Jesus Christ BiBąąhági’ Át’éii Yik’é Niná’ílyágo Ayóó’ó’ó’ní

Ts’ídá doo yá’ádaat’ééh da bąąhági baa nisíníyáígíí dóó bee’í’iinilaago ei dooda nee’iiná ałtso łahgóó ádíilííł íinízingo dóó nihá yóó’iidoo’ááł doo baa yááti’í baa nihił dahózhǫ́ǫ dooleełígíí, t’áá shǫǫdí díí álílee ayóó átʼé ááníiłii niba’ hashch’e’ ahoot’éé doo. Yisdá’iiníiłii, “Shaa hookááh.” nihiká nihił ní.

Yisdá’iiníiłii, Jesus Christ binahjį’ nihee’oodlą’ bidziil ánóóhsingo, niyi’di bee ha’diníít’éhígíí yididoołnááłgo béé hódoohsįįł, Bi yinoohdlą́ą́go, dóó nihijéí Bich’į’ baa ádadinohtʼááł. Enos bibąąhígi bá yóó’adoot’ą́nígíí yina’ádiłkid: “Bóhólníihii, haashą’ yit’éego ádaal’į́?” Bóhólníihii ádííniid, “Háálá Christ ts’ídá t’ah doo diits’į́hígíí dóó yiiłtséhígíí, yínídlánígíí biniinaa.”

Áádóó Moroni anáádoo’niid “tʼáá aaníí bąąhági átʼéii atsʼádahisidohtʼą́ągo, dóó niheʼadziilii, dóó nihintsékees, dóó tʼáá átʼé bee, nihiDiyin God ayóí íínóhʼníigo, áko éí bidiyingo joobaʼ nihikʼéstiʼ, áko bidiyingo joobaʼ binahjįʼ Christ biiʼ hadanołtʼéego ánihidiʼdoolnííł.”

Bąąhági ádaatʼéii bits’ą́ą́’jį’go yinááłgo, Diyin God bich’į’ nisiidzį’go, dóó Jesus Christ binahjį’ nee’oodlą’ bidziil íiníílzingo éí nizhǫ́nígo bee hahoolzhíísh. Nibishop ei dooda tsin bits’áóz’a nilą́ą́’jį’ sizį́ní ts’ídá doo yá’át’ééh da bąąhági bił hodíílni éí bił ólta’go aʼohgo ánítʼéego ni’íínízinígíí Diyin God baa di’díí’ááł, ndi ná yóó’iidii’aah hadeezbingo éí Yisdá’iiníiłii bits’ą́ą́dę́ę́’ at’ée doo. Nihá yóó’iidii’aah éí Jesus Christ bee aa aʼááh hasinii binahjį’ hodiyiní nihaa doolyééł.

Diyin God t’áá’aníí bich’į’ nídíídááł ninizį́į́’go, t’áá ni sínízį́nígíí, háíshį́į́ atídadzaa, dóó Diyin bibe’adziilii dah deiyíléehígíí éí t’áá ałtso doo hayooch’į́į́d da bił bee hadíídzih éí bił da’ólta’ łeh. NiTaa’ Yá’ąąshdi Hólóonii Bich’į’ nídíídááłgo yaa bił hózhǫ́ǫgo łeh ajéí neezgaígíí dóó hwiiʼ sizíinii tídáánáanii bił. Hwiiʼ sizíinii tídáánáanii nee hólǫ́ǫgo éí Diyiin aʼohgo ánítʼéego bíla’ bikáá’gi sinízį́į́ doo; ajéí neezgaígíí nee hólǫ́ǫgo éí Jesus Christ yá sizį́ní Paul ááh yiłní “Diyin God kʼehgo yínííł daniidlı̨́įgo,” at’éego díkwííshį́į́ bą́ą́h hodooleeł ndi ats’íís dóó ii’sizíinii bee Bich’į’ nídíídááł íiyisí laanaa hwinidzin.

Haat’ííshį́į́ ndahastǫ’ígíí nídíídlį́į́łgo bá laanaa ninízinígíí bik’ídíínááł. Ndi, ła’ t’áá doole’é ashch’éédadíídlį́į́łígíí éí doo ná bíighah da, dóó t’áá sodílzingo, Bóhólníihii daats’į́, bee ajooba binahjį’, haishį́į́ atídeinilaaígíí bits’ąą doo bił áhódahoodzaago anéídoołdziih.

