मोर्मोनको पुस्तक—हाम्रो यात्रामा एक अतुलनीय खजाना

अल्मा र मोसीयाहका छोराहरू जस्तै, हामीले “परमेश्वरको वचन जान्न सकौँ भनेर धर्मशास्त्रहरूलाई लगनशीलतापूर्वक [खोजी] गर्नु पर्छ” र सत्यमा मजबुत हुनु पर्छ (अल्मा १७:२)।

जर्जिया एटलान्टा सुसमाचार प्रचार क्षेत्रमा अगुवाका रूपमा सेवा गर्दा हामीले प्रत्येक सुसमाचार प्रचारकहरूलाई दैनिक कम्तिमा ३० मिनेट मोर्मोनको पुस्तक अध्ययन गर्न प्रोत्साहित गर्‍यौँ । त्यो प्रतिबद्धताले हाम्रो आस्था बढायो र चमत्कार खोज्ने विषयमा हामीलाई सहयोग गर्‍यो ।

यो सम्भव छ कि सुसमाचार प्रचार सेवा पछि हामीसँग दैनिक धर्मशास्त्र अध्ययनका लागि त्यति नै समय उपलब्ध नहुन सक्छ तर म प्रतिज्ञा गर्छु कि यदि तपाईंले इमान्दारीपूर्वक हरेक दिन प्रार्थनापूर्वक मोर्मोनको पुस्तक अध्ययनलाई प्राथमिकता दिनुभयो भने, तपाईंले परमप्रभु र उहाँका प्रतिज्ञाहरूमा ठूलो आध्यात्मिक शक्ति र विश्वास पाउनुहुने छ ।

नफीले सिकाए: “ख्रीष्टका वचनहरूमा भोज गर; किनकि हेर, ख्रीष्टका वचनहरूले तिमीले गर्नुपर्ने सबै विषयहरू भन्ने छन्” (२ नफी ३२:३) ।

भोज खानु भनेको पढ्नु मात्र होइन—यसको अर्थ स्वाद लिनु, मनन गर्नु र लागू गर्नु हो । मोर्मोनको पुस्तक अध्ययन गर्दा तपाईंको धर्मशास्त्र अध्ययनलाई अझै अर्थपूर्ण बनाउने तरिकाहरू विचार गर्नुहोस् । उदाहरणका लागि:

• सुसमाचार पुस्तकालय एपमा उपलब्ध अध्ययन सहायकहरू प्रयोग गर्नुहोस् ।

• परमेश्वरको योजना बुझ्न हामीलाई सहयोग गर्ने र हाम्रा स्वर्गका पितासँग करार गर्न र पालना गर्न हामीलाई अगुवाइ गर्ने अनन्त सत्यहरू पहिचान गर्नुहोस् ।

• अध्ययनका क्रममा सिकेका विषयवस्तुहरू सुरक्षित राख्न महत्त्वपूर्ण वाक्यांशहरूमा चिन्ह लगाउनुहोस् र आफ्ना विचारहरूको अभिलेख राख्नुहोस् ।

मोर्मोनको पुस्तकमा आत्माका प्रश्नहरूको उत्तर दिने शक्ति छ । अगमवक्ता नफीले सिकाए जस्तै, हामीले “यो हाम्रो लाभ र शिक्षाका लागि हुन सक्छ भनेर सबै धर्मशास्त्रहरूलाई हामीमा लागू गर्नु पर्छ” (१ नफी १९:२३) ।

जब हामी ख्रीष्टका वचनहरूमा भोज गर्छौँ, तिनीहरूले प्रकाशको ढोका खोल्ने छन् र उहाँको समीप आउनका लागि तपाईंको जीवनका विभिन्न परिस्थितिहरूमा तपाईंले के गर्न आवश्यक छ भनेर तपाईंलाई देखाउने छन् ।

जसरी लहीले आफ्नो परिवारसँग जीवनको रूखको फल बाँड्न चाहन्थे (हेर्नुहोस् १ नफी ८:१२), जब हामी मोर्मोनको पुस्तकको गवाही प्राप्त गर्छौँ, येशू ख्रीष्टको सुसमाचार सिकेर प्राप्त हुने त्यो आनन्द बाँड्ने चाहना हामीमा विकास हुन्छ ।

