Awan ti Agtugaw nga Agmaymaysa

Iti uneg ti 50 a tawen, nagadalak iti kultura, agraman ti kultura ti ebanghelio. Nangrugiak iti fortune cookies.

Idiay Chinatown ti San Francisco, naigibus dagiti pangrabii ti pamilia Gong iti fortune cookie ken nainsiriban a pagsasao kas iti “Ti panagdaliasat iti sangaribu a milia mangrugi iti maysa nga addang.”

Idi agtutuboak, nagaramidak iti fortune cookies. Inaramatko iti puraw a guantes, tinimbukel ken insukogko dagiti nagtimbukel a cookies a napudot manipud iti urno.

Nasdaawak ta naammuak a saan nga orihinal a paset ti kultura dagiti Tsino dagiti fortune cookies. Tapno mailasin ti kultura ti fortune cookie dagiti Tsino, Amerikano, ken Europa, nagsapulak iti fortune cookies iti adu a kontinente—kas iti panangusar ti maysa iti adu a lokasion a mangbirok iti nagtaudan ti uram iti kabakiran. Dagiti restoran dagiti Tsino idiay San Francisco, Los Angeles, ken New York ket mangiserbi iti fortune cookies, ngem saan a kadagiti adda iti Beijing, London, wenno Sydney. Dagiti laeng Amerikano ti mangrambak iti National Fortune Cookie Day. Dagiti laeng Chinese advertisement ti mangidiaya iti “Authentic American Fortune Cookies.”

Naragsak, ken simple a pagarigan ti fortune cookies. Ngem dayta met la a prinsipio ti panangidilig kadagiti kannawidan iti kultura ti agduduma a kasasaad ti makatulong kadatayo a mangilasin iti kultura ti ebanghelio. Ket ita idiaydiaya ti Apo dagiti baro a gundaway a mangadal iti kultura ti ebanghelio bayat ti pannakaipatungpal ti alegoria ti Libro ni Mormon ken dagiti padto ti pangngarig iti Baro a Tulag.

Agtigtignay dagiti tao iti amin a lugar. Impadamag ti United Nations ti 281 million a migrante iti sangalubongan. Daytoy ket 128 milion nga ad-adu nga indibidual ngem idi 1990, ken mamitlo nga ad-adu ngem iti napattapatta idi 1970. Iti amin a lugar, ad-adu ti convert ngem idi ti mangsapsapul iti Ti Simbaan ni Jesucristo dagiti Santo iti Ud-udina nga Aldaw. Tunggal Sabbath, agguummong dagiti miembro ken gagayyem manipud iti 195 a nakayanakan a pagilian ken teritorio iti 31,916 kongregasion ti Simbaan. Agsaotayo iti 125 a lengguahe.

Itay kallabes, iti Albania, North Macedonia, Kosovo, Switzerland, ken Germany, nasaksiak dagiti baro a miembro a mangipatpatungpal iti alegoria ti Libro ni Mormon maipapan iti kayo nga olibo. Iti Jacob 5, ti Apo ti bangkag ken dagiti adipenna ti mangpapigsa kadagiti ramut ken sanga ti kayo nga olibo babaen ti panangurnong ken panangisilpo kadagidiay naggapu iti agduduma a lugar. Ita, aguummong dagiti annak ti Dios kas maysa ken Jesucristo; idiaya ti Apo ti nakaskasdaaw a gagangay a wagas a mangdur-as iti biagtayo iti pakabuklan ken pannakaawat iti naisubli nga ebangheliona.

Iti panangisaganana kadatayo iti pagarian ti langit, isarita ni Jesus dagiti pangngarig maipapan iti dakkel a pangrabii ken padaya ti kallaysa. Kadagitoy a pangngarig, agpambar dagiti naawis a sangaili tapno saanda nga umay. Bilinen ti apo dagiti adipenna nga “agdardarasda a mapan kadagiti kalsada ken dalan ti ili” ken “daldalan ken bitbit-ang” tapno “iyegda ditoy” dagiti napanglaw, lugpi, pilay, ken bulsek. Iti naespirituan a panangisao, tunggal maysa kadatayo dayta.