Ła’ nááná diné bik’ijį’ ts’ídá doo yá’át’ééh da bąąhági é’élyaai bits’ąą doo hwił áhódahoot’éegóó bikʼeh didoodleełígíí éí ts’ída honeezgaigo ayóó nanitł’a łeh. Mosiah biye’ké yee áda’iilaaígíí éíshį́į bik’ehgo ndeikai, jó éí “yikʼee tiʼdahoozniiʼígíí anídadoodziihgo bich’į’ ha’ííniidlį́įgo” Diné ła’ aʼohgo nízinígíí doo yiní’į́į́ígíí daats’į́ bił bich’į’ yádííłti.

Díí hane’ na’nitiní áshłéehgo, be’iina’ łahgo ánéídlééhi yinídiilnishgo dóó Sodizin Bá Hooghan yich’į nídoodááł yiniizį́į́’ii doo ha’íiníshłį́į́góó diné ła’ béésh nisékeesí biyi’ saad ałch’į’ il’į́ shich’į’ áyiilaa. Be’asdzáá nt’ę́ę’ée éí [bee]iigeh hool’áágóó bits’ą́ą́’ neheschxǫ’go, [be’ałchíní yinoołsééłée honeeztł’a], béeso íl’į́ bee ak’idéest’į́į́’ée bits’ą́ą́’ ásdįįd, … t’áádoo lé’é bik’éh na’alyéhée [dooleełígíí] doo bíighah da silį́į́’go, [dóó] binahjį’ hazágí k’íídiinííh nahalingo íiyisí haa’díílááii t’ahndi bits’ąą ti’hoonííh.

Yee shił hoolne’ígíí éí biDiyin bee’adziil dah deiyilééhígíí hait’áoshį́į́ “bił hodeesnáá’go [na’bizhdídéełkid] [be’asdzáá nt’ę́ę’ée dóó be’áłchíní] yaa sididoozįįłii ha’at’íí nááná yá ídoolííłgo [na’bizhdídéełkid].” Bił t’áá áko shił níígo bibéésh nisékeesí biyi’ saad ałch’į’ il’į́ shich’į’ áyiilaaígíí ła’ nił hodeeshnih:

“Shí [áłtséhę́ędą́ą́’] naaltsoos bikʼehgo ałtsʼáʼdootʼashígíí hadilyaaígíí binahjį’ [béeso] shits’á nínilígíí tʼáá jííkʼe bee haahashnííł niizį́į́’ nt’ę́ę’ ndi shitsin bits’áoz’a alą́ą́jį’ siziní ashiłíigo diyin k’ehgo doo adeeshį́į́ł da dóó bá sodidíízįįł naakii dimǫ́ǫ adooleeł. …

“Áłtséhę́ędą́ą́’, bik’eh niná’dadooyééł ááha’nínígíí ch’ééh bik’idiishtįįh. Jó shibąąhígi béeso nanideehígíí doo bídéet’i’ da, ‘bik’eh niná’dadooyééł bił lą́ danilígíí’ t’áá aníígo ha’at’íí lá ááhiiłní niizį́į́ʼ. … [ndi] T’áá hodíína’go béeso doo baa hwinít’į́į́góó baa hwiinizį́į́’.

“Shi Diyin bee’adziil dah deiyilééhígíí [she’asdzáá nt’ę́ę’ée] dóó she’áłchíní yił áłah daséelį́į́’ dóó t’ahndi bich’į’ ndahwii’náago yaa ádahoniizį́į́ dóó t’ahdoo ndáádzíih da. …

Oodlą’ bee náásgóó yishááł dooleeł bee hadideeshwoł ániidgo niizį́į́’. … T’áá jíik’eh t’óó ákáá’anáshwo’go niizį́į́’go doo nanitł’agóó bee haasdzį́į́’. … Niizįį́’go [she’asdzáá nt’ę́ę’ée ła’ ákwííshį́į́ béeso bich’į’ anásh’įįh do] shich’į’ analyééhígíí, éí t’áá lą’í nt’ę́ę’. Ts’ídá áłtséhígíí béeso bich’į’ ádeeshłííłgo, Bóhólníihii [shinisékeesgi yee shidiisnáá’ éí] bich’į’ ádeeshłííł [naakii áhááh nániilyéego].

