Aramidenyo ti Pagrebbenganyo iti Amin a Pusoyo
Agtalek iti Mangisalakan ken makiraman, siaanus ken sipapasnek, a mangaramid iti pagrebbenganyo iti amin a pusoyo.
Itay napan a tawen bayat ti panagbiahek iti Europa, binisitak ti daan a lugar a nagtrabahuak, ti Lufthansa German Airlines iti Frankfurt Airport.
Tapno masanay dagiti pilotoda, mangpatpatarayda iti mano a sopistikado a full-motion flight simulator a makaparnuay manen iti dandani aniaman a normal ken emerhensia a kasasaad ti panagtayab. Bayat ti adu a tawenko kas kapitan ti eroplano, masapul a makapasaak iti check flight iti flight simulator iti tunggal innem a bulan tapno agtalinaed nga agdama ti lisensiak kas piloto. Malagipko unay dagidiay nakaro a kanito ti stress ken panagdanag ken kasta met ti rikna ti nagapuanan kalpasan a nakapasa iti eksamen. Ubingak pay idi ken pagay-ayatko ti karit.
Bayat ti isasarungkarko, dinamag ti maysa kadagiti ehekutibo ti Lufthansa no kayatko a padasen manen dayta ken ipatayabko ti 747 simulator iti maminsan pay.
Sakbay a naaddaanak iti tiempo a naan-anay a mangproseso iti saludsod, nangngegko ti timek—a nakaskasdaaw ti uni a kasla bukodko—a kunkunana, “Wen, kayatko unay dayta.”
Apaman a naisaok dagiti balikas, naglayus iti aglaplapusanan a kapanunotan iti panunotko. Nabayagen manipud pay idi pinatayabko ti 747. Idi agtutuboak ken matalek a kapitan. Itan adda reputasionko nga itakderak kas sigud a chief pilot. Ibabainko kadi ti bagik iti sanguanan dagitoy a propesional?
Ngem naladawen nga umatras, isu a nagtugawak iti tugaw ti kapitan, inkabilko dagiti imak kadagiti pamiliar ken napateg a kontrol, ket nariknak manen, ti ragsak ti panagtayab idi nagdaranudor ti dakkel a jet a bimmaba iti runway ket nagtayab iti simulated wild blue iti tangatang.
Naragsakak a mangisao a naballigian ti panagtayab, nagtalinaed a nasayaat ti eroplano, ken kasta met ti bukodko nga imahe.
Nupay kasta, ti padas ti namagpakumbaba kaniak. Idi addaak iti kinalaingko, nagbalin ti panagtayab a dumani maikadua a nakaugaliak. Ita kasapulan ti amin a pamaysak a mangaramid iti bambanag a nalaka.
Kasapulan ti Kinadisipulo ti Disiplina
Napateg a palagip ti padasko iti flight simulator iti panagbalin a nalaing iti aniaman—panagtayab, panaggaud, panagdait, panaggaraw, wenno panangammo man—kasapulan ti agtultuloy a disiplina iti bagi ken praktis.
Mabalin a bubosenyo ti adu a tawen a manggun-od iti paglaingan wenno mangpadur-as iti talento. Mabalin nga itrabahoyo a napasnek tapno agbalin a maikadua a kaugalianyo. Ngem no panunotenyo a kaipapanan dayta a maisardengyo ti agpraktis ken agadal, in-inut a mapukawyo ti ammo ken kabaelan a nagun-odyo idi.
Maaramat daytoy kadagiti paglaingan kas iti panagsursuro iti pagsasao, panagtokar iti instrumento ti musika, ken panagpatayab iti eroplano. Kasta met a maaramat daytoy iti panagbalin a disipulo ni Cristo.
Iti simple a pannao, ti panagbalin a disipulo agkasapulan iti disiplina ti bagi.
Saan a gagangay nga aramid, ken saan nga aksidente a mapasamak.
Maysa a sagut ti pammati ken ni Jesucristo, ngem ti yaawat iti daytoy ket napuot a pili nga agkasapulan iti panagkumit iti amin a “kabaelan, panunot ken pigsatayo.” Daytoy ti inaldaw a panagsanay. Tunggal oras. Kasapulan ti kanayon a panagsursuro ken determinado a panagkumit. Ti pammatitayo, ti loyalidadtayo iti Mangisalakan, pumigpigsa no masubok daytoy maibusor iti oposision a sanguentayo ditoy a biag. Naandur daytoy gapu ta itultuloytayo a taraonan, itultuloytayo nga aramaten daytoy, ken ditayo sumuko.
