Ir Pwusin Neur Chon Kapung
Ika kich sia ani nukunuk non Jises Kraist, fori me anomwu ach pon ngeni Kot, me aier seni ach kewe tipis, ewe nenien kapung epwe menemenech.
Ewe Pukel Mormon a awesano fiti ewe tungor seni Moronai ren “feito ren Kraist,” “me oupwe unusochuno non I,” “amam [inisich] seni fofforungaw meinisin,” me “tongei Kot ren unusen [ach] tongeni, ekiek me pochokun.” Amwararan, an ewe omuchunon kapasen emwen a asukusuku me ruu ewe Manau Safan me Amuchunon Kapung.
A apasa, “Uwa mwitir no asoso non ewe paratis an Kot, tori an nguni me inisi repwe chufengen sefan, me upwe emmwenito non win me non ewe asepwan, pwe upwe churikemi me mwen ewe menemenechun neni an ewe Jehovah mi napanap, ewe Sou Kapung Esemuch ren ir ekkewe mi manau me pwan mano.
Ngang uwa sani an Moronai aean ewe kapas “kapung“ an epwe anapanapa ew Omuchunon Kapwung. Ekkoch soufosun ewe Pukel Mormon ra pwan anapanapa ewe kapung usun ew “amwararen ran” me ew sipwe “neno mwach [ngeni] ren ew pochokunen nuku.” Iwe nge iteiten nupwen sia osukusuku ewe Ranin Kapwung, ekkoch napanapen osini a tonong non ekieki, usun “saw me nemenemeno,” “ekipwich me nuokus,” me “netipengaw ese mwuch.”
Ngang uwa nuku kei awewe non kapas a pwari usun pwe ewe kapasen Kraist a anisi Moronai me ekkoch soufos ar repwe osukusuku ena watten ran fiti ar mwochen me aneanen nge esapw ren ewe nuokus ra fonou ngeni ekkewe rese monota non ngun. Met Moronai mi weweiti pwe en me ngang sipwe kaeo?
Ngang uwa iotek fan iten an ewe Ngun mi Fel aninis nupwen sia ekieki an Samach won Nang ewe kokkotun pwapwa me kirekiroch, wisen An ewe Chon Amanau ewe achasefan non ewe kokkot an ewe Sam , me ifa usun kich sipwe “tipis ren [ach] pusin tipis non ewe ranin kapung.”
An ewe Sam Kokkotun Pwapwa
Ekkewe auchean popun an ewe Sam kokkot pwe repwe awora ngeni Noun semirit non ngun ekkewe tufich ar repwe angei ew ununun inis, kaeo “ech seni ngaw” seni manau won fonufan, sinei ussun, marita non pekin ngun, me fefeita esemuch.
Met ewe Doctrine me Covenant a kapas ussun ren “pungun finata” ina popunapen non an Kot ewe kokkot an epwe wato manau me manau ese mwuch ngeni Neun Kewe aat me nengin. Ei euchean annuk apwan anapanapa non ewe pukefel ren pungun finata me ewe pochokunen finata me anganga.
Ewe kapas “pungun finata fofor murinno” mi ourouroch. Kapas mi nonno ngeni ewe kapas “fofor murinno” mi pachenong “och,” “wenechar,” me “nimenimech.” Kapas mi nonno ngeni ewe kapas “pungun finata” a pachenong “foffor,” “mwokutukut,” me “angang.” Ina minne, “pungun finata fofor murinno” mi tongeni wewen pwe ewe tufich me feioch ne finata me mokutukut fan itach pwisin non napanapan mi och, wenechar, nimenimoch, me ennet.
An Kot forata mi pachenong ir me ru “mettoch repwe mwokutukut me mettoch repwe mokutukut won.” Iwe pungun finata fofor murinno ina ewe a foruno seni nang “pochokunen mokutukut won pusin an” a apochokuna kich usun noun Kot semirit ach sipwe winiti chon mokutukut fan iten ekkoch nge sisap pwarano ach sise tipeew ngeni ach sipwe mokutukut won.
Ewe fonufan a for pwe ew neni ikewe noun Samach non Nang kewe semirt repwe tongeni pwari ika repwe “fori mettoch meinisin minne ewe Samon ar Kot a annuku ngenir.” Ewe euchean popun ewe Foruta me ach sia nom pwe repwe ngeni kich ewe tufichin mokutukut me winiti met ewe Samon a tingorekich ach sipwe winiti.
Ewe Samol a ouroura Enoch:
“Iwe nengeni ikeir pwim kewe; ir ekkewe ra for me non pwisin pei, me ngang uwa ngenir ar mirit, non ewe ran ua forireta; me non ewe Atake Eden, Uwa ngeni mwan an pungun finata.
“Me ngeni pwim kewe ua kapas usun, me ua pwan ngenir ew annuk, pwe repwe tong fengen nefiner, me repwe finiei, pwe Semer.”
