Ewe Samon A Emwitirano An Angang
Non an ewe Samon a emwitirano An Angang, kich sipwe tongei, tumunu, me emweni ekkewe ra etiwa An kapas annim.
Charles Dickens a itefuno ne pwopwutani neun ewe puken nomw A Tale of Two Cities fiti ewe murinon porous pwe “Ina ewe murinon non fansoun, ina ngawen non fansoun.” Non ew napanap, mi ennet non ach fansoun.
Sia nomw non ew fansoun mi kokotongaw nupwen “ewe unusen fonufan [mi] nomw non osukosuk.” An Preseten Russell M. Nelson kapasen ourour, ussun chon tapweno mwirin Jises Kraist, ar repwe chon fori kinamwe a fatoch ngenikich non ei soran seni Elter Gary E. Stevenson. Iei ew auchean kinikinin ach anapano chufengen, kinamwe, me echikara ren “ewe fansoun mi aweires.”
Sia pwan nom non “ewe fansoun mi murinno,” minne upwe poraus usun. Ewe Samon, non ewe poputan porousen ewe Doctrine and Covenants, kinikin 1, a affata pwe unusan ewe kapas allim epwe “afanafan fetan … tori unusan ewe fonufan.” Ewe Samon a emwitirano An angang non ach fansoun. Kich sipwe fen unusen kinisow ren ewe emwitirin angang, ewe a fen fis me mi fifis iei inamwo ren ekkei fansoun osukosuk. Kich sia nomw non fansoun nupwen chon tapwei ewe Samon ra feiech ar rong An mengungu me penuweni fiti sukkun netip me ekiek. Chochon Ewe Mwichefenin Jises Kraist ren Aramas Mi Pin Non Fansoun Soponon, ekkewe ra mochen anneasosich ngeni ewe Chon Amanau me An kewe annuk, ra kuna pwopwun me nonomwun ar kinamwe.
Non ekkoch fansoun non uruwon ewe Mwichefen, a fen ew auchean wattenon ekkewe ra fen tonong non ewe anen pwon. Ew euchean fansoun a fen fis nefinen 1837 me 1850. Ekkoch me nein ekkewe Aposel akkomw non an ewe Samon Mwichefen mi niwinsefan ra fen fori ar misin non ewe United Kingdom. Ekkei missin ra forata ngeroun chon choni ewe Michefen, me ren 1850 ra fen chommong memperun ewe Mwichefen ra nomw United Kingdom nap seni United States. Ren ena fansoun, ewe Samon a emweni ekkei Aramas mi Pin ar repwe chufengen non Utah. Ew watten mokutukutun aramas ar ra su seni nenier a fis, ekkoch ra aninis seni niwinimang seni ewe Perpetual Emigrating Fund.
Ngang uwa sani uruon ewe fansoun ra tori Salt Lake Valley ewe watten ukukun chon ekkesiwin seni England me Wales non 1852. Ewe mwichen aramas ra chufengen ren ewe Aewin Presetensi ren mesenawen ewe Emigration Canyon me a chiechi ngeni an Kaptin Pitt ewe mwich. Ewe Deseret News a awewer ngeni “ew mwichen wasona [mi pachenong] ekkewe fefin me semirit, ra fetan, woparapar, me kufun-asepwaningaw, nge rese tipengaw; netiper mi saram me pan, ewe a pwano ren ar pwapwa me amwararen won meser.”
Nupwen ra “nuseni ewe nenien ewe Tempel … fite ngeroun mwan, fefin, me semirit, ra chufengen, seni sokkopaten kinikinin ewe sopw, ar repwe chuu non meseik me pwapwan ar etiwer.” Preseten Brigham Young a afanafan ngenir: “Amwo ewe Samon Kotun Israel epwe efeiechu kemi. … Auwa fen ikiotek fan itemi; ngoroun iotek a fen fis fan itemi, ran me ran, ngeni I ewe a annuku ngenikich ach sipwe ochufengeni Israel, tumunu neun kewe semirit ren ami afanafana ewe kapas allim me amonareta fan iten waroton ewe Messaia.”
Non ena fansoun mi amwarar, upwe ureni meinisin ekkewe memper minafo me ekkewe ra niwin sefan ngeni an ewe Samon Mwichefen: Am mi tongei kemi; aua mwochen ami; ewe Samon a mwochen ami. Meni ause etiwa kemi ren chon kon, nge kich sipwe iotek pwe ekkewe feiechun nang repwe fiti ami foffor ren echunon ami fetan won ewe anen pwon epwe emweni kemi ngeni Kot ewe Sam me Jises Kraist non manau ese much.
Mei wor pisekin pwarata mi fatoch pwe nuku non Jises Kraist a watteno non ranich kei. Non Ewe Mwichefenin Jises Kraist ren Aramas mi Pin non Fansoun Sopwonon, a fen watteno chon ekkesiwin. Non ekkewe 36 omuchunon maran, arapakan 900,000 chon ekkesiwin ra choni ewe Mwichefen. Ekkei chon ekkewisin ra efisata ukukun 5 persen ukukun chon ewe Michefen. Kich sia etiwa ekkewe minafon memper fiti peuch mi suuk me ach unusen kinisou ren ewe aan ouwa fen finata.
