Ni Jesucristo ken ti Baro a Pangrugianyo

Sadinoman a napanan ni Jesus “nagar-aramid iti naimbag” Mabasatayo dayta a simple a salaysay iti libro Dagiti Aramid. Anian a nagdakkel a saan nga umdas a palawag dayta! Pudno nga iti sadinoman a napanan ni Jesus, nagar-aramid iti naimbag! Isu ti pudno a kaipapanan—ken pagtaudan—ti kinaimbag! Impaayna ti intero a mortal a biagna iti panagaramid iti naimbag. Isu ket “manangngaasi ken managparabur, di nalaka nga agpungtot, ken aglaplapusanan,” awan patinggana ti kinaimbag ken agnanayon iti asi.

Aniaman a panangpadas a mangiladawan wenno manggupgop iti kinaimbag ken asi-na ket maysa a saan nga umdas a palawag! Pudno unay, kas inkagumaan nga inyebkas ni Apostol Juan, a no padasentay nga isurat ti tunggal pannakaiparangarang ti kinaimbag ti Mangisalakan, “di malaon ti lubong dagiti libro a pakaisuratanda.”

Dagiti pagarigan a nailanad iti nasantuan a kasuratan a ni Jesus “nagar-aramid iti naimbag” ket mangparnuay iti panagraem ken panagsiddaaw, nangnangruna no ibilangtayo nga addatayo koma kadagidiay a kasasaad, a mangsaksi iti milagrona, mangawat iti pannursurona, ken mapadasan ti panangagasna. Kinasaritana dagiti nailaksid iti kagimongan, sinagidna dagiti masakit ken narugit, liniwliwaanna dagiti nabannog, insurona ti makawayawaya a kinapudno, ken inayabanna dagiti managbasol nga agbabawi. Iti tunggal agkukutel, bulsek a lalaki, ken mannakikamalala a babai; kadagiti pilay, tuleng, ken umel; agladladingit nga ina, desperado nga ama, ken agladladingit a balo; kadagiti nakondenar, naibabain, ken agsagsagaba; kadagiti natay iti bagi ken natay iti espiritu, ti inaramidna ket nangipaay iti baro a pangrugian. Wen, sabali manen a saan nga umdas a palawag!

Amin nga imbagana ken inaramidna ti nangipaay iti baro a pangrugian iti tunggal maysa kadagiti pinaimbagna, binendisionanna, insurona, ken insalakanna iti basol. Saanna a binaybay-an ida, ket sigurado a dinakanto baybay-an. Panunotenyo itoy a kanito a mangngegyo dagitoy a mangted-biag a sasao manipud Kenkuana:

“Anakko, napakawanen dagiti basbasolmo.”

“Balasitang, bumangonka.”

“Umimbagkan.”

“Uray siak, saanka a dusaen. Inkan, ket saanka nga agbasolen.”

“Anakko, pinaimbagnaka ti pammatim, agawidkan a sitatalna.”

Ababa laeng dagiti sasao ti Mangisalakan kadagitoy a tao, ngem babaen kadagita inladawanna ti mangbalbaliw a pannakabalin ti pammakawan, pannakapaimbag, pannakaisubli, talna, ken biag nga agnanayon. Ket ti nadayag a damag, ipaayna ti isu met la a baro a pangrugian kadatayo. Datayo amin ket mabalin a maaddaan iti baro a pangrugian babaen, ken gapu ken ni Jesucristo. Uray sika a mismo. Dagiti baro a pangrugian ti kangrunaan iti plano ti Ama para kadagiti annakna. Daytoy ti Simbaan dagiti baro a pangrugian! Daytoy ti Simbaan kadagiti mangabaruanan!

Babaen ti panagbuniag iti danum ken iti Espiritu, “mayanaktayo manen” ken “sumurottayo met koma iti baro a panagbiag.” Kasano ti kaadu ti namnama nga ipaay dayta baro a pangrugian iti maysa a tao nga agsagsagaba iti nadagsen a basol wenno agsagsagaba kadagiti epekto ti nariribuk a biag ken di nasayaat a relasion? Saan a kasapulan ni Jesus ti pannakapakawan a mismo iti basol wenno baro a panangrugi iti biag, ngem nabuniagan, a nangipakita iti dalan nga agturong iti baro a pangrugian nga insaganana para kadatayo.

Ket ti baro a panangirugitayo saan laeng a maminsan a mapasamak. Ipagaruptayo a ti panagbuniagtayo ti kakaisuna a gundaway para iti baro a pangrugiantayo. Saan a kasta. Saan laeng a maymaysa ti gundawaytayo. Mabalin a mapasamak dagitoy a baro a pangrugian iti inaldaw! Ket iti kada lawas a pannakiranudtayo iti bassit a tinapay ken iti bassit a kopa ti danum kas pananglagip iti sagut ti perpekto a Mangisalakantayo, a natay gapu iti panggepna a mangted kadatayo iti adu a baro a pangrugian a kasapulantayo! Ikkannatayo ni Jesus iti adu a baro a pangrugian a kasapulantayo.

