Ti Pangsubbot nga Ayat ni Jesucristo

No nakaaramidkayo iti nadagsen a basbasol ken addakayo iti proseso wenno agtarigagaykayo a naan-anay nga agbabawi ken mariknayo ti di mailadawan a rag-o ti pammakawan, ammoyo koma nga agur-uray kadakayo daytoy a milagro. Agtultuloy nga umawag ti Mangisalakan, “Umayka kaniak.”

Ti panangpapigsa iti pammatiyo iti Mangisalakantayo, ni Jesucristo, ket mangpabileg iti tarigagay ti kararuayo a mangam-ammo Kenkuana, mamati Kenkuana, ken mangted iti pusoyo Kenkuana. Dinamag ni Enos maipapan iti pannakapakawanna, “Apo, kasano a naaramid?” Insungbat ti Apo, “Gapu iti pammatim ken ni Cristo, a dimo pay nangngegan ken nakita.”

Innayon ni Moroni, “Ket no tallikudanyo ti amin a saan a nadiosan, ket ayatenyo ti Dios iti isu amin a kabaelan, panunot ken pigsayo, agpaay kadakayo ti paraburna, ket babaen ti paraburna agbalinkayo a naan-anay ken ni Cristo.”

Ti panangtallikud iti basol, yaasideg iti Dios, ken panangpapigsayo iti pammatiyo ken ni Jesucristo ket napintas a pangrugian. Ti napakumbaba a panangipasakup iti pagayatanyo iti Dios iramanna ti panangbigbig iti nadagsen a basol iti bishop wenno branch president-yo, ngem ti naan-anay a pannakapakawanyo ket aggapu iti Mangisalakan. Ti pammakawan ket nadiosan a sagut a maidiaya babaen ti parabur ni Jesucristo.

Ti tarigagay nga agsubli a pudno iti Dios ket nabuyogan iti determinasion nga agbalin a naan-anay a napudno iti Nailangitan nga Amam, iti bagim, kadagiti nadangran, ken iti lidermo iti priesthood. Agrag-o ti Nailangitan nga Amam iti pangngeddengmo nga umasideg Kenkuana addaan nasneban a puso ken sibababawi nga espiritu. Ti kaadda ti sibababawi nga espiritu ket napakumbaba a panagtalekmo ti Dios; ti nasneban a puso kas inladawan ni Apostol Pablo kas “nadiosan a ladingit,” nalaus a panagtarigagay ti kararua nga agsubli Kenkuana aniaman ti pategna.

Ti panagtarigagaymo iturongnaka a manggusto a mangatur iti nadadaelmo. Ngem adda dagiti banag a dimo kabaelan nga aturen, ket napasnek nga agkararagka iti Apo, babaen ti paraburna, tulongannaka a mangagas kadagiti nadangran kas bunga dagiti aramidmo.

Masansan a nasakit ken narigat a parmeken dagiti epekto ti nadagsen a basol iti dadduma. Sursurotem kadi ti ulidan dagiti annak ni Mosiah, a “mangikarkarigatan a mangpalunit iti amin a sugat a naaramidda”? Kasaritam dagiti raemem maipapan iti mabalin a dimo makitkita.

Idi isagsaganak daytoy a sarita, nakaawatak iti email ti maysa a tao nga adda iti proseso ti panagbabawi ken agtarigagay nga agsubli iti Simbaan. Agsagsagaba pay laeng ti sigud nga asawana iti pannakapukaw “ti agnanayon a kallaysa[da], [rigat kadagiti annak], pannakapukaw ti pinansial a seguridad, … di makaanay a kuarta a pagbayad iti gastos, [ken] ti nalaus a sakit ti nakem gapu iti pannakaliput.”

Imbinglayna kaniak no kasano a naawis ti rikna ti priesthood leader-na “tapno [kiddawen kenkuana] a sikakararag nga usigenna no [ania pay ti maaramidna para iti sigud nga asawa ken annakna].” Babaen ti pammalubos, ibinglayko ti maysa a paset ti email-na:

“[Idi damo] impagarupko nga ad-adu pay ngem iti kawadwadan ti [kuarta] a naibilin kaniak iti divorce decree, ngem inallukoynak ti branch president-ko nga agayuno ken ikararagak daytoy iti dua a lawas. …

“Idi damo, nagkarigatanak iti ideya maipapan iti pannakaisubli. Gapu ta di met pinansial dagiti basolko, napanunotko no ania a talaga ti kaipapanan ti ‘naparabur a panangisubli’… [ngem] naamirisko a di laeng maipapan iti kuarta daytoy.

