जानुहोस् र त्यस्तै गर्नुहोस्

लगभग ९१ ईसा पूर्व, अम्मोन, मोर्मोनको पुस्तकका एक सुसमाचार प्रचारकले राजा लमोनीलाई आफ्नो परिचय दिँदै यसो भने, “म केही समयका लागी यी जनहरू माझ बस्न चाहन्छु; … [र] म तपाईंको सेवक हुने छु । राजाप्रतिको उनको सेवाका कारण, अम्मोनलाई “साहसपूर्वक बोल्ने, … र [राजा लमोनी] लाई कुन शक्तिले आफूले सेवा गरेका थिए भनेर बताउन” अवसर दिइएको थियो । त्यसको सट्टामा, राजाले प्रतिज्ञा गरे कि “[अम्मोन] जे चाहन्छ … [राजा] त्यो दिने छन् ।” राजाले येशू ख्रीष्टको सुसमाचारको सन्देश सुनून् भन्ने अम्मोनको एउटै मात्र अनुरोध थियो । अम्मोनको सेवाको परिणामस्वरूप “हजारौँ जीवात्माहरूलाई पश्चात्तापमा [ल्याइए] ।”

हाम्रा समयमा, सेवाले अरूहरूलाई सुसमाचारतर्फ डोऱ्याइरहन्छ । सिस्टर बेभनले स्वास्थ्य समस्याहरू अनुभव गर्न सुरु गर्दा उहाँ शिक्षण सुसमाचार प्रचारकका रूपमा सेवा गरिरहनु भएको थियो जसका कारण उपचारका लागि उहाँ घर फर्कनु परेको थियो । बोलावटबाट मुक्त नभइ उहाँ घरबाटै सेवा गर्ने सुसमाचार प्रचारकका रूपमा सेवा गरिरहन सक्षम हुनुभयो ।

पार्कको भ्रमणमा जाँदा, सिस्टर बेभन र एक मित्रलाई चार साना बालबालिकाहरू भएकी एक आमासँग कुराकानी गर्ने प्रेरणा मिल्यो तर उनीहरू हिचकिचाए र त्यस परिवार त्यहाँबाट गए । त्यो परिवार त्यहाँ हुनुहोस् भनेर प्रार्थना गर्दै भोलिपल्ट उहाँहरू पार्कमा फर्कनुभयो । चमत्कारिक रूपमा, ती आमा अघिल्लो दिन बसेकै स्थानमा बसिरहनु भएको थियो । यसपटक सिस्टर बेभन र उहाँकी मित्र ती आमातर्फ जानुभयो, उहाँसँग परिचित हुनुभयो र उहाँलाई क्षणिक सहयोगको अत्यन्त आवश्यकता भएको सम्बन्धमा बुझ्नुभयो । उहाँहरूले सहयोग गर्नुभयो र त्यसपछि उहाँलाई सुसमाचारका सम्बन्धमा सिक्न आमन्त्रण गर्नुभयो ।

त्यस सेवा र आमन्त्रणका कारण ती आमा र उहाँका ज्येष्ठ सन्तानले बप्तिस्मा लिनुभयो, त्यसपछि एक वर्ष पछि माहिला सन्तानले बप्तिस्मा लिनुभयो । आज उहाँहरू सक्रिय सदस्यहरू हुनुहुन्छ । सिस्टर बेभनलाई जानकारी थियो कि यो अनुभव दैवी प्रेरणाबाट प्राप्त भएको थियो र यसले “[उहाँलाई] प्रमाणित गर्‍यो कि [उहाँ] त्यहीँ हुनुहुन्थ्यो जहाँ परमेश्वर [उहाँ] हुनुभएको चाहनु हुन्थ्यो ।”

अम्मोन र सिस्टर बेभन जस्तै, जब हामी अरूको सेवा गर्छौँ, हामी “तिनीहरूलाई असल उदाहरण देखाउँछौँ” र तिनीहरू “[हामीमा] रहेको आशाको कारण” जान्न चाहन्छन् ।”

