Ammuen No Ania ti Pudno a Kinasiasinoyo
Aniaman ti kasasaadtayo iti danatayo ti kinadisipulo, ti biagtayo ket kangrunaan nga agbalbaliw no ad-adda a maawatantayo ti pudno a kinasiasinotayo.
Sumagmamano a tawenen ti napalabas, ti balasangmi ket naaddaan iti napateg a padas iti misionna. Iti pammalubosna, ibinglayko ti maysa a paset ti suratna kadakami iti dayta a lawas:
“Idi kalman kiniddaw ti maysa nga agsubsubli a miembro nga inkami a dagus iti balayna. Idi simmangpetkami, nasarakanmi a nakaidda iti suelo, a kasta la unay ti sangitna. Agsangsangit a nangibaga a naikkat iti trabahona, mapapanaw iti apartmentna, ket manen agbalin a homeless.”
Intuloy ti balasangmi: “Matartarantaak a nangsapul iti nasantuan a kasuratak, a padpadasek ti mangkita—iti aniaman—a makatulong kenkuana. Iti panagsapsapulko iti perpekto a bersikulo, napanunotko, ‘Ania ti ar-aramidek? Saan a daytoy ti aramiden ni Cristo. Saan a parikut daytoy a masolbarko, ngem isu ket literal nga anak a babai ti Dios a makasapul iti tulongko.’ Isu nga inrikepko ti nasantuan a kasuratak, nagparintumengak iti abayna, ket iniggamak bayat nga agsangsangitkami, agingga a nakasaganan a tumakder ken sanguen daytoy a pannubok.”
Kalpasan a naliwliwa daytoy a babai, inusar ti balasangmi ti nasantuan a kasuratanna tapno tulonganna a mangawat iti kinapudno ti nadiosan a pategna ken tapno isurona ti maysa kadagiti kangrunaan a kinapudno iti kaaddatayo—a datayo dagiti ipatpateg nga annak ti Dios, maysa a Dios a perpekto ti asina kadatayo no agsagabatayo ken sisasagana a tumulong iti panagtakdertayo manen.
Makapainteres a ti umuna a punto ti doktrina nga isursuro dagiti misionariotayo ket ti Dios ti naayat a Nailangitan nga Amatayo. Ti tunggal sumaganad a kinapudno ket maibatay iti pundasion ti pannakaawat no ania ti pudno a kinasiasinotayo.
Insuro ni Susan H. Porter, ti Primary General President: “No ammom ken maawatam no kasano a naipategka kas anak ti Dios, mabaliwanna ti isu amin a banag. Baliwanna ti panagriknam maipapan iti bagim no makaaramidka iti biddut. Baliwanna no kasano ti riknam no mapasamak dagiti narigat a bambanag. Baliwanna ti pannirigam kadagiti bilin ti Dios. Baliwanna ti pannirigam iti dadduma ken ti kabaelam a mangaramid iti pagdumaan.”
Nailadawan daytoy a panagbalbaliw iti panangbasatayo iti padas ni Moises idi nakisarita iti Dios a rupanrupa. Bayat dayta a panagsarita, maulit-ulit nga insuro ti Dios ken ni Moises ti nadiosan a tawidna, a kinunana “Moises, … sika ti anakko.” Inlawlawag ti Dios a ni Moises ket kaasping iti Bugbugtongna nga Anak. Nalawag a naawatan ni Moises no siasino isuna, nga adda trabahona nga aramidenna, ken addaan iti naayat a Nailangitan nga Ama.
Kalpasan daytoy a padasna, dimteng ti kabusor a nangsulisog kenkuana ket dagus a nakisarita a kinunana, “Moises, anak ti tao.” Daytoy ket gagangay ken napeggad a wagas nga us-usaren ti kabusor a mangsulisog kadatayo. Nupay kanayon ken siaayat nga ipalagip ti Nailangitan nga Amatayo nga annaknatayo, kanayon nga ibagbaga ti kabusor a ti pakabigbigantayo ket naibatay kadagiti pagkapuyantayo. Ngem ammon ni Moises nga isu ket saan laeng a maysa nga “anak ti tao.” Kinunana ken Satanas: “Asinoka? Ta adtoy, siak ti anak ti Dios.” Kasta met, no maipasangotayo kadagiti karit ti mortalidad wenno no mariknatayo a kasla padpadasen ti dadduma nga ibagbaga a ti pakabigbigantayo ket naibatay kadagiti pagkapuyantayo, nasken nga agtalinaed a natibker iti pannakaammotayo ti pudno a kinasiasinotayo. Masapul a sapulentayo ti pannakapasingked a bertikal, saan a horizontal. Ket bayat nga aramidentayo, situturedtayo met nga ibaga, “Siak ti anak ti Dios.”
