Pananglaglagip kadagiti Karnero

Ni Cristo ti Naimbag a Pastor. Napateg Kenkuana ti tunggal maysa iti arban. Imapakitana ti pagwadan iti panagpastor ket insurona babaen iti sao ken aramid dagiti galad ti naimbag a pastor, a pakairamanan ti panangammo iti nagan dagiti karneroyo, panangayat kadakuada, panangbirok kadagiti napukaw, panangpakan, ken, panangiturong kadakuada nga agsubli. Namnamaenna nga aramidentayo met dayta kas katulonganna a pastor.

Adu ti masursurotayo maipapan iti ministering iti wagas ti Apo manipud iti nagkauna a propeta—ken naisangsangayan a pastor—a ni Moroni. Nagbiag bayat iti narigat unay a panawen, nga awan ti selpon, kompiuter, ken internet. Ngem nabalinanna a naam-ammo dagiti karnero. Kasano a naaramidna daytoy? Makitatayo ti pamay-anna iti Moroni 6. Mabasatayo sadiay a dagiti miembro “ket naibilangda kadagiti kameng ti simbaan ni Cristo; ket naala ti nagnaganda, tapno malaglagipda ken mataraonanda kadagiti nasayaat a balikas ti Dios, tapno maiturongda iti umno a dalan. … Ti Simbaan ket naggigimongda a masansan, tapno agayunoda ken agkararag, ken makapagsao maipapan iti pagimbagan ti kararuada” (Moroni 6:4–5; nainayon ti panangyunay-unay).

Para ken ni Moroni, ti amin ket maipapan kadagiti tao—dagiti nagan! Inyaplikarna ti prinsipio ti panagbilang ken panangam-ammo tapno malaglagip ti amin . Mabigbig ti asinoman a marigatan wenno agalla-alla, a mangipalubos a pagsasaritaan dagiti Santo ti pagimbaganda kadagiti konseho. Kas iti pastor a nangpanaw iti siam a pulo ket siam (siguradoak a natalged ken natalingenngenda) ti nangsapul iti maysa a napukaw, (kitaen iti Lucas 15:4–7), naidawat nga agbalintayo met a sipapanunot iti arbantayo—a mangbigbig ken manglaglagip ken aramiden ti kasta met.

Kas maysa a lider ti mision iti India, malagipko a dinamagko iti agkabannuag a branch president iti sumagmamano a panggepna iti sumaruno a tawen: “Mano a lallaki ti isaganam a mangawat iti Melchizedek Priesthood?” Ti dagus a sungbatna ket “Pito!”

Pinampanunotko no sadino ti nakaalaanna iti dayta nga espesipiko unay a numero! Sakbay a makasungbatak, nangiruar iti maysa a papel a nanumeruan iti maysa agingga iti pito a naisurat iti sikigan. Dagiti umuna a lima a linia ket addaan iti nagnagan—dagiti pudno a tao a mapan awisen ken paregtaen ti korum dagiti elderna tapno maaddaanda iti bendision ti priesthood iti biagda. Siempre, masapul a damagek dagiti awan linaonna a linia nga innem ken pito. “Oh, President,” kinunana, a sipapakumbaba nga agwingwingiwing, “sigurado a buniaganminto ti di kumurang a dua a lallaki iti umuna a paset ti tawen a maitedto kadakuada ti priesthood iti ngudo ti tawen.” Naawatan daytoy a nalaing a lider ti prinsipio ti panagbilang ken panangam-ammo.

Inorganisar ni Cristo ti Simbaanna tapno iti kasta narigat a malipatan ti maysa a kararua, ta tunggal maysa ket ipatpategna. Tunggal indibidual iti ward, aniaman ti edad wenno genderna, ket addaan iti adu a manangaywan—dagiti pastor—a naikkan iti annongen a mangaywan kadakuada, a manglaglagip kadakuada. Kas pagarigan, ti maysa nga agtutubo a lalaki ket adda naituding a mangaywan kenkuana a bishopric, ministering brothers, adult youth advisers, seminary teachers, quorum presidencies, ken dadduma pay—nga ti amin agserserbi kas safety nets, a naitali a sititibker a mangsippaw no ti agtutubo ket matnag. Uray no maysa laeng nga iket (net) ti umiso ti posisionna, dayta nga agtutubo a lalaki ket natalged, mabigbig, ken malaglagipto. Ngem masansan a mabirokantayo nga awan ti iket (net) iti umiso a posisionna. Agpagnapagna dagiti tao iti angep—ket awan ti makadlaw. Kasano a makapagbalintayo a nasaysayaat a pastor? Masursurotayo ti agbilang ken mangammo.