Ekkei 900,000 chon ekkesiwin non ekkewe 36 maram ra no a nap seni ewe ukukun chon ewe Mwichefen otun ewe 110 ierin achechem non 1940, ewe achok ekis watte seni 860,00 memper. Iei ewe ier Elter Jeffrey R. Holland, Elter Dieter F. Uchtdorf, me ngang auwa uputiw.
Ekkei echipwerun chon ekkesiwin ra feito seni sokopaten kinikinin non fonufan. Non ekkewe aewin wonu maran non ei ier, ekkesiwin a kekita seni 20 persen nap seni ewe ier akkomw non Europe, Africa, Asia, ewe Pasifik, me Latin America. Non Enefenin Merika sia kuna ukukun 17 persen watenon. Ewe angang an ewe Samon mei chok sopwosopwono non sokopaten pechekunan. Ekkei kekitan nampa a pwarata pwe ewe kapas allim a atapa netip me ekkesiwini manau ekis meinisin.
Non ach ran, ekkei auchean chon ekkesiwin rese chiwen chufengen non ew chok neni. Pwokiten nuku me epinipin an memperun Mwichefen, pisekin ra kawor ar repwe atama mwicheich, fiti keutan imwen fen me tempel, non unusen fonufan. Ren ewe namwoten kewe kien pristut me pisek mi kawor, pekin annuk a wor non napengeni kinikinin non fonufan unus.
Ese nifinifin ia kich sia nonomw ia, ekkewe rafen memper repwe etiwa ekkewe puku ngerou minafon memper usun ach fori ren ekkewe English me Welsh Saints ngang uwa awewei seni uruoch akkomw. Ngang uwa tongei an Elter Gerrit W. Gong ewe afanafan non ei mwich ren an aitikich pwe ese wor emon epwe mot akanamon non an memef me non pekin ngun.
Wisach mi pin ren ach sipwe angei me etiwa ekkewe memper minafo me ekkewe ra niwinsafan. An ewe Samon a emwitirano An angang, kich sipwe tongei, amari, me angang ngeni ekkewe ra angei ewe Kapas allim. Kich sia tongeni anisi kautan ew aramasen Zion, ikewe kich sia nomw ia “ren ew netip me ew ekiek, me [nom] non wenechar.” Ren ach sipwe ew non ewe Samon, sipwe ew me mwen ewe Samon. Meinisin memper, ese nifinifin ranin ar papatais repwe pwan ani angangen etiwa ekkoch.
Ai eureur ngeni memper non ewe Mwichefen sipwe turufano ekkewe aramas mi auchea ren pouch, fini ekkewe aramas ra fen etiwa ewe kapas allimen Jises Kraist.
Preseten Gordon B. Hinckley a aiti kich pwe emon memper minafo a namot ngeni “emon chienan, eu wisan, me tumun ren ‘ewe kapas allimen Kot’ (Moroni 6:4).” Kich sipwe annea nein ekkewe chiechi ra anisi ekkei memper minafo ra mefi pwe ir mi auchea me resap wasona. Kich sia tongeni anisir ar repwe weweiti pwe iir chon kaeo neun Jises Kraist ra tongeni churi ekkoch me atiwa ekkewe kokkon ar repwe angang. Ekkewe serafo mi ekkesiwin repwe ekiekii ar repwe no fori angangen misinery unus. Meinisin repwe mwochen manaueni usun manauen Kraist.
Chommong ra choni ewe Mwichefen non watten ar pusin fangetani metochur meinisin me wesewesen mwochen ewe tong me aninis seni chiechier kewe Aramas mi Pin.
Ngeni ekkewe minafo ika ekkewe chon niwin safan ngeni ewe nuku, ikkei ekkei sosot oupwe churi. Kopwe nikitu non tipepwos! Ekkewe misineri ra aiti kemi ewe nongonongen ewe kapas annim me awewei ekkewe pon mi pin me angangepinin ewe muu, ekkewe ra fen nomw non ekkewe pukefel me non Afanafanen Ai Kapas Allim.
Angei ekkewe angangepin me pwon mi pin me aponueta ekkewe annuk mi euchea. Ekipwichi ekkewe pon a euchea ngeni manau ese mwuch. Ewe kapas alim a fori manau tekia epwe pwonueta, a kawor ren foforun me anomwun ekkewe pon mi pin ngeni Kot. Chinon chok papatais, apwungano, me angei ewe Melkisetek Pristut ren mwan, ekkewe pon kich sia tonong non ra for non ewe tempel. Ren ekkewe mi mano, ew me ew ekkei angangepin ra chok foruno non ekkewe tempel. Ren ena wewe, amonata ren ewe tempel epwe ew mwitirin mettoch ka mochen.