Ipakdaar ti nasantuan a kasuratan:

“Maawisto ti amin a nasion” iti “pangrabii ti balay ti Apo.”

“Isaganayo ti dalan ti Apo, … tapno rummuar ti pagarianna ditoy daga, tapno awaten dagiti agindeg ditoy, ken maisaganada para kadagiti umay nga aldaw.”

Ita dagiti maawis iti pangrabii ti Apo naggapu iti tunggal lugar ken kultura. Lallakay ken ubbing, nabaknang ken napanglaw, lokal ken global, pagbalinentayo dagiti kongregasiontayo iti Simbaan a dagiti komunidadtayo.

Kas pangulo nga Apostol, nakita ni Pedro a naglukat ti langit iti sirmata ti “maysa a dakkel a panid a naisanglad iti uppat a suli, … a nakaikabilan ti amin a kita ti …animal.” Insuro ni Pedro: “Kinapudnona a makitak ti Dios saan a mangidumduma kadagiti tao. … Iti tunggal nasion ti agbuteng [iti Apo], ken agaramid iti kinalinteg, maawat kenkuana.”

Iti pangngarig ti naimbag a Samaritano, awisennatayo ni Jesus nga umasideg iti tunggal maysa ken Kenkuana iti pagdagusanna—ti Simbaanna. Awisennatayo nga agbalin a nasayaat a kaarruba. Ikari ti naimbag a Samaritano nga agsubli ken subadanna ti panangaywan dagiti adda iti pagdagusanna. Ti panagbiag iti ebanghelio ni Jesucristo iramanna ti panangted iti lugar para iti amin iti naisubli a Simbaanna.

Ti espiritu ti “siled iti pagdagusan” iramanna ti “awan ti agtugaw nga agmaymaysa.” No umaykayo iti simbaan, no adda makitayo a maysa a tao nga agmaymaysa, pangngaasiyo ta kumustaenyo koma ken makitugawkayo kenkuana? Mabalin a saanyo nga ugali daytoy. Mabalin nga aglanga wenno agsao ti tao a naiduma kadakayo. Ket, siempre, kas iti makuna ti maysa a fortune cookie, “Ti panagdaliasat ti panaggayyem iti ebanghelio ken ayat ket mangrugi iti umuna a komusta ken awan ti agtugaw nga agmaymaysa.”

Ti “awan ti agtugaw nga agmaymaysa” kaipapananna pay ti saan nga agtugaw nga is-isu iti rikna ken espiritu. Kinuyogko ti agladladingit nga ama a bimmisita iti anakna. Mano a tawen kasakbayanna, naggagar ti anak nga agbalin a maysa a baro a deacon. Karaman iti okasion ti pananggatang ti pamiliana iti umuna a paris ti baro a sapatosna.

Ngem iti simbaan, kinatawaan isuna dagiti deacon. Kabarbaro ti sapatosna, ngem saan nga uso. Nabainan ken napasakitan, kinuna ti agtutubo a deacon a saanto pulos mapan makimisan. Naglidayak para kenkuana ken iti pamiliana.

Iti natapok a dalan nga agturong idiay Jerico, nakatawaan, napabainan ken napasakitan ti tunggal maysa kadatayo, nalabit naumsi wenno naabuso. Ket buyogen ti nagduduma a tukad ti panggep, di pay naikankano ti tunggal maysa kadatayo, saan a nakita wenno nangngegan, nalabit naigagara a napasakitan ti dadduma. Pudno a gapu ta datayo ti napasakitan ken napasakitantayo ti dadduma ta yegnatayo amin ni Jesucristo iti pagdagusanna. Iti Simbaanna ken babaen kadagiti ordinansa ken katulaganna, agtitipontayo ken maagasan ken ni Jesucristo. Agayattayo ken maayattayo, agserbitayo ken maserbiantayo, mamakawantayo ken mapakawantayo. Laglagipen koma, “awan ladingit ti daga a di makaagas ti langit” lumag-an dagiti dadagsen ti daga—pudno ti rag-o ti Mangisalakantayo.