हाम्रा एक सुसमाचार प्रचारक, सिस्टर बेन्सन, जो आज हामीसँग यो सत्रमा भाग लिँदै हुनुहुन्छ, उहाँले आफ्नो भाइलाई सहयोग गर्ने चाहना मसँग बाँड्नुभयो । त्यस समयमा, उहाँ कलेज जाने तयारी गरिरहनुभएको थियो र सुसमाचार प्रचार सेवा गर्ने सम्बन्धमा उहाँ निश्चित हुनुहुँदैनथ्यो । सिस्टर बेन्सनलाई उहाँको सुसमाचार प्रचार सेवाको पहिलो चार महिनामा मोर्मोनको पुस्तक पढ्न, उहाँको मन पर्ने पदहरूमा चिन्ह लगाउन र त्यसपछि त्यो प्रति उहाँको भाइलाई पठाउनका लागि आमन्त्रण गर्न मलाई प्रेरणा मिल्यो ।

सिस्टर बेन्सनले चिन्ह लगाइएको मोर्मोनको पुस्तकको प्रतिलिपि आफ्नो भाइलाई पठाउनुभयो र हरेक रात त्यसबाट पढ्न उहाँलाई आमन्त्रण गर्नुभयो । उहाँले पछि मलाई भन्नुभयो: “सुसमाचार प्रचारको मेरो सेवापूर्व, मेरो भाइ पूर्णकालिन सुसमाचार प्रचारको सेवा गर्न चाहन्छ कि चाहँदैन भन्ने विषयमा निश्चित थिएनन् । बिस्तारै, समय बित्दै जाँदा, उनले मोर्मोनको पुस्तक पढ्दै गए, आफ्नो जीवनमा वृद्धि हुँदै गएको प्रसन्नता उनले प्राप्त गरे र सुसमाचार प्रचारको सेवा गर्ने विचार गर्न सुरु गरे ।”

सिस्टर बेन्सनले आफ्नो सुसमाचार प्रचारको सेवा पूरा गर्नुभन्दा दुई हप्तापूर्व उहाँका भाइले आफ्नो सुसमाचार प्रचारको बोलावट पत्र पाउनुभयो । उहाँ अहिले मेक्सिको टक्सटला गुचारेज सुसमाचार प्रचार क्षेत्रमा सेवा गरिरहनु भएको छ । मोर्मोनको पुस्तकका माध्यमद्वारा एल्डर बेन्सनले आफ्नो जीवनलाई आध्यात्मिक स्पष्टताका साथ हेर्नुभयो, जसले गर्दा उहाँलाई परमप्रभुको सेवा गर्न र सबै चीज सफल हुने छ भन्ने विश्वास गर्न प्रेरित गऱ्यो । त्यो निर्णय ख्रीष्टको वचनको शक्तिबाट प्रभावित—एउटा चमत्कार थियो ।

मेरा प्रिय दाजुभाइ तथा दिदीबहिनीहरू, म तपाईंहरू प्रत्येकलाई मोर्मोनको पुस्तकको अध्ययनलाई गहन बनाउन प्रोत्साहित गर्छु । जब हामी मोर्मोनको पुस्तकमा पाइने ख्रीष्टका वचनहरूमा भोज गर्छौँ, आत्माले हामीलाई अनन्त सत्यहरू बुझ्न र परमप्रभुले आफ्नो सन्देश सुन्न तयार पार्नुभएकाहरूलाई दृढताका साथ हाम्रो गवाही बाँड्न सहयोग गर्ने छ । परमप्रभुले भन्नुभयो, “छनोट गरिएकाहरूले मेरा वाणीलाई सुन्छन् र आफ्ना हृदयहरू कठोर बनाउँदैनन्” (सिद्धान्त र करार २९:७) । आस्थाका साथ परमेश्वरसँग आग्रह गर्नेहरूले पवित्र आत्माको शक्तिद्वारा मोर्मोनको पुस्तकको सत्यता र देवत्वको गवाही प्राप्त गर्ने छन् भनेर म गवाही दिन्छु । म येशू ख्रीष्टको नाममा यी विषयहरू प्रमाणित गर्छु, आमीन ।