Ti Waragawag ti Kaamaan—Dagiti Balikas manipud iti Dios

Daytoy sapasap a komperensia ti Oktubre 2025 ket mangitanda iti maika-30 nga anibersario ti pannakaipakaammo ti “Ti Kaamaan: Maysa a Waragawag iti Lubong.” Babaen ti nadiosan a plano, naparnuay daytoy a waragawag, agraman dagiti mangipalgak a balikasna, tapno “mangpatalinaed ken mangpapigsa iti kaamaan a kas kangrunaan a benneg ti kagimongan.”

Miembro ti tunggal maysa iti maysa a pamilia, inaka man, ama, anak a babai, anak a lalaki, apoko, lolo/lola, ikit, uliteg, kabsat, wenno kasinsin. Ti kapatgan, tunggal maysa kadatayo, kas dinakamat iti waragawag, “maipatpateg nga espiritu nga anak ti nailangitan a nagannak … nga [addaan] iti “nadiosan a kababalin ken pagtungpalan.”

Idi naawaganak iti nasantuan a kinaapostol idi 2015, nabalakadannak, “Bagim daytoy a waragawag itan. Ti naganmo [a mangitudtudo kadagiti balikas a ‘Korum dagiti Sangapulo-ket-dua nga Apostol’ iti paulo] ket adtoy mismo. Riknaen ken isuro daytoy a kasla kukuayo.”

Magustuak ti waragawag ti kaamaan. Pinaneknekak iti intero a lubong manipud Africa agingga iti Australia ken iti amin a lugar ti akem ti pamilia iti agnanayon a plano ti Dios. Addaan ti waragawag iti nadiosan a nagtaudan, isu a nasken a tratuentayo iti naraem a maikari a balikas manipud iti Dios.

Laglagipen, kakabsat, kas kinunak iti napalabas a sapasap a komperensia manipud ditoy a pulpito, “Napateg dagiti balikas.”

Itedko man kadakayo ti sumagmamano a background maipapan iti waragawag kas kangrunaan a mensahe ti patientayo.

Idi 1994, makatawen sakbay a naidatag ti waragawag, nagsasaritaan ti Korum dagiti Sangapulo-ket-dua nga Apostol no kasano nga umadayo ti kagimongan ken gobierno kadagiti linteg ti Dios para iti pamilia, kallaysa, ken sekso. “Ngem saan a dayta ti gibus ti nakitami,” inlawlawag ni Presidente Russell M. Nelson idi agangay. “Makitami ti regget ti agduduma a komunidad a mangikkat iti amin a pagalagadan ken limitasion iti seksual nga aktibidad. Nakitami ti pannakatikaw dagiti sekso. Nakitami a dumtengen ti amin.”

Inkeddeng ti Sangapulo-ket-dua nga isagana ti dokumento, opisial a waragawag, a manggupgupgop iti saad ti Simbaan iti pamilia. Bayat dayta a tawen, dagitoy nga Apostol, mammadto nga inawagan ti Dios, nangisaganada iti waragawag maipapan iti kaamaan. Nalagip ni Presidente Dallin H. Oaks a sikakararagda nga immasideg iti Apo para iti “no ania koma ti sawen[da] ken no kasano a sawen[da] daytoy.” Indatagda daytoy iti Umuna a Panguluen—kada Presidente Howard W. Hunter, Presidente Gordon B. Hinckley, ken PresidenteThomas S. Monson—para iti panangibilangda.

Kalpasan laeng ti sumagmamano a bulan idi Marso 1995, pimmusay ni Presidente Hunter ket nagbalin ni Presidente Hinckley a maika-15 a Presidente ti Simbaan. Adda itan iti imana ti waragawag. Kaano ti umno a panawen a mangaramid iti daytoy a waragawag iti Simbaan? Dimteng dayta a panawen innem a bulan kalpasanna.

Mano nga aldaw sakbay ti Septiembre 23 a sapasap a Relief Society nga immun-una ngem ti sapasap a komperensia, nakipagkita ni Presidente Hinckley ken dagiti mamagbagana iti pannakiuman iti Relief Society General Presidency. Dagiti sister, kas kadagiti Apostol, pampanunotenda dagiti pakaseknan maipapan kadagiti babbai ken pamilia. Nagpokusda iti umay a miting maipapan kadagiti pamilia.

Nayiskediul nga agsarita ni Presidente Hinckley kadagiti babbai iti panagtitipon. Inut-utobna ti turongen dagiti saritana. Idi dumakdakkel ti saritaan, imbasarna ti nagan iti kabarbaro a naparnuay ngem saan pay iti publiko a “Ti Kaamaan: Maysa a Waragawag iti Lubong.” Daytoy kadi a miting dagiti babbai ti husto a setting tapno maaramid ti naikeddeng a waragawag maipapan iti pamilia?

