Tapno Mapatibker ti Amin

Kas miembro ti Ti Simbaan ni Jesucristo dagiti Santo iti Ud-udina nga Aldaw, a nabendisionan iti pannakikadua ti maysa a kameng ti Kinadios, mabalin a magun-odtayo ti tulong ti perpekto a Tutor. Ti Espiritu Santo ammona ti amin a banag, paneknekanna ti kinapudno, ken “ipalagipnanto dagiti amin nga imbagana [kadatayo].” Masansan a dakamaten ni Presidente Russell M. Nelson ti kinapateg ti panagdengngeg iti timek ti Apo. Insurona kadatayo no kasano nga awisen ti panangiwanwan ti Espiritu Santo ken maulit-ulit a kiniddawna kadatayo a paaduentayo ti naespirituan a kabaelantayo nga umawat iti paltiing.

Ita, awisenkayo ​​nga ibilangyo ti akem ti Espiritu Santo, nga espesipiko a mainaig iti panangadal ken panangisuro iti ebanghelio iti pagtaengan ken simbaan. Ti Espiritu Santo ket maited babaen ti kararag ti pammati ken bayat nga ikagkagumaantayo ti agbiag a maikari iti daytoy napateg a sagut. Ti naparegta a manual ti Simbaan a Panangisuro iti Wagas ti Mangisalakan ti mangibalabala kadagiti kanayonan a pagbatayan nga impasdek ti Apo a tumulong a mangawis iti impluensia ti Espiritu Santo.

Maysa kadagitoy a pagbatayan ti panangawis iti napasnek a panagsursuro. Iti napalabas, mabalin a napanunottayo ti panangisuro a kas gundaway iti nagannak wenno mannursuro a mangawis iti Espiritu iti panagsaganada ket kalpasanna ibinglayda ti nasursuroda kadagiti ubbing wenno kameng ti klase, a ti akemda ket dumngeg. Ngem ad-adda pay nga epektibo a no datayo, kas agad-adal, dumar-ay met a nakasagana ken dagiti mannursuro ti mangparnuay kadagiti padas iti panagsursuro a mangpataud iti personal a paltiing a direkta iti puso ken panunottayo. Ngarud, bayat a maikkantayo iti gundaway a mangibinglay iti masursurotayo babaen ti panagadaltayo ken manipud iti Espiritu Santo, matulongantayo ti maysa ken maysa tapno maisuro ken mapatibker. Bayat nga iyaplikartayo dagita a pagbatayan ti ebanghelio, paneknekan manen ti Espiritu ti kinapudnoda.

Kas iti amin a banag, ni Jesucristo ti perpekto a pagwadan. Inawisna ti tunggal maysa kadatayo nga agbalin a nagaget nga agad-adal ken mangimaton iti bukodtayo a pammaneknek. Inawisna dagiti disipulona nga agsagana nga agsursuro, a mangibinglay no ania ti masursuroda, ken agtignay iti pammati. Inkararaganna ida, nakitana ti nadiosan a potensialda, dimngeg kadakuada, ken tinulonganna ida a mangammo a maipatpateg ken kasapulan ida.

Kas mannursuro, ad-adda a makapagpokustayo iti idudur-as ti agad-adal, iti panangpennek kadagiti kasapulanda, ken panangtulong kadakuada a mangpatanor kadagiti naespirituan nga ugali iti tungpal biag a kinadisipulo. Kas dagiti agad-adal, no usarentayo ti kinawayatayo nga agpili iti proseso ti panagsursuro, ipakpakitatayo iti Espiritu Santo a situtuloktayo nga isurona.

Agyamanak iti maysa a mannursuro a nangawis kaniak nga agbalin a nasaysayaat nga agad-adal. Idi nangrugiak iti kolehio, di umiso ti panangipagarupko a masapul nga itultuloyko ti ageskuela tapno makapagay-ayamak iti isports. Maysa nga aldaw, kalpasan a nabasak ti paper-ko, imbaga kaniak ti propesorko nga addaanak iti abilidad nga analitikal a managpanunot. Diak pay ketdi ammo no ania ti kaipapanan dayta. Kinunana a no ad-adda a maipamaysak ti panagreggetko, agbalinak a nasayaat nga estudiante. Diak pulos napanunot dayta. Ti pannakaseknanna, pammaregtana, ken awisna ti nangbalbaliw iti turong ti panagadalko ken nangbendision unay iti biagko.

Ti sabali pay a pagbatayan a mainaig iti panangawis iti Espiritu Santo ket ti panangisuro iti pudno a doktrina. Kayatna a sawen a ti panagadal ken panangisurotayo iti ebanghelio ket nairamut iti sao ti Dios ken di tayo padakkelen wenno pattapattaen no ania ti di impalgak ti Apo. Imbes ketdi, agpokustayo kadagiti nasken ken agnanayon a pagbatayan ti ebanghelio, a mangipalubos iti Espiritu a mangpaneknek iti kinapudno. Manen, surotentayo ti pagwadan ti Mangisalakan. Kinunana, “Saanko a kukua ti doktrinak, no di ket kukua dayta nangibaon kaniak.”