“Bik’eh niná’dadooyééłígíí éí doo t’áá béeso t’éíyá ááh ha’níí baa ákoniizį́į́’. Bóhólníihii she’iina’ baa deesh’ááłgo aʼohgo íinisingo éí óolyé. … Doo ahót’éegóó í’iishłaago bił dashighanígíí hat’ííshį́į́ bits’ą́ą́’ nídiinilyę́ę béeso éí bee ninádoo’nił bee adoolwoł. Bee hajoodzíí’ígíí dóó bik’eh ájooliiłii doo nat’ą́ą́’ t’áádoo le’é há chohodoo’įįł da dóó bik’éh nináda’ilyéhí doo yaa bíne’ da dooleełígíí bee bíkáá’adeeshwoł ákógo Ii’sizį́ Diyinii yik’ídínóotááł éí ááhdishní.”

Haat’ííshį́į́ ndahastǫ’ígíí nídíídlį́į́łgo bididíílnishígíí daats’í béeso doo bídéét’i’ da, ndi aʼohgo ánítʼéego Bóhólníihii bił nahodíinih, ła’ nááná t’áádoo le’é náádadíídliił daats’í bik’ínáádiníítaał.

Bóhólníihii Biyóó’iidii’aahii hanitáágo, t’áá at’é Bił lá niizį́į́’ii biba’ anit’íigo t’áádoo tsxį́į́ł níziní. Díí diyin k’ehjí na’asdzo’go baa nisíníkees:

Díí diyin k’ehjí na’asdzo’go baa nisíníkees: “Bí … tʼáá ałtsoní bee ádaa hojoolbáʼígo nitsáhákees a’oh daniizį́į́’; áádóó … Diyin God yich’į’ íiyisí dajíícha; aoo’, i’íí’ą́ą́jį’. … Doo ákwii ádajíít’įįdígíí yik’ee daachago bininaa Bóhólníihii t’áá hazhó’ógo jidiists’ą́ą́’.”

“T’áá akót’ée ndi, Bóhólníihii dadjichago jidiizts’ą́ą́’, … dóó hade’ ádaadzaayę́ę t’áá hazhó’ó bá nahjį’ akólyaa; … dóó áłts’ísígo náás ádeiskai.”

Bichʼįʼ hadaʼíínółní, ákogo Bóhólníihii t’áá nízáhígo binahjįʼ nihikʼihojidlíi doo dóó bił t’áá áko doo nihaa doolyééł.

Bóhólníihii bibee oolkiłígíí biyi’, binéé’ nihididoołnááłgo niłhodoolnih, Alma biye’ yidííniidígíí at’éego, “Díí ádaat’éegóó t’áádoo ni’diił’áhí doo.” Bóhólníihii t’áá hiináágo, haago shı̨́ı̨́, Yisdá’iiníiłii bich’į’ yínááłii, Nizhe’é NihiTaa’ Yá’ąąshdę́ę́ʼ “[nijei] biyi’dę́ę́ʼ bee ádihodidootʼihii nahjį’ kódoolnííł, Biye’ bibee ajooba’ígíí binahjį’.”

Háíshį́į́ doo tʼáá ákogi ááníiłgo ła’ nááná diné ts’ídá doo yá’ádaat’ééh da bąąhági nik’ijį’ ída’iilaaígíí bee atíindzaaígíí éí Yisdá’iiníiłii bee’ayóó’ó’ó’ni’ dóó bee’ajooba’í, bee’akʼi hataʼ dóó bee’achʼįʼ hózhǫ́ nihił hodeeshni binahjį’ laanaa niizı̨́ı̨́ʼ.

Doo nił ahóóts’íídígíí, nijéí nahastǫ’ígíí, doo beedahooziidígíí, naadíílá bits’ąą nizágí k’íídiinííh nahalingo ti’hwínííhígíí, nee iina’ nits’ą́ą́’ tsé’dego niits’idígíí nił áhódzaago —t’áá íiyisí béé hoozįįdgo nich’í hodiniish’aah, Yisdá’iiníiłii nééhósin dóó ayóó’ó’anóó’ní. Bich’į’ dahdidíílnih. Éí nikʼi hataʼ dóó ne’adziil áté, bi Diyin bá ndaal’a’í dego nídanidoodlííł nich’į’ yidooł’aał. Nił dadiniihígíí haago lá ádin doo, bikʼee yínííł bik’ididoodleełii, doo danízinígíí béédanilniih haago lá beediyoo’nah? Doo shił bééhoozįįd da. Ndi díí éí shił bééhózin: nits’ą́ą́’ doo béédahoozįįdígíí éí nich’į’ ninádoodlééł éí Bidziilgo yíneel’ą́ dóó łeeshchʼiih bikʼee tiʼdahosíniiʼígíí binahjį’ danizhǫ́nígíí nihił nááhádlǫ́ǫ doo.