Ewe nongonongen popun ewe aean pungun finata pwe sipwe tong fengen me fini Kot. Me ekkei ruu pwopwun ra nene ngeni ewe aewin me oruen annuk mi napanap sipwe tongei Kot ren unusen netipach, ngunuch, me ekiekich me sipwe tongei chon oruch usun pwisin kich.
Ekieki pwe a annuk ngenikich—esap chok ekis apochokun ika ourour nge annuk—ach sipwe aea ach pungun finata ne tong fengen me fini Kot. Kose mwochen upwe apasa pwe non ekkewe pukefel, ewe kapas mi ekesiwin “fofor murinno” esapw usun ew anapanap nge epwe pwan ew aninis ren ifa usun ach sipwe aea ach pwusin finata.
Echo kon mi fel kich mi sinei itenapen “Fori mi Pung” ren ew popun. Sise mwo fen efeioch ren pungun finata ach sipwe fori met chok sia mochen me inet chok sipwe fori. Nge, anongonong won an Samach kokkot, sia fen angei pungun finata ach sipwe kutta me foffor anongonong won ennet esemuch. Ren “chon tupuni [kich pusin],” sipwe fokkun achocho ne fori mi pung, “fori chommong mettoch ren [ach] pusin mochen, me awora watten wenechar.”
Ewe auchea ese much ren ewe pungun finata fofor murinno mi affatono non tetenin pukefel usun uruon ewe mwichenap non ewe manau me mwen fonufan. Lucifer a ungeni an ewe Sam kokkot fan iten Neun kewe semirit me kutta an epwe atano ewe pechekunen mokutukut won pusin winikapach. Napan, an ewe chon ungeni a fot won nongonongen pungun finata fofor murinno.
Kot a awewei, “Ina minne, pokiten … Setan a ungeniei, me kutta an epwe atano ewe pungun finata an aramas, … Ngang ua fori pwe i epwe koturutiw.”
An ewe chon koum apangawen kokkot pwe epwe angeiano seni noun Kot kewe semirit ewe niffangen ar repwe winiti “chon mokutukut fan iter pwisin” ekkewe ra tongeni mokutukut non wenechar. An mwochen pwe noun Samach won Nang semirit repwe winiti mettoch epwe angang won.
Fori me Winiti
Preseten Dallin H. Oaks a epwechekuna pwe ewe kapas allimen Jises Kraist a tungorei kich sipwe sinei mettoch me sipwe winiti mettoch ren mi ennet aean ewe pungun finata. A apasa:
“Chommong Paipel me pukefel ra kapas usun ewe saingon kapwung ewe meinisin aramas repwe nifang anongonong ngeni ar fofor ika angang ika mochenin netiper. Nge ekkoch pukefel ra awateno won ei ren ar fosun ach sia fen kapwung me ren ewe keukun kich sia angei.
“Ewe soufos Nifai a awewei ewe Omuchunon Kapwung non kapas met kich sia winiti: ‘Me ika ar kewe angang mi fen nimengaw ir repwe nimengaw; me ika ir repwe nimengaw iwe rese tongeni nomw non ewe mwuun Kot’ [1 Nifai 15:33; auchean mi kapacheta]. Moronai a affata, ‘I ewe mi nimengaw epwe chok nimengaw; me I ewe mi tupwon repwe chok pwan tupwon’ [Mormon 9:14auchean mi kapacheta].”
Preseten Oaks a sopweno: “Seni ekkena afanafan sia apungano pwe ewe Saingon Kapung esap chok ew minen chekin ew ukukun pungun foffor murinno me fofforungaw—met kich sia fen fori. Ina ew kapasen esinesin ren ewe amuchunon pungunon ach foffor me ekiek—met sia fen winiti.”
An ewe Chon Amanau Achasefan
Ach kewe angang me mwochen resap me rese tongeni amanawakich. “Mwirin meinisin sia tongeni fori,” sia niwinsefan ngeni Kot seni chok ewe umeumech me chen a wor seni an ewe Chon Amanau asoren achasefan fan itach ese much me ese keuk.
Alma a apasa, “Poputa ne nuku non ewe Noun Kot, pwe i epwe wareto an epwe angasa noun aramas, me i epwe riaffou me mano pwe epwe achasefani ar tipis; me i epwe manau sefan seni mano, minne epwe wato ewe manausefan, pwe aramas meinisin repwe uta me mwen mesan, ar repwe kapung non ewe soponon me ranin kapung, anongonong won ar kewe angang.”
“Sia nuku pwe seni ewe Achasefan an Kraist, aramas meinisin repwe kuna manau, ren ar aneasochisi ekkewe annuk me angangepin ren ewe Kapas Allim.” Ifa keukun ach kinisou pwe ach tipis me foforuch mi ngaw resapw nomw ar repwe pwarata fan itach ika kich mi ennetin “upu safan,” fori ach nuku non ewe chon Angasakicheno, aier fiti “enetin netip” me “ennetin pwopwun,” me “achocho tori nesopwonon.”
