua men mefi pwapwa pwe mi wor nouch chon ewe Mwichen Engon me Ruemon ra angei ar pwarata.”

Ewe mwichen Fin Anisi non ena Ammon a fokkun murino. Preseten Hinckley a aporousa ewe esinesin ngeni famini fiti ekkei auchean kapas: “Fiti waten emweningawen kapas mi mwan mine a nikinikin pwe mi ennet, fiti waten angangen asonai aramas usun ekkewe nongonong me auchear, fiti waten amwasangata aramas ar repwe wata wor nimengawen fonufan, sia mefi ach sipwe epwichikara me esinesin … usun nongonong, annuk, me anganga mine epwe wewe ngeni ewe famini usun mine kewe soufos, chon osini, me chon pwarata ren ewe mwichefen ra afata me eniwini non unusen uruon.”

Iwe a aneani ewe esinesin ren unusan. Usun met ewe Samon a apasa, “Ika a feito seni pusin ai mongungu ika mongungun nei kewe chon angang, a nono chok.”

Ewe esinesin a apasa, “Ewe famini mi efeioch seni Kot.” Ua sani fatochun ena kapas. Ewe esinesin a eu koko fanitach ach sipwe nom non manauach iei, mi unusen tumunoch ren ewe nikinikin Kot non kich me ewe fansoun mwach esemuch a nom mwach. Preseten Nelson a aitikich: “Ami wesewesen noun Kot semirit non ngun. … Ousap sonono ussun ei: Om nipwakoch a auchea. Ren om manauen nikitu, Kot epwe pwari ngonuk ion kopwe winiti.”

Nupwen a wor, ewe esinesin ese awenewen ngeni chommong mettoch sia kuna non ewe fonufan. Esap me nom. Esap iei. Mi wor ekkana ra awora osukosuk ren ewe esinesin non famini, pupunu, me mwan me fefin. Ekkoch ra ekieki ewe Mwichefen a eniwin sefani, ekesiwini, ika fen watiw mwo ewe esinesin.

Ewe esinesin faniten ewe famini a iei, ussun Preseten Hinckley a apasa, annuk mi pin, pwi me fefinei achengicheng. Ekkewe nongonong rese mwo tou non tetenin nge unusochun non tetenin fiti anen ewe Samon me An anen pwon mi pin. Ekkewe osukun ren ewe esinesin ra pwa seni ach we Samon Jises Kraist ngeni Noun kewe Aposel nomw me ikenai. Iei An Mwichefen; A auweta ewe ennet seni mine sia manaueni.

Ekkoch me neimi oupwe ekieki usun ewe esinesin me apasa, “Ese anim ngeni ei.” “A nikinikin ese wor memefin.” “Ai famini ese nono ngeni ena.” “Use uuk non.”

Ren ekkena oua osukosuk, oupwe sinei pwe ami emon semirit noun sam me in non nang,chochon an Samach won Nang famini. Ese wor e sisine ochuk ika ennetin tongeok epwe usun I. Kun ngeni I, ngeni I unusen netipom; epinukunuku I me An kewe pwon. Mi wor om famini non om we Chon Amanau Jises Kraist, ewe a tongeok I a feito won fonufan an epwe fangono manaun faiten ach tipis me mwarei choun ach kewe pupungaw me ach kewe ran mi fokkun ngaw. A weweiti met ka mesengeni me mefi. Kun ngeni I, nuku pwe I epwe tinato ewe Ngun mi Fel epwe nonom reom, ekiketa, me emwenuk. Mefi Ar tong ewe “a chou fetan non netipen ekkewe noun aramas; … ina ewe auchean mettoch sia mochen me nein mettoch meinisin … me ewe a kon apwapwa ngeni ngun.”