Iti 1 Nephi 19, mabasatayo: “Uray pay ti Dios ti Israel ilupeklupek[da] dagiti sakada; … ibilangda isuna nga awan ti kaes-eskanna. … Gapuna a dusaenda, ket iturednanto; ken saplitenda, ket iturednanto. Wen, ken tupraanda, ket iturednanto.”

Kuna ti gayyemko a ni Propesor Terry Warner a ti panangukom, panangsapsaplit, panangkabil, ken panangtupra ket saan a sagpaminsan a pasamak a napasamak laeng bayat ti mortal a biag ni Cristo. No kasano ti panangtratotayo iti tunggal maysa— nangruna dagiti mabisin, mawaw, nabaybay-an nga agmaymaysa—isu ti panangtratotayo Kenkuana.

Iti naisubli a Simbaanna, nasaysayaat ti kasasaadtayo amin no awan ti agtugaw nga agmaymaysa. Ditayo koma basta laeng makidagus ken nabus-oy. Sibabara koma a pasangbayen, awaten, pagserbian, ipategtayo ti tunggal maysa. Saan koma a ganggannaet ti tunggal gayyem, kabsat, ngem maysa nga anak iti pagtaengan.

Ita adu ti makarikna nga agmaymaysa ken maisinsina. Ti social media ken artificial intelligence ti mabalin a mangbaybay-a kadatayo iti pannakawaw iti kinasinged ken panangsagid ti tao. Kayatmi a mangngeg ti timek ti tunggal maysa. Kayatmi ti napudno a pannakaikameng ken kinaimbag.

Adu dagiti rason a mariknatayo a ditayo maibagay iti simbaan—nga, iti piguratibo a panagsao, agtugawtayo nga agmaymaysa. Mabalin a madanagantayo maipapan iti accent, kawes, kasasaad ti pamiliatayo. Nalabit a mariknatayo a ditayo umdas; angot ti tabako; kinadalus ti dayaw; nakisina iti maysa a tao ken makarikna iti pannakasair ken pannakapabain; maseknan iti daytoy wenno dayta nga annuroten ti Simbaan. Mabalin a single, diborsiado, wenno balotayo. Naringgor dagiti annaktayo; awan annaktayo. Ditayo nagserbi iti mision wenno napagawidtayo a nasapa. Agtultuloy ti listaan.

Mosiah 18:21 awisennatayo a mangreppeng a sangkamaysa iti puspusotayo iti ayat. Awisendakayo a saan nga agdanag, saan a manghusga, di agkasapulan iti dadduma—ken, no kasapulan, saan a nadillaw iti bagbagitayo. Ditayo parsuaen ti Zion iti maysa nga aldaw. Ngem tunggal “kumusta,” tunggal nabara a tignay, ti mangyas-asideg iti Zion. Ad-adda nga agtalektayo koma iti Apo ket pilientayo a sirarag-o a mangtungpal iti amin a bilinna.

Iti doktrina, iti sangakabbalayan ti pammati ken pannakisinged dagiti Santo, awan ti agtugaw nga agmaymaysa gapu iti natulagan a pannakikameng ken ni Jesucristo.

Insuro ni Propeta Joseph Smith: “Nabilintayo a mangkita, makipaset ken tumulong a mangpadur-as iti dayag iti Ud-udina nga Aldaw, ‘ti dispensasion ti pannakatungpal dagiti panawen … ,’ inton maummong dagiti Santo ti Dios iti maymaysa iti tunggal pagilian, ken kabagian, ken tattao.”