Babaen ti panagkumit ken panagrag-o iti baro a biag ken ni Cristo, agbalintayo a “baro a parsua,” a sadiay naglabasen dagiti daan a banag ket dimtengen dagiti baro. Ania a pannakaitantan ti iyeg dayta a baro a parbangon iti tao nga agtultuloy a mangpadpadas, babaen ti agtultuloy a panangpili iti pammati iti pannakabalin ti Mannubbottayo a mangagas ken mangpasubli, iti laksid dagiti nakaro a pannakapaay ti panagbiag iti dakes a lubong? Di pulos simmuko ti Mangisalakan iti panagkumitna a mangtungpal iti pagayatan ti Ama ken mangileppas iti nasantuan a panubbot a misionna, uray pay no aggarigenggen gapu iti saem, ken agdara iti tunggal teterreman ken agsagaba nga agpada ti bagi ken ti espiritu, ken agkararag tapno maikkat ti napait a kopa. Manen, ipakpakitana kadatayo no ania ti kaipapanan ti napudno a panagibtur iti Dios.

Iti tunggal katulagan nga aramidentayo ken panagreggettayo a mangtungpal iti dayta, makaawattayo iti “baro a puso” ken ti naan-anay a “baro nga espiritu.” In-inut, bayat nga ad-adda nga awisentayo ti kinaimbagna iti puspusotayo ken ilaksidtayo dagiti negatibo a kapanunotan, agbalintayo a tattaona gapu ta pudno nga Isu ti pagbalinentayo a Diostayo. Kayat unay ni Jesus ti agbalin nga Aritayo ken ti Pastortayo ken ti Prinsipetayo ti Kappia, ket mabalin a pilientayo Isuna iti puso ken panunottayo.

Ti panagbabawi ti manglukat iti ruangan kadagiti baro a pangrugiantayo, pangabaruanan, ken maikadua a gundawaytayo. Dagiti pannursuro ni Presidente Russell M. Nelson ti nangilawlawag kadagiti di umiso a kapanunotan maipapan iti nasantuan a sagut ti panagbabawi, ket pampanunotek a mangrugin a maawatantayo dayta.

Makaparagsak a denggen dagiti agtutubotayo a mangiladawan no ania ti kaipapanan ti panagbabawi kadakuada. Nabiit pay a nangngegko ti maysa nga agtutubo a babai a nagkuna, “No panunotek ti panagbabawi, inaldaw a panagbabawi, mariknak ti napalalo a rag-o ken namnama. Mariknak ti ayat ken ragsak ti Nailangitan nga Amak ken ti Mangisalakanko. Saanak a mabuteng nga umasideg iti Nailangitan nga Amak iti kararag ken agkiddaw iti tulongna iti aniaman a pakarigatak. Ammok a saandak a kayat a tiliwen nga agar-aramid iti dakes. Sidadaanda a tumulong kadatayo. Daytoy ti panagbabawi kaniak,” kinunana. Maawatan daytoy nga agtutubo a babai a gapu ken ni Jesucristo, mabalinna ti maaddaan kadagiti baro a pangrugian!

Kasapulanyo kadi ti baro a pangrugian? Mabalinyo kadi ti mangrugi manen, uray sika? Panunotenyo dagiti tao a pinagserbian ti Mangisalakan—dagiti tao nga insurona, pinaimbagna, pinagungarna, pinakawanna, ken naisublina. Pinilina kadi ida manipud iti maysa a partikular a klase ti ekonomia wenno kasasaad? Pagdumaenna kadi dagiti nalinteg ken managbasol? Pinilina kadi dagiti tao gapu ta ad-adda a maikarida wenno ad-adda a maay-ayatda? Saan.

Immasideg ti dadduma Kenkuana nga addaan iti dakkel a pammati iti pannakabalinna a mangpaimbag—kas iti babai nga agsagsagaba iti panagbulos ti dara, ti Romano a senturion a ti adipenna ket matmatayen, ti agkukutel, ni Jairo, wenno ni Bartimeo a bulsek. Tunggal maysa kadakuada ti nangsubok iti pammatida, a mangnamnama a ti kinaimbag ken pannakabalin ti rabbi manipud Nazaret ti mangbalbaliw iti biagda ken kasasaadda. Ket inaramidna. Inusarna dagiti pannakabalinna a mangagas.

Ngem binendisionan met ni Jesus dagidiay agduadua iti pammatida, kas iti ama ti masakit nga ubing a nangipukkaw, a nalabit kas iti inaramidyo, “Apo, adda pammatik ngem, punnuam ti pagkurangan ti pammatik” Ket impaayna met ti asina kadagiti di pulos nangbirok Kenkuana, kas iti babai a natiliwan a makikamkamalala, ti balo idiay Nain, ti baldado a lalaki iti pagdigusan iti Betsata, ken ti lalaki a nayanak a bulsek. Nariknayo kadin nga Isuna ket agar-aramid iti naimbag iti biagyo uray no saanyo a sapsapulen wenno sursuroten Isuna?

