“Ay-ayatennak Kadi?”
No kayattayo nga ipakita ti ayattayo iti Dios, maawatantayo koma no kasano a bigbigenna ti ayattayo.
Iti pangngarig ti napukaw nga anak a lalaki, inkarigatan ti inauna a kabsat idi damo nga agrambak idi nagsubli ti adingna a lalaki kalpasan ti panawen ti nakapuy a pilina ken “[panang]busbosna iti kuartana iti nabarayuboy a panagbiag.” Ti kinatangig ken bukod a kinalinteg ti inauna a kabsat ti nanglapped kenkuana a mangarakup iti ragsak ti panagsubli ti agbabbabawin a kabsatna. Mabalintayo pay a di mangusar kadagiti gundaway a ditayo ipakaammo kadagiti ay-ayatentayo, babaen iti balikas ken tignaytayo, ti napudno nga ayattayo kadakuada.
Adu dagiti nabileg a pagarigan iti nasantuan a kasuratan ti napudno nga ayat a naibinglay ken naawat: Da Noemi ken Ruth, da Ammon ken Ari Lamoni, ti napukaw nga anak ken ti amana, ti Mangisalakan ken dagiti disipulona.
No siwayawaya a maited ken sipupudno a maawat ti ayat, sumaruno ti nasagudayan a siklo a dumur-as ti ayat nga agpadpada iti mangted ken ti umawat.
Naan-anay ti ayat ti Dios, awan patinggana, naandur, ken “kasam-itan.” Punnuenna ti kararua iti “napalaus a rag-o.” Nupay kasta, mabalin a marigatantayo a mangbigbig iti ayat ti Dios iti biagtayo. Nupay kasta, ti naan-anay a naayat a Nailangitan nga Amatayo ket tarigagayanna unay a mapasarantayo ti ayatna nga Isu ket “agsao [kadatayo] a mayannurot iti … maawatan[tayo].” Isu ket mangipeksa iti ayatna kadatayo iti wagas a datayo, kas indibidual, mabalin a mabigbigtayo. Mapasarantayo ti ayat ti Dios kadatayo no paliiwentayo dagiti kinapintas iti nakaparsuaan, wenno umawattayo iti sungbat dagiti kararag, wenno adda dagiti kapanunotan nga umay iti mismo a kanito ti panagkasapulan, wenno mapasarantayo dagiti nasam-it a kanito ti rag-o. Ti kaindaklan a pannakaiparangarang ti ayat ti Nailangitan nga Ama kadatayo nga agtaud iti agpada a panunot ken puso ket idi pinalubosanna ti Ay-ayatenna nga Anak a mangidaton iti Bagina kas maysa a pangsubbot.
Kas iti inauna a kabsat ti napukaw nga anak, masansan a naisentro ti pokustayo iti bagbagitayo. Agbubostayo unay iti panagsapul iti pakakitaan ti ayat ti Dios para kadatayo, ken maupaytayo no ditayo makita daytoy. Ngem ti napintas a kasupadi ket no ad-adda nga ipamaysatayo ti panangipakita iti ayat iti Dios, nalaklaka a mabigbigtayo ti ayatna kadatayo. Nalabit daytoy ti gapuna a simmungbat ti Mangisalakan iti saludsod nga “Ania ti naindaklan a bilin?” buyogen daytoy simple ken napateg nga awis: “Ayatem ti Apo a Diosmo iti amin a pusom, ken iti amin a kararuam, ken iti amin a panunotmo.”
No dadduma ti wagas a panangipakitatayo iti ayattayo kadagiti ipatpategtayo unay ket saan a nasken a ti wagas a panangbigbigda iti ayat. Makapaupay daytoy nga agpada iti mangmangted ken umaw-awat. Makatulong no damagentayo kadagiti ay-ayatentayo no kasano a mabigbigda ti naipeksa nga ayat. Kasta met, no kayattayo nga ipakita ti ayattayo iti Dios, maawatantayo koma no kasano a bigbigenna ti ayattayo. Nagasat ta silalawag a nangbalabala iti mano a wagas iti scriptures a maipakitatayo ti ayattayo Kenkuana.
Ad-adda ti Panagayatmo Kaniak Ngem Dagitoy?
Iti makaisuro a panagsinnukat a da Pedro ken ti nangungar nga Apo iti Baybay ti Tiberias, masursurotayo dagiti wagas a maipakitatayo ti ayattayo iti Apo.