Inlawlawag idi agangay ti Presidente ti General Relief Society a ni Elaine Jack: “Dimi ammo no ania ti waragawag iti kaamaan iti dayta a pananwen. … Maibagami babaen ti paulo, ngem nariknami ti aniaman iti pamilia … ket maysa a positibo a banag. … Nariknak a nasayaat unay nga addaantayo kadagiti miembro ti Korum dagiti Sangapulo-ket-dua nga umaw-awat iti paltiing.”

Napnuan pakasaritaan ti miting ti Relief Society ti dayta a Sabado. Inyam-ammo ni Presidente Hinckley ti proklamasion ti pamilia babaen kadagitoy a napateg a balikas: “Buyogen ti nagadu a sopistria a maipasa kas kinapudno, nga addaan iti nagadu a panangallilaw maipanggep iti pagrukodan ken ik-ikkan pateg, nga addaan iti nagadu a pananguyot ken panangallukoy a mangala iti nabannayat a mulit ti lubong, nariknami nga ipakdaar ken nasakbay nga ipakdaar … dagiti pagrukodan, doktrina, ken aramid a mainaig iti pamilia a maulit-ulit nga imbaga dagiti propeta, mammadto, ken mammaltiing itoy a Simbaan iti unos ti pakasaritaanna.”

Kalpasanna, binasana ti intero a waragawag. Kas kinuna ti Apo, “Babaen man ti bukodko a timek wenno babaen ti timek dagiti katulongak, agpada.”

Kuna ti waragawag,“Inordenan ti Dios ti kaamaan.” Magustuak ti kinalawag dayta a palawag. Ti waragawag ket maysa nga awag nga agbiagtayo iti mortalidad, a kanayon a sipapanunot iti kinadios iti unegtayo, ken ti agnanayon a masakbayan nga adda iti sanguanantayo. Kinuna ni Presidente Nelson: “Literal nga espiritu nga annaknakayo ti Dios. … Saankayo nga agbiddut iti dayta: Nadiosan ti potensialyo. Babaen ti napasnek a panagsapulyo, ikkannakayto ti Dios kadagiti pakakitaan no asino ti pakapagbalinanyo.”

Idi naidatag, saan a naitunos ti waragawag iti pannrigan iti adu iti lubong. Saan idi. Saan ita. Adda dagiti mangala iti isyu iti waragawag maipapan iti pamilia, kallaysa, ken sekso. Isingasing ti dadduma a saanen nga ituloy ti Simbaan, irebisa, wenno ipakni ti waragawag.

Daytoy a waragawag iti kaamaan ket, kas kinuna ni Presidente Hinckley, doktrina, patpatgek a kakabsatko. Saan a maitunos dagiti prinsipio ngem naan-anay a maitunos kadagiti wagas ti Apo ken iti dana ti katulaganna. Dagiti pannursuro ti waragawag ket impalgak ni Apotayo a Jesucristo kadagiti Apostolna idi ken ita. Daytoy ti Simbaanna; Impasdekna dagiti kinapudno a pagbibiagantayo.

Mabalin nga utoben ti dadduma kadakayo ti waragawag ket kunayo, “Madi a mayobra daytoy kaniak.” “Kasla diak marikna.” “Saan a kasta ti kita ti pamiliak.” “Diak maibagay.”

Kadagiti addaan pakaseknan, ammoyo nga anakkayo dagiti nailangitan a nagannak, paset ti pamilia ti Amayo iti Langit. Awan ti ad-adda a makaam-ammo wenno maseknan kadakayo no di ketdi Isuna. Umasideg Kenkuana, ibukbok ti pusoyo Kenkuana, agtalek Kenkuana ken kadagiti karina. Adda pamiliayo iti Mangisalakanyo a ni Jesucristo, a mangipatpateg kadakayo. Immay ditoy daga a mangsubbot iti basbasoltayo ken mangibaklay iti dagensen dagiti bidduttayo ken dagiti dakes unay nga aldawtayo. Maawatanna ti sangsanguen ken marikriknayo. Umasideg Kenkuana, agtalek nga ibaonna ti Espiritu Santo a mangkadua, mangitag-ay, ken mangiwanwan kadakayo. Riknaenyo ti ayatda a “nangyagsep iti bagina kadagiti puso ti annak dagiti tao; … ti kangrunaan a matarigagayan iti amin a banag … ken ti kangrunaan a makaparag-o iti kaunggan.”

