Kinasimple nga Adda ken ni Cristo

Tallopulo-ket-tallo a tawenen ti naglabas, naawatko ti awagko nga agserbi kas misionario iti Utah Ogden Mission. Siempre, gapu ta naggapuak idiay Europa, sumagmamano a lokal a tradision ti Utah a kas iti “green Jell-O with carrots” ken “funeral potatoes” ket naidumduma kaniak!

Nupay kasta, dayawek unay iti pasnek ken kinadisipulo ti adu a Santo, ti nakaad-adu a tao a dumardar-ay kadagiti miting ti Simbaan, ken ti kadakkel dagiti programa ti Simbaan a maar-aramid. Idi nalpasen ti misionko, kayatko a masigurado a ti rag-o a nariknak ken ti naespirituan a pigsa ken kinamataengan a napaliiwko ket magun-odto met ti masanguanan a pamiliak. Determinadoak nga agsubli a dagus tapno agbiagak iti “anniniwan dagiti agnanayon a turod.”

Nupay kasta, sabali dagiti plano ti Apo. Iti umuna a Domingo a yaawidko, inayabannak ti masirib a bishopko nga agserbi kas presidente ti Young Men iti ward-mi. Iti panagserbik iti daytoy grupo ti young men, dagus a nasursurok a ti rag-o a bunga ti panagbalin a disipulo ni Cristo ket bassit laeng ti pakainaiganna iti kadakkel dagiti miting ti Simbaan wenno ti kaadu dagiti programa.

Isu nga idi inkallaysak ti napintas nga asawak, ni Margret, nagdesisionkami nga agnaed idiay Europa ken mangpatanor iti pamiliami iti pagilianmi a Germany. Nasaksianmi a dua ti insuro ni Presidente Russell M. Nelson adu a tawenen ti naglabas: “Ti rag-o a mariknatayo ket bassit ti pakainaiganna kadagiti kasasaad ti biagtayo ken ti amin a banag nga aramiden iti pokus ti biagtayo.” No ti pokus ti biagtayo ket ni Cristo ken ti mensahe ti ebangheliona, mapadasantayo dagiti naan-anay a bendision ti kinadisipulo sadinoman ti pagnaedantayo.

Nupay kasta, iti lubong nga agraira ti sekular, komplikado, ken makatikaw, nga agduduma ken masansan nga agsusupadi a mensahe ken kalikagum, kasano a maliklikantayo ti panagbalin a bulsek ken natangken iti panagpuspuso ken agtalinaedda a nakapokus iti “nalawag ken napateg a bambanag” ti ebanghelio ni Jesucristo? Bayat ti panawen ti pannakatikaw, nangted ni Apostol Pablo iti napintas a balakad kadagiti Santo ti Corinto babaen ti panangpalagipna nga agpokusda “iti kinasimple nga adda ken ni Cristo.”

Ti doktrina ni Cristo ken ti linteg ti ebanghelio ket simple unay ta maawatan uray dagiti babassit nga ubbing. Magun-odtayo ti pangsubbot a bileg ni Jesucristo ken maawat ti amin a naespirituan a bendision nga insagana kadatayo ti Nailangitan nga Amatayo babaen ti panangipakita iti pammati ken ni Jesucristo, panagbabawi, panagbuniag, pannakapasanto babaen ti sagut ti Espiritu Santo, ken panagibtur agingga iti panungpalan. Nagpintas unay ti panangiladawan ni Presidente Nelson iti daytoy a panagdaliasat kas ti “dana ti katulagan” ken ti proseso ti panagbalin a “matalek a disipulo ni Jesucristo.”