Iti tunggal maysa kadagitoy a tao a nailanad iti nasantuan a kasuratan, ken iti amin a dumngeg ken sumungbat, nangted Isuna iti baro a pangrugian, baro man dayta a biag a napakawan iti basol wenno baro a biag a naagasan iti sakit, wenno baro a biag a napagungar iti ipapatay.

Ania ti kaipapanan daytoy para kenka ken para kaniak? Ti kinaimbagna ken asi ken kinamanangngaasina awan limitasionna. Dagiti baro a pangrugian ti kangrunaan iti plano ti Ama! Dagiti baro a pangrugian ti mision ti Anak! Dagiti baro a parbangon, baro a kapitulo, ken baro a gundaway ti simple a kangrunaan a paset iti naimbag a damag ti ebanghelio!

Ngarud, nabayag kadin nga adayokayo kadagiti katulaganyo tapno makaawatkayo iti baro a pangrugian? Saan. Namin-anon nga inaramidyo daytoy wenno dayta tapno maikkankayo iti sabali pay a gundaway? Saan. Adayokayo unay kadin ken ni Cristo tapno tulongannakayo a mangisurat iti baro nga estoria manipud ita? Saan. Ti kabusor laeng ti magunggonaan iti kapanunotan a nailumlomkayo. Saan kenka.

Ken dagiti baro a pangrugian ket saan laeng a para kadagiti basol ken bidduttayo. Babaen ti kinaimbag ken parabur ti Mangisalakan, maaddaantayo iti baro a pangrugian a mangiturong iti panagbalbaliw kadagiti dati a panagpampanunot, dakes nga ugali, kinamanagpungtot, negatibo a kababalin, rikna ti kinaawan gaway, ken manangpabasol iti dadduma ken mangliklik iti personal a responsabilidad. Mabalbaliwanyo dagiti banag maipapan iti bagbagiyo a mangpakpakapuy kadakayo iti adun a tawen. Mabalinyo ti mangirugi manen babaen ti bileg ti Apo ti baro a pangrugian. Saan a pulos a mabannog a mangted kadagiti baro a pangrugian kadatayo.

Kadagiti marigrigatan iti isu met lang a basol wenno isu met lang a pannakapaay a maulit-ulit, agtultuloykayo laeng. Saanna nga inkabil ti roadblock iti sanguananyo. Saanna nga inkeddeng ti limitasion dagiti maikadua a gundawayyo. Agtultuloykayo. Agtultuloykayo a mangikagumaan. Agkiddawkayo iti tulong manipud kadagiti adda iti aglawlawyo. Ket agtalekkayo iti baro a pangrugian nga adda kadakayo tunggal agsublikayo a naimpusuan iti Amayo. Baybay-an ti inggagara a panagbasol, panangulit iti isu met la a basol, ken natangsit a panagrebelde. Saan a masapul nga agbalinkayo a kas iti dati. Arakupenyo ti baro a panangrugiyo, ti maikadua, maikatlo, maikapat—wenno maikasangagasut—a gundaway, a naipaay kadakayo babaen ti mangsubbot a dara ni Jesucristo.

Agyamanak unay kadagiti baro a pangrugian a naited kaniak ken kadagiti maitedto pay kaniak.

Imbaga ti Mangisalakantayo ti maysa a maudi a saan nga umdas a palawag, a no awan dayta awanto ti pakaigapuan ti namnama wenno panagrag-o ita nga aldaw. Kalpasan ti panagsagaba iti Getsemani ken iti panagleppas ti pannakailansa iti krus, naikunana laeng, “Natungpalen.” Natungpalen ti mesianiko a padto, ket nabayadanen a namimpinsan ti utang para kadagiti basol ken panagsagaba ti sangataw-an. Imbagana a “natungpalen” ti awan patinggana ken agnanayon a sakripisiona. Ngem saan a makumpleto ti Pannubbotna agingga nga Isu a mismo ket nakapadas iti baro a biag iti maikatlo nga aldaw, ti baro a pangrugian a kas maysa a nadayag, napagungar a parsua babaen ti pannakabalin ti Ama.

Gapu ta kanayon nga inaramidna dagiti makaparagsak iti Amana, ken gapu nga Isu ti “nangaklon iti pagayatan ti Ama iti amin a banag,” mabalintayo a maaddaan iti baro a pangrugian. Awatenyo koma ti baro a pangrugianyo uray ita, ita met laeng. Ni Jesucristo ti Pangulo ken Mangpunno iti pammatitayo, a nangisurat kadagiti di mabilang a baro a kapitulo a kaduatayo. Isu ti Punganay ken ti Panungpalan—ti panungpalan ti pannakaibabain ken panagsagabatayo ken ti pangrugian ti baro a biag Kenkuana, a mangpalubos kadatayo a mangawat iti paraburna, a lipaten ti napalabas ken mangirugi manen iti baro a parbangon, iti mamin-adu a daras a kasapulantayo. Pudno a “kumuyogto [kadatayo] ti kinaimbag ken ti kinamanagayatna bayat ti panagbiagtayo.” Iti nagan ni Jesucristo, amen.