Ti Dios “saanna nga aramiden ti aniaman malaksid iti pagimbagan ti lubong; … tapno mayasidegna ti amin a lallaki [ken babbai] kenkuana. …

“… Awisenna amin ida nga umay kenkuana ket makiranudda iti kinasayaatna; … ken agpapada ti amin iti Dios.”

Ti kumbersion ken ni Jesucristo ket agkasapulan a mangikkat iti nailubongan a kinatao ken nailubongan a kultura. Kas isuro ni Presidente Dallin H. Oaks, masapul nga isardengtayo ti aniaman a tradision ken kannawidan iti kultura a maisuppiat kadagiti bilin ti Dios ken agbalintayo a Santo iti Ud-udina nga Aldaw. Ilawlawagna, “Adda naidumduma a kultura ti ebanghelio, maysa a ragup dagiti ik-ikkan pateg ken namnama ken aramid a gagangay [iti] amin a miembro ti Ti Simbaan ni Jesucristo dagiti Santo iti Ud-udina nga Aldaw.” Karaman iti kultura ti ebanghelio ti kinadalus ti dayaw, linawas a pannakimisa, panagliklik iti arak, tabako, tsa, ken kape. Iramanna ti kinapudno ken integridad; pannakaawat nga agtultuloytayo, saan nga agpangato wenno agpababa, kadagiti saad iti Simbaan.

Masursurok kadagiti napudno a miembro ken gagayyem iti tunggal pagilian ken kultura. Dagiti nasantuan a kasuratan a naadal iti adu a pagsasao ken pannirigan iti kultura ket mangpauneg iti pannakaawat iti ebanghelio. Dagiti nadumaduma nga ebkas dagiti kababalin a kas ken Cristo ti mangpauneg iti panagayat ken pannakaawatko iti Mangisalakanko. Mabendisionan ti amin no ilawlawagtayo ti kaipapanan ti kinasiasinotayo iti kultura, kas isuro ni Presidente Russell M. Nelson, kas anak ti Dios, anak ti katulagan, disipulo ni Cristo.

Ti talna ni Jesucristo ket nairanta para kadatayo a mismo. Nabiit pay, sipapasnek a dinamag ti maysa a barito, “Elder Gong, makapanak kadi pay laeng idiay langit?” Pinampanunotna no mabalin pay a mapakawan. Dinamagko ti naganna, dimngegak a naimbag, inawisko a makisarita iti bishop-na, inarakupko isuna. Pimmanaw nga addaan namnama ken Jesucristo.

Dinakamatko ti barito iti sabali pay a kasasaad. Idi agangay, nakaawatak iti di napirmaan a surat a nangrugi, “Elder Gong, nangpatanorkami iti asawak iti siam nga annak … ken nagserbikami iti dua a mision.” Ngem “kanayon a nariknak a diak mapalubosan iti celestial a pagarian … gapu ta dakes unay dagiti basolko idi agtutuboak!”

Intuloy ti surat, “Elder Gong, idi insaritam maipapan iti pananggun-od ti barito iti namnama iti pannakapakawan, napnoak iti rag-o, a nangrugi a nabigbigko a nalabit [mapakawanak].” Igibus ti surat, “Magustuak pay ketdi ti bagik ita!”

Mapatibker ti natulagan a pannakikameng no umasidegtayo iti tunggal maysa ken iti Apo iti pagdagusanna. Bendisionannatayo amin ti Apo no awan ti agtugaw nga agmaymaysa. Ket asino ti makaammo? Nalabit ti tao a nakatugaw iti abaytayo ket agbalin a best fortune cookie friend-tayo. Sipapakumbabatayo koma a mangsapul ken mangtedtayo iti lugar para Kenkuana ken iti tunggal maysa iti pangrabii ti Kordero, sipapasnek nga ikararagko iti nasantuan a nagan ni Jesucristo, amen.