Ited kadatayo ti Simbaan dagiti report ken ramit tapno maaramidtayo dayta—tapno malaglagiptayo. Ti Quarterly a Report ti maysa a kangrunaan a pagarigan. Makatulong daytoy kadatayo a mangbilang ken mangammo iti tunggal miembro iti mamin-adu a daras ken mabigbigtayo dagidiay nayaw-awan wenno agkasapulan iti tulong ken ayattayo. Ti Action and Interview List ti mangbigbig kadagiti agkasapulan iti atensiontayo ita, kas met laeng iti Temple Recommend Status report ken dadduma pay. Dagitoy a ramit iti panagbilang ken panangam-ammo ti mangipokus kadatayo kadagiti tao. Siasino ti agkasapulan iti calling, priesthood advancement, wenno tulong a maipan ti nagan ti pamilia iti templo? Siasino ti matulongantayo nga agsagana para iti full-time mission? Siasino ti awan iti daytoy a bulan? Tulongandatayo dagitoy a ramit a manglaglagip kadagiti tao.

Adda am-ammok a pamilia manipud iti Estados Unidos a naikkan iti assignment idiay Africa. Iti umuna a Domingoda, simrekda iti kakaisuna a yunit ti Simbaan iti pagilian, a sigagagar a kinablaawan ida dagiti tao. Iti ngudo ti bigat, naawagan ti asawa ti lalaki kas presidente ti Relief Society ken isu kas lider ti Young Men! Dinamagna iti nabannog ti langana a branch president no mano ti adda nga agtutubo a lallaki. Daytoy napudno, umuna a henerasion a lider, intudona ti likudan ti sacrament hall ket kinunana, “Dagidiay dua dita.” Gapu iti panagduadua ti lalaki, inyawidna ti branch roster home, a dagus a nadlawna nga agpayso nga adda 20 nga agtutubo a lallaki iti listaan. Nagsubli iti branch president ket kiniddawna ti dua nga aktibo, bilingual a young adult kas counselor-na ket nakisarita kadakuada ken dagiti dua a barito tapno irebyuda dagiti nagan.

Kalpasanna, nangrugi nga agtrabaho dagitoy a nagaget nga agtutubo. Iti simmaganad a sumagmamano a bulan, nasarakanda ti tunggal lalaki a nailista. Tunggal maysa, dagidiay a napukaw a karnero ket inawat manen dagiti kapatadada ken nataraonanda iti naespirituan ken pisikal! Iti las-ud ti makatawen, iti aniaman a Domingo, adda gagangay a bilang a 21 a young men ti dumardar-ay. Agyamanak iti Dios ta adda dagiti young men a nagbilang ken nangammo.

Maysa a gayyemko, kas maysa nga estudiante a nagturpos, ti immakar ken ti pamiliana iti dakkel a siudad ti America tapno ituloyna ti panagadalna. Naawagan a dagus isuna a mangidaulo iti korum dagiti elder. Medio madandanagan iti umuna nga interbiuna iti stake president, determinado a mapan a nakasagana. Imbagana iti stake president nga adda tallo a panggepna para iti umay a tawen: (1) 90 porsiento a ministering, (2) maysa a napnuan kaipapanan nga adalen ti ebanghelio iti kada lawas, ken (3) naplano nga aktibidad ti korum iti kada bulan.

Immisem iti gayyemko, ket daytoy a masirib a stake president dinamagna, “Mabalinmo kadi a dakamaten ti maysa a di aktibo a miembro ti korum a mabalinmo a tulongan a mapan iti templo kaduana ti pamiliana ita a tawen?” Naklaat ti gayyemko iti dayta a saludsod. Nagpanunot a naimbag ket nakapanunot iti nagan. “Isuratmo dayta,” imbilin ti stake president. Kalpasanna, dinamag daytoy nga aduan padas a lider iti isu met lang a saludsod iti namitlo pay—ket nalpasen ti interbiu. Rimmuar daytoy a barito iti dayta nga interbiu a nasursurona ti maysa a kaindaklan a leksionna maipapan iti panangidaulo ken ministering. Napan iti interbiu nga addaan kadagiti programa, adalen, ken aktibidad. Rimmuar nga addaan kadagiti nagan! Dagidiay nga uppat a nagan ti nagbalin a kangrunaan a pokus ti panagserbina ken ti korumna.