Iti sangalubongan a devotional para iti young adults, insuro ti ay-ayatentayo a Presidente Russell M. Nelson: “Siasinokayo ngarud? Umuna ken kangrunaan iti amin, maysakayo nga anak ti Dios, maysa nga anak ti katulagan, ken maysa a disipulo ni Jesucristo. No awatenyo dagitoy a kinapudno, tulongannakayo ti Amatayo iti langit a mangragpat iti ultimo a panggep a tun-oyen nga agbiag nga agnanayon iti nasantuan nga imatangna.”
Saan la a naiparana a ti Dios ipalagipna kadatayo ti relasiontayo Kenkuana iti nalabit kaaduan a maulit-ulit iti nasantuan a kasuratan. Kadagiti amin a nagan a mabalin a pakabigbiganna iti kararag ti sakramento, kiniddawna a maawagan iti “Dios, Agnanayon nga Ama.”
No maammuantayo ti pudno a kinasiasinotayo, ad-adda a patientayo a ti naayat a Nailangitan nga Amatayo ket nangipaay iti plano tapno agsublitayo a makipagnaed manen Kenkuana. Insuro ni Elder Patrick Kearon, “Ti napintas a plano ti Amatayo, uray pay ti ‘nakaskasdaaw’ a planona, ket nairanta a mangisubli kadakayo, saan a manglapped kadakayo. … Ti Dios ket awan sarday iti panangsurotna kenka.” Panunotenyo laengen—ti mannakabalin-amin, naayat nga Amatayo ket “awan sarday iti panangsurotna kenka.”
Aniaman ti kasasaadtayo iti danatayo ti kinadisipulo, ti biagtayo ket kangrunaan nga agbalbaliw no ad-adda a maawatantayo ti pudno a kinasiasinotayo. Mangisingasingak iti dua a wagas tapno mabalintayo a paunegen daytoy a pannakaawat.
Umuna, Panagkararag
Idi mangrugin ti Mangisalakan iti mortal a panagministrona, inturong ti Espiritu iti let-ang tapno “makitipon iti Dios.” Nalabit rumbeng a baliwantayo ti pannirigantayo iti panangisao iti kararag laeng iti panangipaay iti umdas a panawen tapno pudno a “makitipon iti Dios” iti inaldaw.
Natakuatak a sumayaat ti kalidad ti panagkararagko no mangbusbosak iti sumagmamano a minuto nga agsagana a makisarita iti Amak. Ipakita kadatayo ti nasantuan a kasuratan a daytoy ket epektibo a pagtuladan. Ni man Joseph Smith; Nephi, ti anak ni Helaman; wenno Enos, aminda ket addaanda iti wagas ti panagutob ken panangyanninaw sakbay ti nairekord a pannakisaritada iti Dios. Kinuna ni Enos a nabisinan ti kararuana bayat a dagiti sasao ti amana immukuok iti kaunggan ti pusona. Mangisuro kadatayo ti tunggal maysa kadagitoy a pagarigan iti kinapateg ti naespirituan a panagsaganatayo para iti inaldaw tapno “makitipon iti Dios.”
Kadagiti Nephite, imbilin ti Mangisalakan, “Inton agkararagkayo, sumrekkayo iti siledyo, ket inton nairikepyon ti ridaw, agkararagkayo ken Amayo.”
Iti man siled wenno kuarto, ti prinsipio ket ti panangsapul iti lugar a mabalinyo ti agmaymaysa nga agkararag, tapno agtalinaed a natalna ti kararuayo, ken mariknayo dagiti pannignay ti “naalumamay a timek.” Makapagsaganatayo babaen ti panangutobtayo kadagiti banag a pagyamanantayo ken dagiti saludsod wenno pakaseknan a kayattayo nga ikararag iti Amatayo. Ikagumaantayo koma a saan a gagangay iti wagas ti panagkararag no di ket makisaritatayo iti Amatayo, iti napigsa no mabalin.