En kopwe mefi fan ekkoch esapw naf usun met ka sinei. Miritin ewe Kapas Allim ina ew watten feiech sia angei ren ekis me ekis non fansoun, nge esapw ew angangepin. Ewe kapas allim esapw eu tesin sinei. Iwe nge, usun Preseten Nelson a pwon, “Nupwen oua anneani ewe Puken Mormon fiti iotek iteiten ran, oupwe forata ekiek mi murino—iteiten ran. … Ren ami ekkieki met oua kaeo, ekkewe asamen nang epwe suk, me oupwe angei ponuwen ami kapas eis me emwen fan iten manauemi.”
A pwan kapach, iteiten ier non ekkesiwinin an ewe Mwichefen nesenin non mwichen Raninfel a ochupa ewe Testamenin Nomw, ewe Testamen Sofo, ewe Puken Mormon, me ewe Doctrine me Covenants. Fansoun me fansoun kopwe mefi omw netip pechekun ren omw sinei ewe kapas allim a mamarita. Kaeo ekkewe pukefel iteitan epwe efeiechu me echuweno manauemi ren awatenon ami ekkasiwin ngeni ewe kapas allimen Jises Kraist.
Kaeo ewe echipwerun uruon Jises Kraist ina ew manau nangatam sipwe tapwei, ren non weweochun uruo me nonomwun usun manauen Kraist. Pwon mi namwot a wato ew keukun angang kich sia anapanapa ngeni ewe anen pon. Ekkei eurour rafen epechekun ne kait seni Preseten Nelson. Meinisin memper, akkaewin ekkewe minafo me ekkewe ra niwin safan, oupwe feiech ren ami kaeo me fori an kewe kapasen osini won ekkewe pwon mi pin me ewe anen pon.
Ika ka aimwueno ew anean ren omw kopwe angei ew me ew kewe pwon mei namwot ren manau ese mwuch, en kopwe nomw won ewe an epwe emwenuk ngeni ewe muu ese much. Ewe tempel me ekkewe angangepin non ewe tempel epwe ina met sipwe nengenifichi. Napengeni meinisin pwon a kawor fan iten emon me emon. Ew pwon, pwupwunu fochofoch, a pachenong omw foforun amarita ngeni chiechiomw. Ach mwochen epwe fen ach kutta chiechiach fochofoch.
Nge inamwo, kosapw netipengaw ika pwupwunu fochofoch esapw fis non ei fansoun. Ekkewe soufos rafen aitikich pwe ese wor feiech epwe turuseni ekkewe memper mi nukuchar ekkewe ra apwonueta ekkewe annuk. Emon soufosun ewe Puken Mormon, King Benjamin, a murinno an apasa: “Ekkewe ra aponueta ekkewe annukun Kot … ra feiech non mettoch meinisin, … me ika ir [ra] nikitu tori nesopwonon … repwe tongeni nonomw ren Kot non ew keukun pwapwa ese-mwuch.”
Kopwe kuna, ika kose fen, pwe ekkewe memper rese unusech. Eningano ewe uruo a pwarano pwe ach nonomw won fonufan, kich sipwe fori mi mwan. Kich sia nomw non ew fonufan ese unus me mi turutiw, esapw ew fonufan fochofoch. Ei manau ew fansoun tes, fiti tufichin aier ese kouk me pwarano ennetin manauach.
Kich meinisin sia mefi pwe sise ukungeni ren ach sia achocho ne winiti usun Jises Kraist. An Achesafan a mwut ngenikich ach sipwe aier iteiten ran nupwen sia turutiw. Usun Nifai, pwan emon soufosun ewe Puken Mormon, a apasa: “[Kich] sipwe nikitu fiti tipepos non Kraist, epwe wor ami unusochun saramen apinikunuk, me ewe tongen Kot me aramas unus. Ina minne, ika oupwe feino mwemi, kametip won ewe kapasen Kraist, me nikitu tori nesoponon, nengeni, iei anon ewe Sam: Oupwe weri ewe manau esemuch.”
Nupwen sia eureki osukosuken non ranich kei, kich sipwe chechemeni pwe ewe Chon Amanau, nupwen An angangen afanafan won fonufan, apwan nomw non fansoun osukosuk me fitikoko. An ekipwich esapw won osukosuken non ewe fansoun; nge won unusechun ekkewe Aramas mi Pin.
Tapweno mwirin ewe Chon Amanau me An uruo me afanafan ese mecheres non ewe fonufan mi chok okosukosuk. Ese mecheres ren ewe Chon Amanau non ewe fitikokon fonufan nupwen an nom non ei fonufan, ese mecheres ngeni sou emwen me memper me noom, me ese mecheres ngenikich. Ochun chok, soufos mi manau ra awora ewe emwen sia ennetin mochen ren ach ei ran. Preseten Dallin H. Oaks epwe sopweno ena pochokunen niffang non pekin ngun.
Ngang uwa pwarata pwe ewe uruon ewe Michefenin Jises Kraist mi fochofoch me ennet. Ua apasa ai ennetin me pungun pwarata pwe Jises Kraist mi manau me pokiten An Achasefan, kich sia tongeni eu chok non I. Non iten Jises Kraist mi pin, amen.