Kas maysa a lider ti mision, binisitak ti maysa kadagiti branch iti maysa a bigat ti Domingo. Napaliiwko a kanayon a mangiruar ti branch president iti maysa a kard iti bulsana ket agsurat iti dayta. Inkeddengko a dinamag kenkuana ti maipapan iti dayta kalpasan ti pangrikep a kararag. Idi nalpas ti miting, ken sakbay a makasaludsodak maipapan iti kard, nagdardaras a napan iti podium ti branch mission leader, a sadiay a naited kenkuana ti papel. Dagus a sinurotko daytoy naregta a branch mission leader iti linawas a branch missionary coordination meeting-na. Sakbay a nangrugida, inruarna ti papel manipud iti bulsana. Napno daytoy kadagiti nagan dagiti miembro a di dimmar-ay iti miting ti sakramento. Iti las-ud ti sumagmamano a minuto, nangpili ti tunggal miembro ti konseho iti maysa wenno dua a nagan, a nagkumit a bisitaenna ida iti dayta met la nga aldaw tapno masiguradona nga OK-da ken ibagana a nailiw kadakuada. Ita dayta ti panagbilang ken panangam-ammo.

Malagipko ti maysa a district, nga adayo manipud iti kaasitgan a templo, a ti panangtaginayon iti current recommend ti kangrunaan a prioridad, nupay mabalin a saan a pulos a mausar dayta. Iti umuna a Domingo ti tunggal bulan, usaren dagiti lider ti counting tools a pangammuanda kadagiti na-endow a miembroda. No maammuanda a dandanin agpaso ti maysa a recommend, mangiskediul iti maysa nga interbiu iti panagpabaro ti executive secretary. Mapagsasaritaan dagiti tao nga addaan kadagiti nagpaso a recommend, kalpasanna matulonganda nga agsubli iti dana ti katulagan. Dinamagko no mano kadagiti endowed member-da ti addaan iti current recommend. Ti sungbat ket nakaskasdaaw a 98.6 a porsiento. Idi napagsaludsodan maipapan kadagiti innem a nagpaso ti recommend-da, nabigbig dagiti lider ti naganda ken inladawanda kaniak ti panagregget a maar-aramid tapno makasublida!

Sumagmamano a tawenen ti napalabas, nagsubli ti pamiliak iti Estados Unidos. Maragsakankami a dumar-ay iti simbaan ditoy kalpasan ti 26 a nakaskasdaaw a tawen kadagiti babassit, naiputputong a yunit. Naawaganak kas ward missionary. Nagsayaat ti ward mission leader-mi ken agar-aramidkami kadagiti makapagagar a banag ken mangisursuro iti nagsasayaat a tattao. Kiniddawko a dumar-ayak iti miting ti konseho ti ward tapno paliiwen ken magun-od ti tulongda para kadagiti gagayyem a bisbisitaenmi. Nasdaawak idi a ti laeng napagsasaritaan ket ti sumaruno nga aktibidad iti ward. Inasitgak ti ward mission leader kalpasanna imbagak a saan a naaddaan iti gundaway tapno agreport maipapan kadagiti taomi. Ti sungbatna? “Oh, diak pulos agrep-report.”

Indiligko dayta iti branch council meeting idiay Lahore, Pakistan, a dinar-ayak sumagmamano a lawas sakbayna. Nagtugaw daytoy bassit a grupo iti aglawlaw ti bassit a lamisaan, ket dagiti laeng tao ti napagsasaritaanda. Dagiti Nagan. Inreport ti tunggal lider ti panangaywanda ken dagiti indibidual ken pamilia a pakaseknanda. Naaddaanda amin iti gundaway a manginayon kadagiti kapanunotanda a kasayaatan a wagas tapno mabendisionanda dagiti napagsasaritaanda. Naaramid dagiti plano ken naited dagiti annongen. Anian a nagsayaat a leksion iti panagbilang ken panangammo iti kada nagan manipud kadagiti kabsattayo iti umuna a henerasion.

Iti Simbaan ni Jesucristo, inbilin kadatayo dagiti propeta iti napalabas ken ita—ken babaen ti pagtuladan nga inted ti Mangisalakantayo—no kasano ti agminister. Alaentayo dagiti nagan, laglagipentayo, ken agbibinnalakadtayo para iti pagimbagan dagiti kararua. Dagiti lider nga agar-aramid iti daytoy ket dida pulos maibusan iti aytem iti adyenda iti mitingda iti konseho! Ti prinsipio ti panagbilang ken panangam-ammo ket epektibo. Daytoy ti wagas ti Apo. Nasaysayaat pay ti maaramidantayo. Para iti Dios, a nangparsua iti uniberso ken mangituray iti amin, daytoy nga aramid—Isu ti aramid ken gloriana—ket personal unay. Kasta koma met iti tunggal maysa kadatayo, kas instrumento iti im-imana iti nakaskasdaaw nga aramidna iti pannakaisalakan ken pannakaitan-ok. Agbanagto dagiti milagro iti biag dagiti pudno a tattao. Iti nagan ni Jesucristo, amen.