Fori Wisom ren Unusen Netipomw
Epinukunuku ewe Chon Amanau me pachenong, nikitu me achocho, non om fori wisom fiti unusen netipom.
Ewe ier ano nupwen a fis ew sai ngeni Europe, uwa chuno non ai we nenien angang me akkom, Lufthansa German Airlines non ewe Frankfurt Airport.
Ar repwe aiti nour chon uou sepenin, ra forata ekkoch mettoch ussun sepenin mi prokram pwe nenien kait ngenir met ra tongeni emurinonoi ngeni nonomun osukosuken sepenin mi chok weiweita. Non chommong ierin ai kapitinin uwow sepenin, a auchea upwe passini chekin sepenin non ewe mettoch ussun sepenin mi prokram iteiten wonu mwaram ren ai upwe anomwu nei we naisenin uwow sepenin. Uwa fokkun chemenochu ekkei fansoun pekus me nuokus nge pwan ewe memefin fetanoch mwirin ai passini ewe tes. Ngang uwa chok emon anuwon non ena atun me sani ewe okkuf.
Atun ai we chuno, emon me nein ekkewe meinap seni Lufthansa a aisiniei ika ngang mi mochen ai upwe sotuni safani ne uwei ewe mwesin mi prokram a for sefan ren pekin kaeo uwouwen sepenin 747.
Mwen an wor ai fansoun ne wewefichiti ewe kapas eis, uwa rongorong ew mongungu—ngingin chok nouwei—a apasa, “Ewer, uwa fokkun mochen.”
Mwirin chok ai apasa ekkewe kapas, chommong ekiek ra pwupwunong non ai ekieki. A fansoun nakatam seni ewe omuchunon fansoun uwa uwei efoch 747. Non ewe fansoun uwa emon anuwon me uwa emon kaptin mi wor an pusin nukunuk non i. Iei a wor ew porousochun nonomun manauei upwe fori usun chok ai we akkom emon chon wei sepenin. Upwe fen asauwaei nein ekkei sou sinenap?
Nge a ser nupwen upwe siwini ai ekiek, iwe uwa momot non ewe sean kaptin, wata pei won ekkewe pisekin uwow ngang mi chemeni me tongei, pwan ew, ewe amweseikan ewe sepenin 747 an a sa won kasoro me changeta non kuchu.
Ua pwapwa ai upwe apasa pwe ewe sai a fetanoch, ewe sepenin ese wor osukosukan, me pwan ngang won inisi.
Ina mo, ewe sosot a atepekisonaei. Non ai anuwon me sineoch, uwow sepenin a usun aruwan neniei. Iei ua achocho ngeni ai upwe tumunoch ne fori ekkewe nongonongun mettoch.
Chon Kuno epwe fiti Engino
Ai we sosot non ewe mechan kaeo ew auchean minen achem pwe ren angangoch non mettoch meinisin ese nifinifin—ika epwe uwow sepenin, fotun, tete, ika sinei—a feito seni engino iteitan me asosot.
Ina epwe ier me ier kopwe angei ew pekin sine me awateno omw angangoch. Kopwe angang pekus iwe a winiti och mochen en mi oreni pokiten kakan fofori. Nge ika ka ekieki pwe wewen ena kopwe kauno ne ososot ika kaeo, epwe poutsonuk ewe sinenap me nipwakoch ewe kafen angei ren watten niwin.
Ekkei mirit a usun chok om kaeo kapasen ekis, nounoun pisekin koon, me uwow sepenin. Ei apwan fiti omw winiti chon kuno ren Kraist.
Usun chok, chon kuno epwe fiti ach-engino.
Esap eu kinamwein otures, me ese chok pusin fisita.
Nuku non Jises Kraist eu nifang, nge angei mi eu finata epwe pachenong unusen ach “tongeni, ekiek, me pochokun.” Ina eu fofor iteitan ran. Iteitan kunok. Epwe fiti iteitan ne kaeo me fiti usunen om mochen. Ach nuku, minne ina ach enlet ngeni ewe Samon, a pochokununo nupwen sia churi sosot seni ewe chon koum ikei won fonufan. A engino pokiten kich sia achocho ne amari, kich sia sopweno ne anganga, me sisap fangeta.