“Kinuna ni Jesus ken ni Simon Pedro, Simon, anak ni Jonas, ad-adda ti panagayatmo kaniak ngem dagitoy? Kinunana Kenkuana, Wen, Apo; ammom nga ay-ayatenka.”
Ti kangrunaan a saludsod iti daytoy a panagdamag ti Apo ket “Ad-adda ti panagayatmo kaniak ngem dagitoy?” Ipakitatayo ti ayattayo iti Apo no Isu ti ipangrunatayo ngem “dagitoy,” ken mabalin a “dagitoy” ket asino man, ania man nga aktibidad, ania man a banag a mangsukat Kenkuana iti panagbalinna a kapatgan nga impluensia iti biagtayo.
Dinto pulos umdas ti oras iti aldaw, lawas, bulan, wenno tawen tapno maaramid ti amin a kasapulan wenno nasken nga ileppastayo. Paset ti pannubok ti mortalidad ti mangusar iti napateg a pamataudan ti oras para iti dayta kapatgan iti agnanayon a pagimbagan ken iwalin dagita a banag a saan a napateg.
Kinuna ni Presidente Russell M. Nelson: “Saludsod para kadatayo … dayta met laeng. … Situtulok ka kadi a mangpabalin iti Dios a kapatgan nga impluensia iti biagmo? Palugodam kadi dagiti balikasna, bilinna, ken katulaganna a mangimpluensia iti aramidem iti inaldaw? Ad-adda kadi nga unaem nga ipangpangruna ti timekna ngem iti sabali? Siaayatka kadi a mangaramid iti nasken nga iparamidna kenka ngem iti ania man a sabali pay nga ambision? Siaayatka kadi a mangpasakup iti pagayatam iti pagayatanna?” Ipakitatayo ti kinadisipulo ken ayattayo iti Dios no Isu ti kangatuan a prayoridadtayo.
Pakanem dagiti Karnerok
Iti sumuno a bersikulo daytoy a diskusion ni Pedro ken ti Mangisalakan, maadaltayo ti sabali a wagas a mabigbig ti Apo ti ebkastayo iti ayat: “Kinuna manen [ti Apo] kenkuana iti maikadua a gundaway, Simon, anak ni Jonas, ay-ayatennak kadi? Kinunana kenkuana, Wen, Apo; ammom nga ay-ayatenka. Kinunana kenkuana, Pakanem ti karnerok.”
Maipakitatayo ti ayattayo iti Nailangitan nga Ama no agserbi, dumngeg, agayat, mangitag-ay, wenno agministertayo kadagiti annakna. Mabalin a simple dayta a serbisio kas iti pudno a panangkita iti dadduma a di manghusga. Iti maika-76 a benneg ti Doktrina ken Katulagan, malagiptayo ti kababalin dagiti agtawidto iti celestial a gloria: “Makitada kas iti pannakakita kadakuada, ken maammuanda a kas iti pannakaammo kadakuada.” Makitada ti dadduma kas makita ti Dios ida, makitana ida kas iti pakapagbalinanda, nga addaan nadayag a nadiosan a potensial.
Kalpasan a makaawidak manipud iti misionko, inasikasok ti lawn-care business nga inrugimi iti kabsatko idi agtutubokami. Busy-ak pay iti panagadalko iti unibersidad. Maysa a lawas ti panagtutubo, nagdanagak iti kapigsa ti tudo ken asidegen a final exam-ko ken ti naladaw a panagobrak iti paraangan.
Iti tengnga ti lawas, naglawag ti tangatang, ket planok a mangileppas iti paraangan kalpasan ti klase. Ngem idi makaawidak, awanen ti trak ken ti ramitko. Nagusisaak, binisitak dagiti nayiskediul a paraangan; nalpasen a napintas a napukisan ti tunggal maysa. Iti maudi a paraangan a nayiskediul, nakitak ti adingko a magmagna iti likudan ti pagpukis (mower). Nakitanak nga umis-isem ket nagpayapay. Iti dayta, inarakupko ket nagyamanak kenkuana. Ti napateg nga aramidna ti serbisio ti nangpapigsa unay iti ayatko ken kinapudnok kenkuana. Ti panagserbi iti tunggal maysa ket awan duadua a wagas nga ipakitatayo ti ayattayo iti Dios ken iti Patpatgenna nga Anak.