“Nakipagkita dagiti priesthood leader-ko iti [sigud nga asawak] ken dagiti annakko ket naamirisda a marigatanda pay laeng ken saanda pay a naimbagan. …

“Ti baro a goal-ko ket agtultuloy iti pammati. … Impeksak laeng ti tarigagayko a tumulong nga awan ti namnamaek a subad. … Inkeddengko a [patulodan ti sigud nga asawak iti masinunuo a gatad] iti kada sueldo, a dakkel a porsion ti sueldok. Sakbay la unay ti panangtedko iti umuna a bayad, ti Apo [intukitna iti panunotko a kasapulak] ti agbayad iti [mamindua iti dayta a gatad].

“Naadalko a di laeng maipapan iti kuarta ti panangisubli. Maipapan daytoy iti napakumbaba a panangidaton iti biagko iti Apo. … Ti kuarta ket pangtulong a mangsukat iti innalak iti pamiliak gapu kadagiti biddut a pilik. Maipapan daytoy iti panangaramid ken panangtungpal kadagiti kari a di mangnamnama iti aniaman a subad ken panangtulong kenkuana a di madanagan maipapan iti bills tapno makapagkiddaw iti Espiritu.”

Mabalin nga awan ti pakainaigan iti kuarta dagiti panagreggetmo a mangisubli iti nadadaelmon, ngem no sipapakumbaba nga umararawka iti Apo, makitam nga ad-adu pay ti maaramidam.

No kalikagumam ti pammakawan ti Apo, aganuska bayat ti panagur-uraymo iti naan-anay nga anamongna. Ibilangmo daytoy a nasantuan a kasuratan:

“Ket … imbabada ti bagbagida uray pay iti tukot ti kinapakumbaba; ket … immawagda a sipapasnek iti Dios; wen, uray pay agmalmalem. … [Ngem] nabuntog a denggen ti Apo ti panagpakaasida gapu iti kinadangkesda.”

“Nupay kasta dinenggeg ti Apo dagiti awagda, ket rinugianna … a pinalag-an dagiti dadagsenda; … ket … nangrugida a rimmang-ay nga in-inut.”

Aganuska bayat ti panangted kenka ti Apo iti bendision ken anamongna iti in-inut.

Iti panawen ti Apo, mariknamto ti timekna a mangibagbaga kenka, “Saanmo ipalubos a riribukennaka pay dagitoy a banag.” Maysa nga aldaw, bayat ti panagtultuloymo nga umasideg iti Mangisalakan, ti Nailangitan nga Amam “ikkatenna ti basol manipud [iti pusom], babaen ti pannakaikari ti Anakna.”

Para kadakayo a di nainkalintegan a nadangran dagiti nadagsen a basol ti sabali, ibinglayko ti ayat ken kaasi ti Mangisalakan, ti liwliwa ken kappiana.

Ti ladingit a nariknam, ti liday, ti pannakapukaw, ti nalaus a sakit ti nakem ti pannakaliput, ti nariribuk a biagmo kas iti impagarupmo—itedko kenka ti naan-anay a pammatalgedko, am-ammonaka ti Mangisalakan ken ay-ayatennaka. Umasidegka Kenkuana. Isu ti liwliwa ken pigsam; ibaonnanto dagiti anghelna a mangbaklay kenka. Kaanonto a mapukaw ti saemmo, maparmek ti ladingitmo, malipatan dagiti di tarigagayan a lagip? Diak ammo. Ngem ammok daytoy: Adda bilegna a mangsupapak iti pukawmo ken mangyeg iti kinapintas manipud iti dapo ti panagsagabam.

Dagiti ay-ayatentayo a kakabsat a lallaki ken babbai ti Grand Blanc, Michigan, babaen ti natibker a pammatida ken ni Jesucristo, buyogen ti tured ken kinaawan panagimbubukodda, inawatda ken umawatdanto, kadagiti sumaruno a lawas ken bulan, iti nawadwad nga ayat ken parabur ti Mangisalakan.

Bayat ti panagtultuloyyo iti panagtalekyo Kenkuana, dagiti ulep ti sipnget ken ti naladingit a panagsangityo iti rabii ket agbalinto nga agdisso a lua ti rag-o ken talna iti lawag ti agsapa. “Agbalinto a rag-o ti leddaangmo. … Ket awan (asino) man a makaala iti rag-om.” Dumtengto dayta a kanito. Paneknekak a dumtengto daytoy.