Amin dagiti Apostol ti Apo ket ay-ayatendakayo unay. Ikararagandakayo ken kalikagumanyo ti pannarabay ti Apo. Agtalinaedkayo kadakami. Agbibiagkayo kadagiti makakarit a panawen a mangikarkarigatan ti kabusor a tagikuaennakayo. Dikayo agpaguyod. Ket no naalanakayo, agsublikayo. Nakatanggaya dagiti takiagmi kadakayo a kas met laeng iti dadduma a mamgipatpateg kadakayo.

Kuna ti waragawag, “Addaan dagiti nagannak ti sagrado a pagrebbengan a mangpatanor kadagiti annakda iti ayat ken kinalinteg.” Mangted ti Libro ni Mormon iti maikadua a saksi iti daytoy a kinapudno. Iti umuna a bersikulo ti umuna a kapitulo, mabasatayo, “Siak, ni Nephi, a nayanak kadagiti naimbag a nagannak.” Mano kadatayo ti nangirugi iti Libro ni Mormon—ken nangirugi manen ken manen—ket iti proseso inkumittayo dagita a balikas iti memoria? Ikumit ida iti puso.

Maysa kadagiti paboritok a binatog iti waragawag ket daytoy:“Magun-od ti ragsak iti biag iti kaamaan no nabangon daytoy kadagiti pannursuro … ni Apo Jesucristo.”

Asino ti di agtarigagay nga agragsak?

Ket ania dagiti pannursuro ni Jesucristo? Manen, iti waragawag: “Pammati, kararag, panagbabawi, pammakawan, respeto, ayat, panangngaasi, aramid, ken dagiti makaay-ayo nga aktibidad iti panagaliwaksay.”

Asino ti di nasaysayaat ti biagna babaen ti panangaramat kadagitoy a kangrunaan a prinsipio? Awan kadatayo ti makaaramid a perpekto; ngem masurottayo dagiti nainsiriban a balikas ni Presidente Hinckley, “Aramidenyo ti kasayaatan unay a kabaelanyo.”

Mabasatayo iti waragawag, “Dagiti amma ti mangidaulo … iti ayat ken kinalinteg,” ken “dagiti inna ti kangrunaan nga agrebbeng a mangpatanor kadagiti annakda.” Ti mangidaulo dina kayat a sawen a mangdomina, ken ti mangpatanor dina kayat a sawen ti maikadua nga akem. Inted ti Dios dagiti lallaki ken babbai nga agduma ngem agpada ken dagiti napateg nga akem a mamagkadua iti tunggal maysa.

Mangibinglayak man iti bukod nga estoria.

Naadalmi iti asawak nga agtrabaho a nasaysayaat iti panagbalin nga agpada nga agkadua kalpasan ti maysa nga aldaw idi inkeddengko nga aramiden ti napateg a desision a diak imbaga kenkuana. Ti tignayko ti namangsiddaaw kenkuana, ken nangisagmak kenkuana iti narigat unay a kasasaad. Kalpasanna, inkabilna ti imana iti abagak ket kinunana, “Ron, pangngaasim, dimo pulos aramiden dayta kaniak manen.” Nagbalin nga agkatunosankamin manipud idin.

Makitami iti waragawag iti kaamaan:“Pagrebbengan dagiti amma ken inna nga agtinnulong iti tunggal maysa a kas agkadua nga agpada.”

Ti agpada ket balikas a napateg. Iti panaglabas dagiti tawen, bayat ti panagtinnulongmi ken Sister Rasband iti panangiladawan iti waragawag kas “sagrado a pagrebbenganmi,” sinukogmi ti agpada a naisangol a kallaysa. Itan ta nagasawan ti tunggal maysa kadagiti annakmi, binalakadanmi ken Sister Rasband ida ken dagiti assawada no kasano ti agbalin nga agkadua nga agpada.

No agbiagtayo a nakatalimudoktayo iti dayag ti Dios, agpipinnadayaw ken agsisinnuportatayo. Dagita a nadiosan a pagtuladan ti kinalinteg ket mangiturong iti kinatalged iti biagtayo, kadagiti pamiliatayo, ken iti kagimongan.

Inted ti Amatayo idiay Langit ti waragawag iti kaamaan a tumulong a mangiturong kadatayo nga agawid Kenkuana, tapno matulongannatayo nga agsursuro ken mapno iti ayat, pigsa, panggep, ken agnanayon a pannakaawat. Iti amin a kararuak idawatko nga agbiagkayo nga asideg Kenkuana ken iti Ay-ayatenna nga Anak. Ikarik a no aramidenyo, paregtaen ken tarabayennakayto ken tulongannakayto ti Espiritu a makarikna iti pusoyo ti naikari a talnada a “mangrimbaw iti amin a pannakaawat.” Iti nagan ni Jesucristo, amen.