Ipudno ti Imana iti Amin a Banag
Iparangarangtayo pay ti ayattayo iti Dios babaen ti kaadda ti managyaman a puso. Kinuna ti Apo, “Awan ti pagbasolan ti tao iti Dios, … malaksid kadagiti saan a mangipudno iti imana ti amin a banag.” Ipakitatayo ti ayattayo iti Dios babaen ti panangawat Kenkuana kas pagtaudan ti tunggal nasayaat a banag iti biagtayo.
Kadagidi umuna nga aldaw ti pannakayam-ammo ti kompania, agkararagkami iti business partner-ko sakbay dagiti napateg a mitingmi, a dumawdawat iti tulong ti Nailangitan nga Ama. Iti tunggal oras, sinungbatan ti Dios dagiti kararagmi, ken nagballigi dagiti mitingmi. Kalpasan ti maysa a miting, inlawlawag ti business partner-ko nga alistokami a nagdawat iti tulong ngen nabuntogkami nga agyaman. Manipud idin, inkaugalianmi ti mangidaton iti napudno a kararag ti panagyaman, a mangbigbigbig iti ima ti Dios kadagiti balligimi. Ipakitatayo ti ayattayo iti Dios nga addaan “galad a managyaman.”
“No Ay-ayatendak, Tungpalenyo dagiti Billinko”
Sabali pay a wagas a maipakitatayo ti ayattayo iti Nailangitan nga Ama ken ti Patpatgenna nga Anak ket ti panangpili a tungpalen Ida. Kinuna ti Mangisalakan, “No ay-ayatendak, tungpalenyo dagiti bilinko.” Ti kita ti panagtulnog ket saan a bulsek wenno inkapilitan ngem napudno ken naayat nga ebkas ti ayat. Kayat ti Amatayo iti Langit nga agtarigagaytayo nga agtungpal. Awagan ni Sister Tamara W. Runia daytoy iti “naayat a panagtulnog.” Kinunana, “Nupay awanantayo iti perpekto a panagtulnog ngem, padasentayo ti naayat a panagtulnog itan, panangpili ti agtalinaed, manen ken manen, gapu ta ay-ayatentayo Isuna.”
Inpaayannatayo ti Nailangitan nga Ama iti karbengan nga agpili a mangparegta kadatayo nga agtarigagay a mangpili Kenkuana. Ti aramid ken gloriana saan laeng a mangipatungpal iti agnanayon a biag ngem iramanna ti namnama a ti kadaklan a tarigagaytayo ti agsubli Kenkuana. Nupay kasta, dinatayo piliten nga agtungpal. Iti himno a “Know This, That Every Soul Is Free,” ikantatayo:
Kas mission leader, pinaregtadakami iti asawak, ni Christina, ti adu a misionario a nangpili nga agtungpal, di gapu ta daytoy ti pagalagadan ti misionario ngem gapu ta kayatda nga ipakita ti ayatda iti Apo babaen ti napakumbaba a panagpilida a mangibagi Kenkuana.
Kinuna ni Elder Dale G. Renlund: “Panggep a tun-oyen ti Amatayo iti Langit iti panagbalin a nagannak ket ti di panangpaaramid iti annakna ti umno; daytoy ket pagpilienna ti annakna nga agaramid iti umno ken iti udina agbalin a kas Kenkuana. No simple a kayatnatayo nga agbalin a natulnog, usarenna dagiti madagdagus a gunggona ken pannusa a mangimpluensia kadagiti ugalitayo.” Ipakitatayo ti ayattayo iti Dios no pilientayo ti agtulnog ken sumurot Kenkuana.
Bigbigen ti Nailangitan nga Amatayo ken Mangisalakantayo dagiti ebkas ti ayattayo Kadakuada no ipangrunatayo Ida nga umuna iti biagtayo, agsisinnerbi, siyayaman nga awaten ti tunggal bendision manipud Kadakuada, ken pilien a tungpalen ken suroten Ida.
Paneknekak a pudno nga anak ti Dios ti tunggal maysa kadatayo ken ay-ayatennatayo a naan-anay. Paneknekak nga Agtarigagay a padasentayo ti Ayatna iti wagas a mabigbig ken maawatantayo. Ket ti napintas a paradox ket mapadasantayto ti ayatna kadatayo a nangnagruna pay no ipakitatayo ti ayattayo Kenkuana. Iti nagan ni Jesucristo, amen.