Nihik’isóó dóó nihilaké Grand Blanc, Michigandi, bibee’oodlą’ Jesus Christ doo bił daniiltł’áádgóó, chánah ádaʼdóólzin dóó doo tʼáá shí tʼéí danízin dagóó, baa daasyá dóó baa dadoolyééł, díkwííshı̨́ı̨́ náádimǫ́ǫ́ dóó náánídooziłgo, Yisdá’iiníiłii bee’ayóó’ó’ó’ní doo ła’ nááná ahót’ée daígíí lą’ígo baa dadoolyééł.

Ba’íníidlı̨́ı̨́go bee náás yínááłgo, k’os bee chahałheeł dóó tł’ée biyi’di áháchį’ nichaígíí éí ha’íí’ą́ bee ádinídíín biyi’di ił hózhǫ́ dóó ił hodéezyéél dabinéeshto’ ndaazlı̨́ı̨́ do bee łahgóó ádoonííł. Baa yínííłyę́ę́ éí baa dahózhǫ́ doo. … Áádóó nił hózhǫ́nii doo [háida] nighadidoot’ááł da.” Éí adoonííłígíí béídiyoołkááł. T’áá aníí ádishní éí béídiyoołkááł.

Jesus Christ nihibąąhági át’éii bik’é niná’ílyáhígíí bee ayóó’ó’ó’ní éí íiyisí ndahontł’a gone’é bik’íjíghááh, ndi t’áá anííltso nihiYisdá’iiníiłii bee’ajooba’ daniidzin. Alą́ąjį’ Sizįní Russell M. Nelson na’neeztą́ą́’: “Bits’íís hólǫ́ǫgo yee nina’ídláhígíí biniinaa, nihí Yisda’iinííłii yineel’ą́ągo hwidoołheel, na’áłdziih, dóó hastiin dóó asdzaní nahwiis’áágóó dabiidziil áyósin, ndí hadabinitá dóó shiká anilyééd dabiłninígíí t’éiyá nisin. Hastiin bik’ihodiinii’ígíí James na’neeztą́ą́’, ‘Bóhólníihii binááł aʼohgo ádaa nitsídaahkees, áko ayóó átʼéii danohłı̨́įgo ánihidoolííł’ (James 4:10). Bí yiniidlą́ągo dóó Nihikáá’ adoolwoł biniyé sodiilzin doo bininaa nihik’ijidoodlįįł nihee hólǫ́ǫ do.”

Baa hózhóní dóó emeritus Naat’áanii Adahwiis’áágóó Na’nitinígíí, Elder Robert E. Wells bił t’áá áko shidííniidii, k’ad náhást’éídiin dóó bí’aan tsosts’id binááhai, hastą́ą́diin nááhaiyę́ę́dą́ą́’ binááł ahóót’įįdígíí baa hodeeshni:

T’ááłá’í dimííl yázhí dóó bí’aan náhást’éí neeznádiin dóó bí’aan hastą́ą́diin nááhaiyę́ę́dą́ą́’ Paraguaydi bighango dóó kéyah dahsi’ą́ą́góó béeso bá hoghandi naalnishgo, Robert Wells, tádiin dóó bí’aan naakii binááhaigo, dóó bee asdzáá, Meryl, t’áá áłah na’at’a’i nilį́į́go naakii chidí naat’a’í ał’ąągo, Uruguaydę́ę́’ Paraguaydi bighangóó náát’ash nt’ę́ę́’. K’os ditą́ą́go hak’i yildohgo, Robert dóó Meryl yoot’í bee ééhóziní dóó niłchi bee ałch’į’ hane’ę́ę́ bits’ą́ą́’ nahjį’ akódzaa. Robert tsxį́į́łgo bił neezdáh, áadi bee asdzáá bichidí naat’a’í hwił náhidéelts’idgo yaa’áhoniizı̨́ı̨́’. Bee asdzáá dóó nááná bik’is naakiigo t’áádoo yisdádaaskai da. Bee áłchíní, Asunción hooghandi, éí tsosts’id, ashdla’, dóó naakii béédááhai.

Elder Wells yik’ee jíchaígíí yaa haadzį́į́’:

Bik’ee shił honííłgaiígíí baa hodeeshnihgo éí hool’áágóó ła’ saad doo bíhónéedzą́ da doo, shini’ yi’ííłdįįh dóó bee hinishniihyéé doo yinishniih da silį́į́’. Tʼáá íiyisí yínííł binéeshto’ yiinahgo t’óó doo niiltłáád da. Yéego doo ahót’éegóó áhoonííłgo, she’asdzáá t’áá aníí ádin silį́į́’ígíí shiniséhékees bee baa nídéeshtʼįįł, hwił náhidéelts’idígíí ntsaago bee ak’íhodiisht’i’shi’iildoh.