No simple unay daytoy a mensahe, apay masansan a kasla narigat a suroten ti linteg ni Cristo ken ti pagwadanna? Mabalin a ditay maawatan a maysa a banag a nalaka a maragpat ti kinasimple nga awan ti kagumaan wenno kinapasnek. Ti panangsurot ken Cristo agkasapulan iti kanayon a kagumaan ken agtultuloy a panagbalbaliw. Nasken nga “ikkaten[tayo] ti nailubongan a kinatao ket … [agbalin a kasla bassit] nga ubing.” Iraman daytoy ti “panagtalektayo iti Apo” ken panangbaybay-a iti kinarikut, kas iti aramiden dagiti babassit nga ubbing. Ti panangyaplikar iti doktrina ni Cristo iti napasimple ken naipamaysa a wagas ket matulongannatayo a mangbirok iti rag-o iti inaldaw, matarabaynatayo kadagiti takemtayo, masungbatanna ti dadduma a karikutan a saludsod ti biag, ken mangipaay iti pigsa a mangsango kadagiti karirigatan a karittayo.

Ngem kasanotay a mayaplikar daytoy a simple a wagas iti tungpal biag a panagdaliasattayo kas disipulo ni Cristo? Impalagip ni Presidente Nelson nga agpokustayo iti “natarnaw a kinapudno, natarnaw a doktrina, ken natarnaw a paltiing” bayat nga ikagkagumaantayo a suroten ti Mangisalakan. Ti regular a panagsaludsod nga, “Ania ti kayat ni Apo Jesucristo nga aramidek?” ket ipalgakna ti nauneg a direksion. Ti panangsurot iti pagwadanna ti mangipaay iti natalged a dana iti tiempo ti kinaawan ti kinatalged ken mangipaay iti naayat, manangiwanwan nga ima iti inaldaw. Isu ti Prinsipe ti Kappia ken ti Naimbag a Pastor. Isu ti Manangliwliwa ken Mangisalakantayo. Isu ti Bato ken Pagkamangantayo. Isu ket maysa a Gayyem—ti gayyemmo ken gayyemko. Awisennatayo amin nga ayaten ti Dios, tungpalen dagiti bilinna, ken ayaten ti kaarrubatayo.

No pilientayo a suroten ti pagwadanna ken agtultuloytayo a sipapammati ken Cristo, awatentayo ti bileg ti Pannubbotna, ken laglagipentayo dagiti katulagantayo, mapno ti pusotayo iti ayat, ti namnama ken pannakaagas ti mangitag-ay iti espiritutayo, ken ti kinaulpit ken ladingit ket masukatan iti panagyaman ken anus a manguray kadagiti naikari a bendision. No dadduma, mabalin a nasken nga umadayotayo iti di nasalun-at a situasion wenno agpatulongtayo iti propesional. Ngem iti tunggal kaso, ti panangyaplikar kadagiti simple a pagbatayan ti ebanghelio ti mangtulong kadatayo a mangsango kadagiti karit ti biag iti wagas ti Apo.

No dadduma tagibassitentayo ti pigsa a maawattayo kadagiti simple nga aramid kas iti panagkararag, panagayuno, panagadal iti nasantuan a kasuratan, inaldaw a panagbabawi, linawas a pannakiranud iti sakramento, ken masansan a panagdayaw iti balay ti Apo. Ngem no mabigbigtayo a ditay nasken nga “aramiden ti dadduma a naindaklan a banag” ken agpokustayo iti panangyaplikar iti natarnaw ken simple a doktrina, makitatayo no kasano a “makaaramid iti nakaskasdaaw” ti ebanghelio kadatayo, uray pay kadagiti mapannubok unay a kasasaad. Masarakantayo ti pigsa ken “panagtalek iti imatang ti Dios,” uray no mapasarantayo ti saem. Namin-adu nga impalagip kadatayo ni Elder M. Russell Ballard, “Iti dayta a kinasimple a masarakan[tayo] ti … talna, rag-o, ken ragsak.”