येशूले हामीलाई “जाओ, तिमी पनि त्यसै गर” भनेर आमन्त्रण गर्नुहुन्छ ।

अध्यक्ष रसल एम्. नेल्सनले “प्रत्येक योग्य, सक्षम युवालाई सुसमाचार प्रचार सेवाका लागि तयारी गर्न र सेवा गर्न” र प्रत्येक सक्षम युवतीलाई “परमप्रभुले [उनी] सुसमाचार प्रचारको सेवा गरेको चाहनुहुन्छ कि हुँदैन भनेर जान्न प्रार्थना गर्न” आह्वान गर्नुभयो । “सुसमाचार प्रचार होस् वा सेवा गर्ने सुसमाचार प्रचारको कार्य होस्, सुसमाचार प्रचारको सेवा गर्ने तपाईंको निर्णयले तपाईं र अन्य धेरैलाई आशीर्वाद दिने छ” भनेर उहाँले प्रतिज्ञा गर्नुभयो । सेवा गर्ने सुसमाचार प्रचारका कार्यहरूले सक्षम शब्दको परिभाषालाई परिवर्तन गरेका छन् । अब धेरै कम अपवादहरू बाहेक परमप्रभुका लागि पूर्णकालिन सुसमाचार प्रचारको सेवा गर्न चाहने हरेक योग्य युवा र युवतीले त्यसो गर्न सक्छन् ।

व्यक्तिगत परिस्थिति जस्तोसुकै भए तापनि सेवा गर्न सक्षम हुनुको उदाहरण एल्डर होल्गाडो हुनुहुन्छ । उहाँ एक दुर्लभ आनुवंशिक विकारका साथ जन्मनुभएको थियो जसले उहाँलाई शिक्षण सुसमाचार प्रचारकका रूपमा सेवा गर्नबाट अनुबंधित गरेको थियो । एल्डर होल्गाडोलाई सेवा गर्ने सुसमाचार प्रचारकका रूपमा बोलावट दिइएको थियो र उहाँले बिशपहरूको भण्डारमा स्वयम् सेवा गर्नुभयो, जहाँ उहाँले सयौँ मानिसहरूलाई आवश्यक सहयोग प्राप्त गर्न सहयोग गर्नुभयो । उहाँले तखताहरूमा सामान राख्ने, झोलामा तरकारीहरू भर्ने र कागजका बाकसहरू कुच्याउने काम गर्नुभयो ।

उहाँको सेवा गर्ने सुसमाचार प्रचारको कार्यपछि प्रभुभोज सभामा एल्डर होल्गाडोले बोल्दै गर्नुहुँदा, उहाँले भन्नुभयो कि “परमेश्वरलाई सेवा गर्ने सुसमाचार प्रचारकहरूको आवश्यकता छ ।” उहाँलाई अरूलाई प्रेम गर्ने र सेवा गर्ने मानिसहरू चाहिन्छ । यी मानिसहरूले ट्वाइलेट पेपर तखतामा राख्ने, ब्रोकाउलीहरू झोलामा भर्ने, फर्निचर बनाउने जस्ता कार्यहरू गर्छन् र मानिसहरूप्रति राम्रो व्यवहार गर्छन् ।”

राम्रो कार्य गर्नका लागि तपाईंलाई सेवाको कार्यभार दिइएको वा तपाईंले नामको ट्याग लगाएको हुनु पर्दैन । हरेक सेवाका कार्यलाई मुक्तिदाताले मान्यता दिनुहुन्छ । हामी सबैले उहाँ जस्तै प्रेमपूर्वक र दयालु भएर सेवा गर्दै अरूलाई ख्रीष्टकहाँ आउन सहयोग गर्न सक्षम छौँ । हामी सबैले पवित्र आत्माको शक्तिद्वारा ख्रीष्टको नाममा ती एकजनाको सेवा गर्न सक्छौँ र येशू ख्रीष्टमा आस्थाको उदाहरण भएर जिउन सक्छौँ । सेवाले हामी आफूलाई जीवित बलिदानका रूपमा प्रस्तुत गर्न अनुमति दिन्छ जुन परमेश्वरका लागि स्वीकार्य हुन्छ ।