Ti pangsubbot nga ayat ni Jesucristo ket masarakan iti karigatan a situasion, ngem agtultuloy a kasapulantayo ti pangsubbot a parabur ti Mangisalakantayo. Insuro ni Presidente Dallin H. Oaks: “Gapu iti pangsubbot a padasna iti mortalidad, kabaelan ti Mangisalakan ti mangliwliwa, mangagas, ken mangpapigsa iti amin a lallaki ken babbai iti amin a lugar, ngem patiek nga aramidenna laeng kadagiti agsapul Kenkuana ken agpatulong Kenkuana. Insuro ni Apostol Santiago, ‘Ipakumbabayo ti bagiyo iti imatang ti Apo, ket isu itan-oknakayto’ (Santiago 4:10). Maikaritayo iti dayta a bendision no mamatitayo Kenkuana ken ikararagan ti tulongna.”

Inawatko ti pammalubos ti ay-ayatek a gayyem ken emeritus a General Authority, ni Elder Robert E. Wells, agtawen itan iti 97, tapno ibinglay ti padasna iti nasurok a 60 a tawenen ti naglabas:

Bayat ti panagnaedna idiay Paraguay idi 1960 ken nagtrabaho kas international banker, ni Robert Wells, agtawen iti 32 idi, ken ti asawana, ni Meryl, pilotoda iti dua nga agduma nga eroplano, iti panagtayabda nga agawid iti Paraguay manipud Uruguay. Gapu ta nasabatda dagiti napuskol nga ulep, napukaw da Robert ken Meryl ti visual ken radio contact iti tunggal maysa. Napardas a nag-landing ni Robert, a sililiday a nakaammuanna a nadungpar ti eroplano ti asawana. Saan a nakalasat ti asawana wenno ti dua a gagayyemna a kaduana iti eroplano. Dagiti annakna, iti pagtaenganda idiay Asunción, ket agtawen iti pito, lima, ken dua.

Insarita ni Elder Wells ti ladingitna:

“Agnanayonto a di umdas dagiti balikas a mangyebkas iti saem a nangpunno iti kaunggak, a manglaplapunos iti riknak ken diakon kabaelan ti agpanunot a nalawag. Diakto agsardeng nga agsangit gapu iti napalaus a ladingitko. Ti mangpakaro pay iti kasasaad, bayat ti panangpampanunotko a mangsango iti ipapatay ti asawak, ket nasarakak ti bagik a mangpaspasar ti dakkel a basol gapu iti pannakariknak a siak ti responsable iti pannakadungpar.”

Pinabasol ni Robert ti bagina gapu ta dina naan-anay a na-inspect ti eroplano ken gapu ta dina inikkan ti asawana ti umdas nga instruksion iti ramit ti panagpatayab iti eroplano. Nariknana a nagbasol iti kinaliway.

Kinuna ni Robert:

“Naglidem ti panunotko. … Nagbiagak laeng [para iti pagimbagan dagiti ubbing,] ken awanen ti sabali pay.”

“Napukawko … ti tarigagayko nga agtultuloy.”

Idi agangay, nabendisionan ni Robert iti nauneg a naespirituan a padas. Insalaysayna:

“Maysa a sardam, makatawen kalpasanna, idi nakaparintumengak nga agkararag, adda milagro a napasamak. Bayat ti panagkararag ken panagpakaasik iti Nailangitan nga Amak, nariknak a kasla immay ti Mangisalakan iti sibayko ket nangngegko ti nalawag a timek a mangisasao iti kararuak ken lapayagko: ‘Robert, ti pangsubbot a sakripisiok ti nangbayad ti basol ken biddutmo. Pakawanennaka ti asawam. Pakawanendaka dagiti gagayyemmo. Itag-aykonto ti dagensenmo. …’

“Manipud dayta a kanito, nakaskasdaaw a naikkat kaniak ti dagsen ti basol [ken pannakaupay]. Naisalakanak! Dagus a naawatak ti mangliklikmut a bileg ti Pannubbot ti Mangisalakan ken … maaramat daytoy kaniak. … Nariknak … ti lawag ken rag-o a diak pay pulos napadasan idi. … Naited kaniak ti di maikari a sagut—ti sagut ti Apo a parabur. … Diak maikari iti daytoy—awan ti inaramidko a maikari iti daytoy, ngem nupay kasta intedna kaniak”

Kakabsat, “mapasanto koma ken ni Cristo ti tunggal maysa kadatayo babaen ti parabur ti Dios, gapu iti panagayus ti dara ni Cristo, … nga [agbalin] a nasantuan, nga awan mulitna.”

Paneknekak ti ayat, ti asi, ken parabur ti Mangisalakan ken Mannubbottayo. Sibibiag Isuna. Kukuanatayo; annaknatayo ti katulagan. No mamatitayo Kenkuana, sumurot Kenkuana, ken agtalek Kenkuana, itag-aynatayo iti ladladingit ken basbasoltayo. Sa, kalpasan daytoy mortal a biag, iti balay ti Amana, makipagnaedtayto Kenkuana iti agnanayon nga awan inggana. Iti nagan ni Jesucristo, amen.