Nuokusiti Kot
Chommong me neich sipwe fen ekieki pwe nonomwuch memwen ewe nenien Soukapwung Esemuch epwe nonongeni foforun non imwen kapwung non fonufan. Emon soukapwung epwe emweni. Pisekin pwarata repwe kawor. Ewe pwungun kapwung epwe katou. Me kich sisapw sinei me ruko tori ach sipwe sinei an a katou pwungun. Nge ngang uwa nuku pwe ei ekiek ese pwung.
Mi sokkono seni nge a arapakan ngeni ekkewe nuokus sia mefi ina met ekkewe pukefel ra awewei pwe “nuokusiti Kot” ika “ewe nuokusiti ewe Samon.” Esap usun niuokusun fonufan minne a efisata osukosuk me eurek, nuokusiti Kot a uweato non manauach kinamwe, pochokunen ourour, me nukunuk.
Nuokus a apachanong ew anononun memefin sufon me mwar ren ewe Samon Jises Kraist, anneasosich ngeni An kewe annuk, me monota ngeni ewe Amuchunon Kapwung, me pungoch non Poun. Nuokusiti Kot a pwuku seni pungun weweiti napanapan Kot me angang an ewe chon Angasono, ew mwochen ach sipwe etiwa ach mochen ngeni An mochen, me weweiti pwe meinisin mwan me fefin repwe angei niwinin pusin ar mwochen, ekiek, kapas, me foffor non ewe Ranin Kapwung.
Ewe nuokusiti ewe Samon esap wewen pwe sia tipemwaramwar usun ach feino fan Mesan pwe sipwe kapwung. Nge, ina ewe fofforun euchean ach sinei usun inisich “mettoch pusin ina ussur” me “met repwe wesewesen ussun.”
Meinisin aramas ion a fen manau, me ion ese mwo manau won fonufan “epwe uta fan mesen ewe nenien kapung an Kot, an epwe kapwung anongonong won an [atewe ika neminewe] foffor ika ra fofforoch are fofforungaw.”
Ika ach mwochen a fen fan iten wenechar me ach angang rafen ech—wewen kich sia fen anganga ach nuku non Jises Kraist, fori me aponueta ach pon ngeni Kot, me aier seni ach tipis—iwe ewe nenien kapung epwe apwapwa. Usun Enos a fen apasa, kich sipwe “uta fan mesen [ewe chon Angasakich]; iwe [kich] sipwe kuna mesen fiti pwapwa.” Me non ewe amuchunon ran kich sipwe “angei niwinin wenechar.”
Pwan usun chok, ika ach mochen fan iten met mi ngaw me ach angang mi ngaw, iwe ewe fansoun kopung epwe aosukosukakich. Sipwe ani “ew unusochun weweiti,” “ew saramen ekiek,” me ew “pochokunen memefin [ach] pwisin niamam.” “Sise fakkun tongeni ach sipwe neta ren ach we Kot; me sipwe pwapwa ika kich mi tongeni annuku ngeni ekkewe achau me chuk ar repwe turutiw woch ar repwe opa kich seni fan esean.” Iwe non ewe amuchunon ran sipwe “angei [ach] niffangen angang mi ngaw.”
Emwuchunon, kich pusin nouch kewe sou kapwung. Ese wor emon epwe ureni kich ian sipwe feino ia. Non an ewe Samon nonomw, kich sipwe etiwa met kich sia fen finata ach sipwe winiti non ei manau me sipwe pusin sinei ian sipwe nomw ia fefeino.
Pwon me Kapasen Pwarata
Weweiti pwe ewe Amuchunon Kapung epwe menemenoch esapw ew feioch a iseiseno faniten chok Moronai.
Alma a awewei ekewe pwonen feioch mi kawor ngeni meinisin ekkewe chon kaeo mi nikitu noun ewe Chon Amanau. A apasa:
“Wewen ewe kapas niwinsefan pwe epwe niwini sefani ngaw ngeni ngaw, ika mocheniangawen fonufan ngeni mocheniangawen fonufan, manauangau ngeni manauangau—öch ngeni met minne mi öch; tupwon ngeni met minne mi tupwon; pung ngeni met minne mi pung; umoumoch ngeni met minne mi umoumoch.
“… Fofforoch non pung, kapung non wenechar, me soposopono ne fori mi öch; iwe ika kopwe fori ekkei mettoch meinisin kopwe angei niffangom; ewer, kopwe angei umoumoch epwe niwin sefan ngonuk; kopwe angei pungoch epwe niwin sefan ngonuk; kopwe angei ewe kapung mi wenechar epwe niwin sefan ngonuk; me kopwe angei öch epwe niwin sefan ngonuk.”
Ngang uwa pwapwa me pwarata pwe Jises Kraist I ach Chon Amanau mi manau. An Alma pwon mi ennet me fich ngeni en me ngang—ikanai, nesor, me feinfeino. Ua pwarata ei non ewe it mi pin iten ewe Samon Jises Kraist, amen.