Ti Apo Kumita iti Puso
Ti laeng kasapulan ti Dios a mangipatungpal kadagiti panggepna ken matulongannatayo nga agbalin iti kayatna a pagbalinantayo ket ti naan-anay a panangiturongtayo iti puspusotayo Kenkuana.
Idi nabilin a mangpili iti baro nga ari ti Israel manipud kadagiti annak ni Jesse, ni propeta Samuel, idi kinitana ti inauna nga anak ni Jesse, ni Eliab, sigagagar nga impukkawna, “Sigurado nga adda iti sanguananna ti pinulotan ti Apo.” Ngem saan a ni Eliab ti pinili ti Apo nga adipen. Binallaagan ti Mangisalakan ni Samuel: “Dika kumita iti rupana, wenno ti katayagna; gapu ta pinagkedkedak: ta saan a makita ti Apo kas iti makita ti tao; ta ti tao kumita iti makinruar a langa, ngem ti Apo kumita iti puso.”
Nupay mabalin a saan a ni David ti kapigsaan iti bagi wenno kalaingan kadagiti kakabsatna, nabileg ti pusona iti imatang ti Dios. Inayatna ti Dios iti amin a pusona ken nauneg ti tarigagayna nga agtulnog Kenkuana. Addaan iti di maisin a pammatina iti ayat, bileg, ken naikari a bendision ti Dios, kas impakitana idi agangay idi awan butengna a nakiranget ken inabakna ni Goliat babaen ti tulong ti Apo.
Isuronatayo daytoy nga estoria a ti laeng kasapulan ti Dios a mangipatungpal kadagiti panggepna ken matulongannatayo nga agbalin iti kayatna a pagbalinantayo ket ti naan-anay a panangiturongtayo iti puspusotayo Kenkuana. Iti maysa nga abogado, imbilinna, “Ayatem ti Apo a Diosmo iti amin a pusom.” Ken ni Propeta Joseph Smith, kinunana, “Adtoy, kalikaguman ti Apo ti puso ken situtulok a panunot.” Ken kadagiti Nephite, inted ti nagungar a Mangisalakan daytoy nga awis: “Ket idatonyo kaniak a daton ti nasneban a puso ken napnuan babawi nga espiritu.”
Apay a kasta? Insuro ti Mangisalakan a no naan-anay a maiturong ti puspusotayo Kenkuana, gapu iti pangsubbot a sakripisiona, mabendisionantayo iti pigsa ken naespirituan a sagsagut a kasapulantayo a mangparmek iti karittayo iti biag, mangliklik iti sulisog, umawat iti direksion ken pannakaawat, ken makarikna iti rag-o ken talna iti biagtayo. “Agtaud kadagiti babassit a banag ti naindaklan.” Kinunana a mabalinna nga “aramiden a napigsa dagiti nakapsut a banag” ken bendisionannatayo iti amin a kasapulantayo tapno agballigitayo iti daytoy mortal a biag ken umawat iti agnanayon a biag. “Nagasat dagiti nadalus ti pusona,” kinunana, “ta makitadanto ti Dios.”
Mamatiak a daytoy ti gapuna, iti uray bassit laeng, a masansan nga inatur ni Jesucristo dagiti eskriba ken Fariseo bayat ti panagministrona. Nupay napasnekda nga agtungpal iti lintegna, inaramidda daytoy para iti di umisu a gapu. Tinubngarna ida, a kinunana, “Dagitoy a tattao umasidegda kaniak babaen ti ngiwatda, ket dayawendak kadagiti bibigda, ngem adayo kaniak ti pusoda.”
Daytoy ti nasimbeng a palagip iti amin a disipulona a saan laeng a maipanggep iti aramidentayo—dagiti sao ken tignaytayo—ngem iti pay no apay nga aramidentayo ti paaramid ni Jesucristo kadatayo—dagiti tarigagay ken gagemtayo. Kinunana, “Ta siak, ti Apo, ukomekto dagiti amin a tao a maibatay kadagiti aramidda, a maibatay iti tarigagay ti puspusoda.” Ad-adu pay ti tarigagay ti Nailangitan nga Amatayo ngem dagiti mekanikal nga aramid ti panagtulnog ken serbisio dagiti annakna. Kayatna nga aramidentayo dagita a banag nga addaan pudno a panggep, gapu ta ay-ayatentayo iti amin a puspusotayo. Kayatna a tarigagayantayo ti agbalin a kas Kenkuana.
Ita, no ti naespirituan a salun-at ti pusotayo ti kangrunaan a pakaseknan ti Mangisalakan—no ania ti sapsapulenna iti maysa a pudno a disipulo—kasano a mausigtayo ti puspusotayo ken maammuan no umno daytoy iti imatang ti Dios?
Nabiit pay, iti panagsublimi nga agassawa manipud iti misionmi idiay Portugal, nagsasaruno ti panagpaamirismi iti salun-at tapno matingiting ti pisikal a kasasaadmi. Sumagmamano kadagita a panagamiris ti naipamaysa iti salun-at ti pusomi—kas iti blood test, echocardiogram, ken stress test. Mamatiak nga inikkannatayo pay ti Mangisalakan kadagiti naespirituan a pannubok a mausartayo a mangtingiting iti naespirituan a kasasaad dagiti pusotayo. Ibinglayko man ti sumagmamano kadakayo.