Ti panangyaplikar iti kinasimple nga adda ken ni Cristo ti mangiturong kadatayo a mangyun-una kadagiti tao ngem kadagiti proseso ken kadagiti agnanayon a relasion ngem kadagiti agdama a kababalin. Agpokustayo kadagiti “banag a kapatgan” iti aramid ti Dios iti pannakaisalakan ken pannakaitan-ok imbes a maitalimudoktayo iti panangimaton iti panagserbi. Nawayatayo koma a mangipangpangruna kadagiti banag a kabaelantayo nga aramiden imbes a maburburiborantayo kadagiti banag a ditay kabaelan nga aramiden. Impalagip kadatayo ti Apo: “Gapuna, saankayo koma a mabannog nga agaramid iti nasayaat, ta isagsaganayo ti pamuon ti naindaklan nga aramid. Ket agtaud kadagiti babassit a banag ti naindaklan.” Anian a nabileg a pammaregta nga agtignaytayo iti kinasimple ken kinapakumbaba, aniaman ti kasasaadtayo.

Ni lelangko a Marta Cziesla ket napintas a pagwadan iti panagaramid “iti babassit ken gagangay a bambanag” tapno mapasamak dagiti naindaklan a banag. Siaayat nga inawaganmi iti Oma Cziesla. Inawat ni Oma ti ebanghelio iti bassit a purok ti Selbongen iti Daya a Prussia a kaduana ti lelangko iti tumeng idi Mayo 30, 1926.

Ni Marta Cziesla (kannawan) iti aldaw ti panagbuniagna.

Impategna ti Apo ken ti ebangheliona ket inkeddengna ti agtungpal kadagiti katulagan nga inaramidna. Idi 1930 inkallaysana ni lelongko, a saan a miembro ti Simbaan. Iti daytoy a gundaway saan a makadar-ay ni Oma kadagiti miting ti Simbaan gapu ta adayo ti bangkag ni lelongko manipud iti kaasitgan a kongregasion. Ngem impamaysana no ania ti maaramidna. Intultuloy ni Oma ti nagkararag, nagbasa kadagiti nasantuan a kasuratan, ken nagkanta kadagiti musika ti Zion.

Mabalin nga impagarup ti dadduma a tao a saanen nga aktibo iti pammatina, ngem adayo dayta iti kinapudno. Idi nayanak da ikitko ken tatangko, awan ti priesthood iti pagtaengan ken awan dagiti miting ti Simbaan wenno pannakagun-od kadagiti ordinansa iti asideg, inaramidna manen ti kabaelanna nga aramiden ket impamaysana ti nangisuro kadagiti annakna “nga agkararag, ken magna a sililinteg iti imatang ti Apo.” Imbasaanna ida kadagiti nasantuan a kasuratan, nakipagkanta kadakuada iti kankanta ti Zion, ken siempre nakipagkararag kadakuada—iti inaldaw. Maysa a 100 a porsiento a padas iti Simbaan a naisentro iti pagtaengan.

Idi 1945, agserserbi idi ni lelongko iti gubat nga adayo iti pagtaengan. Idi umas-asideg dagiti kabusor iti bangkagda, innala ni Oma ti dua a babassit nga annakna ket pinanawanda ti bangkagda tapno agkamangda iti nataltalged a lugar. Kalpasan ti narigat ken napeggad a panagdaliasatda, nakasarakda iti pagkamangan idi Mayo ti 1945 iti amianan ti Germany. Awan ti naitugotda malaksid kadagiti kawes iti bagida. Ngem intuloy ni Oma ti kabaelanna nga aramiden: nakipagkararag kadagiti annakna—iti inaldaw. Nakipagkanta kadakuada iti kankanta ti Zion a kabesadona—iti inaldaw.

Narigat unay ti biag, ket iti uneg ti adu a tawen, nagpokus iti panangpennek laeng nga adda taraon iti lamisaan. Ngem idi 1955 ni tatangko, nga agtawen idi iti 17, napan iti trade school iti siudad ti Rendsburg. Nagna iti igid ti maysa a pasdek ket nakitana ti bassit a karatula iti ruar a nakaisuratan iti “Kirche Jesu Christi der Heiligen der Letzten Tage”—“Ti Simbaan ni Jesucristo Dagiti Santo iti Ud-udina nga Aldaw.” Napanunotna, “Makaay-ayo dayta; daytoy ti simbaan ni Nanang.” Isu nga idi nagawid, imbagana ken ni Oma a nasarakanna ti simbaanna.