येशूले हामीलाई “जाओ, तिमी पनि त्यसै गर” भनेर आमन्त्रण गर्नुहुन्छ ।

शिक्षण कार्यभारबाट सेवा कार्यभारमा स्थानान्तरण भएका एक युवा सुसमाचार प्रचारकले केही व्यक्तिगत चुनौतीहरूसँग सङ्घर्ष गर्नुभयो जसले गर्दा उहाँलाई ख्रीष्टको चङ्गाइको शक्तिको आवश्यकता पऱ्यो । पवित्रिकृत गरिएको सेवाको कार्यले उहाँको जीवनमा त्यो शक्ति ल्यायो । उहाँले भन्नुभयो, “जब म सङ्घर्ष गरिरहेको थिएँ, ख्रीष्टले मलाई उठाइरहनुभएको म महसुस गर्न सक्थेँ । मन्दिरमा रहेको खानाको भण्डारमा सेवा गरेर र उहाँको सुसमाचार मार्फत् उहाँले मानिसहरूलाई आशीर्वाद दिन सक्षम भइरहनुभएको देख्न पाउनुमा केही विशेषता छ ।”

यी एल्डरले अझ गहिरो प्रसन्नता महसुस गर्न सुरु गर्नुभयो र उहाँको नयाँ उत्साहले उहाँलाई र उहाँका सम्पूर्ण परिवारलाई आशीर्वाद दियो । उहाँहरूको घरमा आत्माले थप प्रशस्त मात्रामा प्रवेश गरे, उहाँहरू नियमित रूपमा मन्दिरमा सँगै जानुभयो र ख्रीष्ट उहाँहरूको परिवारमा बढी मात्रामा केन्द्रबिन्दु बन्नुभयो । ख्रीष्टले उहाँको जीवनको रक्षा गर्नुभयो र सेवाद्वारा उहाँको परिवारलाई आशीर्वाद दिनुभयो भनेर यी सुसमाचार प्रचारकले विश्वास गर्नुहुन्छ ।

अध्यक्ष नेल्सनले सिकाउनुभयो, “अरुहरूको सेवा गर्ने र अरुहरूलाई मजबुत बनाउने चाहना मुक्तिदाताको उद्धार शक्तिद्वारा चङ्गाइ प्राप्त गर्नका लागि व्यक्तिको तत्परताको प्रतीकका रूपमा खडा हुन्छ ।”

येशूले हामीलाई “जाओ, तिमी पनि त्यसै गर” भनेर आमन्त्रण गर्नुहुन्छ ।

जब तपाईं वा तपाईंको परिवारका कुनै सदस्यलाई सेवा गर्ने सुसमाचार प्रचारकका रूपमा बोलावट आउँछ, त्यो उत्सव मनाउने क्षण हो । अब तपाईंको परिवारमा परमप्रभु येशू ख्रीष्टद्वारा पदीय जिम्मेवारी दिइएको एक प्रतिनिधि बस्नुहुने छ । यसले तपाईंहरू सबैलाई असल कार्यका लागि परिवर्तन गर्ने छ । सेवा गर्ने कुनै पनि बोलावटमा निराश हुनुहुँदैन । हामी गाउँछौँ, “हजुर जहाँ चाहनुहुन्छ म त्यहीँ जान्छु” र “हजुर जे चाहनुहुन्छ म त्यही हुने छु ।” हामी जे भन्छौँ त्यो साच्चैँ गर्छौँ भनेर देखाउने यहाँ एउटा राम्रो अवसर छ !

सेवा गर्ने तपाईंहरू सबैलाई र विशेष गरी ४,००० भन्दा बढी सेवाको कार्य गर्ने युवा सुसमाचार प्रचारकहरूलाई, हामी तपाईंहरूलाई माया गर्छौँ ! यदि शिक्षण कार्यभार भएका सुसमाचार प्रचारकहरू परमप्रभुका मुख हुनुहुन्छ भने, सेवा गर्ने सुसमाचार प्रचारकहरू परमप्रभुका हात हुनुहुन्छ र तपाईंहरू दोस्रो दर्जाका सुसमाचार प्रचारकहरू हुनुहुन्न । इस्राएलको भेलाका लागि तपाईंहरू प्रत्येक महत्त्वपूर्ण हुनुहुन्छ । अध्यक्ष नेल्सनले सिकाउनुभयो कि “जब हामी कसैलाई सहयोग गर्ने कुनै पनि कार्य गर्छौँ … परमेश्वरसँगको उनीहरूको करार बनाउन र पालना गर्न, हामी इस्राएललाई एकत्रित गर्न सहयोग गरिरहेका हुन्छौँ ।”