Panangtingiting iti Pusoyo babaen kadagiti Naespirituan a Pannubok
Umuna, ti Pokus, Dagiti Prayoridad, ken Dagiti Gagemtayo
“Ta no sadino ti yan ti kinabaknangyo, isu met ti yan ti pusoyo,” insuro ni Jesus. Ti gameng ti maysa a banag a napateg kadatayo, banag nga idatontayo ti panagkagumaan ken pasnek. No sadino a pilientayo a pangibubosan iti orastayo ken pangipamaysaan iti pasnektayo, kasta met no ania ti mangmotibar kadatayo nga agaramid, ket adu ti madakamat maipapan iti puspusotayo. Imballaag ti Mangisalakan nga idinto nga adu ti inawaganna, manmano ti napili “gapu ta nalabes ti pannakaituon ti puspusoda kadagiti banag iti daytoy a lubong, ken [tarigagayanda] ti pakaidayawan ti tattao.” Maipangrunak kadi ti Mangisalakan iti biagko? Maiturong kadi ti imatangko iti dayagna ti amin nga ar-aramidek?
Maikadua, ti Kinatallugodtayo nga Agtungpal kadagiti Bilin ti Dios
Iti intero a nasantuan a kasuratan, innaig ti Apo ken dagiti propetana ti kinatangsit ken kinasukir iti kaadda ti natangken a puso. Binagbagaan ni Nephi dagiti kabsatna, a kinunana: Apay kadi a saankayo nga agtungpal kadagiti bilin ti Apo? Kasano a mapukawkayonto, gapu iti kinatangken ti panagpuspusoyo?” Kadagiti Santo iti Missouri, imballaag ti Apo, “Ngem isu a di agaramid iti ania man agingga a mabilin, ken umawat iti bilin a napnuan duadua, ken tungpalenna a sisasadut, mailunod.” Idinto a saan a namnamaen ti Mangisalakan ti kinaperpekto iti panagtungpal kadagiti bilinna, kiddawenna a tarigagayan ken ikagumaantayo a tungpalen dagitoy iti amin a pusotayo.
Maikatlo, ti Kinapasnektayo iti Panagadal iti Nasantuan a Kasuratan ken Panagkalikagum a Manggun-od iti Paltiing
Binalakadan ti Apo ni Oliver Cowdery nga “ipategmo dagitoy a balikas iti pusom.” Maawistayo a sipapasnek a mangsukisok iti nasantuan a kasuratan ken, babaen ti bileg ti Espiritu Santo, kalikagumantayo a makagun-od iti pannakaawat ken saksi ti kinapudno ti ebanghelio iti puspusotayo.
Binabalaw ni propeta Abinadi dagiti saserdote ti nadangkes nga Ari Noe gapu ta dida inaramid dayta, a kinunana, “Saanyo nga inaramat kadagiti pusoyo iti pannakaawat, ngarud, saankayo a nainsiriban.” Sipapasnek kadi nga ikagkagumaak nga adalen dagiti nasantuan a kasuratan iti inaldaw ken aramatek ti pusok a makaawat kadagitoy babaen ti kararag?
Maikapat, dagiti Pampanunot ken Balikastayo
Insuro ti Mangisalakan a “ti puso ti pagtaudan dagiti dakes a pampanunot” ken dayta “isawang ti ngiwat ti linaon ti puso.” Ti kalidad ti pampanunot ken sasaotayo ket nasayaat a mangipamatmat iti kinadalus ti pusotayo. Itantandudok kadi ti adu a negatibo a pampanunot maipapan iti aramid wenno gagem ti dadduma, wenno maipapan iti bagik? Alistoak kadi unay a manghusga ken mangkondena iti dadduma? Ikagkagumaak kadi ti agsapul kadagiti pambar wenno panangikalintegan kadagiti biddutko? Ket kasano dagiti balikasko? Itag-ay ken paregtaenda kadi dagiti adda iti aglawlawko? Wenno masansan kadi a mangpataudda iti sinnupiat ken babawi?
Kalpasan a nakumpleto dagiti panagpaamirisko iti bagik, imbaga kaniak ti doktorko nga, iti pakabuklan, nasalun-at ti pusok—ngem adda sumagmamano a pakaseknan a masapul a tamingen ita, sakbay a kumaroda. Kalpasanna inresetana ti sumagmano a mamagbalbaliw iti estilo ti biag. Kasta met, a no aramidenyo daytoy naespirituan a panangtingiting iti pusoyo ken madlawyo ti sumagmamano a negatibo a sintomas a mangrugin a tumaud, dikay koma agbuteng! Nangipaay ti Mangisalakan iti nalaing a naespirituan a pangagas tapno matulongannakayo. Inkarina pay nga ikkannakayo iti baro a puso! Adtoy ti sumagmamano nga aramid a makapasayaat iti naespirituan a pigsa ti pusoyo.