Iti sabali a bangir, no maliwayantayo a mangusar iti pammati ken makaawis a bilegna, ditayo masigurado dagiti banag nga imbilangtayo idi a sagrado—awan ti panagtalektayo kadagiti banag nga ammotayo idi a pudno.
Dagiti sulisog a naminsan a di pulos nakaallukoy kadatayo mangrugidan a kasla di nakaam-amak ken ad-adda a makaawis.
Ti apuy ti pammaneknek idi kalman ket makapabara kadatayo iti kasta laeng a kabayag. Kasapulan ti kanayon a taraon tapno agtultuloy a sumsumged a naraniag.
Iti Baro a Tulag, insuro ti Mangisalakan ti pangngarig maipapan iti maysa nga apo a nangted iti sagrado a talek iti tunggal maysa kadagiti adipenna—dagup ti kuarta a maawagan iti talento. Pinaadu ida dagiti adipen a sipapasnek a nangusar kadagiti talentoda. Napukaw daytoy ti adipen a nangikali iti talentona idi agangay.
Ti leksion? Ikkannatayo ti Dios iti sagsagut—ti pannakaammo, abilidad, gundaway—ket kayatna nga usaren ken padur-asentayo dagitoy a mangparabur kadatayo ken ti dadduma nga annakna. Di mapasamak dayta no idulintayo dagita a sagut iti ngato ti estante kas iti tropeo a dayawentayo sagpaminsan. Dumakkel ken umadu laeng dagiti saguttayo no usarentayo dagitoy.
Nalaingkayo
“Ngem Elder Uchtdorf,” mabalin a kunayo, “Awan sagutko wenno talentok—no adda man, awan ti kasta ti kapategna.” Nalabit makitayo dagiti dadduma a madlaw ken makaawis rikna dagiti sagutda ken mariknayo nga ordinariokayo no maidilig. Mabalin nga ipagarupyo nga iti biag sakbay ti ipapatay, iti aldaw ti padaya ti naindaklan a sagut ken talento, kasla nakaay-ay-ay ti kinabassit ti platoyo—nangnangruna no idilig kadagiti napunno ken agliplippias a plato ti dadduma.
Oy, tarigagayak a maarakup ken matulongankayo koma a makaawat iti daytoy a naindaklan a kinapudno: Naparaburankayo a parsua ti lawag, ti espiritu nga anak ti awan inggana a Dios! Ket adda iti unegyo iti potensial a nalablabes ngem iti kabaelanyo a panunoten.
Kas napaliiw dagiti mannaniw, umayka ditoy daga nga “agturturong iti ulep ti dayag”!
Nadiosan ti estoria ti nagtaudam, ken kasta met ti pagtungpalam. Pinanawam ti langit tapno ditoy umayka, ngem ti langit dinaka pulos pinanawan!
Asinokayo man ngem ordinario.
Nalaingkayo!
Iti Doktrina ken Katulagan, impakdaar ti Dios:
“Adu ti sagut, ket ikkan ti Espiritu ti Dios ti tunggal tao iti sagut.
“Maikkan ti sumagmamano iti saggaysa, ket ti dadduma maikkan iti sabali, tapno mairanud ti amin iti kastoy a wagas.”
Nailista iti nasantuan a kasuratan ti sumagmamano kadagiti saguttayo. Adu ti saan a nailista.
Kas kinuna ti propeta Moroni,“Saanyo a tallikudan dagiti sagut ti Dios, gapu ta adu dagitoy; ket aggapuda iti isu met la a Dios.” Mabalin nga iparangarangda ti bagbagida iti “nadumaduma a wagas … ; ngem isu met laeng a Dios ti agtartrabaho iti amin.”
Mabalin a pudno a di kanayon a naraniag dagiti naespirituan a saguttayo, ngem dina kayat a sawen a dida napateg. Maibinglayko man kadakayo ti sumagmamano a naespirituan a sagut a nakitak kadagiti miembro iti intero a lubong? Utobenyo no naparaburankayo man iti maysa wenno ad-adu pay a sagut a kas iti:
-
Panangipakita iti kaasi.
-
Panangkita kadagiti tao a maliwayan.
-
Panangsapul kadagiti gapu nga agrag-o.
-
Panagbalin a mamagkappia.
-
Pannakadlaw iti babassit a milagro.
-
Panangted kadagiti napudno a pammadayaw.
-
Pannakapakawan.
-
Panagbabawi.
-
Panagibtur.
-
Panangilawlawag kadagiti banag a simple.
-
Pannakikonekta kadagiti ubbing.
-
Panangkanunong kadagiti lider ti Simbaan.