Masarakan ti pudno a doktrina iti nasantuan a kasuratan ken pannursuro dagiti kabaruanan a propeta. Ti pammagbaga ti Apo nga adalentayo ti nasantuan a kasuratan kas indibidwal ken pamilia ken linawas a dumar-ay iti simbaan tapno agadal iti ebangheliona ti mangipaay iti napateg a balangkas tapno masursuro ti doktrinana ken mangngeg ti timekna. Sukisokentayo dagiti nasantuan a kasuratan tapno maawatantayo ti salaysay, dagiti pagbatayan nga isursuroda, ken ti pannakayaplikar dagitoy a kinapudno iti biagtayo. Anian a bendision ti kaadda dagiti nasantuan a kasuratan a nalaka a magun-odantayo. Panunotenyo da Adan ken Eva, Abinadi, wenno uray pay ti Naindaklan a Mannursuro a ni Jesucristo a bumisbisita iti pagtaengan wenno klasetayo a mangisuro kadatayo. Makaumayda no agpennektayo iti sao ti Dios. Babaen ti agtultuloy a panagregget, masursurotayo a maawatan ken ayaten dagiti nasantuan a kasuratan ken agtalektayo nga addaanda kadagiti sungbat kadagiti saludsod ti kararua.

Adda idi panawen sakbay a nagkasarkami ken ni baketko a ni, Kristi, a marigatan a makarikna iti ayat ti Nailangitan nga Ama ken mangawat iti planona para kenkuana. Bayat nga inkararagna ti panangiwanwan, nariknana a masapul a dumar-ay iti institute, isu a nag-enrol iti klase ti Baro a Tulag. Ti wagas ti panangisuro ti mannursurona manipud kadagiti nasantuan a kasuratan, uray pay ti wagas a panangiggemna kadagitoy, ti nangipakita no kasano ti panagayatna iti sao ti Dios. Bayat ti idadar-ayna, inyarasaas kenkuana ti Espiritu Santo nga adda maysa a banag iti nasantuan a kasuratan a kasapulanna. Ti panagayat ti mannursurona kadagiti nasantuan a kasuratan ken ti pannignay ti Espiritu Santo ti nangted iti tarigagayna a mangirugi iti napasnek a panagadalna iti sao ti Dios—a nagbalin a tungpal biag a panagdaliasat iti nauneg a kumbersion ken naikonsagraran a panagserbi.

Kamaudiananna, kas isingasing ti Panangisuro iti Wagas ti Mangisalakan ti panangisuro ken panagsursurotayo ket masapul a kanayon a nakapokus ken ni Jesucristo. Mabalintayo a masansan nga isarita ken agdaydayaw maipapan Kenkuana ken agsapul iti ad-adu a gundaway a pakayebkasan ti pammaneknek, panagyaman, ken ayattayo Kenkuana. Aniaman ti kasasaad, no la ketdi laglagipentayo Isuna, mabalin “nga agtaeng ti Espirituna [kadatayo].”

Maysa a wagas tapno ni Jesucristo ti sentro iti pannursurotayo ket ti panangipaganetget nga isu ti perpekto a pagwadan, ti pannakaiparangarang ken pannakaiyebkas dagiti amin a pagbatayan ti ebanghelio. Uray no saan a direkta a nadakamat Isuna iti maysa a salaysay iti nasantuan a kasuratan, mabalintayo latta nga ibaga nga Isuna ti pagwadan ti pagbatayan a maisursuro. Mabalintayo nga isaludsod, “adda kadi malagipmo a gundaway nga impakita ni Jesucristo daytoy a pagbatayan?”

Makapagpokustayo pay Kenkuana babaen ti panangadaltayo kadagiti titulo, akem, ken kababalinna, a mangsapsapul saan laeng a tapno maammuantayo no ania ti inaramidna no di ket tapno ad-adda pay a maawatantayo no siasino Isuna. Kas pagarigan, no adalen ti pagbatayan ti panagbabawi, napateg a maawatan no kasano ti agbabawi. Ngem nasken met a laglagipentayo ti inaramid ni Jesucristo tapno posible ti panagbabawi ken tapno maawatan no ania ti isuro kadatayo ti panagbabawi maipapan Kenkuana, maipapan iti pudno a kinataona ken kababalinna. Ania ti ibaga ti panagbabawitayo maipapan iti ayat, kinaanus, ken asina, ti pammatina iti nadiosan a potensialtayo, ti kinatulokna a mangsubbot iti basbasoltayo, ken ti rag-o a masarakanna iti panangpakawan? Ket ti pannakaawat kadagiti titulona—kas iti Kordero ti Dios, Mannubbot, ken Mangngagas—ti mangtulong kadatayo a makakita a ti panagbabawi ket ti awisna a mangdalus, mangbalbaliw, ken mangagas kadatayo. Ti panangipokus iti inaramidna para kadatayo ken no ania ti kinasiasinona ti makatulong kadatayo a maaddaan iti “pammati a mangiyeg ti panagbabawi.”