Panangpadur-as iti Naespirituan a Salun-at ti Pusoyo
Umuna, Papigsaenyo ti Relasionyo ken ni Cristo
No idatontayo ti panawen iti inaldaw tapno umas-asideg ken Cristo, agbalbaliw ti puspusotayo. Ti inaldaw a panagadal iti nasantuan a kasuratan, a buyogan ti napasnek a kararag ken masansan a panagayuno, ket mangpadakkelto iti ayatyo iti Mangisalakan ken mangpapigsa iti pammati ken tarigagayyo nga agbabawi ken sipapakumbaba nga itedyo ti pusoyo iti Dios. Panunotenyo daytoy a pagarigan ni Nephi: “Gapuna, immawagak iti Apo; ket adtoy sinarungkarannak, ket pinaluknengna ti pusok a namatiak iti amin a balikas nga insawang ti amak.”
Bayat ti panagtultuloytayo a mangtaraon iti bukel ti pammati babaen kadagiti nalinteg a tarigagay ken aramidtayo, mapasarantayo ti isu met laeng a pannakapasanto ti puspusotayo a kas kadagiti Nephite: “Masansanda a nagayuno ken nagkararag, ket pimmigsada a pimmigsa iti kinapakumbabada, ken timmibkerda a timmibker iti pammati ken ni Cristo, agingga iti napno ti kararuada iti rag-o ken linglingay, wen, iti pannakapatarnaw ken ti pannakapasanto ti puspusoda, pannakapasanto a dimteng gapu iti panangiturongda iti puspusoda iti Dios.”
Maikadua, Itunosyo iti Pagayatantayo iti Pagayatanna
Insuro ti Apo,“No patpatgendak, tungpalenyo dagiti bilinko.” Awisennatayo a mangipakita iti ayattayo babaen ti panangaramid ken panangtungpal kadagiti katulagan Kenkuana. No inaldaw nga ikagumaantayo ti agtungpal kadagiti bilinna, sipupudno nga agbabawi iti basbasoltayo, ken agtultuloy nga awatentayo iti naganna ken itunos ti pagayatantayo iti pagayatanna, mabendisionantayo iti kanayon a pannakikadua ti Espiritu Santo.
Impaneknek ni Nephi, “Ammok a no surotenyo ti Anak, nga addaan puso a napnuan tarigagay, nga awanan panaginkukuna ken awanan panangallilaw iti sango ti Dios, ngem ketdi addaan iti pudno a panggep, a mangibabawi kadagiti basolyo, a mangisaksi iti Ama a siaayatkayo nga umawat iti nagan ni Cristo, babaen ti pannakabuniag … , adtoy, inkayto awaten ti Espiritu Santo.” Iwanwannakayto ti Espiritu Santo ken tulongannakayto a mangammo iti pagayatan ti Apo ken agaramid kadagiti nasayaat a pili.
Maudi, Agserbikayo iti Dios ken iti Dadduma iti Amin a Pusoyo
Awisen ti Mangisalakan ti amin nga “agserbi kenkuana iti amin a pusoyo.” No pilientayo nga aramiden ti tunggal banag nga impaaramid ti Apo kadatayo—kas iti panagtungpal kadagiti bilin, pannakiranud iti sakramento, panagdaydayaw iti templo, ken panagserbi iti dadduma—addaan napudno a puso ken pudno a panggep, agbalin ti tunggal aramid ti panagserbi ken panagdaydayaw a nabileg a naespirituan a padas a mangpapigsa iti pammati ken pammaneknektayo ken mangpunno iti puspusotayo iti rag-o ken ayat iti Dios ken padatayo a tao.
Mayallingag pay laeng ita ti saludsod ni propeta Alma: “Naespirituan kadi a nayanakkayo iti Dios? Maipakitayo kadi ti ladawanna iti langayo? Limmansad kadi iti pusoyo daytoy naisangsangayan a panagbalbaliw?”
Kakabsat, awisenkayo a mangted iti sibubukel a pusoyo iti Mangisalakan ita nga aldaw. Napasnek ken nairanta koma ti tunggal aramid ti panagdayaw ken panagserbi. Isinayo dagiti pakasingaan ti lubong ket ikagumaan a maaddaankayo iti napnuan kaipapanan nga oras para iti Apo iti inaldaw a biagyo. Agbabawi ket agsublikayo Kenkuana iti amin a pusoyo, ket pakawanen ken arakupennakayto kadagiti takiag ti ayatna. Diyo sapulen dagiti banag daytoy a lubong, ngem ketdi pilienyo nga italimudok iti dayagna ken sapulenyo dagiti banag a nasaysayaat. Ammona dagiti pampanunotenyo ken dagiti tarigagay ti pusoyo, ket bayat ti yaasidegyo Kenkuana, bendisionannakayo iti pigsa, panagtalek, talna, ken rag-o iti daytoy a biag ken lugar iti nailangitan a pagarianna iti amin a kinaagnanayon.
Ammok a sibibiag ni Jesucristo. Isu ti Mannubbottayo. Ken ay-ayatennakayo ken siak iti amin a pusona. Iti nagan ni Jesucristo, amen.