Nge pwan ew, ika ese fetanoch ach aea nuku me an pochokunen pesepes ren ach foffori, a kukkununo epinukunukun mettoch sia ekieki pwe ir mi pin—kukkununo ach nukunuk non kewe mettoch sia fen pin sinei pwe ir mi pung.
Sosot minne ese tongeni sotuni kich a poputa ne kisitiw amairun me sia fokkun mwareiti.
Ekkewe mochenin pwarata a no a tongeni epechekunakich non ekis chok fansoun. A pochokun ika pun sia aniwini ne apochokuna.
Non ewe Testamen Sofo, ewe Chon Amanau a aiti kich ew kapas monomon ussun emon masta ewe a ngeni noun chon angang ew nuku mi pin—ew ukukun moni a iteni kewe sinenap. Ekkewe chon angang ra achocho ne aea ar sineinap a anapereno. Ewe chon angang a ireno an sinenap a poutuno seni.
Ekkewe nesen? Kot a ngenikich nifang—ren tipachem, ren tongeni, ren tufichich—me I a mochen kich sipwe aea me awatteno pwe repwe afeichukich me afeiochu Noun kewe semerit. Ese tongeni epwe fis ika sia isetta nifang won salif usun eu niffangen win sia ingeiti fansoun me fansoun. Ach nifang ra ningeno me marino chok nupwen sia aia.
En Mei Feioch
“Nge Elter Uchtdorf,” a apasa, “Ese wor ai sinei me tipachem—ina mo, ese wor eu mi namot.” Iwe ka nengeni ekkoch ren nifanger mi fat me amwarar me ka mefi pwe kose akarap ngeni om ka anonno fengenir. Ka ekieki non ewe manau me mwen fonufan, non ewe ranin watten nifang me tipachem, sepiomw ese kon masou—akaewin anono ngeni urenon me chommongun nifangen ekkoch.
O, ifa me ai aneanei ai upwe tongeni turufukono non pei me anisuk om kopwe weweiti ei wachemuken enlet: En emon aramasen saram mi feioch, ewe semirit non ngun noun emon Kot ese much! Me en mei kamoch non en ew tufich pekinon om pwisin tongeni om kopwe ekieki.
Ussun chon mak ra fen makkei, ka feito fonufan, “pwereni kuchun amwarar”!
Uruomw nepwopwutan a amwarar, me pwan fetanin manauom. En ka suseni nang omw kopwe ettiw ikei, nge nang ese sususenuk!
En mi wesen sokkono.
En mi tipachem!
Non ewe Doctrine and Covenants, Kot a affata:
“Mei wor chomong niffang, me ngeni meinisin [aramas] mi angei ew nifang meren ewe Ngunun Kot.
“Ngeni ekkoch a kawor ngenir eu, me ngeni ekkoch pwan eu, [me] meinisin repwe feioch seni.”
Ekkoch me nein nifangach kewe ra mak non ekkewe pukefel. Chommong resapw ina.
Usun ewe soufos Moronai a apasa, “Kosap ammam ekkewe nifangen Kot, pun ir mei chommong; me ra feito seni emon chok Kot.” Repwe sineno non “sokofesenin napanaper… ; nge i chok ewe emon Kot ewe a angang non meinisin.”
Meni epwe enlet pun ach nifang non ngun esap pwano, nge esap wewen pwe a kis namotan. Mut ngeniei upwe apworausa kich ren ekkoch pworausen nifangen ngun uwa kuna chommong seni memper non unusen fonufan? Ekipwichi ika ka pin angei feioch ren eu ika chommong nifang usun:
-
Pwarano kirekiroch.
-
Eteneki aramas kewe mei monukuno.
-
Kutta pwopun kopwe pwapwa.
-
Winiti emon chon fori kinamwe.
-
Eteneki ekkewe kukkun manaman.
-
Awora kapas murinno seni ennetin netipom.
-
Omwusomwus.
-
Aier.
-
Engino.
-
Awewei mettoch non mecheres.
-
Chuu ngeni semerit.
-
Tipeew ngeni meinapen Mwichefel.