Chídí naat’á’í t’áá at’é náádínóól’įįłii dóó be’asdzáá chídí naat’a’í bee nda’agizí lą’ígo t’áádoo na’bineezt’ą́ą́’ da biniinaa Robert ak’íhodiit’ą́. Doo yaa ahólyą́ą́góó bee ák’íhodiit’ą́ hodiiłnáá’.

Robert ádíiniid:

“Shinisékees chahóółhéél. … T’óó honishłǫ́ nt’ę́ę́’—[shee’áłchíní biniyé ásht’į́į́go,] doo ła’ nááná bee ánísht’ée da.”

“Shí … éí doo náás déíyáá da niizı̨́ı̨́’.”

Abíyííłką́ą́di, Robert íiyisí ii’sizí k’ehjí bich’í’ ííshją́ą́ ályaago bee bik’ihodeesdlı̨́ı̨́’. Yaa hoolne’:

“Ła i’íí’ą́ą́dą́ą́’, t’ááłá’í nááná haigo, nisídiníshgo’ sodisingo, álílee k’ehgo áhoodzaa. ShiTaa’ Yá’ąąshdi Hólóonii bich’į’ sodiszingo dóó ná’ooshkąąhgo, Yisdá’iiníiłii shííghahgi yiizį’ baa ákoniizı̨́ı̨́’ dóó Diyin God biinééʼ disetsʼą́ąʼ díí saad shits’íís dóó shii’sizíinii, dóó shijaa’ yee shich’į’ hadzı̨́ı̨́’: ‘Robert, bąąhági át’éii bik’éh nináníshdláhígíí nibąąhági dóó doo ahót’éegóó áda’iilaayę́ę bik’eh nináníshdlá. Nee’asdzáá yóóʼadííʼą́. Nikʼisóó danilíinii yóóʼadadííʼą́. Ade’ ánósinígíí yaa anídeeshdlííł. …’

“Kodóó, bee shik’íhodiit’ą́ shide’ át’eígíí [dóó yínííł] éí shits’ą́ą́jo yaa ádzaa bik’ee déésyiz. Yisdásííłtį́h! Yisdá’iiníiłii Bibąąhági’ Át’éii Yik’é Niná’ílyáhígíí bee adziil ak’edidlį́įnii t’áá ahodíína’í bik’idiitáh dóó … éídígíí shídéét’i’ silį́į́’. … Shí … ádinídíín dóó ił hózhǫ́ t’ahdoo ákót’éígíí baa ákonisingóó baa ákonizį́į́’. … Aa’ilyéi t’áádoo iiséłbą́ą́ ndi shaa daat’ą́—Bóhóníihii bee’ajooba’í aa’ilyéi … T’áádoo bik’eh sheilyáá da— t’áá doole’é t’áádoo i’iishłaa da bik’eh shich’į’ ni’azláá, ndi t’áá jíík’eh Bí sheilyá.”

Ak’isóó dóó alahké, t’áá aníiltso laanaa nisingo “Diyin God bidiyingo joobaʼ bee Christ biiʼ doo nihąąh chingóó ánihidiʼdoolnííł, Christ bidił deeznaʼą́ą biníkááʼ góneʼ, … áko, hodóóhsin [dooleeł], doo nihąąh chingóó.”

Yisdá’iiníiłii dóó Niná’nídláii bi’ayóó’ó’ó’ní, bi’aʼááh hasin, dóó bee’ajooba’í éí t’áá aníí ádishníigo hólǫ́. Bí éí hiná. Nihí éí Bí niidlı̨́; bee ahadeest’áanii bee áłchíní niidlı̨́. Ákogo Bí yiniidlą́ągo, Bikéé’ yidááłgo, dóó Ba’íiniidlı̨́įgo, Bí éí bik’ee yinííł dóó nihibąąhí bits’ą́ą́’jį’go dego ánihi’doolííł. Áko íinda, díí ats’íís k’ehjí iiná bilááhgóó, NihiTaa’ Nihizhe’é bighan gone’é, hool’áágóó doo honít’i’ii bił kééhwiit’íí do. Jesus Christ bízhi’ binahjį’, amen.