Mabalin a diyo makita dagitoy a sagut a naiparang iti ward talent show. Ngem sapay ta makitayo no kasano ti kapateg dagitoy iti aramid ti Apo ken no kasano a mabalin a sinagid, binendisionan, wenno naisalakanyo ti maysa kadagiti annak ti Dios babaen kadagiti sagutyo. Laglagipen: “Babaen dagiti babassit ken gagangay a banag agbalindanto a naindaklan a banag.”
Aramidenyo ti Bassit a Pasetyo
Patpatgek a kakabsatko, gagayyem, ikararagko a tulongannakayo ti Espiritu a mangbigbig kadagiti sagut ken talento nga inted ti Dios. Kalpasanna, kas kadagiti napudno nga adipen iti pangngarig ti Apo, paaduen ken padakkelentayo koma ida.
Dumtengto ti aldaw inton agtakdertayo iti sango ti naasi nga Amatayo idiay Langit tapno pagsungbatennatayo iti panagaywantayo. Kayatna a maammuan no ania ti inaramidtayo kadagiti sagut nga intedna kadatayo—nangnangruna, no kasano nga inusartayo ida a mangbendision iti annakna. Ammo ti Dios no asinotayo a pudno, no asinotayo a nadisenio a pagbalinan, ket ngarud nangato dagiti namnamaenna kadatayo.
Ngem dina namnamaen nga agaramidtayo iti naindaklan, nabannuaran, wenno nalablabes a panaglagto ti tao a mangdanon idiay. Iti lubong a pinarsuana, in-inut ken naanus a mapasamak ti panagdur-as—ngem kanayon pay ken di agsarday.
Laglagipenyo, ni Jesucristo ti nangaramiden iti paset a nalablabes ngem tao idi pinarmekna ti ipapatay ken basol.
Pagrebbengantayo a suroten ni Cristo. Pagrebbengantayo a tallikudan ti basol, umasideg iti Mangisalakan, ken magna iti dalanna, maysa nga addang iti maminsan. No aramidentayo daytoy, a sipapasnek ken sipupudno, inton agangay ibellengtayo dagiti kawar ti kinaimperpekto ken biddut ket in-inut nga agbalintayo a nasingsingpet, agingga iti dayta naan-anay nga aldaw nga agbalintayo a perpekto ken ni Jesucristo.
Magun-odtayo dagiti bendision. Naaramiden dagiti kari. Nakalukaten ti ridaw. Pilitayo ti sumrek ken mangrugi.
Mabalin a bassit ti pangrugian. Ngem OK dayta.
No sadino a nakapuy ti pammati, mangrugi iti namnama ken Cristo Jesus ken ti bilegna a mangdalus ken mangpatarnaw.
Kiddawen ni Amatayo nga umasidegtayo iti daytoy a karit ti pammati ken kinadisipulo saan a kas gagangay a turista ngem kas naimpusuan a mamatpati, a mangbaybay-a iti Babilonia ken mangiturong iti puso, panunot, ken addangda iti Zion.
Ammotayo a dinatayo mapagbalin a celestial dagiti kagumaantayo laeng. Ngem mapagbalindatayo a napudno ken naikumit ken ni Jesus a Cristo, ken Isu mapagbalinnatayo a celestial.
Gapu iti ay-ayatentayo a Mangisalakan, awan ti makunkuna a senario nga awan pagbanaganna. No mangnamnama ken mamatitayo Kenkuana, masigurado ti balligitayo. Ikarina kadatayo ti pannakagun-od iti pigsana, bilegna, ti nawadwad a paraburna. Iti tunggal addang, in-inut, umas-asidegtayo iti dayta naindaklan ken naan-anay nga aldaw inton makipagnaedtayo Kenkuana ken dagiti ay-ayatentayo iti agnanayon a dayag.
Tapno makadanon sadiay, masapul nga aramidentayo ti pasettayo ita ken inaldaw. Agyamantayo kadagiti addang a pinagnatayo idi kalman, ngem ditayo agsardeng sadiay. Ket ammotayo nga adayo pay ti pagnaantayo, ngem ditayo ipalubos a dayta ti mangpaupay kadatayo.
Daytoy ti kaipapanan ti no asinotayo—kas pasurot ni Cristo.
Gutugotek ken bendisionak ti tunggal miembro ti Simbaan ken amin nga agtarigagay a makipaset, nga agtalek iti Mangisalakan ken makipaset, a siaanus ken sireregta nga aramidenyo ti pagrebbenganyo iti amin a pusoyo—tapno naan-anay ti rag-oyo ken, iti maysa nga aldaw, awatenyo ti amin nga adda iti Ama. Paneknekak daytoy iti nagan ni Jesucristo, amen.