Mabigbigko a kadagiti nariribuk a kasasaad ti biagtayo, no adda dagiti ubbing nga aywanantayo wenno no intayo kadagiti miting, mabalin a di tayo kabaelan ti agtalinaed a naulimek ken agsagana a naimbag—ngem dagita naulimek, napartak, ken kasapulan a kararag ket ad-adda a napnuan kaipapanan no ikagumaantayo ti “makitipon iti Dios” a nasapsapa iti aldaw.
Nalabit adda dagiti nabayagen a saan a nagkararag wenno adda met dagiti saan a nakarikna a mangngeg ti Dios dagiti kararagda. Ikarik kadakayo a ti Nailangitan nga Amayo am-ammonakayo, ay-ayatennakayo, ken kayatnakayo a denggen. Kayatna ti makisarita kadakayo. Kayatna a laglagipenyo no asino kayo.
Nabiit pay nga insuro ni Elder Jeffrey R. Holland: “Uray no kasano ti panagkararagyo, agkararagkayo pay. Nupay kasano ti kinarigat ti panagkararagyo, ad-adda nga agkararagkayo.”
Malaksid iti panangpaadu iti kasansan ken kinapasnek dagiti kararagtayo, ti panangadal iti Libro ni Mormon iti inaldaw ken panagdaydayaw iti templo ti makatulong a mangisagana iti panunottayo para iti paltiing. Bayat nga ikagkagumaantayo a pasayaaten ti pannakisaritatayo iti Nailangitan nga Amatayo, bendisionannatayto tapno ad-adda a mariknatayo nga annaknatayo.
Maikadua, Ammuen a ni Jesus Isu ti Cristo
Ti kaindaklanan a panangipakita ti ayat ti Nailangitan nga Ama kadatayo kas annakna ket ti pudno a panangibaonna iti Anakna, ti bukodtayo a Mangisalakan, tapno matulongannatayo nga agawid. Gapuna, masapul nga isu ket maam-ammotayo.
Adu a tawenen ti napalabas, bayat ti panagserbik kas stake president, idi nangitedak iti rekomendasion iti maysa a kabsat nga agserbi a kas ordinance worker iti templo. Kalpasan ti panangilawlawagko nga agbalinto a nasayaat isuna kas ordinanace worker, diak inggagara a nasagid ti “Do not endorse” nga isu ti nakapatulodan tay rekomendasion. Kalpasan ti di nagballigi a panang-recall-ko iti mensahe, inawagak ti temple president ket kinunak, “Nakaaramidak iti nakaam-amak a biddut.” Awan panagduadua, kinuna daytoy nasayaat a temple president, “President Eyre, awan ti inaramidmo a saan a mapakawan ken mailinteg iti kamaudiananna.” Anian a naindaklan a kinapudno. Pudno, ni Jesucristo ket. “mannakabalin a mangisalakan.”
Idi 2019, adda dakkel a panagbalbaliw kadagiti saludsod iti temple recommend. Iti napalabas, maysa a saludsod a madamag ket no adda pammaneknekyo iti akem ni Jesucristo kas Mangisalakan ken Mannubbot. Saludsodenna itan kadakayo no adda pammaneknekyo iti akemna kas Mangisalakan ken Mannubbotyo. Ti Pannubbot ni Jesucristo ket saan laeng nga epektibo para kadagiti dadduma; epektibo daytoy para kenka ken para kaniak. Isu ti Mangisalakanko. Isu ti Mangisalakanmo. Para iti tunggal maysa. Babaen laeng kenkuana a mabalintayo ti agsubli ken makidenna iti Amatayo.
Gapuna, kakabsat, sapulentayo Isuna. Adalentayo ti nadiosan a relasionna iti Ama ken iti tunggal maysa kadatayo. Padasentayo ti kanta ti manangsubbot nga ayat a personal nga umay iti tunggal maysa kadatayo babaen ti Mannubbottayo bayat ti panagbabawitayo. No maam-ammotayo “Isuna kas mannakabalin a mangisalakan,” maawatantayo a datayo, kas annak ti Dios, ti ragsakna—ti kapatgan a pokusna—ken pudno a tunggal maysa ket maikari a maisalakan.
Paneknekak nga addaantayo iti naayat a Nailangitan nga Ama. Bayat ti pannakaammotayo iti daytoy agnanayon a kinapudno babaen ti nabileg a kararag, personal a paltiing, ken iyaasideg ken ni Jesucristo, mabalintayo itan ken kanayon a situtured nga iwaragawag: “Siak ti anak ti Dios” Iti nagan ni Jesucristo, amen.