तपाईं हरेक दिन इस्राएललाई धेरै तरिकाले एकत्रित गर्नुहुन्छ र तपाईंका सेवाले जीवन परिवर्तन गर्छ । प्रायः तपाईंलाई जानकारी हुँदैन कि तपाईंको सेवाले कसलाई लाभ भएको छ तर परमेश्वरलाई जानकारी छ । सधैँ स्मरण गर्नुहोस् कि “जब तपाईं यी मध्ये एकको [सेवा] गर्नुहुन्छ, … तपाईं [उहाँको] सेवा गर्नुहुन्छ ।” चर्च कल सेन्टरहरूमा स्वयम् सेवा गर्नुहुँदा हामी तपाईंका आवाजहरू सुन्छौँ; सामुदायिक संस्थाहरूमा सहयोग गर्नुहुँदा हामी तपाईंका मुस्कानहरू देख्छौँ; र मन्दिरहरूमा सेवा गर्नुहुँदा हामी तपाईंको ज्योति महसुस गर्छौँ । तपाईं भोकाहरूलाई खुवाउनुहुन्छ, नाङ्गाहरूलाई लुगा लगाइदिनुहुन्छ र तिर्खाएकाहरूलाई पिउन दिनुहुन्छ ।

हामी सबै जानु पर्छ र त्यसै गर्नु पर्छ ।

सेवामा सुसमाचारका लागि हृदयहरू खोल्न सक्ने शक्ति हुन्छ र यसले हामी सबैलाई हाम्रो सम्पूर्ण आत्मा ख्रीष्टलाई अर्पण गर्न अनुमति दिन्छ । यसले हाम्रो हृदयलाई उहाँ जस्तै बन्न परिवर्तन गर्छ र यस प्रक्रियामा, हामी अरूलाई उचाल्छौँ । अध्यक्ष नेल्सनले एक पटक सोध्नुभएको थियो, “आध्यात्मिक क्षयले ग्रस्त यस संसारमा, के व्यक्तिहरूले … भिन्नता ल्याउन सक्छन् ?” उहाँको जवाफ छ, “सक्छन् ! … ‘परमप्रभुका करारबद्ध मानिसहरू, … ठूलो महिमामा परमेश्वरको शक्तिले … सुसज्जित’ … हरूले सबै मानवजातिको जीवनलाई उठाउन सक्छन् ।” सेवाका माध्यमद्वारा हामी हृदय—र संसार परिवर्तन गर्छौँ ।

ख्रीष्ट “असल कार्य गर्दै हिँड्नुभयो ।” उहाँले बिरामीहरूको सेवा गर्नुभयो, अन्धाहरूलाई दृष्टि दिनुभयो, उत्पीडितहरूलाई भेट्नुभयो । उहाँले खाना पकाउनुभयो, विवाह भोजमा सहयोग गर्नुभयो र भोकाएका हजारौँहरूलाई खुवाउनुभयो । ख्रीष्टको नाममा ती एक जनाको सेवा गर्दा, हामी अत्यन्त पवित्र र अनन्त जीवनको वरदानको योग्य हुन्छौँ । येशू ख्रीष्ट जीवित हुनुहुन्छ । उहाँ मेरा र तपाईंका मुक्तिदाता हुनुहुन्छ । उहाँ हाम्रो उद्धारकर्ता हुनुहुन्छ । उहाँ सेवाको हाम्रो महान उदाहरण हुनुहुन्छ । म हामी सबैलाई गएर त्यसै गर्न आमन्त्रण गर्छु । येशू ख्रीष्टको नाममा, आमीन ।