Mailadawanyo la ketdi ti nariknana kalpasan ti dandani 25 a tawen nga awan kontakna iti Simbaan. Inkeddengna ti dumar-ay iti sumaruno a Domingo ket naawisna ni tatangko a kumuyog kenkuana. Nasurok a 20 a milia (32 km) ti kaadayo ti Rendsburg manipud iti bassit a purok a pagnaedanda. Ngem saan a dayta ti manglapped ken ni Oma a mapan iti simbaan. Iti simmaruno a Domingo, nagbisikletada a kaduada ni tatangko a napan iti simbaan.

Idi nangrugi ti miting ti sakramento, nagtugaw ni tatangko iti likud, a mangnamnama a malpas koman a dagus . Daytoy ti simbaan ni Oma ken saan a ti simbaanna. Saan unay a makaparegta ti nakitana: sumagmamano laeng a nataengan a babbai ti dimmar-ay ken dua nga agtutubo a misionario a nangidaulo iti miting. Ngem kalpasanna rinugianda ti nagkanta, ket kinantada dagiti musika ti Zion a nangngeg ni tatangko sipud pay idi ubing: “Come, Come, Ye Saints,” “O My Father,” “Praise to the Man.” Ti pannakangngegna iti daytoy bassit nga arban a mangkankanta kadagiti kanta ti Zion nga ammona sipud iti kinaubingna ti nangsagid iti pusona, ket ammona a dagus ken awan duadua a pudno ti Simbaan.

Ti immuna a miting ti sakramento a dinar-ayan ni lelangko kalpasan ti 25 a tawen ket ti miting a personal a nakagun-odan ni tatangko iti pammaneknek iti kinapudno ti naisubli nga ebanghelio ni Jesucristo. Nabuniagan isuna tallo a lawas kalpasanna, idi Septiembre 25, 1955, a kaduana da lelongko ken ikitko.

Nasurok a 70 a tawenen sipud iti dayta a bassit a miting ti sakramento idiay Rendsburg. Masansan a panunotek ni Oma, no kasano ti nariknana kadagidi a naliday a rabii, nga ar-aramidenna dagiti babassit ken gagangay a bambanag a nabaelanna, kas iti panagkararag, panagbasa, ken panagkanta. Agtakderak ditoy ita iti sapasap a komperensia ken saritaek ti maipapan ken ni Omak, ti determinasionna nga agtungpal iti katulaganna ken agtalek iti Apo iti baet dagiti rigatna ket mangpunno iti pusok iti kinapakumbaba ken panagyaman—saan la a para kenkuana ngem para iti adu a nasingpet a Santotayo iti intero a lubong nga agpokus iti kinasimple nga adda ken Cristo iti mapannubok a kasasaadda, nalabit a bassit laeng ti makitada a panagbalbaliw ita ngem agtaltalekda a mapasamakto ti naindaklan a bambanag iti masakbayan.

Nasursurok babaen ti bukodko a padas a dagiti babassit ken gagangay a banag ti ebanghelio ken sipupudno a panangipokus ken Cristo ket iturongdatayo iti pudno a rag-o, mangyegda iti nabileg a milagro, ken ipaayandatayo iti panagtalek a mapasamakto amin a naikari a bendision. Pudno daytoy para kadakayo kasta met kaniak. Iti balikas ni Elder Jeffrey R. Holland, “Adda dagiti bendision nga umay a nasapa, adda dagiti umay a naladaw, ken adda dagiti saan nga umay agingga iti langit; ngem para kadagiti mangawat iti ebanghelio ni Jesucristo, umay dagitoy Paneknekak met daytoy iti nagan ni Jesucristo, amen.