En kosap kuna ekkei nifang non atun an wart pwarano ar sinenap. Nge amo kopwe kuna auchear ngeni an ewe Samon angang me ifa usun kopwe fen atapa, feioch, ika fen anisi emon noun Kot semirit ren nifangom. Chechemeni: “Seni kukkun me ekis mettoch ra watteno feioch non fansoun mwach.”
Fori Ekis Wisom
Achengicheng pwi me fefinei, chienei achengicheng, uwa iotek pwe ewe Ngun mi fel epwe anisi kich ne esina ekkewe nifang me tipachem Kot a fen ngeni kich. Iwe, mut ngeni kich, sipwe ussun ekkewe chon angang mi nikitu non an ewe Samon kapas monomon, nikinik, awateno me anapano.
Ewe ran epwe war nupwen kich sia utta me mwen Semach mi uren tong non Nang an epwe ngeni kich niwinin ach foffor. I epwe mochen sinei met sia fori ngeni ach nifang I a ngeni kich—akaewin, ifa usun sia aia ne efeiochu Noun semerit. Kot a sinei ion enletin kich, ion sia foruta pwe sipwe usun, me An mochen ren kich a tekia.
Nge I ese mochen sipwe angei watten, unusechun, ika pechekunen foforun ach sipwe tikeri. Non ewe fonufan I a foratta, marita a fis non fansoun me tipemecheres—nge pwan angangan ran me ran me esapw keuk.
Chechemeni, pwe Jises Kraist a fen fori ewe angangen pechekunen foffor nupwen I a okufu mano me tipis.
Wisach sipwe tapweno mwirin Kraist. Wisach sipwe kuun seni tipis, kuun ngeni ewe Chon Amanau, me fetan non An ewe aan, eu iipw fan eu. Nupwen sia fori ei, achocho me nukuchar, sia tou seni fotekin ach nipwakingaw me mwan me ekis me ekis ne nimenimochuno, tori ewe unusochun ran nupwen kich sipwe unusochuno non Kraist.
Ekkewe feioch ra chok arapoto. Ekkewe pwon ra fen nomw. Ewe asam mi sukuochuno. A pusin nonomw rech ach sipwe tonong me poputa.
Nepoputan meni epwe kukkun. Nge ena mi eoch.
Ian nuku a apwangapwang me ian, a poputa ren ew epinukunuk non Kraist Jises me non An manaman an epwe nimeti kich me enimenima.
Semach a tingorekich ach sipwe arap ngeni ei sosotun nuku me chon kaeo esap ussun kewe turis nge ussun chon nuku ekkewe ra su seni me nikitano Babylon me anomu netiper, ekiekir, me ipweipwen pecher ngeni Zion.
Sia sinei pwe ach achocho chok ese tongeni uwei kich ngeni manau fochofoch. Nge a tongeni fori kich sipwe nikitu me fangeno non Jises ewe Kraist, me I a tongeni fori ach sipwe manau fochofoch.
Pokiten ach achengicheng Chon Amanau, ese wor och mettoch usun ren ese wor ach-win. Ika sia wattiw ach epinukunuk me nuku non I, ach ngaseno epwe fis. I a pwon ngeni kich An Tongeni, An manaman, An amwararen tong. Eu me Eu iipw, ekis me ekis, sipwe marita arap ngeni ewe auchean me ningen ran nupwen kich sipwe nomw ren I me atongeach non pwapwa fochofoch.
Om kopwe tour ngeni, sipwe achocho fori wisach ikenai me iteitan ran. Sia kinisou ren ekkewe eipweip sia eipwa nanew, nge sisap kauno ikana. Sia sinei pwe mi chiwen towaw fansoun sipwe tour, nge sise mut ngeni ena epwe etipemwaramwara kich.
Ina ewe popunapen ion kich—chon appiru Kraist. .
Uwa pesei me efeiochu meinisin chon ewe Mwichefel, me ir meinisin ekkewe ra mochen repwe choni, ar repwe nuku ewe Chon Amanau me fifiti, tipepos me achocho ne fori wisom fiti unusen netipom—pun om pwapwa epwe unusoch iwe, ew ran, kopwe angei mettoch meinisin an ewe Samach. Ren ekkei ua pwarata non iten Jises Kraist, amen.