Meinisin Noun ewe Samon kewe Aposel ra ennetin tongekemi. Aua iotek fanitemi me kukuta an ewe Samon emwen fanitemi. Nonom rech. Ka nonom non fansoun sosot nupwen ewe chon oput a kuta an epwe nounuk. Kosap towawono. Me ika en mi, niwinsefanito. Am mi etiwok usun chok pwan ekkana ra fokkun tongek

Ewe esinesin a apasa, “Mi wor wisen sam me in mi pin pwe repwe amari nour kewe semirit non tong me wenewen.“ Ewe Puken Mormon a awora eu oruwen pwarata ngeni ei ennet. Non ewe aewin uwekisin non ewe aewin sopun, sia aneani, “Ngang, Nifai, ua uputiw me ren emon sam me in mi murino.“ Fitemon me neich sia fen poputani ewe Puken Mormon—me poputani ne eniwini me eniwini—me non angangen om kopwe chechemeni ekkena kapas? Aponueta ngeni non netipom.

Ew me nein ekkewe kapas non ewe esinesin uwa kon sani ei: “Pwapwa non manauen famini a usun an epwe fetanoch nupwen a anongonong won ekkewe afanafan an … Jises Kraist.”

Ion esap mochen pwapwa?

Me met ekkewe afanafan an Jises Kraist? Eniwini sefani, non ewe esinesin: ”Nuku, iotek, aier, omusomus, sufon, tong, umoumoch, angang, me mokutukutun angangen apochokunen inis.“

Manauen ion esap murino ika epwe manaueni ekkei kien nongonong? Esap wor emon me neich epwe fori non unusoch; nge sia tongeni apiru an Preseten Hinckley kapas mi murino, “Fori ukukun om tongeni.”

Sia aneani non ewe esinesin, “Ekkewe sam repwe wisen nemeni … non tong me wenechar,” me “ekkewe inenap repwe wisen tumunu nour kewe semirit.” Nemeniesap wewen pwe nemenemengaw me tumunesap wewen pwe oruen wis. Kot afen ngeni mwan me fefin wis mi sokofesen nge ra chok nonno me auchea mine repwe aninis fengen won.

Mut ngeni ei upwe apasa usun met mi fis ngeniei.

Ngang me punuwei we aua kaeo ne angangoch nupwen aupwe aninis fengen mwirin eu ran nupwen ua mefata upwe fori eu auchean ekiek nge use ereni. A fokkun mairu ren met ua fori, a fokkun netipengaw, me a fokkun weires ngeni metewe a fis. Mwirin, neminewe a wata poun won afarei me a pochokun ne apasa, “Ron, kose mochen, kosapw forsefani ena ngeniei.” Aua fokkun tipeew fengen won met aua fori mwirin ena fansoun.

Sia kuna non ewe esinesin ngeni famini: “Sam me in repwe fokkun chok aninis fengen ussun ruemon chiechi.”

Nonofengen mi eu kapas a auchea . Fansoun nakatam nupwen am me Sister Rasband aua aninis fengen non met ewe esinesin a awewetiw pwe “wisach mi pin,” aua anonopoku wisem non am pupunu. Nupwen neum kewe ra pupunu, Sister Rasband me ngang aua sopweno ne aurourer me punuwer kewe ifa usun ar repwe nonofengen non ar chiechi.

Nupwen sipwe manau ren eu ekiek ngeni ewe muun Kot, sia sufoniti emon me emon me anisi emon me emon. Ekkena foforun wenechar ra feitto seni Kot ra emwen ngeni nukuchar non pusin manauach, ach famini, me non choo.

Samach won Nang a awora ewe esinesin ren ewe famini an epwe aninis ne emwenikicheno neim ngeni I, anisi kich ne kaeo me ani tong, pochokun, popun, me weweiti ese much. Ren unusen nguni upwe tingor ngonuk kopwe arap ngeni I me Noun we At mi Achengicheng. Ua pwon ngonuk ika pwe ka fori, ewe Ngun eppwe pesek me emwenuk me anisuk kopwe mefi non netipwom ar we pwonen kinamwe ewe “sise tongeni weweiti.” Non iten Jises Kraist, amen.