No dadduma, mabalin a ditay dagus makita dagiti kababalin ti Mangisalakan a nadakamat iti maysa a salaysay iti nasantuan a kasuratan. Kas pagarigan, no basaentayo ti panangibangon ni Nephi iti barko, mabalin a ni Nephi laeng ti pagpokusantayo. Ngem ti panangipokus iti Mangisalakan ti mangtulong kadatayo a mangkita a daytoy a rekord saan a napreserba tapno isurona kadatayo ti maipapan iti kinatan-ok ni Nephi no di ket tapno maipakita ti kinatan-ok ti Dios—nga isu ti mangted kadatayo iti pigsa a mangtungpal kadagiti bilinna ken mangtulong kadatayo iti panawen ti panagkasapulan.

Makapagpokustayo pay iti kangrunaan nga akem ni Jesucristo iti naan-anay a plano ti ragsak ti Nailangitan nga Ama. Mabalbaliwanna ti turong ti biagtayo tapno makitatayo dagiti kasasaadtayo babaen ti pannirigan ti agnanayon a plano ti Dios imbes a makitatayo ti plano babaen ti pannirigan dagiti temporal a kasasaadtayo. Ti ebanghelio ket saan a listaan ​​dagiti kalikagum; daytoy ti naimbag a damag a naparmek ni Jesucristo ti basol ken ipapatay Iti pananggun-od ti nakaskasdaaw a paraburna babaen ti panangtungpal kadagiti katulagantayo iti Dios a mabalintayo a siraragsak nga agbiag ita ken agsagana iti biag a kadua ti Amatayo iti Langit iti kinaagnanayon. Bayat a masursurotayo a makita ti Nailangitan nga Ama ken ti Mangisalakan kadagiti nasantuan a kasuratan, ad-adda a maam-ammotayo Ida ken makita ti ayat ken impluensiada nga ad-adda a masansan ken nabilbileg iti biagtayo.

Kanayonto a malaglagipko ti Espiritu a nariknak idi agtutuboak idi insuro ti mannursuromi ti maipapan kadagiti maudi nga aldaw ti biag ti Mangisalakan. Tinulongannakami a makita iti kaipapanan dagiti pasamak iti kuarto nga akinngato, Getsemani, Golgotha, ken ti awan nagyanna a tanem. Imbinglayna ti nauneg a panagyamanna iti Mangisalakan ken ti pudno a tarigagayna a mangsurot Kenkuana. Ti panangisurona ket awis para iti Espiritu Santo a mangpaneknek maipapan ken ni Jesucristo. Ket ti Espiritu a nariknak iti dayta a klase ti nangpauneg iti pammatik ken nangpadakkel iti panagayat ken panagyamanko iti Mangisalakan. Nagtalinaed kaniak ti impluensia dayta a mannursuro iti intero a panagbiagko. Kas nakuna ti sabali pay a mannursuro, “Mabalintayo a pabaraen dagiti imatayo babaen ti apuy ti pammatina.

Kadagiti pagtaengan ken miting ti Simbaantayo, no agpokustayo ken ni Jesucristo, isuro ti doktrinana, ken agadal a sireregta, awisentayo ti Espiritu Santo a mangpauneg iti pammatitayo ken ni Jesucristo ken tumulong kadatayo nga agbalin nga ad-adda a kas Kenkuana, nga isu ti panggep ti amin a panangisuro ken panagsursuro iti ebanghelio.

Agyamanak kadagiti mannursuro iti biagko, manipud kadagiti nasayaat a nagannak ken lokal a lider ken mannursuro agingga kadagiti lallaki ken babbai a naawagan a mangisuro ken agpaneknek manipud iti daytoy a pulpito, a tumulong kadatayo a mangammo ken mangsurot ken ni Jesucristo. Ket agyamanak iti Espiritu Santo, ti perpekto a Tutor. Babaen ti Espiritu Santo, ammok nga ay-ayatennatayo ti Nailangitan nga Ama ken addaan iti perperkto a plano para kadatayo, a ni Jesus ti Cristo, ti Mangisalakan ken Mannubbot ti lubong; ken naisubli ti Ebanghelio ken Simbaanna. Paneknekak a sirarag-o dagitoy a banag iti nagan ni Jesucristo, amen.